samachara
www.samachara.com
ಅಧಿವೇಶನದ ಎರಡನೇ ದಿನವೂ ಬಿಜೆಪಿ ಗದ್ದಲ; ಚರ್ಚೆಯೇ ಇಲ್ಲದೆ ಕಲಾಪ ನಾಳೆಗೆ ಮುಂದೂಡಿಕೆ
ಸುದ್ದಿ ಸಾರ

ಅಧಿವೇಶನದ ಎರಡನೇ ದಿನವೂ ಬಿಜೆಪಿ ಗದ್ದಲ; ಚರ್ಚೆಯೇ ಇಲ್ಲದೆ ಕಲಾಪ ನಾಳೆಗೆ ಮುಂದೂಡಿಕೆ

ಸಿಎಂ ಕುಮಾರಸ್ವಾಮಿ ನಾಳೆ ಬಜೆಟ್‌ ಮಂಡಿಸುತ್ತಿದ್ದು, ಬಿಜೆಪಿ ಸದಸ್ಯರು ನಾಳೆಯೂ ಗದ್ದಲ ಮಾಡಿ ಬಜೆಟ್‌ ಮಂಡನೆಗೆ ಅಡ್ಡಿ ಪಡಿಸಬಹುದೆಂಬ ಆತಂಕ ಸಮ್ಮಿಶ್ರ ಸರಕಾರಕ್ಕೆ ಎದುರಾಗಿದೆ.

Team Samachara

ಬಿಜೆಪಿ ಶಾಸಕರ ಗದ್ದಲ ಬಜೆಟ್‌ ಅಧಿವೇಶನದ ಎರಡನೇ ದಿನದ ಕಲಾಪವನ್ನೂ ನುಂಗಿ ಹಾಕಿದೆ. ಸರಕಾರ ನಡೆಸಲು ಕಾಂಗ್ರೆಸ್‌- ಜೆಡಿಎಸ್‌ಗೆ ಸಂಖ್ಯಾಬಲದ ಕೊರತೆ ಇದೆ ಎನ್ನುತ್ತಿರುವ ಬಿಜೆಪಿ ಶಾಸಕರು, ಜಂಟಿ ಅಧಿವೇಶನ ಉದ್ದೇಶಿಸಿ ರಾಜ್ಯಪಾಲರು ಮಾಡಿದ್ದ ಭಾಷಣದ ಮೇಲಿನ ವಂದನಾ ನಿರ್ಣಯಕ್ಕೆ ವಿರೋಧ ವ್ಯಕ್ತಪಡಿಸಿ ಗುರುವಾರವೂ ಸದನದ ಬಾವಿಗಿಳಿದು ಪ್ರತಿಭಟನೆ ನಡೆಸಿದರು.

ಗದ್ದಲದ ಕಾರಣಕ್ಕೆ ಎರಡು ಬಾರಿ ಕಲಾಪ ಮುಂದೂಡಿದ್ದ ಸ್ಪೀಕರ್‌ ರಮೇಶ್‌ ಕುಮಾರ್, ಮಧ್ಯಾಹ್ನ 12.30ಕ್ಕೂ ಬಿಜೆಪಿ ಸದಸ್ಯರು ಗದ್ದಲ ಮುಂದುವರಿಸಿದ ಕಾರಣ ಕಲಾಪವನ್ನು ಶುಕ್ರವಾರ ಮಧ್ನಾಹ್ನ 12.30ಕ್ಕೆ ಮುಂದೂಡಿದರು. ಶುಕ್ರವಾರ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಬಜೆಟ್‌ ಮಂಡಿಸುತ್ತಿದ್ದು, ಬಿಜೆಪಿ ಸದಸ್ಯರು ಶುಕ್ರವಾರವೂ ಗದ್ದಲ ಮಾಡಿ ಬಜೆಟ್‌ ಮಂಡನೆಗೆ ಅಡ್ಡಿ ಪಡಿಸಬಹುದೆಂಬ ಆತಂಕ ಸಮ್ಮಿಶ್ರ ಸರಕಾರಕ್ಕೆ ಎದುರಾಗಿದೆ.

ವಿಪ್‌ ಜಾರಿಯಾಗಿದ್ದರೂ ಕಾಂಗ್ರೆಸ್‌ ಅತೃಪ್ತ ಶಾಸಕರು ಬಜೆಟ್‌ ಅಧಿವೇಶನಕ್ಕೆ ಹಾಜರಾಗಿಲ್ಲ. ಅತೃಪ್ತ ಶಾಸಕರನ್ನು ಬಿಜೆಪಿ ಬೆದರಿಕೆ ಒಡ್ಡಿ ಕೂಡಿ ಹಾಕಿಕೊಂಡಿದೆ ಎಂದು ಕಾಂಗ್ರೆಸ್‌ ಮುಖಂಡರು ಆರೋಪಿಸಿದ್ದಾರೆ. "ರಾಜ್ಯ ಸರಕಾರವನ್ನು ಕೆಡವಲು ಯತ್ನಿಸುತ್ತಿರುವ ಬಿಜೆಪಿ, ಕೆಲವು ಶಾಸಕರನ್ನು ಬಲವಂತವಾಗಿ ಕೂಡಿಹಾಕಿಕೊಂಡಿದೆ. ಪೊಲೀಸರು ಹಾಗೂ ಗೂಂಡಾಗಳಿಂದ ಬೆದರಿಕೆ ಒಡ್ಡಲಾಗಿದೆ" ಎಂದು ಸಂಸದ ಡಿ.ಕೆ. ಸುರೇಶ್ ಗಂಭೀರ ಆರೋಪ ಮಾಡಿದ್ದಾರೆ.

ಗುರುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಸುರೇಶ್‌, "ಪ್ರತಿಪಕ್ಷದವರು ಶಾಸಕರನ್ನು ಬಲವಂತವಾಗಿ ಕೂಡಿಹಾಕಿರುವುದಕ್ಕೆ ನಮ್ಮ ಬಳಿ ದಾಖಲೆಗಳಿವೆ. ಸೂಕ್ತ ಸಂದರ್ಭದಲ್ಲಿ ದಾಖಲೆ ಬಿಡುಗಡೆ ಮಾಡುತ್ತೇವೆ. ನಮ್ಮ ಶಾಸಕರಿಗೆ ಹಣದ ಆಮಿಷ ಒಡ್ಡಿರುವುದಲ್ಲದೆ ರಾಜಕೀಯವಾಗಿ ಅವರನ್ನು ಮುಗಿಸುತ್ತೇವೆ ಎಂಬ ಬೆದರಿಕೆಯೊಡ್ಡಿ ಒಂದೆಡೆ ಕೂಡಿ ಹಾಕಿದ್ದಾರೆ. ಸಂವಿಧಾನದ ಆಶಯಗಳನ್ನು ಗಾಳಿಗೆ ತೂರಲಾಗಿದೆ. ಈ ಸಂದರ್ಭದಲ್ಲಿ ರಾಷ್ಟ್ರಪತಿಗಳು ಮಧ್ಯಪ್ರವೇಶಿಸಬೇಕು" ಎಂದು ಆಗ್ರಹಿಸಿದ್ದಾರೆ.

"ಬಿಜೆಪಿಯಿಂದ ಸಂವಿಧಾನ ವಿರೋಧಿ ಕೆಲಸ ನಡೆಯುತ್ತಿದೆ. ಬಹುಮತವಿರುವ ಸಮ್ಮಿಶ್ರ ಸರಕಾರವನ್ನು ಪತನ ಮಾಡುವ ಯತ್ನಕ್ಕೆ ಬಿಜೆಪಿ ಮುಂದಾಗಿದೆ. ಇದಕ್ಕೆ ಮೋದಿ, ಅಮಿತ್ ಶಾ ನೇರವಾಗಿ ಕುಮ್ಮಕ್ಕು ನೀಡುತ್ತಿದ್ದಾರೆ. ಶಾಸಕರನ್ನು ತಮ್ಮ ಕ್ಷೇತ್ರಕ್ಕೆ ಹೋಗಲು ಬಿಡದೆ 25 ರಿಂದ 50 ಕೋಟಿ ರೂಪಾಯಿ ನೀಡುವ ಆಮಿಷವೊಡ್ಡಿ ಕೂಡಿಟ್ಟುಕೊಂಡಿದ್ದಾರೆ. ಈಗ ಐಟಿ, ಇಡಿ ಇಲಾಖೆಗಳು ಎಲ್ಲಿ ಹೋಗಿವೆ" ಎಂದು ಕಿಡಿಕಾರಿದರು.

"ಈ ಹಿಂದೆ ಆಪರೇಷನ್ ಕಮಲ ಎಂಬುದನ್ನು ಯಾರೂ ನೋಡಿರಲಿಲ್ಲ. ಅದನ್ನು ಪ್ರಾರಂಭಿಸಿದ್ದೇ ಬಿ.ಎಸ್. ಯಡಿಯೂರಪ್ಪ. ಮೊದಲಿಗೆ ಕರ್ನಾಟಕದಲ್ಲೇ ಆಪರೇಷನ್ ಕಮಲ ಆರಂಭಿಸಿದ್ದರು. ರಾಜ್ಯ ಸರಕಾರವನ್ನು ಕೆಡವಲು ನಿರಂತರವಾಗಿ ಪ್ರಯತ್ನಿಸಿದ್ದು, ಇದಕ್ಕೆ ಮಹಾರಾಷ್ಟ್ರ ಸರಕಾರವೂ ಕೈ ಜೋಡಿಸಿದೆ" ಎಂದು ಆರೋಪಿಸಿದರು.

"ಪ್ರಜಾಪ್ರಭುತ್ವದ ಕಗ್ಗೊಲೆಗೆ ಮುಂದಾಗಿರುವ ಪ್ರತಿಪಕ್ಷದವರಿಗೆ ಕೇಂದ್ರ ನಾಯಕರು ಬೆಂಬಲವಾಗಿದ್ದಾರೆ. ನರೇಂದ್ರ ಮೋದಿ ಯುಗ ಅಂತ್ಯವಾಗಲಿದೆ. ಕೇಂದ್ರದಿಂದ ಅಧಿಕಾರ ದುರ್ಬಳಕೆಯಾಗುತ್ತಿದ್ದರೂ ಈ ಬಗ್ಗೆ ಯಾರೂ ಗಮನ ಹರಿಸುತ್ತಿಲ್ಲ. ಮೂರು ತಿಂಗಳಿನಿಂದ ರಾಜಕೀಯ ಅಸ್ಥಿರತೆ ಮೂಡಿಸುವ ಯತ್ನಗಳು ನಡೆಯುತ್ತಿದ್ದರೂ ಯಾರೂ ಇದನ್ನು ತಡೆಯಲು ಮುಂದಾಗಿಲ್ಲ" ಎಂದು ಆಕ್ಷೇಪಿಸಿದರು.