ಬಾಲಿವುಡ್‌ ಲೈಂಗಿಕ ದೌರ್ಜನ್ಯ; ದಶಕದ ಹಿಂದಿನ ಘಟನೆ ಬಗ್ಗೆ ಮೌನ ಮುರಿದ ತನುಶ್ರೀ ದತ್ತ
ಸುದ್ದಿ ಸಾರ

ಬಾಲಿವುಡ್‌ ಲೈಂಗಿಕ ದೌರ್ಜನ್ಯ; ದಶಕದ ಹಿಂದಿನ ಘಟನೆ ಬಗ್ಗೆ ಮೌನ ಮುರಿದ ತನುಶ್ರೀ ದತ್ತ

“ಹತ್ತು ವರ್ಷಗಳ ಹಿಂದೆಯೇ ನನ್ನ ಮೇಲೆ ಲೈಂಗಿಕ ದೌರ್ಜನ್ಯ ನಡೆದಿತ್ತು” ಎಂದು ಬಾಲಿವುಡ್ ನಟಿ ತನುಶ್ರೀ ದತ್ತ ಹೇಳಿಕೊಂಡಿದ್ದಾರೆ.

ಬಾಲಿವುಡ್‌ನ ಆಂತರ್ಯದ ಬಗ್ಗೆ ಮಾತನಾಡಿರುವ ನಟಿ ತನುಶ್ರೀ ದತ್ತ, ತಮ್ಮ ಮೇಲೆ ದಶಕದ ಹಿಂದೆಯೇ ಲೈಂಗಿಕ ದೌರ್ಜನ್ಯ ನಡೆದಿತ್ತು ಎಂದು ಹೇಳಿಕೊಂಡಿದ್ದಾರೆ.

“ಮಿ ಟೂ ಅಭಿಯಾನಕ್ಕಿಂತಲೂ ಸಾಕಷ್ಟು ವರ್ಷಗಳ ಹಿಂದಿನಿಂದಲೂ ಬಾಲಿವುಡ್‌ನಲ್ಲಿ ನಟಿಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಯುತ್ತಿದೆ. ಸುಮಾರು ಹತ್ತು ವರ್ಷಗಳ ಹಿಂದೆ ನನ್ನ ಮೇಲೂ ಲೈಂಗಿಕ ದೌರ್ಜನ್ಯ ನಡೆದಿತ್ತು” ಎಂದು ನ್ಯೂಸ್‌ 18 ಸುದ್ದಿಸಂಸ್ಥೆಗೆ ನೀಡಿರುವ ಸಂದರ್ಶನದಲ್ಲಿ ತನುಶ್ರೀ ಹೇಳಿದ್ದಾರೆ.

“2008ರಲ್ಲಿ ‘ಹಾರ್ನ್ ಒಕೆ ಪ್ಲೀಸ್‌’ ಚಿತ್ರದ ಹಾಡಿನಲ್ಲಿ ನರ್ತಿಸುವ ವೇಳೆ ನನ್ನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಲಾಯಿತು. ಮಿ ಟೂ ಅಭಿಯಾನ ಆರಂಭವಾಗುವ ದಶಕದ ಹಿಂದೆಯೇ ನನ್ನ ಮೇಲೆ ಬಾಲಿವುಡ್‌ನಲ್ಲಿ ಲೈಂಗಿಕ ದೌರ್ಜನ್ಯ ನಡೆದಿತ್ತು. ಆದರೆ, ನನಗೆ ನ್ಯಾಯ ಸಿಗಲಿಲ್ಲ” ಎಂದಿದ್ದಾರೆ ತನುಶ್ರೀ.

“ನನ್ನ ಮೇಲೆ ನಡೆದ ದೌರ್ಜನ್ಯದ ಬಗ್ಗೆ ಎಲ್ಲರೂ ಈ ಹೊತ್ತಿಗೂ ಮೌನವಾಗಿದ್ದಾರೆ. ಎಲ್ಲಿಯವರೆಗೂ ನನಗೆ ನ್ಯಾಯ ಸಿಗುವುದಿಲ್ಲವೋ ಅಲ್ಲಿಯವರೆಗೂ ಭಾರತದಲ್ಲಿ ಮಿ ಟೂ ಅಭಿಯಾನವಷ್ಟೇ ಅಲ್ಲ, ಇಂಥ ದೌರ್ಜನ್ಯ ವಿರೋಧಿಸುವ ಯಾವುದೇ ಅಭಿಯಾನ ಆರಂಭವಾಗದು” ಎಂದು ತನುಶ್ರೀ ನೊಂದು ನುಡಿದಿದ್ದಾರೆ.