ಭಾರತಕ್ಕೆ ಟ್ರಂಪ್‌ ಗುನ್ನಾ, 50 ಉತ್ಪನ್ನಗಳ ರಫ್ತಿಗೆ ಇನ್ನು ತೆರಿಗೆ ಕಡ್ಡಾಯ
ಸುದ್ದಿ ಸಾರ

ಭಾರತಕ್ಕೆ ಟ್ರಂಪ್‌ ಗುನ್ನಾ, 50 ಉತ್ಪನ್ನಗಳ ರಫ್ತಿಗೆ ಇನ್ನು ತೆರಿಗೆ ಕಡ್ಡಾಯ

2017ರಲ್ಲಿ ಭಾರತ ತೆರಿಗೆ ಪಾವತಿ ಮಾಡದೆ ಅಮೆರಿಕಾಕ್ಕೆ ರಫ್ತು ಮಾಡಿದ ಉತ್ಪನ್ನಗಳ ಬೆಲೆಯೇ ಬರೋಬ್ಬರಿ 41 ಸಾವಿರ ಕೋಟಿ ರೂಪಾಯಿ. ಇದಕ್ಕೀಗ ಟ್ರಂಪ್‌ ಹೊಡೆತ ನೀಡಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ‘ಆಪ್ತ’ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಭಾರತಕ್ಕೆ ದೊಡ್ಡ ಆಘಾತವನ್ನೇ ನೀಡಿದ್ದಾರೆ. ಅಮೆರಿಕಾಗೆ ಆಮದಾಗುವ ಕೆಲವು ಸರಕುಗಳು ತೆರಿಗೆ ಮುಕ್ತವಾಗಿದ್ದು ಇವುಗಳ ಪಟ್ಟಿಯಿಂದ 90 ವಸ್ತುಗಳನ್ನು ಅವರು ಹೊರಗಿಟ್ಟಿದ್ದಾರೆ. ಇದರಲ್ಲಿ ಭಾರತದಿಂದಲೇ ಅತೀ ಹೆಚ್ಚು ರಫ್ತಾಗುವ 50ಕ್ಕೂ ಹೆಚ್ಚು ವಸ್ತುಗಳಿದ್ದು ಇವುಗಳೀಗ ತೆರಿಗೆ ಹೊಡೆತಕ್ಕೆ ಸಿಕ್ಕಿವೆ.

ಅಮೆರಿಕಾದಲ್ಲಿರುವ ವಿಶೇಷವಾಗಿ ಅಸ್ತಿತ್ವದಲ್ಲಿರುವ ‘ಪ್ರಾಶಸ್ತ್ಯಗಳ ಸಾಮಾನ್ಯ ವ್ಯವಸ್ಥೆ (ಜಿಎಸ್‌ಪಿ)‘ ಪಟ್ಟಿಯಿಂದ 90 ವಸ್ತುಗಳನ್ನು ಕೈ ಬಿಟ್ಟಿರುವುದಾಗಿ ಫೆಡರಲ್‌ ರಿಜಿಸ್ಟ್ರಾರ್‌ ಸುತ್ತೋಲೆ ಹೊರಡಿಸಿದ್ದಾರೆ. ನವೆಂಬರ್‌ 1ರಿಂದಲೇ ಈ ಹೊಸ ನಿಯಮ ಜಾರಿಗೆ ಬರಲಿದೆ. ಈ ಪಟ್ಟಿಯಲ್ಲಿ ಕರಕುಶಲ ವಸ್ತುಗಳು, ಕೃಷಿ ಉತ್ಪನ್ನಗಳೇ ಹೆಚ್ಚಾಗಿರುವುದರಿಂದ ಭಾರತಕ್ಕೆ ದೊಡ್ಡಮಟ್ಟದ ನಷ್ಟ ಉಂಟಾಗಲಿದೆ.

‘ನವೆಂಬರ್‌ 1ರಿಂದ ಶೂನ್ಯ ತೆರಿಗೆಯಲ್ಲಿ ಈ ವಸ್ತುಗಳ ವ್ಯಾಪಾರಕ್ಕೆ ಅವಕಾಶ ಇರುವುದಿಲ್ಲ. ಆದರೆ ತೆರಿಗೆ ಪಾವತಿ ಮಾಡಿ ಉತ್ಪನ್ನಗಳನ್ನು ಆಮದು ಮಾಡಿಕೊಳ್ಳಬಹುದು,” ಎಂದು ಅಮೆರಿಕಾದ ವ್ಯಾಪಾರ ಪ್ರತಿನಿಧಿ ‘ಟಿಒಐ’ಗೆ ತಿಳಿಸಿದ್ದಾರೆ.

ಏನಿದು ಜಿಎಸ್‌ಪಿ?

ಜಿಎಸ್‌ಪಿ ಎಂಬುದು ಅಮೆರಿಕಾದ ಅತ್ಯಂತ ಹಳೆಯ ವ್ಯಾಪಾರ ವ್ಯವಸ್ಥೆಯಾಗಿದ್ದು ತನಗೆ ಬೇಕಾದ ದೇಶಗಳಿಗೆ ಲಾಭ ಮಾಡಿಕೊಡಲು ಸಾವಿರಾರು ಉತ್ಪನ್ನಗಳನ್ನು ಅಲ್ಲಿನ ಸರಕಾರ ತೆರಿಗೆ ಮುಕ್ತಗೊಳಿಸಿದೆ. ಇದೀಗ ಇದರಲ್ಲಿ 90 ಉತ್ಪನ್ನಗಳನ್ನು ಹೊರಗಿಡಲಾಗಿದ್ದು, ಇದರಲ್ಲಿ 50 ಕ್ಕೂ ಹೆಚ್ಚು ಭಾರತದಿಂದಲೇ ರಫ್ತುಗೊಳ್ಳುವ ವಸ್ತುಗಳಾಗಿವೆ. ಈ ನೀತಿಯಿಂದಾಗಿಯೇ ಭಾರತ ಹೆಚ್ಚಿನ ಲಾಭವನ್ನು ಇಲ್ಲಿಯವರೆಗೆ ಪಡೆದುಕೊಳ್ಳುತ್ತಿತ್ತು. 2017ರಲ್ಲಿ ಈ ರೀತಿ ಭಾರತ ದೇಶ ತೆರಿಗೆ ಪಾವತಿ ಮಾಡದೆ ಅಮೆರಿಕಾಕ್ಕೆ ರಫ್ತು ಮಾಡಿದ ಉತ್ಪನ್ನಗಳ ಬೆಲೆಯೇ ಬರೋಬ್ಬರಿ 41 ಸಾವಿರ ಕೋಟಿ ರೂಪಾಯಿ.

ಇದೀಗ ಟ್ರಂಪ್‌ ಸರಕಾರದ ಹೊಸ ನೀತಿಯಿಂದ ಭಾರತದ ರಫ್ತಿನ ಮೇಲೆ ನೇರ ಪರಿಣಾಮ ಬೀರಲಿದೆ. ಅವರೆ ಕಾಳು, ಅಡಿಕೆ, ಟರ್ಪಂಟೈನ್‌ ಗಮ್‌, ಮಾವಿನ ಹಣ್ಣು, ಕಲ್ಲು, ಉಪ್ಪು, ಆಸಿಡ್‌ಗಳು, ಕ್ಲೋರೈಡ್‌ಗಳು ಈ ಪಟ್ಟಿಯಲ್ಲಿ ಸೇರಿವೆ. ಇವುಗಳಲ್ಲದೆ ಕೋಣದ ಚರ್ಮ, ಹತ್ತಿ, ಕೈಯಿಂದ ಮಾಡಿದ ಕಾರ್ಪೆಟ್‌ಗಳು, ಆಭರಣಗಳು, ಕೀಬೋರ್ಟ್‌, ಹಾರ್ಮೋನಿಯಂ ಸೇರಿದಂತೆ ಸಂಗೀತ ಪರಿಕರಗಳನ್ನು ಇನ್ನು ಮುಂದೆ ತೆರಿಗೆ ಪಾವತಿಸಿಯೇ ಅಮೆರಿಕನ್ನರು ಆಮದು ಮಾಡಿಕೊಳ್ಳಬೇಕಾಗಿದೆ.

2017ರಲ್ಲಿ ಒಟ್ಟು ಜಿಎಸ್‌ಪಿ ಅಡಿಯಲ್ಲಿ ಅಮೆರಿಕಾ ದೇಶ 21.2 ಬಿಲಿಯನ್‌ ಡಾಲರ್‌ ಮೊತ್ತದ ವಸ್ತುಗಳನ್ನು ಆಮದು ಮಾಡಿಕೊಂಡಿತ್ತು. ಇದರಲ್ಲಿ ಶೇಕಡಾ 25ಕ್ಕಿಂತ ಹೆಚ್ಚು ಅಂದರೆ 5.6 ಬಿಲಿಯನ್‌ ಡಾಲರ್‌ ಮೊತ್ತ ವಸ್ತುಗಳನ್ನು ಭಾರತವೇ ಮಾರಾಟ ಮಾಡಿತ್ತು. ಇಷ್ಟೊಂದು ದೊಡ್ಡ ಪ್ರಮಾಣದ ವ್ಯಾಪಾರಕ್ಕೆ ಈಗ ಹೊಸ ನೀತಿ ಹೊಡೆತ ನೀಡುವ ಸಾಧ್ಯತೆ ಇದೆ. ಇದನ್ನು ಟ್ರಂಪ್‌ ‘ಗೆಳೆಯ’ ಮೋದಿ ಗಮನಿಸಬೇಕಿದೆ.