‘ಸೌದಿ ಫ್ಯಾಷನ್‌ ವೀಕ್‌’: ಮಹಿಳಾ ಸಮಾನತೆ ಎಡೆಗೆ ಮತ್ತೊಂದು ಹೆಜ್ಜೆ ಇಟ್ಟ ರಾಜಕುಮಾರಿ!
ಪಾಸಿಟಿವ್

‘ಸೌದಿ ಫ್ಯಾಷನ್‌ ವೀಕ್‌’: ಮಹಿಳಾ ಸಮಾನತೆ ಎಡೆಗೆ ಮತ್ತೊಂದು ಹೆಜ್ಜೆ ಇಟ್ಟ ರಾಜಕುಮಾರಿ!

ಸೌದಿ ಅರೇಬಿಯಾದಲ್ಲಿ ಮಹಿಳೆಯರು ತಮ್ಮಿಷ್ಟದ ಬಟ್ಟೆ ಹಾಕಿಕೊಳ್ಳುವ ಸ್ವಾತಂತ್ರ್ಯವನ್ನು ಇಷ್ಟು ವರ್ಷ ಹೊಂದಿರಲಿಲ್ಲ. ಆದರೆ ಈಗ ಹೊಸತನದ ಗಾಳಿ ಸೌದಿಯಲ್ಲಿ ಬೀಸಿದೆ. ಅದಕ್ಕೆ ಕಾರಣ ಸೌದಿಯ ರಾಜಕುಮಾರಿ ನೌರಾ ಬಿಂತ್‌ ಫೈಸಲ್‌ ಅಲ್‌ ಅಸದ್‌. 

ಪ್ರಪಂಚದ ಬಹುತೇಕ ದೇಶಗಳು ಜಾಗತೀಕರಣಕ್ಕೆ ತಮ್ಮನ್ನು ತೆರೆದುಕೊಂಡಿವೆ. ಜಾಗತೀಕರಣದಿಂದ ಬೇರೆ ಬೇರೆ ದೇಶಗಳ ಉತ್ಪನ್ನಗಳಷ್ಟೇ ಅಲ್ಲ, ಸಂಸ್ಕೃತಿಯ ವಿನಿಮಯವೂ ಆಗುತ್ತಿದೆ. ಆದರೆ ಕೆಲ ದೇಶಗಳು ಮಾತ್ರ ಸಂಸ್ಕೃತಿ, ಪರಂಪರೆಯನ್ನು ಬಿಡುತ್ತಿಲ್ಲ. ಅದು ಆ ದೇಶಗಳ ಜೀವನ ಶೈಲಿಯೂ ಹೌದು. ಆದರೀಗ, ಮೊದಲ ಬಾರಿಗೆ ಸೌದಿ ಅರೇಬಿಯಾದಲ್ಲಿ ಹೊಸ ಗಾಳಿ ಬೀಸುತ್ತಿದೆ. ಅದಕ್ಕೆ ಕಾರಣ ರಾಜಕುಮಾರಿ ನೌರಾ ಬಿಂತ್‌ ಫೈಸಲ್‌ ಅಲ್‌ ಸೌದ್‌.

ಸೌದಿ ಅರೇಬಿಯಾದ ಇತಿಹಾಸದಲ್ಲೇ ಮೊದಲ ಬಾರಿಗೆ ಫ್ಯಾಷನ್‌ ಷೋ ಇದೇ ಏಪ್ರಿಲ್‌ ಆರಂಭದಲ್ಲಿ ಆಯೋಜಿಸಲಾಗಿದೆ. ಇಲ್ಲಿಯವರೆಗೂ ಮಹಿಳೆಯರನ್ನು ಹಿಜಾಬಿನಲ್ಲೇ ಹಿಡಿದಿಟ್ಟ ಸಂಸ್ಕೃತಿ ಬದಲಾಗುವ ಸಾಧ್ಯತೆಯೂ ಈ ಫ್ಯಾಷನ್‌ ಷೋದಿಂದ ಕಂಡುಬಂದಿದೆ. ಬಹಿರಂಗವಾಗಿ ಮಹಿಳೆಯರಿಗೆ ಸ್ಥಾನಮಾನಗಳನ್ನು ನೀಡದ ಸೌದಿ ಅರೇಬಿಯಾ, ಹೆಂಗಸರ ಮೇಲಿನ ಕಟ್ಟಲೆಗಳ ವಿಚಾರದಲ್ಲಿ ಬದಲಾಗುವ ಮುನ್ಸೂಚನೆ ನೀಡಿದೆ.

ಯಾರೀ ರಾಜಕುಮಾರಿ?:

ನೌರಾ ಬಿಂತ್‌ ಫೈಸಲ್‌ ಅಲ್‌ ಅಸದ್‌ ಸೌದಿ ಅರೇಬಿಯಾದ ರಾಜಕುಮಾರಿ. ಜಪಾನಿನ ರಾಜಧಾನಿ ಟೋಕಿಯೋದ ರಿಕ್ಯೊ ಯೂನಿವರ್ಸಿಟಿಯಲ್ಲಿ ಅಂತರಾಷ್ಟ್ರೀಯ ಉದ್ಯಮದ ಪದವಿ ಪಡೆದ ನೌರಾ, ಸೌದಿಗೆ ವಾಪಸಾಗಿದ್ದಾರೆ. 2017ರಲ್ಲಿ ನೌರಾ ಸೌದಿ ಅರೇಬಿಯಾದ ಫ್ಯಾಷನ್‌ ಕೌನ್ಸಿಲ್‌ ಅಧ್ಯಕ್ಷೆಯಾದರು. ಅದು ಸೌದಿಯಲ್ಲಿ ಹೊಸತನದ ಗಾಳಿ ಬೀಸುತ್ತಿದ್ದ ಸಮಯ. ಮಹಿಳೆಯರ ಸಮಾನತೆಯ ಬಗ್ಗೆ ಈಗಲೂ ಸೌದಿಯಲ್ಲಿ ಬೇಡಿಕೆ ಕೇಳಿ ಬಂದಿಲ್ಲವಾದರೂ, ಫ್ಯಾಷನ್‌ ಷೋ ಮಾಡುವ ಮೂಲಕ ಹೊಸ ಸಾಧ್ಯತೆಯ ಅನಾವರಣ ಮಾಡಿದ್ದಾರೆ.

‘ಸೌದಿ ಫ್ಯಾಷನ್‌ ವೀಕ್‌’: ಮಹಿಳಾ ಸಮಾನತೆ ಎಡೆಗೆ ಮತ್ತೊಂದು ಹೆಜ್ಜೆ ಇಟ್ಟ ರಾಜಕುಮಾರಿ!

ನೌರಾ ಸೌದಿ ಅರೇಬಿಯಾದ ಸ್ಥಾಪಕ ಅಬ್ದುಲ್ಲಾಝಿಜ್‌ರ ಮರಿಮೊಮ್ಮಗಳು. ಸೌದಿ ರಾಜ ಮನೆತನದಲ್ಲಿ ಹುಟ್ಟಿದ ನೌರಾ ಹುಟ್ಟಿನಿಂದ ಶ್ರೀಮಂತಿಕೆ ಕಂಡವರು. ಸೌದಿಯಲ್ಲೇ ಬಾಲ್ಯ ಕಳೆದ ನೌರಾ ಉನ್ನತ ವಿದ್ಯಾಭ್ಯಾಸಕ್ಕೆ ಜಪಾನಿಗೆ ತೆರಳಿದರು. ಜಪಾನಿಗೆ ತೆರಳಿದ ನೌರಾರನ್ನು ಫ್ಯಾಷನ್‌ ಲೋಕ ಆಕರ್ಷಿಸಿತ್ತು. ಅವರ ವಾರ್ಡ್‌ರೋಬ್‌ ಕಲೆಕ್ಷನ್‌ ಕೂಡ ಅದಕ್ಕೆ ಸಾಕ್ಷಿಯಾಗಿವೆ. ಅದಾದ ನಂತರ ಸೌದಿಗೆ ವಾಪಸಾದ ನಂತರ ಫ್ಯಾಷನ್‌ ಕೌನ್ಸಿಲ್‌ ಸ್ಥಾಪನೆಯಾಯಿತು.

ಏಪ್ರಿಲ್‌ ಮೊದಲ ವಾರದಲ್ಲಿ ನಡೆದ ಫ್ಯಾಷನ್‌ ವೀಕ್‌ ಕೇವಲ ಮಹಿಳೆಯರಿಗೆ ಮಾತ್ರ ಪ್ರವೇಶ ನೀಡಿತ್ತು. ಕ್ಯಾಮೆರಾಗಳು ಮತ್ತು ಮಾಧ್ಯಮಕ್ಕೆ ಅನುಮತಿ ಇರಲಿಲ್ಲ.

ಈ ಬಗ್ಗೆ ಮಾತನಾಡಿದ ನೌರಾ, “ನಾನು ನನ್ನ ದೇಶದ ಸಂಸ್ಕೃತಿಯನ್ನು ಪ್ರೀತಿಸುತ್ತೇನೆ. ದೇಶದ ಪರಂಪರೆಯ ಬಗ್ಗೆ ಕಾಳಜಿ ಮತ್ತು ಅಪಾರವಾದ ಹೆಮ್ಮೆಯಿದೆ. ಫ್ಯಾಷನ್‌ ಷೋನಲ್ಲಿ ಮಹಿಳೆಯರಿಗೆ ಮಾತ್ರ ಪ್ರವೇಶ ನೀಡಲು ಕಾರಣಗಳಿವೆ. ಸೌದಿಯಲ್ಲಿ ಮಹಿಳೆಯರು ತಮ್ಮಿಚ್ಛೆಯ ಬಟ್ಟೆ ಧರಿಸಿ ಬಹಿರಂಗವಾಗಿ ಓಡಾಡುವುದಿಲ್ಲ. ಹಾಗಿರುವಾಗ ಮಾಧ್ಯಮಗಳಿಗೆ ಅವಕಾಶ ನೀಡಿದರೆ ಅವರಿಗೆ ಮುಜುಗರವಾಗಬಹುದು. ಸ್ವಚ್ಛಂದದ ವಾತಾವರಣ ನಿರ್ಮಾಣ ಮಾಡಲು ಪುರುಷರಿಗೆ ಮತ್ತು ಮಾಧ್ಯಕ್ಕೆ ಪ್ರವೇಶ ನಿರ್ಬಂಧ ಹೇರಲಾಗಿತ್ತು,” ಎಂದಿದ್ದಾರೆ.

‘ಸೌದಿ ಫ್ಯಾಷನ್‌ ವೀಕ್‌’: ಮಹಿಳಾ ಸಮಾನತೆ ಎಡೆಗೆ ಮತ್ತೊಂದು ಹೆಜ್ಜೆ ಇಟ್ಟ ರಾಜಕುಮಾರಿ!

ಆದರೆ ಈ ಬಗ್ಗೆ ಸೌದಿಯ ರಾಜ ಸಲ್ಮಾನ್‌ ಪ್ರತಿಕ್ರಿಯೆಯೇ ಬೇರೆ ರೀತಿಯಾಗಿದೆ. “ಮಹಿಳೆಯರು ಅಬಯಾಸ್‌ (ಬುರ್ಕಾ ರೀತಿಯ ನಿಲುವಂಗಿ) ಹಾಕಲೇ ಬೇಕು ಎಂಬುದಿಲ್ಲ. ತಮ್ಮಿಷ್ಟದ ಬಟ್ಟೆ ಧರಿಸಲು ಮಹಿಳೆಯರು ಸ್ವತಂತ್ರರು,” ಎಂದಿದ್ದಾರೆ. ಇದು ಮೊದಲ ಬಾರಿಗೆ ಸೌದಿಯ ರಾಜ ಮಹಿಳಾ ಸ್ವಾತಂತ್ರ್ಯದ ಬಗ್ಗೆ ಆಡಿದ ಮಾತುಗಳು.

ಒಟ್ಟಿನಲ್ಲಿ ಸೌದಿ ಅರೇಬಿಯಾ ಕೂಡ ಹೊಸತನಕ್ಕೆ ಮತ್ತು ಮಹಿಳಾ ಸ್ವಾತಂತ್ರ್ಯದ ಬಗ್ಗೆ ಇನ್ನೊಂದು ಪ್ರಬಲ ಹೆಜ್ಜೆಯನ್ನು ದಾಖಲಿಸಿದೆ. ಸಲ್ಮಾನ್‌ ಹೇಳಿದಂತೆ ಮಹಿಳೆಯರು ಸ್ವತಂತ್ರವಾಗಿ ತಮಗೆ ಬೇಕಾದ ಬಟ್ಟೆ ಧರಿಸುವ ಸಮಯವೂ ತುಂಬಾ ದೂರವೇನಿಲ್ಲ.