‘ಶಿವಲಿಂಗದ ಮೇಲಿನ ಚೇಳು’, ‘ಡೆಂಗಿ ಸೊಳ್ಳೆ’; ಹಲವು ರೂಪಕಗಳಲ್ಲಿ ನರೇಂದ್ರ ಮೋದಿ!
ಸುದ್ದಿ ಸಾರ

‘ಶಿವಲಿಂಗದ ಮೇಲಿನ ಚೇಳು’, ‘ಡೆಂಗಿ ಸೊಳ್ಳೆ’; ಹಲವು ರೂಪಕಗಳಲ್ಲಿ ನರೇಂದ್ರ ಮೋದಿ!

ಮೋದಿಯನ್ನು ಒಪ್ಪುವಂತೆಯೂ ಇಲ್ಲ ಬಿಡುವಂತೆಯೂ ಇಲ್ಲ ಎಂದು ಹೇಳಲು ಆರ್‌ಎಸ್‌ಎಸ್ ಮುಖಂಡರು 2012ರಲ್ಲೇ ಬಳಸಿದ್ದ ರೂಪಕ ಅದು.

ಪ್ರಧಾನಿ ನರೇಂದ್ರ ಮೋದಿ ಬಗ್ಗೆ ಕಾಂಗ್ರೆಸ್‌ ಮುಖಂಡರು ಭಾನುವಾರ ಹಲವು ರೂಪಕಗಳನ್ನು ಬಳಸಿದ್ದಾರೆ. ಕಾಂಗ್ರೆಸ್ ಮುಖಂಡರು ಉಲ್ಲೇಖಿಸಿರುವ ರೂಪಕಗಳು ಬಿಜೆಪಿ ಮುಖಂಡರನ್ನು ಕೆಣಕಿವೆ. ಸಿಟ್ಟಿಗೆದ್ದ ಬಿಜೆಪಿ, ರೂಪಕಗಳನ್ನು ಬಳಸಿದವರನ್ನು ಬಿಟ್ಟು ನೇರವಾಗಿ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್‌ ಗಾಂಧಿ ಕಡೆಗೆ ಟೀಕೆಯ ಬಾಣ ಬಿಟ್ಟಿದೆ.

ಬೆಂಗಳೂರು ಸಾಹಿತ್ಯ ಉತ್ಸವದಲ್ಲಿ ಭಾಗವಹಿಸಿದ್ದ ಕಾಂಗ್ರೆಸ್‌ ಸಂಸದ ಶಶಿ ತರೂರ್‌ ತಮ್ಮ ಪುಸ್ತಕ 'ದಿ ಪ್ಯಾರಾಡಾಕ್ಸಿಕಲ್‌ ಪ್ರೈಮ್‌ ಮಿನಿಸ್ಟರ್' ಪುಸ್ತಕದ ಬಗ್ಗೆ ಮಾತನಾಡುತ್ತಾ ಮೋದಿ ಬಗ್ಗೆ ಗುಜರಾತ್‌ನ ಆರ್‌ಎಸ್‌ಎಸ್ ಮುಖಂಡರೊಬ್ಬರು ಹೇಳಿದ್ದ ರೂಪಕವನ್ನು ಉಲ್ಲೇಖಿಸಿದ್ದರು.

‘ದಿ ಕ್ಯಾರವಾನ್‌’ ಪತ್ರಿಕೆಯ ಕಾರ್ಯನಿರ್ವಾಹಕ ಸಂಪಾದಕ ವಿನೋದ್ ಕೆ. ಜೋಸ್ 2012ರಲ್ಲಿ ಮೋದಿ ಕುರಿತು ಬರೆದಿದ್ದ ವಿಶೇಷ ವರದಿ 'ದಿ ಎಂಪರರ್‌ ಅನ್‌ಕ್ರೌನ್ಡ್‌'ನಲ್ಲಿ ಬಳಸಿದ್ದ ಸಾಲುಗಳು ಇವಾಗಿದ್ದವು. ಗುಜರಾತ್‌ನ ಆರ್‌ಎಸ್‌ಎಸ್‌ ಮುಖಂಡರೊಬ್ಬರು ಮೋದಿ ಕುರಿತು ಹೇಳಿದ್ದ ರೂಪಕವನ್ನು ವಿನೋದ್‌ ತಮ್ಮ ವಿಶೇಷ ವರದಿಯ ಕೊನೆಯಲ್ಲಿ ಉಲ್ಲೇಖಿಸಿದ್ದರು. ಆ ಆರ್‌ಎಸ್ಎಸ್‌ ಮುಖಂಡರು ಹೇಳಿದ್ದ ರೂಪಕ ಇದು: “ಶಿವಲಿಂಗದ ಮೇಲೆ ಚೇಳು ಕುಳಿತಿದೆ. ಅದನ್ನು ಕೈಯಿಂದಲೂ ಎತ್ತಿ ಹಾಕುವಂತಿಲ್ಲ, ಚಪ್ಪಲಿಯಿಂದಲೂ ಹೊಡೆಯುವಂತಿಲ್ಲ”.

2014ರ ಲೋಕಸಭಾ ಚುನಾವಣೆಗಿಂತ ಎರಡು ವರ್ಷ ಮೊದಲೇ ಗುಜರಾತ್‌ನ ಆರ್‌ಎಸ್‌ಎಸ್‌ ಮುಖಂಡರಿಗೇ ಮೋದಿ, ‘ಶಿವಲಿಂಗದ ಮೇಲಿನ ಚೇಳು’ ಎನಿಸಿದ್ದನ್ನು ಈ ರೂಪಕ ಹೇಳತ್ತದೆ. ಮೋದಿಯನ್ನು ಒಪ್ಪುವಂತೆಯೂ ಇಲ್ಲ ಬಿಡುವಂತೆಯೂ ಇಲ್ಲ ಎಂದು ಹೇಳಲು ಆರ್‌ಎಸ್‌ಎಸ್ ಮುಖಂಡರು ಬಳಸಿದ್ದ ರೂಪಕ ಅದು.

ಆದರೆ, ಈ ರೂಪಕವನ್ನು ಶಶಿ ತರೂರ್‌ ಅವರೇ ಹೇಳಿದ್ದಾರೆ ಎಂದು ಸಿಟ್ಟಿಗೆದ್ದಿರುವ ಬಿಜೆಪಿ ಈ ಬಗ್ಗೆ ರಾಹುಲ್‌ ಗಾಂಧಿ ಅವರನ್ನು ತರಾಟೆಗೆ ತೆಗೆದುಕೊಂಡಿದೆ. “ತಮ್ಮನ್ನು ಶಿವಭಕ್ತ ಎಂದು ಕರೆದುಕೊಳ್ಳುವ ರಾಹುಲ್‌ ಗಾಂಧಿ ಈ ಬಗ್ಗೆ ಪ್ರತಿಕ್ರಿಯಿಸಬೇಕು” ಎಂದು ಬಿಜೆಪಿ ಮುಖಂಡ ರವಿಶಂಕರ್‌ ಪ್ರಸಾದ್‌ ಹೇಳಿದ್ದಾರೆ.

ಆದರೆ, ಈ ರೂಪಕದ ಬಗ್ಗೆ ವಿವಾದ ಎದ್ದ ಬೆನ್ನಲ್ಲೇ ಶಶಿ ತರೂರ್‌ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. 'ಕ್ಯಾರವಾನ್‌'ನ ವಿಶೇಷ ವರದಿಯ ರೂಪಕವನ್ನು ತಾವು ಪುಸ್ತಕದಲ್ಲಿ ಬಳಸಿದ್ದಾಗಿ ಹೇಳಿರುವ ಶಶಿ ತರೂರ್‌ ವರದಿಯ ಲಿಂಕ್ ಅನ್ನೂ ಟ್ವೀಟ್‌ ಮಾಡಿದ್ದಾರೆ.

ಶಶಿ ತರೂರ್‌ ಹೇಳಿಕೆಯ ಬೆನ್ನಲ್ಲೇ ಮಹಾರಾಷ್ಟ್ರದ ಕಾಂಗ್ರೆಸ್‌ ಶಾಸಕಿ ಮೋದಿ ಕುರಿತು ನೀಡಿದ್ದ ಹೇಳಿಕೆಯೂ ಚರ್ಚೆಗೆ ಬಂದಿದೆ. ದಕ್ಷಿಣ ಸೊಲ್ಲಾಪುರದ ಕಾಂಗ್ರೆಸ್‌ ಶಾಸಕಿ ಪ್ರಣಿತಿ ಶಿಂಧೆ ಶನಿವಾರ ರ್ಯಾಲಿಯೊಂದರಲ್ಲಿ ಮಾತನಾಡುತ್ತಾ, “ದೇಶದಲ್ಲಿ ಹೊಸ ಡೆಂಗಿ ಸೊಳ್ಳೆಯೊಂದಿದೆ. ಅದರ ಹೆಸರು ಮೋದಿ ಬಾಬಾ. ಅದರಿಂದ ಎಲ್ಲರೂ ಅನಾರೋಗ್ಯಕ್ಕೆ ತುತ್ತಾಗುತ್ತಿದ್ದಾರೆ. ಅದನ್ನು ಅಧಿಕಾರದಿಂದ ಹೊಡೆದೋಡಿಸಲು ನೀವು ಕೀಟನಾಶಕ ಸ್ಪ್ರೇ ಮಾಡುವುದು ಸೇರಿದಂತೆ ಏನೇನು ಮಾಡಲು ಸಾಧ್ಯವಿಯೋ ಅದನ್ನೆಲ್ಲಾ ಮಾಡಿ” ಎಂದು ಹೇಳಿದ್ದರು.

ಮೋದಿಯನ್ನು ಡೆಂಗಿ ಸೊಳ್ಳೆಗೆ ಹೋಲಿಸಿರುವ ಪ್ರಣಿತಿ ಶಿಂಧೆ ಬಗ್ಗೆಯೂ ಆಕ್ರೋಶ ಹೊರ ಹಾಕಿರುವ ಬಿಜೆಪಿ ಮುಖಂಡರು ಈ ಹೇಳಿಕೆಯ ಬಗ್ಗೆ ಶಿಂಧೆ ಹಾಗೂ ರಾಹುಲ್‌ ಗಾಂಧಿ ಕ್ಷಮೆ ಕೋರಬೇಕು ಎಂದು ಒತ್ತಾಯಿಸಿದ್ದಾರೆ.