samachara
www.samachara.com
ಉದ್ಯೋಗಕ್ಕಾಗಿ ಪದವೀಧರರ ದುಂಬಾಲು; 14 ಕಸ ಗುಡಿಸುವ ಕೆಲಸಕ್ಕೆ 4,607 ಆಕಾಂಕ್ಷಿಗಳು
ಸುದ್ದಿ ಸಾರ

ಉದ್ಯೋಗಕ್ಕಾಗಿ ಪದವೀಧರರ ದುಂಬಾಲು; 14 ಕಸ ಗುಡಿಸುವ ಕೆಲಸಕ್ಕೆ 4,607 ಆಕಾಂಕ್ಷಿಗಳು

ಕಸಗುಡಿಸುವ ಕೆಲಸವನ್ನು ಪದವೀಧರರು ಮಾಡಬಾರದು ಎಂದು ಎಲ್ಲೂ ನಿಯಮವಿಲ್ಲ. ಆದರೆ ಪದವೀಧರರು ಅವರು ಶೈಕ್ಷಣಿಕ ಹಿನ್ನೆಲೆಗೆ ಸರಿ ಹೊಂದದ ಕೆಲಸವನ್ನು ಅನಿವಾರ್ಯವಾಗಿ ಒಪ್ಪಿಕೊಳ್ಳಬೇಕಾದುದು ಆರ್ಥಿಕ ದೃಷ್ಟಿಯಿಂದ ಒಳ್ಳೆಯ ಮಾದರಿಯಲ್ಲ.

Team Samachara

ನಿರುದ್ಯೋಗ ಸಮಸ್ಯೆ ತಾರಕಕ್ಕೆ ಏರಿದಾಗ ತಮಗೆ ಇಷ್ಟವಿಲ್ಲದ, ಶೈಕ್ಷಣಿಕ ಹಿನ್ನೆಲೆಗೆ ಸರಿ ಹೊಂದದ ನೌಕರಿಯನ್ನು ಅನಿವಾರ್ಯವಾಗಿ ಒಪ್ಪಿಕೊಳ್ಳಬೇಕಾದ ಇಕ್ಕಟ್ಟಿನ ಸಂದರ್ಭಗಳು ಸೃಷ್ಟಿಯಾಗುತ್ತವೆ. ಅದಕ್ಕೆ ತಮಿಳುನಾಡಿನ ಈ ಬೆಳವಣಿಗೆ ಕನ್ನಡಿ ಹಿಡಿಯುತ್ತಿದೆ.

ತಮಿಳುನಾಡಿನ ವಿಧಾನಸಭೆಯಲ್ಲಿ 10 ಕಸಗುಡಿಸುವ ಕಾರ್ಮಿಕರು ಮತ್ತು 4 ನೈರ್ಮಲ್ಯ ಕಾರ್ಮಿಕರ ಹುದ್ದೆಗಳು ಖಾಲಿ ಇವೆ. ಈ ಹುದ್ದೆಗಳನ್ನು ಭರ್ತಿ ಮಾಡಲು ಸೆಪ್ಟೆಂಬರ್‌ 26ರಂದು ವಿಧಾನಸಭೆ ಕಾರ್ಯಾಲಯ ಅರ್ಜಿಗಳನ್ನು ಆಹ್ವಾನಿಸಿತ್ತು.

ದೈಹಿಕವಾಗಿ ಸಮರ್ಥರಾಗಿರುವ, ಕನಿಷ್ಠ 18 ವರ್ಷ ತುಂಬಿದ ಅಭ್ಯರ್ಥಿಗಳಿಂದ ಅರ್ಜಿಗಳನ್ನು ಆಹ್ವಾನಿಸಲಾಗಿತ್ತು. ಯಾವುದೇ ಶೈಕ್ಷಣಿಕ ಅರ್ಹತೆಯನ್ನೂ ಇಲ್ಲಿ ಕೇಳಿರಲಿಲ್ಲ. ಆದರೆ ಅರ್ಜಿಗಳು ಸಲ್ಲಿಕೆ ಪೂರ್ಣಗೊಂಡಾಗ ಅಲ್ಲಿ ಅಚ್ಚರಿ ಕಾದಿತ್ತು.

ಕೇವಲ 14 ಹುದ್ದೆಗಳಿಗೆ ಬರೋಬ್ಬರಿ 4,607 ಜನರು ಅರ್ಜಿ ಸಲ್ಲಿಸಿದ್ದರು. ವಿಶೇಷವೆಂದರೆ ಇದರಲ್ಲಿ ಪದವೀಧರರು ಬಿಡಿ, ಸ್ನಾತಕೋತ್ತರ ಪದವೀಧರರೂ ಅರ್ಜಿಗಳೂ ಇದ್ದವು. ಎಂ.ಟೆಕ್‌, ಬಿ.ಟೆಕ್‌ ಮತ್ತು ಎಂಬಿಎ ಪದವೀಧರರು ಕಸಗುಡಿಸುವ, ಶುಚಿಗೊಳಿಸುವ ನೌಕರಿಗೆ ಅರ್ಜಿ ಹಾಕಿದ್ದಾರೆ.

ಒಟ್ಟು 4,607 ಅರ್ಜಿಗಳಲ್ಲಿ 677 ಅರ್ಜಿಗಳನ್ನು ತಿರಸ್ಕರಿಸಲಾಗಿದ್ದು ಇನ್ನುಳಿದ ಅರ್ಜಿಗಳು ಅರ್ಹತಾ ಮಾನದಂಡಗಳನ್ನು ಹೊಂದಿವೆ. ಹೀಗಾಗಿ ಇದೀಗ ಸುಮಾರು 14 ಹುದ್ದೆಗಳಿಗಾಗಿ 3,930 ಜನರು ಕಾಯುತ್ತಾ ಕುಳಿತಿದ್ದಾರೆ.

ಕಸಗುಡಿಸುವ, ನೈರ್ಮಲ್ಯ ಕಾರ್ಮಿಕರ ಕೆಲಸವನ್ನು ಶಿಕ್ಷಿತರು, ಪದವೀಧರರು ಮಾಡಬಾರದು ಎಂದು ಎಲ್ಲೂ ನಿಯಮವಿಲ್ಲ. ಆದರೆ ಪದವೀಧರರು ಅವರು ಶೈಕ್ಷಣಿಕ ಹಿನ್ನೆಲೆಗೆ ಸರಿ ಹೊಂದದ ಕೆಲಸವನ್ನು ಅನಿವಾರ್ಯವಾಗಿ ಒಪ್ಪಿಕೊಳ್ಳಬೇಕಾದುದು ಆರ್ಥಿಕ ದೃಷ್ಟಿಯಿಂದ ಒಳ್ಳೆಯ ಮಾದರಿಯಲ್ಲ.

“ನಮ್ಮಲ್ಲಿ ಪಿಎಚ್‌ಡಿ ಮಾಡಿರುವವರು ಆಡುಗೆ ಕೆಲಸಕ್ಕೆ ಅರ್ಜಿ ಹಾಕುತ್ತಾರೆ. ಡೆಂಟಲ್‌ ಡಾಕ್ಟರ್‌ಗಳು ಸರಕಾರಿ ನೌಕರಿಗೆ ಅರ್ಜಿ ಹಾಕುತ್ತಾರೆ. ಅಂದರೆ ಅವರ ಶೈಕ್ಷಣಿಕ ಹಿನ್ನೆಲೆ ಬಗ್ಗೆ ಅವರಿಗೆಯೇ ನಂಬಿಕೆ ಇಲ್ಲ. ಅಂಥಹದ್ದೊಂದು ವಿಶ್ವಾಸವನ್ನು ನಾವು ಅವರಲ್ಲಿ ಮೂಡಿಸಿಲ್ಲ. ಇಂದು ನಾವು ಶಿಕ್ಷಣ ಹೊಂದಿದ ದೊಡ್ಡ ಸಮುದಾಯವನ್ನು ಸೃಷ್ಟಿಸುತ್ತಿದ್ದೇವೆ ಅಷ್ಟೇ. ಆದರೆ ಅದೇ ಸಮುದಾಯದ ಶೈಕ್ಷಣಿಕ ಗುಣಮಟ್ಟದ ಕಡೆ ನಾವು ಗಮನ ಕೊಡುತ್ತಿಲ್ಲ. ಇದೇ ದೊಡ್ಡ ಸಮಸ್ಯೆಯಾಗಿ ಕಾಡುತ್ತಿದೆ,” ಎನ್ನುತ್ತಾರೆ ಬೆಂಗಳೂರು ವಿವಿ ಅರ್ಥಶಾಸ್ತ್ರ ಪ್ರಾಧ್ಯಾಪಕ ಕೇಶವ್‌.

“ಇನ್ನೊಂದು ಕಡೆ, ನಾನು ಪಕೋಡ ಮಾರ್ತೀನಿ 20 ಲಕ್ಷ ರೂಪಾಯಿ ದುಡಿತೇನೆ ಅಂದರೆ ಅದಕ್ಕೆ ಯಾವುದೇ ಅರ್ಥವಿಲ್ಲ. ಅದಕ್ಕೆ ನೀವು ಮಾಸ್ಟರ್ಸ್‌ ಡಿಗ್ರಿ ಯಾಕೆ ಮಾಡಬೇಕಾಗಿತ್ತು? ಎಸ್‌ಎಸ್‌ಎಲ್‌ಸಿಯಿಂದಲೇ ಪಕೋಡ ಮಾರಬಹುದಾಗಿತ್ತು,” ಎನ್ನುತ್ತಾರೆ ಅವರು.

ಪದವಿ ಪಡೆದು ಪಕೋಡ ಮಾರಲು ಹೋಗುವುದರಿಂದ, “ಶಿಕ್ಷಣದ ಹೆಸರಿನಲ್ಲಿ ಆತ ಇಷ್ಟು ವರ್ಷ ಸಾರ್ವಜನಿಕರ ಹಣವನ್ನು ಹಾಳು ಮಾಡುತ್ತಾನೆ. ತನ್ನ ಅಮೂಲ್ಯ ಸಮಯವನ್ನೂ ವ್ಯರ್ಥ ಮಾಡುತ್ತಾನೆ. ಒಂದೊಮ್ಮೆ ಆತ 10ನೇ ತರಗತಿ ನಂತರ ಮತ್ತಷ್ಟು ಪಕೋಡದ ಬಗ್ಗೆಯೇ ಕಲಿತಿದ್ದರೆ ಇಂದು ಅದೇ ಕ್ಷೇತ್ರದಲ್ಲಿ ನೈಪುಣ್ಯತೆ ಪಡೆದುಕೊಳ್ಳುತ್ತಿದ್ದ. ಈಗ ಹೊಸದಾಗಿ ಆ ಉದ್ಯೋಗವನ್ನು ಆರಂಭಿಸುತ್ತಿದ್ದಾನೆ. ಹೀಗಾದಾಗ ವಿಫಲತೆಯ ಸಾಧ್ಯತೆಗಳು ಹೆಚ್ಚು. ಇನ್ನೊಂದು ಕಡೆ ನಾನು ಪದವೀಧರನಾಗಿ ಈ ಕೆಲಸ ಮಾಡುತ್ತಿದ್ದೇನಲ್ಲಾ ಎಂಬ ಕೀಳರಿಮೆಯೂ ಆತನಿಗಿರುತ್ತದೆ. ಒಂದು ಕಡೆ ಈ ಭ್ರಮೆ, ಇನ್ನೊಂದು ಕಡೆ ಆತನಿಗೆ ಈ ಉದ್ಯೋಗದ ಬಗ್ಗೆ ಸರಿಯಾದ ಜ್ಞಾನವಿಲ್ಲ. ಹೀಗಾದಾಗ ಯಾವುದರಲ್ಲೂ ಆತ ಯಶಸ್ವಿಯಾಗಲು,” ಸಾಧ್ಯವಿಲ್ಲ ಎನ್ನುತ್ತಾರೆ ಕೇಶವ್‌.

ತಮಿಳುನಾಡಿನ ವಿಧಾನಸಭೆಯಲ್ಲಿ ಕಸಗುಡಿಸುವ ಕೆಲಸಕ್ಕೆ ಅರ್ಜಿ ಹಾಕಿದವರ ಕಥೆಯೂ ಇದೇ ಆಗಿದೆ ಎಂಬುದನ್ನು ಬಿಡಿಸಿ ಹೇಳಬೇಕಿಲ್ಲ.

(ಸಾಂದರ್ಭಿಕ ಚಿತ್ರ)

Also read: ಎಚ್ಚರಿಕೆಯ ಗಂಟೆ: ಮೋದಿ ಯುಗದಲ್ಲಿ ನೀವು ಊಹಿಸದ ಮಟ್ಟಕ್ಕೆ ಏರಿಕೆಯಾಗಿದೆ ನಿರುದ್ಯೋಗ