ಉಪಚುನಾವಣೆ ಕಣ: ಬಳ್ಳಾರಿ ಗಣಿಧೂಳಿಗೆ ‘ವಿಜಯನಗರ ವೈಭವ’ದ ಕನಸು ಬಿತ್ತಿದ ಡಿಕೆಶಿ!
ಸುದ್ದಿ ಸಾರ

ಉಪಚುನಾವಣೆ ಕಣ: ಬಳ್ಳಾರಿ ಗಣಿಧೂಳಿಗೆ ‘ವಿಜಯನಗರ ವೈಭವ’ದ ಕನಸು ಬಿತ್ತಿದ ಡಿಕೆಶಿ!

ಬಳ್ಳಾರಿಯಲ್ಲಿ ಗಣಿಧೂಳು ನಿವಾರಿಸಿ ವಿಜಯನಗರ ಸಾಮ್ರಾಜ್ಯದ ವೈಭವ ಮರಳಿತರುವ ಮಾತನ್ನಾಡಿರುವ ಡಿ.ಕೆ.ಶಿವಕುಮಾರ್‌, ಗತವೈಭವ ಮರಳಿ ತರಲು ಉಗ್ರಪ್ಪ ಅವರನ್ನು ಗೆಲ್ಲಿಸಿ ಎಂದಿದ್ದಾರೆ.

ಸಚಿವ ಡಿ.ಕೆ. ಶಿವಕುಮಾರ್‌ ಬಳ್ಳಾರಿಯಲ್ಲಿ ಗುರುವಾರ ಕರೆದಿದ್ದ ಸುದ್ದಿಗೋಷ್ಠಿ ಭಾರೀ ಕುತೂಹಲ ಮೂಡಿಸಿತ್ತು ಶಿವಕುಮಾರ್ ಬಿಜೆಪಿ ಮುಖಂಡರ ವಿರುದ್ಧ ಮಹತ್ವದ ದಾಖಲೆಗಳನ್ನು ಬಿಡುಗಡೆ ಮಾಡುವ ನಿರೀಕ್ಷೆ ಇದೆ ಎಂದು ಸುದ್ದಿ ವಾಹಿನಿಗಳು ಸದ್ದು ಮಾಡಿದ್ದವು. ಆದರೆ, ಡಿಕೆಶಿ ಸುದ್ದಿಗೋಷ್ಠಿಯಲ್ಲಿ ಬಳ್ಳಾರಿ ಗಣಿಧೂಳು ನಿವಾರಿಸಿ ವಿಜಯನಗರ ಸಾಮ್ರಾಜ್ಯದ ವೈಭವ ಮರಳಿತರುವ ಮಾತನ್ನಾಡಿದರು. ಗಣಿನಾಡಿನಲ್ಲಿ ಗತವೈಭವ ಮರಳಿ ತರಲು ಕಾಂಗ್ರೆಸ್ ಅಭ್ಯರ್ಥಿ ವಿ.ಎಸ್‌. ಉಗ್ರಪ್ಪ ಅವರನ್ನು ಗೆಲ್ಲಿಸಿ ಎಂದರು.

“ಬಳ್ಳಾರಿಯಲ್ಲಿ ಧೂಳಿನ ಸಮಸ್ಯೆ ಹೆಚ್ಚಾಗಿದೆ. ಇದರಿಂದ ಜನರ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗುತ್ತಿದೆ. ಈ ಸಮಸ್ಯೆ ನಿವಾರಣೆಗೆ ಹೆಚ್ಚೆಚ್ಚು ಮರಗಳನ್ನು ಬೆಳೆಸುವ ಯೋಜನೆ ರೂಪಿಸಿಕೊಂಡಿದ್ದೇವೆ. ಗಣಿ ಪರಿಸರ ಪುನಶ್ಚೇತನಕ್ಕಾಗಿ ಬಳ್ಳಾರಿ ಜಿಲ್ಲೆಗೆ ಸುಮಾರು 13,500 ಕೋಟಿ ರೂಪಾಯಿ ಮೀಸಲಿದೆ. ಈ ಹಣವನ್ನು ಪಾರದರ್ಶಕವಾಗಿ ಬಳಸಿಕೊಂಡು ಸಮಸ್ಯೆಗಳನ್ನು ನಿವಾರಿಸುತ್ತೇವೆ” ಎಂದು ತಿಳಿಸಿದರು.

“ಬಳ್ಳಾರಿ ಜಿಲ್ಲೆಯಲ್ಲಿ ಸಾಕಷ್ಟು ನೀರು ಲಭ್ಯವಿದ್ದರೂ ಹಲವು ತಾಲ್ಲೂಕುಗಳಿಗೆ ನೀರಿನ ಹಂಚಿಕೆ ಸಮರ್ಪಕವಾಗಿ ಆಗುತ್ತಿಲ್ಲ. ಜನರಿಗೆ ಕುಡಿಯುವ ನೀರು, ರಸ್ತೆ, ಉತ್ತಮ ಪರಿಸರ, ಶಿಕ್ಷಣ, ಆರೋಗ್ಯ, ಕೃಷಿಗೆ ನೀರನ್ನು ಒದಗಿಸುವುದು ನಮ್ಮ ಮುಂದಿರುವ ಜವಾಬ್ದಾರಿ. ಮುಂದಿನ ಆರು ತಿಂಗಳಲ್ಲಿ ಬಳ್ಲಾರಿಯ ಚಿತ್ರಣ ಬದಲಾಗಲಿದೆ. ಹಿಂದೆ ಇದ್ದಂಥ ಭಯದ ವಾತಾವರಣದಲ್ಲಿ ಇಲ್ಲಿನ ಜನ ಇನ್ನು ಮುಂದೆ ಬದುಕಬೇಕಾಗಿಲ್ಲ. ಅದೆಲ್ಲವೂ ಮುಗಿದು ಹೋದ ಅಧ್ಯಾಯ” ಎಂದರು.

“ಚುನಾವಣೆಗಳು ಬರುತ್ತವೆ ಹೋಗುತ್ತವೆ. ಜನಪ್ರತಿನಿಧಿಗಳು ಬರುತ್ತಾರೆ ಹೋಗುತ್ತಾರೆ. ಆದರೆ, ಯಾರೇ ಬಂದರೂ ಜನರಿಗೆ ಅನುಕೂಲ ಆಗುವಂಥ ಕಾರ್ಯಕ್ರಮಗಳನ್ನು ಮಾಡಬೇಕು. ಚುನಾವಣಾ ನೀತಿ ಸಂಹಿತೆ ಇರುವುದು ನನಗೆ ಗೊತ್ತಿದೆ. ಈಗ ಹೇಳುತ್ತಿರುವ ಯಾವ ಕಾರ್ಯಕ್ರಮಗಳೂ ಹೊಸ ಘೋಷಣೆಗಳಲ್ಲ. ಈಗಾಗಲೇ ಸಂಪುಟದ ಒಪ್ಪಿಗೆ ದೊರೆತಿರುವ ಕಾರ್ಯಕ್ರಮಗಳನ್ನು ನೆನಪಿಸುತ್ತಿದ್ದೇನೆ” ಎಂದು ಹೇಳಿದರು.

ದಾಖಲೆ ಬಿಡುಗಡೆಯ ಬಗ್ಗೆ ಸುದ್ದಿಗಾರರು ಕೇಳಿದ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಡಿಕೆಶಿ, “ಬಿಜೆಪಿಯವರ ಹಲವು ದಾಖಲೆಗಳು ನಮ್ಮ ಬಳಿ ಇವೆ. ಆದರೆ, ದಾಖಲೆಗಳ ವಿಚಾರ ಈಗ ಬೇಡ ಬಿಡಿ” ಎಂದು ಜಾರಿಕೊಂಡರು.