ಮೂಲಸೌಕರ್ಯಕ್ಕಾಗಿ ದೇವದುರ್ಗ ಮಿನಿ ವಿಧಾನಸೌಧದ ಎದುರು ಉಪವಾಸ ಕುಂತ ಮಕ್ಕಳು
ಸುದ್ದಿ ಸಾರ

ಮೂಲಸೌಕರ್ಯಕ್ಕಾಗಿ ದೇವದುರ್ಗ ಮಿನಿ ವಿಧಾನಸೌಧದ ಎದುರು ಉಪವಾಸ ಕುಂತ ಮಕ್ಕಳು

ಉಪವಾಸ ಕುಳಿತಿರುವ ವಿದ್ಯಾರ್ಥಿಗಳ ಬಳಿ ತೆರಳಿ ಅವರ ಸಮಸ್ಯೆ ಕೇಳುವ, ಅವರಿಗೆ ಸಮಾಧಾನದ ಮಾತುಗಳನ್ನು ಹೇಳುವ ಸೌಜನ್ಯವನ್ನೂ ಜನಪ್ರತಿನಿಧಿಗಳು, ಅಧಿಕಾರಿಗಳು ಈವರೆಗೆ ತೋರಿಲ್ಲ.

“ನಮ್ಮೂರಿಗೆ ಸರಿಯಾದ ರಸ್ತೆಯಿಲ್ಲ”, “ನಮ್ಮೂರಿಗೆ ಬಸ್‌ ವ್ಯವಸ್ಥೆ ಇಲ್ಲ”, “ನಮ್ಮೂರಲ್ಲಿ ಶುದ್ಧ ಕುಡಿಯುವ ನೀರಿನ ವ್ಯವಸ್ತೆ ಇಲ್ಲ”, “ನಮ್ಮೂರಲ್ಲಿ ಸಾರ್ವಜನಿಕ ಶೌಚಾಲಯಗಳಿಲ್ಲ”, “ನಮ್ಮೂರಲ್ಲಿ ಶಾಲೆ ಸರಿಯಿಲ್ಲ”, “ನಮ್ಮೂರಲ್ಲಿ ಗ್ರಂಥಾಲಯವಿಲ್ಲ” – ಈ ‘ಇಲ್ಲ’ಗಳ ಸರಮಾಲೆ ಬಹುತೇಕ ಗ್ರಾಮೀಣ ಪ್ರದೇಶ ಭಾಗಗಳಲ್ಲಿ ಇಂದಿಗೂ ಮುಂದುವರಿದಿದೆ. ಹೈದರಾಬಾದ್‌ ಕರ್ನಾಟಕ ಭಾಗದ ರಾಯಚೂರು ಜಿಲ್ಲೆ ದೇವದುರ್ಗದ ಗೂಗಲ್‌ ಹಾಗೂ ಸುತ್ತಮುತ್ತಲಿನ ಗ್ರಾಮಗಳ ಮಕ್ಕಳು ಈ ಇಲ್ಲಗಳನ್ನು ಸರಿಪಡಿಸಿಕೊಳ್ಳಲು ಈಗ ಉಪವಾಸ ಸತ್ಯಾಗ್ರಹ ಕುಳಿತಿದ್ದಾರೆ.

ರಾಯಚೂರು ಜಿಲ್ಲೆಯಲ್ಲೇ ದೇವದುರ್ಗ ಹಿಂದುಳಿದ ತಾಲ್ಲೂಕು ಎಂಬ ಹಣೆಪಟ್ಟಿಕಟ್ಟಿಕೊಂಡು ಬಹಳ ವರ್ಷಗಳಾಗಿವೆ. ಈ ಹಣೆಪಟ್ಟಿ ಕಳಚಲು ಜನಪ್ರತಿನಿಧಿಗಳು, ಅಧಿಕಾರಿಗಳು, ಸ್ಥಳೀಯ ಮುಖಂಡರು ಮನಸ್ಸು ಮಾಡುತ್ತಿಲ್ಲ ಎಂದು ಬೇಸತ್ತ ಕೊಪ್ಪರ, ಕುರ್ಕಿಹಳ್ಳಿ, ಇಟಗಿ, ಹೇರೂರು, ಗೂಗಲ್‌ ಸುತ್ತಮುತ್ತಲಿನ ಗ್ರಾಮಗಳ ವಿದ್ಯಾರ್ಥಿಗಳು ದೇವದುರ್ಗದ ಮಿನಿ ವಿಧಾನಸೌಧದ ಎದುರು ಮಂಗಳವಾರದಿಂದ (ಅಕ್ಟೋಬರ್‌ 23) ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದಾರೆ.

“ದೇವದುರ್ಗದಿಂದ ಗೂಗಲ್‌ಗೆ ಹೋಗುವ ರಸ್ತೆಯಲ್ಲಿ ಮಂಡಿಯುದ್ದದ ಗುಂಡಿಗಳು ಬಿದ್ದಿವೆ. ಕಳೆದ ವರ್ಷವೇ ಈ ಬಗ್ಗೆ ಜಿಲ್ಲಾ ಪಂಚಾಯ್ತಿ ಅಧಿಕಾರಿಗಳು ಹಾಗೂ ದೇವದುರ್ಗ ಶಾಸಕ ಶಿವನಗೌಡ ನಾಯಕ್‌ ಅವರಿಗೆ ಮನವಿ ಮಾಡಿದ್ದೆವು. ಈ ಚುನಾವಣೆಗೂ ಮುನ್ನವೂ ರಸ್ತೆ ಸರಿಪಡಿಸಲು ಆಗ್ರಹಿಸಿದ್ದೆವು. ಆದರೆ, ಚುನಾವಣೆ ಮುಗಿಯಿತು. ಅವರಿಗೆ ಅಧಿಕಾರ ಸಿಕ್ಕಿತು. ನಮ್ಮ ಸಮಸ್ಯೆ ಅವರಿಗೆ ಈಗ ನೆನಪಿಲ್ಲ” ಎನ್ನುತ್ತಾರೆ ಉಪವಾಸ ಸತ್ಯಾಗ್ರಹದಲ್ಲಿ ಭಾಗಿಯಾಗಿರುವ ವಿದ್ಯಾರ್ಥಿಯೊಬ್ಬರು.

“ನಮ್ಮ ಊರುಗಳ ಹಿರಿಯರಿಗೆ ನಮ್ಮ ಸಮಸ್ಯೆಗಳು ಸಮಸ್ಯೆ ಎಂದು ಅನಿಸುತ್ತಲೇ ಇಲ್ಲ. ಬೆಳಿಗ್ಗೆ ಟೀ ಅಂಗಡಿ, ರಾತ್ರಿ ಹೆಂಡದ ಅಂಗಡಿಗೆ ಅಲೆಯುವುದು ಬಿಟ್ಟರೆ ನಮ್ಮ ಗ್ರಾಮಗಳ ಗಂಡಸರಿಗೆ ಹೆಚ್ಚೇನೂ ಬೇಕಾಗಿಲ್ಲ. ಹಳ್ಳಿಗಳಿಂದ ಕಾಲೇಜಿಗೆ ಕಲಿಯಲು ದೇವದುರ್ಗಕ್ಕೆ ಬರಬೇಕಾದರೆ ಸರಿಯಾದ ಬಸ್‌ಗಳ ವ್ಯವಸ್ಥೆ ಇಲ್ಲ. ಹಾಳಾದ ರಸ್ತೆಯ 30 ಕಿ.ಮೀ. ಬಂದು ಹೋಗಲು ಎರಡು ತಾಸು ಹಿಡಿಯುತ್ತದೆ. ನಮ್ಮ ಸಮಸ್ಯೆ ಯಾರಿಗೂ ಮುಖ್ಯವಾಗುತ್ತಿಲ್ಲ ಎಂದಾಗ ನಾವು ವಿದ್ಯಾರ್ಥಿಗಳೇ ಉಪವಾಸ ಕುಳಿತಿದ್ದೇವೆ. ಇನ್ನಾದರೂ ಜನಪ್ರತಿನಿಧಿಗಳು, ಅಧಿಕಾರಿಗಳು ನಮ್ಮ ಸಮಸ್ಯೆ ಕೇಳುತ್ತಾರೋ ಗೊತ್ತಿಲ್ಲ” ಎಂದವರು ಮತ್ತೊಬ್ಬ ವಿದ್ಯಾರ್ಥಿ.

ಈ ಬಗ್ಗೆ ‘ಸಮಾಚಾರ’ದೊಂದಿಗೆ ಮಾತನಾಡಿದ ದೇವದುರ್ಗ ಶಾಸಕ ಶಿವನಗೌಡ ನಾಯಕ್‌, “ಮೂಲಸೌಕರ್ಯಗಳ ಸಮಸ್ಯೆ ಹೆಚ್ಚೇನಿಲ್ಲ. ರಸ್ತೆ ಸಮಸ್ಯೆ ಇರುವುದು ನಿಜ. ದೇವದುರ್ಗ– ಗೂಗಲ್‌ ವ್ಯಾಪ್ತಿಯಲ್ಲಿ ರಾಜ್ಯ ಹೆದ್ದಾರಿ ಅಭಿವೃದ್ಧಿಯ ಕೆಲಸ ಬಾಕಿ ಇದೆ. ಹಳೆಯ ಗುತ್ತಿಗೆದಾರರು ಕೆಲಸ ನಿಲ್ಲಿಸಿದ್ದಾರೆ. ಹೊಸದಾಗಿ ಟೆಂಡರ್‌ ಕರೆದು ಕೆಲಸ ಆರಂಭವಾಗಬೇಕು. ಹೊಸ ಟೆಂಡರ್‌ ಪ್ರಕ್ರಿಯೆ ಸರಕಾರದ ಮಟ್ಟದಲ್ಲಿದೆ. ಹೊಸ ಟೆಂಡರ್‌ ಪ್ರಕ್ರಿಯೆಗೆ ಹೊಸ ಸರಕಾರ ಮನಸ್ಸು ಮಾಡುತ್ತಿಲ್ಲ. ಈ ಬಗ್ಗೆ ನಾನು ಕೂಡಾ ಸರಕಾರಕ್ಕೆ ಒತ್ತಾಯಿಸುತ್ತಲೇ ಇದ್ದೇನೆ” ಎನ್ನುತ್ತಾರೆ.

ಹೀಗೆ ಸ್ಥಳೀಯ ಶಾಸಕರು ಸಮಸ್ಯೆಯ ವಿಚಾರವಾಗಿ ಸರಕಾರದ ಕಡೆಗೆ ಕೈ ತೋರುತ್ತಿದ್ದಾರೆ. ಸಮಸ್ಯೆ ಬಗೆಹರಿಯುವವರೆಗೂ ಉಪವಾಸ ಸತ್ಯಾಗ್ರಹ ನಿಲ್ಲಿಸುವುದಿಲ್ಲ ಎಂದು ವಿದ್ಯಾರ್ಥಿಗಳು ಹೇಳುತ್ತಿದ್ದಾರೆ. ಸರಕಾರ ಹೊಸ ಟೆಂಡರ್‌ ಕರೆದು ಕೆಲಸ ಆರಂಭಿಸುವ ಮಾತು ಸದ್ಯಕ್ಕಂತೂ ಹತ್ತಿರದಲ್ಲಿಲ್ಲ. ಆದರೆ, ಉಪವಾಸ ಕುಳಿತಿರುವ ವಿದ್ಯಾರ್ಥಿಗಳ ಬಳಿ ತೆರಳಿ ಅವರ ಸಮಸ್ಯೆ ಕೇಳುವ, ಅವರಿಗೆ ಸಮಾಧಾನದ ಮಾತುಗಳನ್ನು ಹೇಳುವ ಸೌಜನ್ಯವನ್ನೂ ಜನಪ್ರತಿನಿಧಿಗಳು, ಅಧಿಕಾರಿಗಳು ಈವರೆಗೆ ತೋರಿಲ್ಲ.