‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!
ಪಾಸಿಟಿವ್

‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!

ಪಾಕಿಸ್ತಾನದಲ್ಲಿ ಹಿಂದೆ ಚಲಾವಣೆಯಲ್ಲಿದ್ದ ಕರೆನ್ಸಿ ನೋಟುಗಳ ಹಿಂಭಾಗದಲ್ಲಿ ಭಾರತದ 7 ಸ್ಥಳೀಯ ಭಾಷೆಗಳಲ್ಲಿ ನೋಟಿನ ಮೌಲ್ಯವನ್ನು ಬರೆಯಲಾಗುತ್ತಿತ್ತು. ಆ 7 ಭಾಷೆಗಳಲ್ಲಿ ಕನ್ನಡವೂ ಒಂದು.

ಬ್ರಿಟಿಷ್‌ ಆಳ್ವಿಕೆಯಿಂದ ಮುಕ್ತಗೊಂಡು ಭಾರತ ಮತ್ತು ಪಾಕಿಸ್ತಾನಗಳು ಸ್ವತಂತ್ರ ದೇಶಗಳಾದಾಗ ಪಾಕಿಸ್ತಾನಕ್ಕೆ ಅಗತ್ಯವಿದ್ದ ಕರೆನ್ಸಿಯನ್ನು ಭಾರತ ಮುದ್ರಿಸುತ್ತಿತ್ತು. ಪಾಕಿಸ್ತಾನ ಸ್ವತಂತ್ರಗೊಂಡು 4 ವರ್ಷ ಕಳೆಯುವವರೆಗೂ ಪಾಕಿಸ್ತಾನಿ ಪ್ರಜೆಗಳು ಭಾರತದಲ್ಲಿ ಮುದ್ರಣಗೊಂಡ ನೋಟುಗಳನ್ನು ಬಳಸುತ್ತಿದ್ದರು.

1947ರಲ್ಲಿ ಭಾರತ ಪಾಕಿಸ್ತಾನ ಬೇರೆ ಬೇರೆ ಸ್ವತಂತ್ರ ರಾಷ್ಟ್ರಗಳಾಗಿ ರೂಪುಗೊಂಡವು. ಆ ಸಮಯದಲ್ಲಿ ಪಾಕಿಸ್ತಾನಕ್ಕೆ ತನ್ನದೇ ಆದ ಪ್ರತ್ಯೇಕ ರಾಷ್ಟ್ರೀಕೃತ ಬ್ಯಾಂಕ್‌ ಇರಲಿಲ್ಲ. ಪಾಕಿಸ್ತಾನದ ಆರ್ಥಿಕತೆಯನ್ನು ಸ್ವಲ್ಪ ದಿನಗಳ ಕಾಲ ಎಳೆದೊಯ್ಯುವ ಜವಾಬ್ದಾರಿಯನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌ ವಹಿಸಿಕೊಂಡಿತ್ತು.

ಅದಾಗ ತಾನೇ ರೂಪುಗೊಂಡ ಹೊಸ ರಾಷ್ಟ್ರಕ್ಕೆ ತನ್ನನ್ನು ತಾನು ಕಟ್ಟಿ ನಿಲ್ಲಿಸಿಕೊಳ್ಳುವ ಚೈತನ್ಯ ಇರಲಿಲ್ಲ. ತನ್ನದೇ ಸ್ವಂತ ಕರೆನ್ಸಿಯನ್ನು ರೂಪಿಸಿಕೊಂಡು, ಚಲಾವಣೆಗೆ ತರುವಷ್ಟು ಶಕ್ತಿ ಇರಲಿಲ್ಲ. ಆದ್ದರಿಂದ ಪಾಕಿಸ್ತಾನದಲ್ಲಿ ಪ್ರತ್ಯೇಕ ಬ್ಯಾಂಕ್‌ ಸ್ಥಾಪನೆಯಾಗಿ ಆರ್ಥಿಕ ನಿರ್ವಹಣೆಯ ಹೊರೆ ಹೊತ್ತುಕೊಳ್ಳಲು ಸಾಧ್ಯವಾಗುವವರೆಗೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಪಾಕಿಸ್ತಾನದ ಆರ್ಥಿಕತೆಯ ಜವಾಬ್ದಾರಿಯನ್ನು ಹೊತ್ತುಕೊಂಡಿತ್ತು. ‘ಮಾನೆಟರಿ ಸಿಸ್ಟಮ್‌ ಅಂಡ್‌ ರಿಸೆರ್ವ್‌ ಬ್ಯಾಂಕ್‌ ಆರ್ಡರ್‌ 1947’ ಅಡಿಯಲ್ಲಿ 1948ರ ಸೆಪ್ಟೆಂಬರ್‌ 30ರವರೆಗೆ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಪಾಕಿಸ್ತಾನಕ್ಕೆ ಕರೆನ್ಸಿ ನೋಟುಗಳನ್ನು ಮುದ್ರಿಸಿ ಕೊಟ್ಟಿತ್ತು.

1947ರ ಅವಧಿಯಲ್ಲಿ ಭಾರತ ಪಾಕಿಸ್ತಾನಗಳೆರಡರಲ್ಲೂ ಕೂಡ ಒಂದೇ ಕರೆನ್ಸಿ ಚಲಾವಣೆಯಲ್ಲಿತ್ತು. ಸ್ವತಂತ್ರ ದೊರೆತ ನಂತರ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಪಾಕಿಸ್ತಾನಕ್ಕೆಂದು ಹೊಸ ಕರೆನ್ಸಿ ನೋಟುಗಳನ್ನು ಮುದ್ರಿಸಿತು. ರೂ 1, 2, 5, 10 ಮತ್ತು 100 ರೂಪಾಯಿ ಮೌಲ್ಯದ ನೋಟುಗಳನ್ನು ಮುದ್ರಿಸಿ ಪಾಕಿಸ್ತಾನಕ್ಕೆ ನೀಡಲಾಗಿತ್ತು.

ಈ ನೋಟುಗಳು ಭಾರತದ ನೋಟುಗಳಂತೆಯೇ ಇದ್ದವು. ಭಾರತದ ಮತ್ತು ಪಾಕಿಸ್ತಾನದ ನೋಟುಗಳ ಮಧ್ಯೆ ಇದ್ದದ್ದು ಎರಡು ವ್ಯತ್ಯಾಸಗಳಷ್ಟೇ. ಈ ನೋಟುಗಳ ಮುಂಬದಿಯ ಮಧ್ಯ ಭಾಗದಲ್ಲಿ ರಿಸರ್ವ್‌ ಆಫ್‌ ಇಂಡಿಯಾ ಎಂದು ಬಲಭಾಗದಲ್ಲಿ ‘ಗರ್ವನಮೆಂಟ್‌ ಆಫ್‌ ಪಾಕಿಸ್ತಾನ್‌’ ಎಂದು ಇಂಗ್ಲೀಷ್‌ನಲ್ಲಿ ಅಚ್ಚು ಒತ್ತಲಾಗುತ್ತಿತ್ತು. ಜತೆಗೆ ಬಲಭಾಗದಲ್ಲಿ ಕೆಳಗಡೆ ಉರ್ದುವಿನಲ್ಲಿ ‘ಹಕೂಮತ್‌-ಎ-ಪಾಕಿಸ್ತಾನ’ ಎಂಬ ಸಾಲು ಇರುತ್ತಿತ್ತು. ನೋಟಿನ ಹಿಂಭಾಗದಲ್ಲಿ ಯಾವುದೇ ಬದಲಾವಣೆಗಳಿರಲಿಲ್ಲ. ಸಂತಸದ ಸಂಗತಿ ಏನೆಂದರೆ ಭಾರತ ಮತ್ತು ಪಾಕಿಸ್ತಾದಲ್ಲಿ ಚಲಾವಣೆಯಲ್ಲಿ ಕರೆನ್ಸಿ ನೋಟುಗಳ ಹಿಂಭಾಗದಲ್ಲಿ ಭಾರತದ 7 ಸ್ಥಳೀಯ ಭಾಷೆಗಳಲ್ಲಿ ನೋಟಿನ ಮೌಲ್ಯವನ್ನು ಬರೆಯಲಾಗುತ್ತಿತ್ತು. ಆ 7 ಭಾಷೆಗಳಲ್ಲಿ ಕನ್ನಡವೂ ಒಂದು.

ಒಂದೆಡೆ ರಿಸರ್ವ್‌ ಬ್ಯಾಂಕ್‌ ಪಾಕಿಸ್ತಾನದ ಹೊಣೆ ಹೊತ್ತಿದ್ದರೆ ಮತ್ತೊಂದು ಕಡೆ ಪಾಕಿಸ್ತಾನ ತನ್ನ ಆರ್ಥಿಕ ಸ್ವಾಯತ್ತತೆಯನ್ನು ಕಾಪಾಡಿಕೊಳ್ಳಲು ಬೇಕಾಗಿದ್ದ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಆರಂಭಿಸಿತ್ತು. 1948ರ ಜೂನ್‌ 30ರಂದೇ “ಸೆಂಟ್ರಲ್‌ ಬ್ಯಾಂಕ್‌ ಆಫ್‌ ಪಾಕಿಸ್ತಾನ್‌” ಜನ್ಮ ತಳೆಯಿತು. 1948ರ ಜುಲೈ 1ರಿಂದಲೇ ತನ್ನ ಕಾರ್ಯವನ್ನು ಆರಂಭಿಸಿತು.

ಭಾರತ ಪಾಕಿಸ್ತಾನ ವಿಭಜನೆಯ ಒಪ್ಪಂದದಂತೆ ಪಾಕಿಸ್ತಾನದಲ್ಲಿ ಚಲಾವಣೆಯಲ್ಲಿದ್ದ ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ನೋಟುಗಳ ಜಾಗವನ್ನು ಪಾಕಿಸ್ತಾನದ ನೋಟುಗಳು ತುಂಬಿದವು. ಹಂತ ಹಂತವಾಗಿ 1 ರುಪಾಯಿ, 2 ರೂಪಾಯಿ, 5 ರೂಪಾಯಿಯ ನೋಟುಗಳ ಮುದ್ರಣವನ್ನು ಆರಂಭಿಸಿದ ಪಾಕಿಸ್ತಾನ 1952ರ ಜನವರಿ 15ರಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ ನೋಟುಗಳನ್ನು ಅಮಾನ್ಯಗೊಳಿಸಿ, ಆರ್ಥಿಕತೆಯ ಮೇಲೆ ಸಂಪೂರ್ಣ ಸ್ವಾಯತ್ತತೆಯನ್ನು ಸಾಧಿಸಿಕೊಂಡಿತು.

ಸ್ವತಂತ್ರ ಪಾಕಿಸ್ತಾನಕ್ಕೆ ಭಾರತ ಮುದ್ರಿಸಿಕೊಟ್ಟ 1, 2, 5, 10 ಮತ್ತು 100 ರೂಪಾಯಿ ಮುಖಬೆಲೆಯ ನೋಟುಗಳು ಹೀಗಿವೆ:

‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!
‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!
‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!
‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!
‘ಐತಿಹಾಸಿಕ ಸತ್ಯ’: ಪಾಕಿಸ್ತಾನದ ನೋಟಿನಲ್ಲಿ ಕನ್ನಡ ಭಾಷೆ!

ಚಿತ್ರ ಕೃಪೆ: ಪಾಕಿಸ್ತಾನ್‌ ಇನ್‌ಸೈಡರ್‌.