samachara
www.samachara.com
ದೀದೀ ವೇದಿಕೆಯಲ್ಲಿ ರಾಜಕೀಯ ಒಗ್ಗಟ್ಟು; ಬಿಜೆಪಿ ವಿರುದ್ಧ ಕೈಜೋಡಿಸಿದ ಎಡಪಕ್ಷಗಳು
ಸುದ್ದಿ ಸಾರ

ದೀದೀ ವೇದಿಕೆಯಲ್ಲಿ ರಾಜಕೀಯ ಒಗ್ಗಟ್ಟು; ಬಿಜೆಪಿ ವಿರುದ್ಧ ಕೈಜೋಡಿಸಿದ ಎಡಪಕ್ಷಗಳು

ಎಲ್ಲಾ ಎಡಪಕ್ಷಗಳ ಮುಖಂಡರೂ ಬಿಜೆಪಿಯನ್ನು ಅಧಿಕಾರದಿಂದ ಕಿತ್ತೊಗೆಯಬೇಕಾದ ಅನಿವಾರ್ಯತೆಯ ಬಗ್ಗೆ ಮಾತನಾಡಿದ್ದಾರೆ.

Team Samachara

ಕೋಲ್ಕತ್ತದಲ್ಲಿ ಶನಿವಾರ ಬಿಜೆಪಿ ವಿರುದ್ಧದ ಬಹುದೊಡ್ಡ ರಾಜಕೀಯ ಒಗ್ಗಟ್ಟು ಪ್ರದರ್ಶನವಾಗಿದೆ. ತೃಣಮೂಲ ಕಾಂಗ್ರೆಸ್‌ ಆಯೋಜಿಸಿದ್ದ 'ಯುನೈಟೆಡ್‌ ಇಂಡಿಯಾ ರ್ಯಾಲಿ'ಯಲ್ಲಿ ಕಾಂಗ್ರೆಸ್, ಎಸ್‌ಪಿ, ಬಿಎಸ್‌ಪಿ, ಆರ್‌ಜೆಡಿ, ಜೆಡಿಎಸ್‌ ಸೇರಿದಂತೆ ಎಲ್ಲಾ ಎಡಪಕ್ಷಗಳ ಮುಖಂಡರೂ ಭಾಗವಹಿಸಿ ಬಿಜೆಪಿಯನ್ನು ಅಧಿಕಾರದಿಂದ ಕಿತ್ತೊಗೆಯಬೇಕಾದ ಅನಿವಾರ್ಯತೆಯ ಬಗ್ಗೆ ಮಾತನಾಡಿದ್ದಾರೆ.

ಸಭೆಯಲ್ಲಿ ಮಾತನಾಡಿದ ಬಿಜೆಪಿ ನಾಯಕ ಶತ್ರುಘ್ನ ಸಿನ್ಹ, "ರಫೇಲ್‌ ಒಪ್ಪಂದದ ಕುರಿತು ವಿರೋಧ ಪಕ್ಷಗಳು ಎತ್ತಿರುವ ಪ್ರಶ್ನೆಗಳಿಗೆ ಮೋದಿ ಉತ್ತರಿಸಬೇಕು. ನೀವು ಉತ್ತರಿಸುವವರೆಗೂ 'ಚೌಕೀದಾರ್‌ ಚೋರ್‌ ಹೈ' (ಕಾವಲುಗಾರನೇ ಕಳ್ಳ) ಎಂದೇ ಜನ ನಿಮ್ಮನ್ನು ಕರೆಯುತ್ತಾರೆ" ಎಂದಿದ್ದಾರೆ.

ಮೈತ್ರಿ ಸರಕಾರದ ಅಸ್ಥಿರತೆಯ ಬಗ್ಗೆ ಮೋದಿ ಹೇಳಿಕೆಗೆ ಈ ವೇದಿಕೆಯಿಂದ ಪ್ರತಿಕ್ರಿಯೆ ನೀಡಿರುವ ಜೆಡಿಎಸ್ ವರಿಷ್ಠ ಎಚ್‌.ಡಿ. ದೇವೇಗೌಡ, "ಮೈತ್ರಿ ಸರಕಾರಗಳೂ ಸ್ಥಿರವಾದ ಸರಕಾರ ನಡೆಸುತ್ತವೆ ಎಂಬುದನ್ನು ನಾವು ತೋರಿಸುತ್ತೇವೆ. ಈ ಬಾರಿ ಎಲ್ಲಾ ಎಡ ಪಕ್ಷಗಳೂ ಒಂದಾಗಿ ಬಿಜೆಪಿಗೆ ತಕ್ಕ ಉತ್ತರ ನೀಡುತ್ತೇವೆ" ಎಂದು ಹೇಳಿದ್ದಾರೆ.

Also read: ‘ಬಿಜೆಪಿ 125’: ಬಂಗಾಳದಲ್ಲಿ ದೀದೀ ಅಬ್ಬರ, ಬಿಜೆಪಿ ವಿರೋಧಕ್ಕೆ ಸಜ್ಜುಗೊಂಡ ವೇದಿಕೆ

"ಮೋದಿ ಕೆಲಸ ಮಾಡುವ ಪ್ರಧಾನಿಯಲ್ಲ, ಕೇವಲ ಪ್ರಚಾರ ಬಯಸುವ ಪ್ರಧಾನಿ. ಜನ್‌ಧನ್‌, ಮುದ್ರಾ, ಉತ್ತಮ ಆಡಳಿತ, ಸ್ಮಾರ್ಟ್‌ ಸಿಟಿ, ಎರಡು ಕೋಟಿ ಉದ್ಯೋಗ, ಅಚ್ಚೇದಿನ್‌ - ಹೀಗೆ ಬಿಜೆಪಿ ಕೇವಲ ಹಗಲುಗನಸು ತೋರಿಸಿತೇ ಹೊರತು ಯಾವುದೂ ಜಾರಿಗೆ ಬರಲಿಲ್ಲ" ಎಂದು ಟಿಡಿಪಿ ಅಧ್ಯಕ್ಷ ಎನ್‌. ಚಂದ್ರಬಾಬು ನಾಯ್ಡು ಹೇಳಿದರು.

"ಮೋದಿ 'ನಾನು ತಿನ್ನುವುದಿಲ್ಲ, ತಿನ್ನಲೂ ಬಿಡುವುದಿಲ್ಲ' ಎಂದು ಹೇಳುತ್ತಲೇ ಉದ್ಯಮಿಗಳಿಗೆ ತಿನ್ನಿಸುತ್ತಿದ್ದಾರೆ. ಜಾತ್ಯತೀತ ಮೌಲ್ಯಗಳ ಉಳಿವಿಗಾಗಿ ನಾವೆಲ್ಲರೂ ಈಗ ಒಗ್ಗಟ್ಟಾಗಬೇಕಿದೆ" ಎಂದು ಕಾಂಗ್ರೆಸ್‌ ಮುಖಂಡ ಮಲ್ಲಿಕಾರ್ಜುನ ಖರ್ಗೆ ಹೇಳಿದರು.

ಆಮ್‌ ಆದ್ಮಿ ಪಕ್ಷದ ಅರವಿಂದ ಕೇಜ್ರಿವಾಲ್, "ಕಳೆದ 5 ವರ್ಷಗಳಲ್ಲಿ ಮೋದಿ- ಅಮಿತ್‌ ಶಾ ಜೋಡಿ ಧರ್ಮದ ಆಧಾರದಲ್ಲಿ ಸಮಾಜವನ್ನು ಒಡೆದಿದೆ. ಈ ಜೋಡಿಯನ್ನು ಅಧಿಕಾರದಿಂದ ದೂರ ಇಡಬೇಕಾದ ಅಗತ್ಯ ಈಗ ಬಂದಿದೆ. ಮೋದಿ ಸರಕಾರ ನೋಟು ರದ್ಧತಿ ಹಾಗೂ ಕೃಷಿ ವಿಮಾ ಕಂಪನಿಗಳ ಮೂಲಕ ಜನಸಾಮಾನ್ಯರು ಹಾಗೂ ರೈತರನ್ನು ಕಂಗೆಡಿಸಿದೆ" ಎಂದಿದ್ದಾರೆ.