samachara
www.samachara.com
ಡಾಲರ್ ಮುಂದೆ ರೂಪಾಯಿ ಮೌಲ್ಯ ಕುಸಿತ, ಇತ್ತ ಏರಿಕೆ ಹಾದಿಯಲ್ಲಿ ತೈಲ ಬೆಲೆ
ಸುದ್ದಿ ಸಾರ

ಡಾಲರ್ ಮುಂದೆ ರೂಪಾಯಿ ಮೌಲ್ಯ ಕುಸಿತ, ಇತ್ತ ಏರಿಕೆ ಹಾದಿಯಲ್ಲಿ ತೈಲ ಬೆಲೆ

ಜನವರಿ 10 ರಿಂದ ಪೆಟ್ರೋಲ್‌ ಮತ್ತು ಡೀಸೆಲ್‌ ಬೆಲೆಯಲ್ಲಿ ನಿಧಾನಗತಿಯ ಏರಿಕೆ ಕಂಡು ಬಂದಿದೆ. ಬೆಂಗಳೂರಿನಲ್ಲಿ ಇಂದು ಕೂಡ ಪೆಟ್ರೋಲ್‌ ಬೆಲೆಯಲ್ಲಿ 21 ಪೈಸೆ, ಡೀಸೆಲ್‌ ಬೆಲೆಯಲ್ಲಿ 43 ಪೈಸೆ ಏರಿಕೆಯಾಗಿದೆ.

Team Samachara

ಡಾಲರ್ ಎದುರು ರೂಪಾಯಿ ಮೌಲ್ಯ ಮತ್ತೆ ಕುಸಿತದ ಹಾದಿ ಹಿಡಿದಿದೆ. ಮಂಗಳವಾರದ ಅಂತ್ಯಕ್ಕೆ ಷೇರುಪೇಟೆ ಸೂಚ್ಯಂಕದಲ್ಲಿ ಒಂದು ಡಾಲರ್‌ಗೆ 71.04 ರೂ. ಇದ್ದ ರೂಪಾಯಿ ಮೌಲ್ಯ ಬುಧವಾರದ ಆರಂಭದಲ್ಲೇ 71.24 ರೂ.ಗೆ ಇಳಿಕೆಯಾಗುವುದರೊಂದಿಗೆ ದಾಖಲೆಯ ಕುಸಿತ ಕಂಡಿದೆ.

ಇಂಗ್ಲೆಂಡ್, ಯೂರೋಪ್ ಒಕ್ಕೂಟದಿಂದ ಹೊರಬರುವ ‘ಬ್ರೆಕ್ಸಿಟ್ ಒಪ್ಪಂದ’ ಅನಿಶ್ಚಿತತೆಯಿಂದ ಕೂಡಿದ್ದು ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಸಿದೆ. ಇದು ಕೂಡ ರೂಪಾಯಿ ಮೌಲ್ಯ ಇಳಿಕೆಗೆ ಸಹಾಯ ಮಾಡಿದೆ.

ಸತತ ಇಳಿಕೆಯ ಹಾದಿಯಲ್ಲಿದ್ದ ರೂಪಾಯಿ ಡಿಸೆಂಬರ್‌ನಲ್ಲಿ ಸ್ವಲ್ಪ ಮಟ್ಟಿಗೆ ಚೇತರಿಸಿಕೊಂಡಿತ್ತು. ಕಳೆದ ಡಿಸೆಂಬರ್‌ಗೆ ಹೋಲಿಸಿದರೆ ಚಿನ್ನದ ಆಮದು ಶೇಕಡಾ 24ರಷ್ಟು ಕುಸಿತವಾಗಿದ್ದು ರೂಪಾಯಿ ಮೌಲ್ಯ ಏರಿಕೆಗೆ ಕೊಡುಗೆ ನೀಡಿತ್ತು. ಆದರೆ ಇದೀಗ ಕಳೆದ 4-5 ದಿನಗಳಿಂದ ದೇಶದ ಕರೆನ್ಸಿಯ ಮೌಲ್ಯ ಕುಸಿಯುತ್ತಿದೆ.

ಬುಧವಾರ ಬೆಳಿಗ್ಗೆ ಡಾಲರ್‌ ಎದುರು 71.24 ರೂಪಾಯಿಗೆ ಕುಸಿತವಾಗಿದ್ದ ರೂಪಾಯಿ ಮೌಲ್ಯ ಸದ್ಯ 71.16 ರೂಪಾಯಿಯಲ್ಲಿ ಸ್ಥಿರವಾಗಿದೆ. ಒಂದೆಡೆ ರೂಪಾಯಿ ಕುಸಿತ ಮುಂದುವರಿದಿದ್ದರೆ ಇನ್ನೊಂದು ಕಡೆ ತೈಲ ಬೆಲೆ ಏರಿಕೆಯ ಹಾದಿ ಹಿಡಿದಿದೆ.

ಜನವರಿ 10 ರಿಂದ ಪೆಟ್ರೋಲ್‌ ಮತ್ತು ಡೀಸೆಲ್‌ ಬೆಲೆಯಲ್ಲಿ ನಿಧಾನಗತಿಯ ಏರಿಕೆ ಕಂಡು ಬಂದಿದೆ. ಬೆಂಗಳೂರಿನಲ್ಲಿ ಇಂದು ಕೂಡ ಪೆಟ್ರೋಲ್‌ ಬೆಲೆಯಲ್ಲಿ 21 ಪೈಸೆ, ಡೀಸೆಲ್‌ ಬೆಲೆಯಲ್ಲಿ 43 ಪೈಸೆ ಏರಿಕೆಯಾಗಿದೆ. ಸದ್ಯ ಬೆಂಗಳೂರಿನಲ್ಲಿ ಲೀಟರ್‌ ಪೆಟ್ರೋಲ್‌ಗೆ 72.68 ರೂಪಾಯಿ ದರವಿದ್ದರೆ, ಡೀಸೆಲ್‌ಗೆ 66.75 ರೂಪಾಯಿ ದರವಿದೆ.

ಚಿತ್ರ ಕೃಪೆ: ಫಾರ್ಚೂನ್‌ ಇಂಡಿಯಾ