ಮತ್ತೋರ್ವ ಸ್ವಘೋಷಿತ ದೇವಮಾನವ ಜೈಲಿಗೆ: ಕೊಲೆ ಪ್ರಕರಣದಲ್ಲಿ ರಾಮ್‌ಪಾಲ್‌ ದೋಷಿ
ಸುದ್ದಿ ಸಾರ

ಮತ್ತೋರ್ವ ಸ್ವಘೋಷಿತ ದೇವಮಾನವ ಜೈಲಿಗೆ: ಕೊಲೆ ಪ್ರಕರಣದಲ್ಲಿ ರಾಮ್‌ಪಾಲ್‌ ದೋಷಿ

ಸದ್ಯ ರಾಮ್‌ಪಾಲ್‌ ಹಿಸ್ಸಾರ್‌ ಕೇಂದ್ರ ಕಾರಾಗೃಹದಲ್ಲಿದ್ದಾರೆ. ದೊಡ್ಡ ಮಟ್ಟದ ಅನುಯಾಯಿಗಳನ್ನು ಹೊಂದಿರುವ ಅವರನ್ನು 2014ರಲ್ಲಿ ಬಂಧಿಸಲಾಗಿತ್ತು.

ಎರಡು ಕೊಲೆ ಪ್ರಕರಣಗಳಲ್ಲಿ ಸ್ವಯಂ ಘೋಷಿತ ದೇವಮಾನವ ಸಂತ ರಾಮ್‌ಪಾಲ್‌ ದೋಷಿ ಎಂದು ಹಿಸ್ಸಾರ್‌ ನ್ಯಾಯಾಲಯ ತೀರ್ಪು ನೀಡಿದೆ. ಶಿಕ್ಷೆಯ ಪ್ರಮಾಣವನ್ನು ನ್ಯಾಯಾಲಯ ಮುಂದಿನ ವಾರ ಅಂದರೆ ಅಕ್ಟೋಬರ್‌ 16 ಮತ್ತು 17ರಂದು ಘೋಷಣೆ ಮಾಡಲಿದೆ.

ಇಂದು ತೀರ್ಪು ಘೋಷಣೆ ಹಿನ್ನೆಲೆಯಲ್ಲಿ ಹಿಸ್ಸಾರ್‌ ನಗರದಲ್ಲಿ ಬಿಗಿ ಬಂದೋಬಸ್ತ್‌ ಕೈಗೊಳ್ಳಲಾಗಿದೆ. ನಗರದಲ್ಲಿ ಸಿಆರ್‌ಪಿಸಿ ಸೆಕ್ಷನ್‌ 144 ಜಾರಿಗೊಳಿಸಲಾಗಿದೆ. 1800 ಜನ ಪೊಲೀಸರು ನಗರದ ಭದ್ರತೆಯ ಹೊಣೆ ಹೊತ್ತಿದ್ದಾರೆ. 2017ರ ಆಗಸ್ಟ್‌ನಲ್ಲಿ ಪಂಚಕುಲದಲ್ಲಿ ದೇರಾ ಸಚ್ಚಾ ಸೌಧದ ಮುಖ್ಯಸ್ಥ ಗುರ್ಮಿತ್‌ ರಾಮ್‌ ರಹೀಮ್‌ ಸಿಂಗ್‌ ಶಿಕ್ಷೆ ಘೋಷಣೆ ವೇಳೆ ನಡೆದ ಘಟನೆಗಳು ಮರು ಕಳುಹಿಸದಂತೆ ಈ ಏರ್ಪಾಟುಗಳನ್ನು ಮಾಡಿಕೊಳ್ಳಲಾಗಿದೆ. ನಗರ ಪ್ರವೇಶಿಸುವ ಪ್ರತೀ ವಾಹನವನ್ನೂ ಪರಿಶೀಲನೆ ಮಾಡಿ ಪೊಲೀಸರು ಒಳಗೆ ಬಿಡುತ್ತಿದ್ದಾರೆ.

ಸದ್ಯ ರಾಮ್‌ಪಾಲ್‌ ಹಿಸ್ಸಾರ್‌ ಕೇಂದ್ರ ಕಾರಾಗೃಹದಲ್ಲಿದ್ದಾರೆ. ದೊಡ್ಡ ಮಟ್ಟದ ಅನುಯಾಯಿಗಳನ್ನು ಹೊಂದಿರುವ ಅವರನ್ನು 2014ರಲ್ಲಿ ಬಂಧಿಸಲಾಗಿತ್ತು. ನ್ಯಾಯಾಲಯದ ವಿಚಾರಣೆಗೆ ಸತತವಾಗಿ ಗೈರು ಹಾಜರಾಗಿದ್ದ ಅವರನ್ನು ಬಂಧಿಸುವಂತೆ ಪಂಜಾಬ್‌ ಮತ್ತು ಹರ್ಯಾಣ ಹೈಕೋರ್ಟ್‌ ಆದೇಶ ನೀಡಿತ್ತು.

2014ರಲ್ಲಿ ರಾಮ್‌ಪಾಲ್‌ ಬಂಧನದ ವೇಳೆ ನಡೆದ ಗಲಭೆಯ ದೃಶ್ಯ
2014ರಲ್ಲಿ ರಾಮ್‌ಪಾಲ್‌ ಬಂಧನದ ವೇಳೆ ನಡೆದ ಗಲಭೆಯ ದೃಶ್ಯ
/ಇಂಡಿಯನ್‌ಎಕ್ಸ್‌ಪ್ರೆಸ್‌

ಈ ವೇಳೆ ರಾಮ್‌ಪಾಲ್‌ ಅವರನ್ನು ಬಂಧಿಸಲು ಹಿಸ್ಸಾರ್‌ಗೆ ತೆರಳಿದ ಪೊಲೀಸರಿಗೆ ಜನರು ಅಡ್ಡಿಯಾಗಿದ್ದರು. ಸುಮಾರು 12 ಕಿಲೋಮಿಟರ್‌ ಆವರಣದಲ್ಲಿರುವ ಬೃಹತ್ ಸತ್‌ಲೋಕ್‌ ಆಶ್ರಮದಲ್ಲಿ 20,000 ಕ್ಕೂ ಅಧಿಕ ಜನರು ಸೇರಿಕೊಂಡು ರಾಮ್‌ಪಾಲ್‌ ಕಾವಲಾಗಿ ನಿಂತಿದ್ದರು. ಕೊನೆಗೆ ಆಶ್ರಮಕ್ಕಿದ್ದ ನೀರು ಪೂರೈಕೆ ಮತ್ತು ವಿದ್ಯುತ್‌ ಪೂರೈಕೆಯನ್ನು ಪೊಲೀಸರು ನಿಲ್ಲಿಸಿ ಜನರು ಹೊರ ಬರುವಂತೆ ಮಾಡಿದ್ದರು. ಆಗಲೂ ಸುಲಭವಾಗಿ ಹೊರ ಬರದೆ ಅಲ್ಲಿದ್ದ 5,700 ಪೊಲೀಸರ ಜತೆ ರಂಪ ರಾಮಾಯಣ ನಡೆಸಿದ್ದರಿಂದ ಆರು ಜನರು ಅಸುನೀಗಿದ್ದರು. ಇವರಲ್ಲಿ ಐವರು ಮಹಿಳೆಯರಾದರೆ ಇನ್ನೊಂದು ಮಗುವಾಗಿತ್ತು. ಅಂತಿಮವಾಗಿ ನವೆಂಬರ್ 19, 2014ರಲ್ಲಿ ರಾಮ್‌ಪಾಲ್‌ರನ್ನು ಬಂಧಿಸಲಾಗಿತ್ತು. ಈ ಇಡೀ ಕಾರ್ಯಾಚರಣೆಗೆ 26 ಕೋಟಿ ರೂಪಾಯಿ ಖರ್ಚಾಗಿತ್ತು.

6 ಜನರು ಸಾವನ್ನಪ್ಪಿದ ಈ ಪ್ರಕರಣದಲ್ಲಿ ಇದೀಗ ಸಂತ ರಾಮ್‌ಪಾಲ್‌ ಮತ್ತು 22 ಜನರು ದೋಷಿಗಳು ಎಂದು ನ್ಯಾಯಾಲಯ ತೀರ್ಪು ನೀಡಿದೆ. ಕೊಲೆ, ಕ್ರಿಮಿನಲ್‌ ಸಂಚು, ಅಕ್ರಮ ಬಂಧನ ಸೇರಿದಂತೆ ಅವರ ಮೇಲಿನ ಹಲವು ಆರೋಪಗಳು ಸಾಬೀತಾಗಿವೆ. ಪರಿಣಾಮ ಮತ್ತೋರ್ವ ಸ್ವ ಘೋಷಿತ ದೇವಮಾನವರೀಗ ಖೈದಿಯಾಗಿ ಜೈಲು ಶಿಕ್ಷೆ ಅನುಭವಿಸಲಿದ್ದಾರೆ.