ಮಹಾರಾಷ್ಟ್ರದ ಸೇನಾ ಡಿಪೋದಲ್ಲಿ ಸ್ಫೋಟ, ಆರು ಜನ ಬಲಿ
ಸುದ್ದಿ ಸಾರ

ಮಹಾರಾಷ್ಟ್ರದ ಸೇನಾ ಡಿಪೋದಲ್ಲಿ ಸ್ಫೋಟ, ಆರು ಜನ ಬಲಿ

ಡಿಪೋದಲ್ಲಿ ಅನಗತ್ಯ ಯುದ್ಧ ಸಾಮಾಗ್ರಿಗಳನ್ನು ನಾಶಗೊಳಿಸುವ ಪ್ರಕ್ರಿಯೆಯ ಸಂದರ್ಭ ಈ ಸ್ಫೋಟ ಸಂಭವಿಸಿದೆ.

ಮಹಾರಾಷ್ಟ್ರದ ವಾರ್ದಾ ಜಿಲ್ಲೆಯ ಪುಲ್ಗಾವ್‌ನಲ್ಲಿರುವ ಸೇನೆಗೆ ಸೇರಿದ ‘ಕೇಂದ್ರ ಯುದ್ಧ ಸಾಮಾಗ್ರಿಗಳ ಘಟಕ’ದಲ್ಲಿ ಸಂಭವಿಸಿದ ಸ್ಫೋಟದಲ್ಲಿ ಆರು ಜನರು ಅಸುನೀಗಿದ್ದಾರೆ. ಘಟನೆಯಲ್ಲಿ ನಾಲ್ವರು ಗಾಯಗೊಂಡಿದ್ದಾರೆ.

ಘಟಕದಲ್ಲಿ ಅನಗತ್ಯ ಯುದ್ಧ ಸಾಮಾಗ್ರಿಗಳನ್ನು ನಾಶಗೊಳಿಸುವ ಪ್ರಕ್ರಿಯೆಯ ಸಂದರ್ಭ ಈ ಸ್ಫೋಟ ಸಂಭವಿಸಿದೆ. ವರದಿಗಳ ಪ್ರಕಾರ ಮಂಗಳವಾರ ಮುಂಜಾನೆ ಈ ಸ್ಫೋಟ ನಡೆದಿದೆ.

ಮಧ್ಯ ಪ್ರದೇಶದ ಜಬಲ್‌ಪುರ ಸಮೀಪದಲ್ಲಿರುವ ಖಮರಿಯಾ ಘಟಕದಿಂದ ಬೇಡದ ಯುದ್ಧ ಸಾಮಾಗ್ರಿಗಳನ್ನು ನಾಶಗೊಳಿಸಲೆಂದು ಪುಲ್ಗಾವ್‌ಗೆ ತರಲಾಗಿತ್ತು. ‘ಖಮಾರಿಯಾದಲ್ಲಿರುವ ಯುದ್ಧ ಸಾಮಾಗ್ರಿಗಳ ಫ್ಯಾಕ್ಟರಿಯಲ್ಲಿ ಯುದ್ಧ ಸಾಮಾಗ್ರಿಗಳ ನಿಯಂತ್ರಿತ ನಾಶ ಸೌಲಭ್ಯ ಇಲ್ಲದ ಕಾರಣ ಪುಲ್ಗಾವ್‌ಗೆ ತರಲಾಗಿತ್ತು’ ಎಂದು ರಕ್ಷಣಾ ಇಲಾಖೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಸಾಮಾನ್ಯವಾಗಿ ಪುಲ್ಗಾವ್‌ನಲ್ಲೇ ಸೇನೆಗೆ ಸೇರಿದ ಸಾಮಾಗ್ರಿಗಳನ್ನು ನಾಶ ಪಡಿಸುವುದು ವಾಡಿಕೆ. ಅದರಂತೆ ಇಂದು ಮುಂಜಾನೆ 6 ರಿಂದ 7 ಗಂಟೆ ಅವಧಿಯಲ್ಲಿ ಶಸ್ತ್ರಾಸ್ತ್ರ ಮದ್ದುಗುಂಡುಗಳನ್ನು ನಾಶ ಪಡಿಸುತ್ತಿದ್ದ ಸಂದರ್ಭ ಈ ಘಟನೆ ನಡೆದಿದೆ.

ಘಟನೆಯಲ್ಲಿ ಯುದ್ಧ ಸಮಾಗ್ರಿಗಳ ಫ್ಯಾಕ್ಟರಿಯ ಮೂವರು ಸಿಬ್ಬಂದಿಗಳು ಸೇರಿ ಒಟ್ಟು ಆರು ಜನರು ಸಾವನ್ನಪ್ಪಿದ್ದಾರೆ. ಇನ್ನು ನಾಲ್ಕು ಜನ ಗಾಯಗೊಂಡಿದ್ದಾರೆ. ಗಾಯಗೊಂಡವರಲ್ಲಿ ಸ್ಥಳೀಯ ಗ್ರಾಮಸ್ಥರು ಸೇರಿದ್ದಾರೆ.

ಶಸ್ತ್ರಾಸ್ತ್ರಗಳನ್ನು ನಾಶಪಡಿಸುವ ವೇಳೆ ಗ್ರಾಮಸ್ಥರು ಯಾಕೆ ಸಮೀಪ ಬಂದಿದ್ದರು ಎಂಬ ಪ್ರಶ್ನೆ ಉದ್ಭವಿಸಿದೆ. ಈ ಬಗ್ಗೆ ತನಿಖೆಗೆ ಆದೇಶ ನೀಡಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಇದೇ ಪುಲ್ಗಾವ್‌ ಫ್ಯಾಕ್ಟರಿಯಲ್ಲಿ ಮೇ 2016ರಲ್ಲಿ ಭೀಕರ ಬೆಂಕಿ ಅವಘಡ ಸಂಭವಿಸಿದ್ದನ್ನು ಇದೇ ಸಂದರ್ಭದಲ್ಲಿ ಸ್ಮರಿಸಿಕೊಳ್ಳಬಹುದಾಗಿದೆ. ಈ ಘಟನೆಯಲ್ಲಿ ಇಬ್ಬರು ಸೇನಾ ಅಧಿಕಾರಿಗಳು 15 ಭದ್ರತಾ ಸಿಬ್ಬಂದಿಗಳೂ ಸೇರಿ 17 ಜನರು ಸಾವನ್ನಪ್ಪಿದ್ದರು. 19 ಜನರು ಈ ಘಟನೆಯಲ್ಲಿ ಗಾಯಗೊಂಡಿದ್ದರು. ಇದೀಗ ಎರಡು ವರ್ಷಗಳ ನಂತರ ಇದೇ ಘಟಕದಲ್ಲಿ ಮತ್ತೊಂದು ಸ್ಫೋಟ ಸಂಭವಿಸಿದ್ದು ಆರು ಜನರು ಬಲಿಯಾಗಿದ್ದಾರೆ.