‘ಎನ್‌ಡಿಟಿವಿ ನೋಡ್ತಿದ್ದೀವಿ ಈಗ’: ಸುದ್ದಿ ವಾಹಿನಿಗಳಿಗೆ ನಟ ಅಂಬರೀಷ್ ನೀತಿ ಪಾಠ
ಸುದ್ದಿ ಸಾರ

‘ಎನ್‌ಡಿಟಿವಿ ನೋಡ್ತಿದ್ದೀವಿ ಈಗ’: ಸುದ್ದಿ ವಾಹಿನಿಗಳಿಗೆ ನಟ ಅಂಬರೀಷ್ ನೀತಿ ಪಾಠ

ಸೂಕ್ಷ್ಮತೆ ಕಳೆದುಕೊಂಡು ಕೇವಲ ಟಿಆರ್‌ಪಿಗಾಗಿ ಮೀಟೂ ಸುದ್ದಿ ಮಾಡುತ್ತಿರುವ ಸುದ್ದಿ ವಾಹಿನಿಗಳ ಬಗ್ಗೆ ಅಂಬರೀಷ್‌ ಸ್ವಲ್ಪ ಸಿಟ್ಟಾಗಿದ್ದಾರೆ.

“ನಾಲ್ಕು ದಿನದಿಂದ ಬರೀ ಅದನ್ನೇ ತೋರಿಸ್ತಿದ್ದೀರಾ. ಅದನ್ನ ನೋಡಿ ನೋಡಿ ಸಾಕಾಗಿ ಎನ್‌ಡಿಟಿವಿ ನೋಡ್ತಿದ್ದೀವಿ ಈಗ…”

ಕನ್ನಡದ ಹಿರಿಯ ನಟ ಅಂಬರೀಷ್‌ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಗುರುವಾರ ನಡೆದ ಸುದ್ದಿಗೋಷ್ಠಿ ವೇಳೆ ಹೇಳಿದ್ದಿದು. ನಟ ಅರ್ಜುನ್‌ ಸರ್ಜಾ ವಿರುದ್ಧ ನಟಿ ಶ್ರುತಿ ಹರಿಹರನ್‌ ಮಾಡಿರುವ #Me Too ಆರೋಪದ ಬಗ್ಗೆ ಸಂಧಾನಕ್ಕೆ ಯತ್ನಿಸಿ ವಿಫಲವಾಗಿದ್ದ ಅಂಬರೀಷ್‌ ಮಾಧ್ಯಮ ಪ್ರತಿನಿಧಿಗಳ ಮುಂದೆ ಮಾತಿಗೆ ಕುಳಿತಿದ್ದರು.

ಈ ವೇಳೆ ಮೀಟೂ ಅಭಿಯಾನವನ್ನು ಕನ್ನಡ ಸುದ್ದಿ ವಾಹಿನಿಗಳು ಅತಿ ಮಾಡುತ್ತಿವೆ ಎಂಬ ಅಸಮಾಧಾನವನ್ನು ಅಂಬರೀಷ್‌ ಈ ರೀತಿ ಹೊರ ಹಾಕಿದರು. ಅತಿಯಾದರೆ ಅಮೃತವೂ ವಿಷವಾಗುತ್ತದೆ ಎನ್ನುವಂತೆ ಮೀಟೂ ಅಭಿಯಾನವನ್ನು ಅತಿ ಮಾಡಿ ಅದರ ಗಂಭೀರತೆಯನ್ನು ಕುಗ್ಗಿಸಲಾಗುತ್ತಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಚಿತ್ರರಂಗದ ಒಬ್ಬರಲ್ಲಾ ಒಬ್ಬರು ಪ್ರತಿ ದಿನವೂ ‘ಮೀಟೂ’ ಎನ್ನುತ್ತಿದ್ದಾರೆ. ಇದನ್ನು ಸುದ್ದಿ ವಾಹಿನಿಗಳು ದಿನವಿಡೀ ಎಳೆಯುತ್ತಿರುವ ಬಗ್ಗೆ ಅಂಬಿ ಸ್ವಲ್ಪ ಸಿಟ್ಟಾಗಿದ್ದರು.

ವಿಡಿಯೊ ನೋಡಿ:

ಅವಕಾಶಕ್ಕಾಗಿ ಈ ಹಿಂದೆ ‘ಎಲ್ಲಕ್ಕೂ ಒಪ್ಪಿಕೊಂಡು’ ಈಗ ಪ್ರಚಾರಕ್ಕಾಗಿ ಮೀಟೂ ಎನ್ನುತ್ತಿರುವವರಿಂದ ನಿಜವಾಗಿ ಕಿರುಕುಳ ಅನುಭವಿಸಿದವರ ದನಿಗಳೂ ಗಂಭೀರತೆ ಕಳೆದುಕೊಳ್ಳುತ್ತಿವೆ ಎಂಬ ಮಾತುಗಳೂ ಇವೆ. ಆದರೆ, ಈ ಅಭಿಯಾನದ ಸೂಕ್ಷ್ಮತೆಯನ್ನು ಬಹುತೇಕ ಸುದ್ದಿವಾಹಿನಿಗಳು ಮರೆತಂತಿದೆ. ಸೂಕ್ಷ್ಮತೆ ಕಳೆದುಕೊಂಡು ಕೇವಲ ಟಿಆರ್‌ಪಿಗಾಗಿ ಮೀಟೂ ಸುದ್ದಿ ಮಾಡುತ್ತಿರುವ ಸುದ್ದಿ ವಾಹಿನಿಗಳ ಬಗ್ಗೆ ಅಂಬರೀಷ್‌ ಮಾತಾಡಿದ್ದಾರೆ.

ಅಂಬರೀಷ್‌ ಮಾತಿಗೆ ‘ಎನ್‌ಡಿಟಿವಿಯಲ್ಲೂ ಹಾಕ್ತಾರೆ’ ಎಂದು ಇತರೆ ಮಾಧ್ಯಮ ಪ್ರತಿನಿಧಿಗಳು ಸಮಜಾಯಿಷಿಗೆ ಇಳಿದಾಗ, “ಅವರು ಎರಡು ನಿಮಿಷ ಹಾಕ್ತಾರೆ ಅಷ್ಟೇ. ನಿಮ್ಮಲ್ಲಿ ರಾತ್ರಿನೂ ಅದೇ, ಬೆಳಿಗ್ಗೆನೂ ಅದೇ” ಎಂದು ಅಂಬರೀಷ್‌ ಕೊಂಚ ಸಿಟ್ಟಾದರು.