ಫ್ರೆಂಚ್‌ ಥೀಮ್‌ ಪಾರ್ಕ್‌: ಕಸ ಆಯ್ದು, ಕುರುಕಲು ತಿಂಡಿ ಪಡೆಯುವುದೇ ಇಲ್ಲಿನ ಕಾಗೆಗಳ ಕೆಲಸ!
ಪಾಸಿಟಿವ್

ಫ್ರೆಂಚ್‌ ಥೀಮ್‌ ಪಾರ್ಕ್‌: ಕಸ ಆಯ್ದು, ಕುರುಕಲು ತಿಂಡಿ ಪಡೆಯುವುದೇ ಇಲ್ಲಿನ ಕಾಗೆಗಳ ಕೆಲಸ!

ಈ ಪಾರ್ಕ್‌ನಲ್ಲಿ 6 ಕಾಗೆಗಳ ತಂಡವೊಂದಿದೆ. ದಿನ  ಬೆಳಗ್ಗೆ ಕಸ ಆಯ್ದು ತಂದು ಕಸದ ಬುಟ್ಟಿಗೆ ಹಾಕಿ ತಿಂಡಿ ಪಡೆಯುವುದೇ ಈ ಕಾಗೆಗಳ ದಿನನಿತ್ಯದ ಕೆಲಸ.

ಈ ಪಾರ್ಕ್‌ನಲ್ಲಿ ಕಸ ಆಯುವ ಕೆಲಸ ತರಬೇತಿ ಪಡೆದ ಕಾಗೆಗಳ ತಂಡದ್ದು. ಕಾಗೆಗಳು ಸುತ್ತ ಮುತ್ತ ಬಿದ್ದ ಸಿಗರೇಟಿನ ತುಂಡು, ಚಾಕಲೇಟ್‌ ಕವರ್‌ ಇನ್ನಿತ್ಯಾದಿ ಚಿಕ್ಕ ಪುಟ್ಟ ಕಸವನ್ನು ಆಯ್ದು ಕಸದ ಬುಟ್ಟಿಗೆ ಹಾಕುತ್ತವೆ. ಕಾಗೆಗಳು ತಮ್ಮ ಈ ಕೆಲಸದಿಂದ ಜನ ಒಂದೆಡೆ ಖುಷಿಯನ್ನು, ಮತ್ತೊಂದೆಡೆ ನಾಚಿಕೆಯನ್ನೂ ಅನುಭವಿಸುವಂತೆ ಮಾಡಿವೆ.

ಏಷ್ಯಾ, ಸ್ಕ್ಯಾಂಡಿನೇವಿಯಾ ಮತ್ತು ಯುರೋಪ್‌ ಖಂಡಗಳಲ್ಲಿ ಕಾಣಸಿಗುವ , ‘ರೂಕ್’ ಹೆಸರಿನ ಕಾಗೆ ಜಾತಿಯ 6 ಪಕ್ಷಿಗಳು ಈಗ ಫ್ರಾನ್ಸ್‌ನ ‘ಪುಯ್‌ ಡು ಫೌ’ ಹೆಸರಿನ ಉದ್ಯಾನವನದಲ್ಲಿ ಕಸ ಆಯುವ ಕೆಲಸದಲ್ಲಿ ನಿರತವಾಗಿವೆ. ಅದಕ್ಕಾಗಿಯೇ ಈ ಕಾಗೆಗಳಿಗೆ ತರಬೇತಿಯನ್ನೂ ಕೂಡ ನೀಡಲಾಗಿದೆ. ಇತಿಹಾಸವನ್ನು ಪ್ರತಿಬಿಂಬಿಸುವ, ಹಳ್ಳಿ ಸೊಬಗನ್ನು ತುಂಬಿಕೊಡುವ ಮತ್ತು ಹಲವಾರು ಕಾರ್ಯಕ್ರಮಗಳು ನಡೆಯುವ ಈ ‘ಪುಯ್‌ ಡು ಫೌ’ ಉದ್ಯಾನವನ್ನು ಸ್ವಚ್ಚವಾಗಿಡಲು ಕಾಗೆಗಳು ನಿರಂತರವಾಗಿ ಶ್ರಮಿಸುತ್ತಿವೆ.

ಈ ಕಸ ಆಯುವ ವಾಯು ಸೇನೆಗೆ ತರಬೇತಿ ನೀಡಿ, ಕೌಶಲ್ಯವನ್ನು ತುಂಬಿರುವುದು ಕ್ರಿಸ್ಟೋಫೆ ಗ್ಯಾಬೊರಿಟ್‌ ಎಂಬ ವ್ಯಕ್ತಿ. ಈತ ಒಬ್ಬ ಗಿಡುಗಗಳ ಸಾಕಣೆದಾರ ಮತ್ತು ಪಾರ್ಕ್‌ನಲ್ಲಿರುವ ಗಿಡುಗಗಳ ಅಕಾಡೆಮಿಯ ಪ್ರಾಜೆಕ್ಟ್‌ ಮ್ಯಾನೇಜರ್. ಗಿಡುಗಗಳ ಸಂತತಿಯನ್ನು ಅಭಿವೃದ್ಧಿ ಪಡಿಸುವುದರ ಜತೆಗೆ ಕಾಗೆಗಳಿಗೆ ಪಾಠ ಹೇಳಿಕೊಟ್ಟು ಕಸ ಆಯುವ ಕೆಲಸದಲ್ಲಿ ತೊಡಗಿಸಿದ್ದಾನೆ.

ಫ್ರೆಂಚ್‌ ಥೀಮ್‌ ಪಾರ್ಕ್‌: ಕಸ ಆಯ್ದು, ಕುರುಕಲು ತಿಂಡಿ ಪಡೆಯುವುದೇ ಇಲ್ಲಿನ ಕಾಗೆಗಳ ಕೆಲಸ!

ಗ್ಯಾಬೊರಿಟ್‌ಗೆ ಕಾಗೆಗಳನ್ನು ಪಳಗಿಸುವ ಮನಸ್ಸಾಗಿದ್ದು ಸುಮಾರು 20 ವರ್ಷಗಳ ಹಿಂದೆ. ಅಂದೆಂದೋ ಒಮ್ಮೆ ಗ್ಯಾಬೋರಿಟ್‌ ಕಾಡಿನಲ್ಲಿದ್ದ ಕೆಲವು ರಾವೆನ್‌ ಎಂಬ ಜಾತಿಯ ಕಾಗೆಗಳು ನೆಲದ ಮೇಲೆ ಬಿದ್ದಿದ್ದ ಎಲೆ ಕಡ್ಡಿಗಳನ್ನು ಆಯುತ್ತಿದ್ದನ್ನು ಕಂಡಿದ್ದ. ಇದರಿಂದ ಪ್ರಭಾವಿತನಾದ ಗ್ಯಾಬೊರಿಟ್‌, ಅಂದಿನಿಂದ ಕಾಗೆಗಳಿಗೆ ಕೆಲಸ ಕಲಿಸುವ ಕಾರ್ಯದಲ್ಲಿ ನಿರತನಾಗಿದ್ದ. ಗ್ಯಾಬೊರಿಟ್‌ ಮಾಡಿದ ಕೆಲಸವೆಂದರೆ ತರಗೆಲೆ, ಕಡ್ಡಿ ಇತ್ಯಾದಿಗಳನ್ನು ಆಯುತ್ತಿದ್ದ ಕಾಗೆಗಳು ಮನುಷ್ಯ ಉತ್ಪಾದಿಸಿದ ತಾಜ್ಯವನ್ನು ಆಯುವಂತೆ ಮಾಡಿದ್ದು. ಅದರೆ ಅದು ಅಷ್ಟು ಸುಲಭದ ಕೆಲಸವೇನೂ ಆಗಿರಲಿಲ್ಲ. ಅದಕ್ಕಾಗಿ ಗ್ಯಾಬೊರಿಟ್‌ಗೆ ಹಲವಾರು ವರ್ಷ ಸಮಯ ಹಿಡಿದಿತ್ತು.

ಕ್ರಿಸ್ಟೊಫೆ ಗ್ಯಾಬೊರಿಟ್‌ನ ಮೊದಲ ಕಸ ಆಯುವ ವಾಯು ಸೇನೆ ಸಿದ್ಧವಾಗಿದ್ದು 2001ರ ಅಸುಪಾಸಿನಲ್ಲಿ. ಕಾಗೆಗಳಿಗೆ ತರಬೇತಿ ನೀಡಲೆಂದೇ ಗ್ಯಾಬೊರಿಟ್‌ ವಿಶೇಷವಾದ ಕಸದ ಬುಟ್ಟಿಯೊಂದನ್ನು ಸಿದ್ಧಪಡಿಸಿದ್ದ. ಕಾಗೆಗಳು ಕಸವನ್ನು ತಂದು ಮೇಲಿನ ಒಂದು ಜಾಗಕ್ಕೆ ಹಾಕಿದರೆ ಮತ್ತೊಂದು ಜಾಗದಲ್ಲಿ ಕಾಗೆಗಳಿಗೆ ಪ್ರಿಯವೆನಿಸುವ ರುಚಿಕರ ತಿಂಡಿಯ ಚೂರುಗಳು ಸಿಗುವಂತೆ ಆ ಕಸದ ಬುಟ್ಟಿಯನ್ನು ವಿನ್ಯಾಸ ಮಾಡಲಾಗಿತ್ತು.

ಒಂದು ಬಾರಿ, ಎರಡು ಬಾರಿ ಕಸವನ್ನು ಆಯ್ದು ತಂದು ಇದರೊಳಗೆ ಹಾಕಿ ತಿಂಡಿಯ ಭಕ್ಷೀಸು ಪಡೆದ ಕಾಗೆಗಳಿಗೆ ಇದೇ ಅಭ್ಯಾಸವಾಗುತ್ತಾ ಹೋಯಿತು. ಕಸ ತಂದು ಹಾಕಿ ತಿಂಡಿ ಪಡೆಯುವುದೇ ಕಾಗೆಗಳ ದಿನನಿತ್ಯದ ಕೆಲಸವಾಯಿತು. ಈಗ ಕಸ ಆಯುವುದು ಈ ಕಾಗೆಗಳ ಜೀವನದ ಭಾಗದಂತಾಗಿದೆ. ಕೆಲವೊಮ್ಮೆ ಸರಿಯಾಗಿ ಕೆಲಸ ಮಾಡದ ಕಾಗೆಗಳು ಕಸದ ಬದಲು ಕಡ್ಡಿ, ಮರದ ತುಂಡುಗಳನ್ನು ತಂದು ಹಾಕಿ, ತಿಂಡಿ ಪಡೆಯುತ್ತವೆ.

ಫ್ರೆಂಚ್‌ ಥೀಮ್‌ ಪಾರ್ಕ್‌: ಕಸ ಆಯ್ದು, ಕುರುಕಲು ತಿಂಡಿ ಪಡೆಯುವುದೇ ಇಲ್ಲಿನ ಕಾಗೆಗಳ ಕೆಲಸ!

ಕಾಗೆಗಳು ಕಸ ಆಯುತ್ತಿವೆ ಎನ್ನುವುದೇನೋ ನಿಜ. ಆದರೆ ಇಡೀ ‘ಪುಯ್‌ ಡು ಫೌ’ ಉದ್ಯಾನವನ್ನು ಸ್ವಚ್ಛವಾಗಿಡುವ ತ್ರಾಣ ಈ ಕಾಗೆಗಳಿಗಿಲ್ಲ. ಎಲ್ಲಾ ಕಾಗೆಗಳನ್ನು ಪಳಗಿಸಿ, ಅವುಗಳಿಂದ ಕಸ ಸಂಗ್ರಹಿಸಿ ತಿಂಡಿ ನೀಡಲು ಸಾಧ್ಯವಿಲ್ಲ. ಆಮೇಲೆ ಕಾಗೆಗಳು ಊರೊಳಗಿನ ಕಸವನ್ನೆಲ್ಲಾ ತಂದು ಸುರಿಯುವ ಅಪಾಯವುಂಟು. ಸಧ್ಯಕ್ಕೆ ಕಾಗೆಗಳಿಂದ ಕಸ ಆಯಿಸಿ ತಿಂಡಿ ಕೊಡುತ್ತಿರುವುದರಿಂದ ಆಗುತ್ತಿರುವ ಲಾಭ ದೊಡ್ಡದೇನಿಲ್ಲ. ಆದರೆ ಕಾಗೆಗಳು ಕಸ ಆಯುವುದನ್ನು ಕಂಡಾದರೂ ಜನ ಕಸದ ಬುಟ್ಟಿಗಳಿಗೆ ಕಸ ಹಾಕುವ ಬುದ್ದಿ ಕಲಿಯುತ್ತಾರೇನೋ ಎಂಬ ನಿರೀಕ್ಷೆಯಿಂದ ಕಾಗೆಗಳಿಗೆ ತಿಂಡಿಯ ಆಮಿಶವನ್ನು ಒಡ್ಡಿ ಗ್ಯಾಬೋರಿಟ್‌ ಕಸ ಆಯಿಸುತ್ತಿದ್ದಾರೆ.