samachara
www.samachara.com
‘ಮಂಡ್ಯಕ್ಕೆ ಸುಮಲತಾ ಕೊಡುಗೆ ಏನು?’: ಸಂಪಾದಕರ ಸಭೆಯಲ್ಲಿ ಸಿಎಂ ಪ್ರಶ್ನೆ
ಸುದ್ದಿ ಸಾರ

‘ಮಂಡ್ಯಕ್ಕೆ ಸುಮಲತಾ ಕೊಡುಗೆ ಏನು?’: ಸಂಪಾದಕರ ಸಭೆಯಲ್ಲಿ ಸಿಎಂ ಪ್ರಶ್ನೆ

“ಅಂಬರೀಷ್ ಬಗ್ಗೆ ಜನರಿಗಿರುವ ಭಾವನಾತ್ಮಕ ವಿಷಯವನ್ನು ಮುಂದಿಟ್ಟುಕೊಂಡು ಸುಮಲತಾ ರಾಜಕೀಯಕ್ಕೆ ಇಳಿಯಲು ಮುಂದಾಗಿದ್ದಾರೆ...”

Team Samachara

ಮಂಡ್ಯದಲ್ಲಿ ಚುನಾವಣೆಗೆ ಸ್ಪರ್ಧಿಸಲು ಮುಂದಾಗಿರುವ ಸುಮಲತಾ ಅವರು ಮಂಡ್ಯಕ್ಕೆ ನೀಡಿರುವ ಕೊಡುಗೆ ಏನು ಎಂದು ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಪ್ರಶ್ನಿಸಿದ್ದಾರೆ.

ಬಜೆಟ್‌ ಪೂರ್ವಭಾವಿಯಾಗಿ ವಿಧಾನಸೌಧದಲ್ಲಿ ಸೋಮವಾರ ನಡೆದ ಪತ್ರಿಕಾ ಸಂಪಾದಕರ ಜತೆಗಿನ ಸಭೆಯಲ್ಲಿ ಮಾತನಾಡಿದ ಅವರು, “ರಾಜಕಾರಣ ಭಾವನಾತ್ಮಕ ಅಲೆಗಳ ಮೇಲೆ ನಡೆಯುತ್ತದೆ. ಉದಾಹರಣೆಗೆ ಈಗ ಮಂಡ್ಯದಲ್ಲಿ ಸ್ಪರ್ಧಿಸಲು ಮುಂದಾಗಿರುವ ಅಂಬರೀಷ್ ಅವರ ಪತ್ನಿ ಸುಮಲತಾ ಅವರ ಸಾಧನೆ ಏನು? ಅಂಬರೀಷ್ ಅವರ ಸಾಧನೆಗಳನ್ನು ನಾನು ಅಲ್ಲಗಳೆಯುವುದಿಲ್ಲ. ಆದರೆ, ಸುಮಲತಾ ಅವರು ಮಂಡ್ಯ ಜಿಲ್ಲೆಗೆ ನೀಡಿರುವ ಕಾಣಿಕೆ ಏನು?” ಎಂದಿದ್ದಾರೆ.

“ಅಂಬರೀಷ್ ಬಗ್ಗೆ ಜನರಿಗಿದ್ದ ಪ್ರೀತಿಯನ್ನಲ್ಲವೇ ಸುಮಲತಾ ಅವರು ಬಳಸಿಕೊಳ್ಳಲು ಹೊರಟಿರುವುದು? ಅಂದರೆ ಅಂಬರೀಷ್ ಬಗ್ಗೆ ಜನರಿಗಿರುವ ಭಾವನಾತ್ಮಕ ವಿಷಯವನ್ನು ಮುಂದಿಟ್ಟುಕೊಂಡು ಸುಮಲತಾ ರಾಜಕೀಯಕ್ಕೆ ಇಳಿಯಲು ಮುಂದಾಗಿದ್ದಾರೆ. ಮಂಡ್ಯದಲ್ಲಿ ನನ್ನ ಮಗ ನಿಖಿಲ್ ಕಣಕ್ಕಿಳಿಸಲು ನಾನು ತೀರ್ಮಾನಿಸಿಲ್ಲ. ಆದರೆ ಕಾರ್ಯಕರ್ತರು ಆ ರೀತಿ ಒತ್ತಡ ಹೇರುತ್ತಿದ್ದಾರೆ” ಎಂದರು.

“ಇಂದಿನ ಪರಿಸ್ಥಿತಿ ಹೇಗಿದೆ ಎಂದರೆ ಐಎಎಸ್ ಅಧಿಕಾರಿಗಳ ಮಕ್ಕಳು ಐಎಎಸ್ ಮಾಡುತ್ತಿದ್ದಾರೆ. ಉದ್ಯಮಿಗಳ ಮಕ್ಕಳು ಉದ್ಯಮಿಗಳಾಗುತ್ತಿದ್ದಾರೆ. ಪೂಜಾರಿಗಳ ಮಕ್ಕಳು ಪೂಜಾರಿಗಳಾಗುತ್ತಿದ್ದಾರೆ. ಚಿತ್ರ ನಟರ ಮಕ್ಕಳು ಚಿತ್ರರಂಗಕ್ಕೆ ಬರುತ್ತಿದ್ದಾರೆ. ಅದೇ ರೀತಿ ರಾಜಕಾರಣಿಗಳ ಮಕ್ಕಳು ರಾಜಕೀಯಕ್ಕೆ ಬರುತ್ತಿದ್ದಾರೆ. ಹೀಗಾಗಿ ನಿಖಿಲ್ ರಾಜಕೀಯಕ್ಕೆ ಇಳಿಯುವುದು ಅನಿವಾರ್ಯವಾದರೆ ಅದನ್ನು ತಳ್ಳಿ ಹಾಕಲು ಸಾಧ್ಯವಿಲ್ಲ. ಆದರೆ ಈ ವಿಷಯದಲ್ಲಿ ತೀರ್ಮಾನ ತೆಗೆದುಕೊಳ್ಳಬೇಕಿರುವುದು ಪಕ್ಷ” ಎಂದು ಹೇಳಿದರು.

ಬಿಜೆಪಿ ಫ್ಯೂಸ್ ಕೀಳೋದು ಗೊತ್ತು:

“ರಾಜ್ಯದಲ್ಲಿರುವ ಸಮ್ಮಿಶ್ರ ಸರಕಾರವನ್ನು ಬೀಳಿಸಿ ಅಧಿಕಾರಕ್ಕೆ ಬರಲು ಬಿಜೆಪಿ ಯತ್ನಿಸಿದರೆ ಅದರ ಫ್ಯೂಸ್ ಕಿತ್ತು ಹಾಕಿ ಉಳಿದುಕೊಳ್ಳುವುದು ಹೇಗೆ ಎಂದು ನನಗೆ ಗೊತ್ತಿದೆ. ಹೀಗಾಗಿ ಅದು ಆಪರೇಷನ್ ಕಮಲದಂತಹ ದುಸ್ಸಾಹಸಕ್ಕೆ ಕೈ ಹಾಕದೆ ಸುಮ್ಮನಿರುವುದು ಒಳ್ಳೆಯದು” ಎಂದು ತಿಳಿಸಿದರು.

“ಸರ್ಕಾರ ಬೀಳಿಸಲು ಬಿಜೆಪಿ ಯತ್ನಿಸಿದರೆ ಆ ಪಕ್ಷದ ಐದಾರು ಮಂದಿ ಶಾಸಕರು ರಾಜೀನಾಮೆ ನೀಡಿ ನನ್ನ ಸರಕಾರದ ರಕ್ಷಣೆಗೆ ಬರುತ್ತಾರೆ. ಹದಿನಾರು ಮಂದಿ ಶಾಸಕರನ್ನು ಸಮ್ಮಿಶ್ರ ಸರ್ಕಾರದ ಬೌಂಡರಿಯಿಂದ ಕಿತ್ತುಕೊಳ್ಳುತ್ತೇವೆ ಎಂದು ಅವರು ಹೊರಟಿದ್ದಾರೆ. ಅಂತಹ ದುಸ್ಸಾಹಸ ಮಾಡುವುದರಲ್ಲಿ ಅರ್ಥವಿಲ್ಲ. ಒಂದು ವೇಳೆ ಅವರು ಅಂತಹ ಸಾಹಸ ಮಾಡಿದರೆ ಬಿಜೆಪಿಯ ಫ್ಯೂಸ್ ಕಿತ್ತು,ಸಮ್ಮಿಶ್ರ ಸರಕಾರಕ್ಕೆ ಅದೇ ಫ್ಯೂಸನ್ನು ಬಳಸಿ ಬೆಳಕನ್ನು ಉಳಿಸಿಕೊಳ್ಳುವುದು ಗೊತ್ತು” ಎಂದರು.

“ಭಾವನಾತ್ಮಕವಾಗಿ ವರ್ತಿಸುವುದು ನನ್ನ ಬಲಹೀನತೆಯೂ ಹೌದು, ನನ್ನ ಶಕ್ತಿಯೂ ಹೌದು. ಯಾಕೆಂದರೆ ನಾನಿರುವುದೇ ಹಾಗೆ. ಇದು ಜನರಿಗೂ ಗೊತ್ತಿದೆ. ಹೀಗಾಗಿ ಅವರು ಕೂಡಾ ನಾನು ಇರುವಂತೆಯೇ ನನ್ನನ್ನು ಒಪ್ಪಿಕೊಂಡಿದ್ದಾರೆ. ಈ ತಿಂಗಳ ಎಂಟರಂದು ನಾನು ಬಜೆಟ್ ಮಂಡಿಸುತ್ತಿದ್ದೇನೆ. ರಾಜ್ಯದ ರೈತರಿಗೆ ಅನುಕೂಲವಾಗಲಿ ಎಂಬ ಕಾರಣಕ್ಕಾಗಿ ಸರ್ಕಾರದ ವತಿಯಿಂದಲೇ ಬೆಳೆ ವಿಮೆ ಯೋಜನೆಯನ್ನು ಪ್ರಾರಂಭಿಸುವ ಉದ್ದೇಶವಿದೆ” ಎಂದು ಹೇಳಿದರು.