ಬೆಂಗಳೂರಿನ ಕಸದ ಸಮಸ್ಯೆ: ಸಂಸ್ಕರಿಸುವ ಮನಸ್ಸಿದ್ದರೆ ಮಾದರಿಯೊಂದು ಇಲ್ಲಿದೆ ನೋಡಿ...
ಪಾಸಿಟಿವ್

ಬೆಂಗಳೂರಿನ ಕಸದ ಸಮಸ್ಯೆ: ಸಂಸ್ಕರಿಸುವ ಮನಸ್ಸಿದ್ದರೆ ಮಾದರಿಯೊಂದು ಇಲ್ಲಿದೆ ನೋಡಿ...

ಸ್ಲೋವೇನಿಯಾ ಸ್ಥಾಪಿಸಿರುವ ಅತ್ಯಾಧುನಿಕ ತ್ಯಾಜ್ಯ ನಿರ್ವಹಣಾ ಕೇಂದ್ರ ಈಗ ಹಲವಾರು ದೇಶಗಳ ವಿದ್ಯಾರ್ಥಿಗಳನ್ನು, ಅಧ್ಯಯನಕಾರರನ್ನು ಆಕರ್ಷಿಸುತ್ತಿದೆ. ಯುರೋಪಿಯನ್‌ ರಾಷ್ಟ್ರಗಳು ಈ ಕೇಂದ್ರವನ್ನು ಮಾದರಿಯಾಗಿ ನೋಡುತ್ತಿವೆ. 

ಒಂದು ಕಾಲದಲ್ಲಿ ಗಾರ್ಡನ್ ಸಿಟಿ ಎಂದು ಹೆಸರು ಗಳಿಸಿದ್ದ ಬೆಂಗಳೂರು ನಗರ ಈಗ ‘ಗಾರ್ಬೇಜ್‌ ಸಿಟಿ’ ಎಂದು ಕರೆಸಿಕೊಳ್ಳುತ್ತಿದೆ. ಸ್ವತಃ ರಾಜ್ಯದ ಮುಖ್ಯಮಂತ್ರಿ ಎಚ್. ಡಿ. ಕುಮಾರಸ್ವಾಮಿ ಬೆಂಗಳೂರು ಕಸದ ಹಿಂದೆ ‘ಮಾಫಿಯಾ’ ಕೆಲಸ ಮಾಡುತ್ತಿದೆ ಎಂದು ಸಾರ್ವಜನಿಕವಾಗಿ ಒಪ್ಪಿಕೊಂಡಿದ್ದಾರೆ. ನಗರದಲ್ಲಿ ಬಿದ್ದಿರುವ ಕಸ ನೋಡುತ್ತಿದ್ದರೆ ನಾಚಿಕೆಯಾಗುತ್ತಿದೆ ಎಂದು ಅವರು ಅವಲತ್ತುಕೊಂಡಿದ್ದಾರೆ. ಇಷ್ಟಕ್ಕೂ ಕಸದ ಸಮಸ್ಯೆಗೆ ಪರಿಹಾರ ಆದರೂ ಏನಿದೆ? ಎಂದು ಹುಡುಕಿಕೊಂಡು ಹೋದರೆ, ಸಿಕ್ಕಿದ್ದು ಸ್ಲೋವೇನಿಯಾ ಎಂಬ ದೇಶದ ಆರ್‌ಸಿಇಆರ್‌ಓ ತ್ಯಾಜ್ಯ ಸಂಸ್ಕರಣಾ ಕೇಂದ್ರ. 

ಯುರೋಪ್‌ ಖಂಡದ ಮಧ್ಯಭಾಗದಲ್ಲಿರುವ ಸ್ಲೋವೆನಿಯಾ ದೇಶ ಉತ್ಪತ್ತಿಯಾಗುವ ಕಸವನ್ನು ಮರುಬಳಕೆ ಮಾಡಿಕೊಳ್ಳುವಲ್ಲಿ ಇಡೀ ಜಗತ್ತಿಗೆ ಮಾದರಿ ಎನ್ನಿಸಿಕೊಂಡಿದ್ದು ಇತ್ತಿಚಿನ ದಿನಗಳಲ್ಲಿ. ಸ್ಲೋವೇನಿಯಾ ತನ್ನ ರಾಜಧಾನಿ ಲುಜುಬ್ಲಾನಾದಲ್ಲಿ ಆರ್‌ಸಿಇಆರ್‌ಓ ಎಂಬ ತ್ಯಾಜ್ಯ ನಿರ್ವಹಣಾ ಕೇಂದ್ರವನ್ನು ಸ್ಥಾಪಿಸಿದ್ದು, ಈ ಕೇಂದ್ರದಲ್ಲಿ ದೇಶದ 58 ನಗರಗಳ ತ್ಯಾಜ್ಯವನ್ನು ವಿಂಗಂಡಿಸಿ ಮರು ಬಳಕೆ ಆರಂಭಿಸಿದೆ. ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಕಸ ನಿರ್ವಹಣೆ ಮಾಡುತ್ತಿರುವ ಆರ್‌ಸಿಇಆರ್‌ಓ ಯುರೋಪ್‌ ಖಂಡಿದಲ್ಲಿಯೇ ಅತಿ ದೊಡ್ಡದಾದ ತ್ಯಾಜ್ಯ ವಿಂಗಂಡಣಾ ಕೇಂದ್ರ.

ಲುಜುಬ್ಲಾನಾದಲ್ಲಿರುವ ಆರ್‌ಸಿಇಆರ್‌ಓ ತ್ಯಾಜ್ಯ ನಿರ್ವಹಣಾ ಕೇಂದ್ರದ ಪಕ್ಷಿನೋಟ.
ಲುಜುಬ್ಲಾನಾದಲ್ಲಿರುವ ಆರ್‌ಸಿಇಆರ್‌ಓ ತ್ಯಾಜ್ಯ ನಿರ್ವಹಣಾ ಕೇಂದ್ರದ ಪಕ್ಷಿನೋಟ.

ಆರ್‌ಸಿಇಆರ್‌ಓ ತ್ಯಾಜ್ಯ ನಿರ್ವಹಣಾ ಕೇಂದ್ರ ಪ್ರತಿವರ್ಷ ಸರಿಸುಮಾರು 1,70,000 ಟನ್‌ ಕಸವನ್ನು ನಿರ್ವಹಣೆ ಮಾಡುತ್ತಿದೆ. ಒಟ್ಟು ಕಸದ ಶೇ.98ರಷ್ಟು ಭಾಗವನ್ನು ಮರುಬಳಕೆಗೆ ಯೋಗ್ಯವಾದ ವಸ್ತುಗಳನ್ನಾಗಿ ರೂಪಿಸುತ್ತಿದೆ. ಕೊಳೆಯಬಲ್ಲ ತ್ಯಾಜ್ಯದಿಂದ ಜೈವಿಕ ಗೊಬ್ಬರವನ್ನು, ತ್ಯಾಜ್ಯವನ್ನು ನೆಲದೊಳಗೆ ಹುದುಗಿಸಿಟ್ಟು ಜೈವಿಕ ಇಂಧನವನ್ನು ಈ ತ್ಯಾಜ್ಯ ನಿರ್ವಹಣಾ ಕೇಂದ್ರ ಉತ್ಪಾದಿಸುತ್ತಿದೆ. ಜತೆಗೆ ತನಗೆ ಅಗತ್ಯವಿರುವ ವಿದ್ಯುಚ್ಛಕ್ತಿಯನ್ನೂ ಕೂಡ ಆರ್‌ಸಿಇಆರ್‌ಓ ತಾನೇ ಉತ್ಪಾದಿಸಿಕೊಳ್ಳುತ್ತಿದೆ.

ದೇಶದಲ್ಲಿ ಉತ್ಪಾದನೆಯಾಗುವ ಕಸದ ಮೂರನೇ ಒಂದು ಭಾಗವನ್ನು ಇಂದು ಆರ್‌ಸಿಇಆರ್‌ಓ ಸಂಸ್ಕರಿಸುತ್ತಿದೆ. ಈ ಕೇಂದ್ರದೊಳಗೆ ಬಂದ ಕಸದಲ್ಲಿ ಮರು ಬಳಕೆಗೆ ಸಾಧ್ಯವಾಗದೇ ಇರುವಂತಹ ಕಸದ ಪ್ರಮಾಣ ಕೇವಲ ಶೇ.2ರಷ್ಟು ಮಾತ್ರ. ಆ ತ್ಯಾಜ್ಯವನ್ನು ನೆಲದಡಿಯಲ್ಲಿ ಹೂಳಲಾಗುತ್ತದೆ.

ಸಂಸ್ಕರಣಾ ಘಟಕದ ಅಂಕಿ ಅಂಶ. 
ಸಂಸ್ಕರಣಾ ಘಟಕದ ಅಂಕಿ ಅಂಶ. 
euronews.com

ಈ ಯೋಜನೆ ಅಗತ್ಯವಿದ್ದ ಹಣವನ್ನು ಯುರೋಪಿಯನ್‌ ಸ್ಥಳೀಯ ಅಭಿವೃದ್ಧಿ ನಿಧಿ ಒದಗಿಸಿದೆ. ಈ ಆತ್ಯಾಧುನಿಕ ತ್ಯಾಜ್ಯ ನಿರ್ವಾಹಣಾ ಕೇಂದ್ರ ಸ್ಥಾಪನೆ ಖರ್ಚಾಗಿರುವ ಮೊತ್ತ ಒಟ್ಟು 155 ಮಿಲಿಯನ್‌ ಯುರೋಗಳು. ರುಪಾಯಿ ಲೆಕ್ಕದಲ್ಲಿ ಹೇಳುವುದಾದರೆ ಸರಿಸುಮಾರು 1, 224 ಕೋಟಿ. ವರದಿಗಳ ಪ್ರಕಾರ ಬಿಬಿಎಂಪಿ ಪ್ರತಿ ವರ್ಷ ತ್ಯಾಜ್ಯ ನಿರ್ವಹಣೆಗಾಗಿ 700 ಕೋಟಿ ರೂಪಾಯಿಗಳನ್ನು ವಿನಿಯೋಗಿಸುತ್ತಿದೆ.

ಈ ತ್ಯಾಜ್ಯ ಸಂಸ್ಕರಣಾ ಕೇಂದ್ರ ಲಕ್ಷಾಂತರ ಸ್ಥಳೀಯರ ಬದುಕನ್ನೂ ಬದಲಾಯಿಸಿದೆ. ಆರ್‌ಸಿಇಆರ್‌ಓ ತ್ಯಾಜ್ಯ ಸಂಸ್ಕರಣಾ ಕೇಂದ್ರದಲ್ಲಿ ಕಳೆದ 10 ವರ್ಷಗಳಿಂದ ಕೆಲಸ ನಿರ್ವಹಿಸುತ್ತಿರುವ ಎಲಿಟಾ ಹೇಳುವಂತೆ, ಈ ಕೇಂದ್ರ ಅವರ ಬದುಕಿನ ಮೇಲೆ ಪ್ರಭಾವ ಬೀರಿದೆ.

ಎಲಿಟಾ ತಿಂಗಳಿಗೆ 4 ಬಾರಿ ತ್ಯಾಜ್ಯ ನಿರ್ವಹಣಾ ಕೇಂದ್ರಕ್ಕೆ ತೆರೆಳಿ ಮಾರ್ಗದರ್ಶನ ನೀಡುತ್ತಾರೆ. ಯುರೋಪಿಯನ್‌ ಒಕ್ಕೂಟ, ಮಧ್ಯಪ್ರಾಚ್ಯ ಮತ್ತು ಉತ್ತರ ಆಫ್ರಿಕಾದ ಭಾಗಗಳಿಂದ ತ್ಯಾಜ್ಯ ನಿರ್ವಹಣಾ ಕೇಂದ್ರವನ್ನು ನೋಡಲು ಬರುವ ವಿದ್ಯಾರ್ಥಿಗಳು ಮತ್ತು ಅಧ್ಯಯನಕಾರರಿಗೆ ಕೇಂದ್ರದ ಕುರಿತು ಮಾಹಿತಿ ನೀಡುತ್ತಾರೆ. ಕೇವಲ 2 ವರ್ಷಗಳ ಅವಧಿಯಲ್ಲಿ ತ್ಯಾಜ್ಯ ನಿರ್ವಹಣಾ ಕೇಂದ್ರ ಹೇಗೆ ಸ್ಲೋವೇನಿಯನ್‌ ಜನಗಳ ಬದುಕನ್ನು ಬದಲಿಸಿತು ಎಂದು ವಿವರಿಸುತ್ತಾರೆ. ಆಸಕ್ತಿರು ಕೆಳಗಿನ ವಿಡಿಯೋ ಗಮನಿಸಿ.

“ಸ್ಲೋವೇನಿಯಾದಲ್ಲಿ ಜನರೇ ಕಸವನ್ನು ವಿಂಗಡಿಸಿ ನೀಡುತ್ತಾರೆ. ತ್ಯಾಜ್ಯ ನಿರ್ವಹಣಾ ಕೇಂದ್ರ ಆರಂಭಗೊಂಡ ಮೊದಲ ದಿನಗಳಲ್ಲಿ ಜನರು ತ್ಯಾಜ್ಯವನ್ನು ವಿಂಗಡಿಸಲು ಹಿಂದೇಟು ಹಾಕಿದ್ದರು. ನಾವೇಕೆ ತ್ಯಾಜ್ಯವನ್ನು ವಿಂಗಡಿಸಬೇಕು? ಅದು ನಮ್ಮ ಕೆಲಸವಲ್ಲ, ವಿಂಗಡಿಸಿ ಕೊಟ್ಟರೆ ನಮಗ್ಯಾವ ಲಾಭವೂ ಇಲ್ಲ ಎಂಬ ಉತ್ತರ ಜನರಿಂದ ಬರುತ್ತಿತ್ತು. ಆದರೆ ಒಂದು ಎರಡು ವರ್ಷಗಳ ಕಳೆಯುವ ವೇಳೆಗೆ ಜನರಿಗೆ ಕೇಂದ್ರ ನಿರ್ವಹಿಸುತ್ತಿರುವ ಕಾರ್ಯದ ಬಗ್ಗೆ ಅರ್ಥವಾಗಿತ್ತು,” ಎನ್ನುತ್ತಾರೆ ಎಲಿಟಾ.

ಈಗ ಸ್ಲೋವೇನಿಯಾದ ಪರಿಸ್ಥಿತಿ ಬದಲಾಗಿದೆ. ಎಲ್ಲಿಯೂ ಕಸ ಕಾಣಿಸುವುದಿಲ್ಲ. ಜನರೇ ತ್ಯಾಜ್ಯವನ್ನು ವಿಂಗಡಿಸಿ ನೀಡುತ್ತಾರೆ. ತ್ಯಾಜ್ಯ ವಿಂಗಡಿಸದವರನ್ನು ಕಂಡರೆ ಸಿಡಿಮಿಡಿಗೊಳ್ಳುತ್ತಾರೆ.

ತ್ಯಾಜ್ಯ ನಿರ್ವಹಣಾ ಕೇಂದ್ರದಲ್ಲಿ ಉತ್ಪಾದನೆಗೊಂಡ ಜೈವಿಕ ಗೊಬ್ಬರವನ್ನು ನಗರಗಳಲ್ಲಿ ಹಸಿರನ್ನು ಹೆಚ್ಚಿಸಲು ಬಳಸಲಾಗುತ್ತಿದೆ. ಸ್ಲೋವೇನಿಯಾದ ರಾಜಧಾನಿ ಲುಜುಬ್ಲಾನಾದಲ್ಲಿನ ಟಿವೋಲಿ ಉದ್ಯಾನವನಕ್ಕಾಗಿ ಪ್ರತಿವರ್ಷ 80 ರಿಂದ 100 ಕ್ಯೂಬಿಕ್‌ ಮೀಟರ್‌ ಜೈವಿಕ ಗೊಬ್ಬರವನ್ನು ಬಳಸಲಾಗುತ್ತಿದೆ.

ಆರ್‌ಸಿಇಆರ್‌ಓದ ನಾಯಕ ತಂಜಾ ಕಾರ್ನರ್‌ ಹೇಳುವಂತೆ, ಆರ್‌ಸಿಇಆರ್‌ಓದಲ್ಲಿ ತ್ಯಾಜ್ಯ ನಿರ್ವಹಣೆ ಸಮರ್ಪಕವಾಗಿ ನಡೆಯುತ್ತಿದ್ದು, ಬಳಕೆ, ಮರು ಬಳಕೆ, ಪುನರ್‌ಬಳಕೆಗಳ ಒಂದು ಸುತ್ತು ಸಂಪೂರ್ಣವಾಗುತ್ತಿದೆ. ತ್ಯಾಜ್ಯದ ಪ್ರಮಾಣ ಹೆಚ್ಚಾದರೆ ಅದನ್ನು ಹೇಗೆ ಮರುಬಳಕೆ ಮಾಡಬಹುದು ಎನ್ನುವುದರ ಕುರಿತು ದಾರಿಗಳನ್ನು ಹುಡುಕಲಾಗುತ್ತಿದೆ. ಕಸದಿಂದಲೇ ಉತ್ಪಾದನೆ ಮಾಡಿದ ಗೊಬ್ಬರದಿಂದ ಉದ್ಯಾನವನದ ಗಿಡಗಳನ್ನು ಬೆಳೆಸಲಾಗುತ್ತಿದೆ. ಆದ್ದರಿಂದಾಗಿ ಗೊಬ್ಬರವನ್ನು ಕೊಂಡು ತರುವ ಅವಶ್ಯಕತೆ ಇಲ್ಲದೇ ಹೆಚ್ಚಿನ ಖರ್ಚು ಉಳಿಯುತ್ತಿದೆ. ಇದು ಚಿಕ್ಕ ಉದಾಹರಣೆಯಷ್ಟೇ ಎನ್ನುತ್ತಾರೆ ತಂಜಾ ಕಾರ್ನರ್‌.

ಸ್ಲೋವೇನಿಯಾದಲ್ಲಿನ ಸುಮಾರು 8 ಲಕ್ಷದಷ್ಟು ಜನರು ಆರ್‌ಸಿಇಆರ್‌ಓ ತ್ಯಾಜ್ಯ ನಿರ್ವಹಣಾ ಕೇಂದ್ರದಿಂದ ಲಾಭ ಪಡೆಯುತ್ತಿದ್ದಾರೆ. ಇದು ಸ್ಲೋವೇನಿಯಾದ ಜನಸಂಖ್ಯೆಯ ಅರ್ಧದಷ್ಟು. ತ್ಯಾಜ್ಯ ನಿರ್ವಹಣೆ, ಸಂಸ್ಕರಣೆ ಮತ್ತು ಮರು ಬಳಕೆಯಲ್ಲಿ ಸ್ಲೋವೇನಿಯಾದ ಈ ಸಾಧನೆ ಯುರೋಪ್‌ ಖಂಡಕ್ಕೆ ಮಾದರಿಯಾಗಿ ಕಾಣಿಸಿಕೊಂಡಿದೆ. ತ್ಯಾಜ್ಯದಿಂದ ದಿನನಿತ್ಯ ಸಮಸ್ಯೆ ಅನುಭವಿಸುತ್ತಿರುವ ಬೆಂಗಳೂರಿನಂತಹ ನಗರಗಳೂ ಕೂಡ ಇಂತಹ ಪ್ರಯೋಗಗಳತ್ತ ಗಮನ ಹರಿಸಿದರೆ ಕಸದಿಂದ ಮುಕ್ತಿ ಪಡೆಯಬಹುದು.