ದರ ಇಳಿಕೆ ಪ್ರಹಸನಕ್ಕೆ ತೆರೆ; ಮತ್ತೆ ಏರುತ್ತಿದೆ ಪೆಟ್ರೋಲ್‌- ಡೀಸೆಲ್‌ ಬೆಲೆ
ಸುದ್ದಿ ಸಾರ

ದರ ಇಳಿಕೆ ಪ್ರಹಸನಕ್ಕೆ ತೆರೆ; ಮತ್ತೆ ಏರುತ್ತಿದೆ ಪೆಟ್ರೋಲ್‌- ಡೀಸೆಲ್‌ ಬೆಲೆ

ಪೆಟ್ರೋಲ್‌- ಡೀಸೆಲ್‌ ಬೆಲೆ ಇಳಿಕೆ ಘೋಷಣೆಯಾಗಿ ನಾಲ್ಕು ದಿನಗಳಲ್ಲೇ ಮತ್ತೆ ಬೆಲೆ ಏರಿಕೆ ಬಿಸಿಯನ್ನು ಕೇಂದ್ರ ಸರಕಾರ ಮುಂದುವರಿಸಿದೆ.

ನಾಲ್ಕು ದಿನಗಳ ಹಿಂದೆ ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಪತ್ರಿಕಾಗೋಷ್ಠಿ ನಡೆಸಿ ಪ್ರತಿ ಲೀಟರ್‌ ಪೆಟ್ರೋಲ್‌- ಡೀಸೆಲ್‌ ಮೇಲಿನ ಅಬಕಾರಿ ಸುಂಕವನ್ನು 1.5 ರೂಪಾಯಿ ಕಡಿತ ಮಾಡಿರುವುದಾಗಿ ಘೋಷಿಸಿದ್ದರು. ತೈಲ ಮಾರುಕಟ್ಟೆ ಕಂಪೆನಿಗಳು ಪ್ರತಿ ಲೀಟರ್‌ ಮೇಲೆ 1 ರೂಪಾಯಿ ನಷ್ಟ ಸರಿದೂಗಿಸುವುದು ಸೇರಿ 2.5 ರೂಪಾಯಿ ಬೆಲೆ ಇಳಿಕೆ ಘೋಷಣೆಯಾಗಿ ವಾರ ತುಂಬುವುದರೊಳಗೆ ಮತ್ತೆ ಪೆಟ್ರೋಲ್‌- ಡೀಸೆಲ್‌ ಬೆಲೆ ಏರುತ್ತಿದೆ.

ಅರುಣ್‌ ಜೇಟ್ಲಿ ದರ ಇಳಿಕೆ ಘೋಷಣೆ ಮಾಡಿದ ಮಾರನೆ ದಿನ ಅಂದರೆ ಕಳೆದ ಶುಕ್ರವಾರ (ಅ.5) ದೇಶದ ಎಲ್ಲಾ ಕಡೆಗಳಲ್ಲೂ 2.5 ರೂಪಾಯಿ ಬೆಲೆ ಇಳಿಕೆಯಾಗಿತ್ತು. ಬೆಂಗಳೂರಿನಲ್ಲಿ ಅಕ್ಟೋಬರ್‌ 4ರಂದು 84.72 ರೂಪಾಯಿ ಇದ್ದ ಪ್ರತಿ ಲೀಟರ್‌ ಪೆಟ್ರೋಲ್‌ ಬೆಲೆ ಅ.5ರಂದು 82.19 ರೂಪಾಯಿಗೆ ಇಳಿಕೆಯಾಗಿತ್ತು. ಆದರೆ, ಅ.6ರಿಂದ ಮತ್ತೆ ಬೆಲೆ ಏರಿಕೆಯಾಗುತ್ತಲೇ ಇದೆ. ಅ.6ರಂದು 18 ಪೈಸೆ, ಅ.7ರಂದು 15 ಪೈಸೆ ಏರಿಕೆಯಾಗಿದ್ದ ಪ್ರತಿ ಲೀಟರ್‌ ಪೆಟ್ರೋಲ್‌ ಬೆಲೆ ಅ.8ರಂದು 21 ಪೈಸೆಯಷ್ಟು ಏರಿದೆ. ಇನ್ನು ಡೀಸೆಲ್‌ ಬೆಲೆಯನ್ನು ಬೆಂಗಳೂರಿನಲ್ಲಿ ಅ.6ರಿಂದ ಪ್ರತಿ ದಿನ 29 ಪೈಸೆಯಷ್ಟು ಹೆಚ್ಚಿಸುತ್ತಲೇ ಬರಲಾಗುತ್ತಿದೆ.

ಬೆಂಗಳೂರಿನ ದರ ವಿವರ (ರೂ.)
ಅ.4: ಪೆಟ್ರೋಲ್‌ 84.72, ಡೀಸೆಲ್ 75.89
ಅ.8: ಪೆಟ್ರೋಲ್‌ 82.73; ಡೀಸೆಲ್ 74.24

ಮುಂಬೈನಲ್ಲಿ ಪ್ರತಿ ಲೀಟರ್‌ ಪೆಟ್ರೋಲ್‌ ಬೆಲೆ ಸೋಮವಾರದ ಹೊತ್ತಿಗೆ 21 ಪೈಸೆ ಹೆಚ್ಚಾಗಿ 87.50 ರೂಪಾಯಿ ಮುಟ್ಟಿದೆ. ಲೀಟರ್‌ ಡೀಸೆಲ್‌ ಬೆಲೆ 31 ಪೈಸೆಯಷ್ಟು ಹೆಚ್ಚಾಗಿದ್ದು, ಇಂದಿನ ದರ 77.37 ರೂಪಾಯಿ. ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಪೆಟ್ರೋಲ್‌ ದರ ಪೆಟ್ರೋಲ್‌ ಬೆಲೆ 21 ಪೈಸೆ ಹಾಗೂ ಡೀಸೆಲ್‌ ಬೆಲೆ 29 ಪೈಸೆ ಹೆಚ್ಚಾಗಿದೆ. ಚೆನ್ನೈನಲ್ಲಿ ಪೆಟ್ರೋಲ್‌ ಬೆಲೆ 22 ಪೈಸೆ ಹಾಗೂ ಡೀಸೆಲ್‌ ಬೆಲೆ 31 ಪೈಸೆ ಹೆಚ್ಚಾಗಿದೆ.

ಪೆಟ್ರೋಲ್‌- ಡೀಸೆಲ್‌ ಬೆಲೆ ಇಳಿಕೆಯ ಸಂದರ್ಭದಲ್ಲೇ ಇದೊಂದು ಜನಸಾಮಾನ್ಯರ ಕಣ್ಣೊರೆಸುವ ತಂತ್ರ ಎಂಬ ಟೀಕೆಗಳು ಕೇಳಿಬಂದಿದ್ದವು. ಈ ಬೆಲೆ ಇಳಿಕೆ ಪ್ರಹಸನ ನಡೆದು ನಾಲ್ಕು ದಿನಗಳಲ್ಲೇ ಕೇಂದ್ರ ಸರಕಾರದ ರಂಗೋಲೆ ಕೆಳಗೆ ತೂರುವ ತಂತ್ರ ಜನರಿಗೇ ಗೊತ್ತಾಗುತ್ತಿದೆ. ಮುಂದೆ ಬೆಲೆ ಇಳಿಕೆ ಮಾಡಿ ಪ್ರತಿ ದಿನ ಪೈಸೆ ಪೈಸೆಗಳಲ್ಲಿ ದರ ಹೆಚ್ಚಿಸುವ ಮೂಲಕ ದರ ಏರಿಕೆಯ ಬಿಸಿಯನ್ನು ಕೇಂದ್ರ ಮುಂದುವರಿಸಿದೆ.

Also read: ಏರಿಸಿದ್ದು ₹19.48, ಇಳಿಸಿದ್ದು ₹4.5: ಇಂಧನ ಬೆಲೆ ಇಳಿಕೆಗೆ ಸಂಭ್ರಮ ಪಡಲು ಕಾರಣಗಳು ಸಿಗುತ್ತಿಲ್ಲ!

Also read: ಇಂಧನ ಬೆಲೆ ಇಳಿಕೆ; ಬೆನ್ನಲ್ಲೇ ಹೊರಬಿದ್ದ ಸಮೀಕ್ಷೆ: ಇದು ಗುರುವಾರ ನಡೆದ ‘ಪ್ರೈಂ ಟೈಮ್ ಮ್ಯಾನೇಜ್‌ಮೆಂಟ್’!