ರಫೇಲ್‌ ಅಕಾ ಮೋದಿ ಬೊಫೋರ್ಸ್‌;  ಸಿಎಜಿ ತನಿಖೆಗೆ ಕಾಂಗ್ರೆಸ್‌  ಮನವಿ
ಸುದ್ದಿ ಸಾರ

ರಫೇಲ್‌ ಅಕಾ ಮೋದಿ ಬೊಫೋರ್ಸ್‌; ಸಿಎಜಿ ತನಿಖೆಗೆ ಕಾಂಗ್ರೆಸ್‌ ಮನವಿ

ರಫೇಲ್‌ ಒಪ್ಪಂದದ ಸತ್ಯ ಹೊರಬಂದರೆ ಮೋದಿ ಸರಕಾರದ ಬಣ್ಣ ಬಯಲಾಗಲಿದೆ ಎಂದು ಕಾಂಗ್ರೆಸ್‌  ಹೇಳಿದೆ. ಹೀಗಾಗಿ ಸಿಎಜಿ ತನಿಖೆಗೆ ಪ್ರಮುಖ ಪ್ರತಿಪಕ್ಷವೀಗ ಆಗ್ರಹಿಸಿದೆ. 

ರಫೇಲ್‌ ಒಪ್ಪಂದದ ಆಡಿಟ್‌ ನಡೆಸಿ ಈ ಹಗರಣದ ಸತ್ಯವನ್ನು ದೇಶದ ಜನಕ್ಕೆ ತಿಳಿಯುವಂತೆ ಮಾಡಬೇಕೆಂದು ಕಾಂಗ್ರೆಸ್‌ ಮುಖಂಡರು ಸಿಎಜಿಗೆ ಬುಧವಾರ ಮನವಿ ಸಲ್ಲಿಸಿದ್ದಾರೆ.

ಕಾಂಗ್ರೆಸ್‌ ಮುಖಂಡರಾದ ಆನಂದ್ ಶರ್ಮಾ, ರಣದೀಪ್‌ ಸುರ್ಜೆವಾಲಾ ಮತ್ತಿತರರು ಸಿಎಜಿ ಕಚೇರಿಗೆ ತೆರಳಿ ಮನವಿ ಪತ್ರ ನೀಡಿದ್ದಾರೆ. ಮನವಿ ಪತ್ರದ ಜತೆಗೆ ರಫೇಲ್‌ ಒಪ್ಪಂದದ ಕುರಿತ ದಾಖಲೆಗಳನ್ನೂ ನೀಡಿರುವುದಾಗಿ ಸುರ್ಜೆವಾಲಾ ಹೇಳಿದ್ದಾರೆ.

ಮನವಿ ಸಲ್ಲಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಸುರ್ಜೆವಾಲಾ, “ರಫೇಲ್‌ ಹಗರಣದ ಸತ್ಯಾಂಶ ಹೊರಬೇಕು. ಇದಕ್ಕಾಗಿ ಸಿಎಜಿ ಆಡಿಟ್ ನಡೆಸಿ ಹಗರಣವನ್ನು ಹೊರಹಾಕುವಂತೆ ಮನವಿ ಮಾಡಿದ್ದೇವೆ. ರಫೇಲ್‌ ಒಪ್ಪಂದ ಪ್ರಕ್ರಿಯೆಯ ಬಗ್ಗೆ ಈಗಾಗಲೇ ಪರಿಶೀಲನೆ ನಡೆಸುತ್ತಿರುವ ಸಿಎಜಿ ಈ ಒಪ್ಪಂದಕ್ಕೆ ಸಂಬಂಧ ಪಟ್ಟ ದಾಖಲೆಗಳನ್ನು ಸಂಗ್ರಹಿಸುತ್ತಿದೆ” ಎಂದಿದ್ದಾರೆ.

“ಸಿಎಜಿ ವರದಿ ಬಂದ ಬಳಿಕ ರಫೇಲ್‌ ಖರೀದಿ ಹಗರಣದ ಸತ್ಯಾಂಶ ಹೊರಬರುತ್ತದೆ. ಈ ಮೂಲಕ ಮೋದಿ ಸರಕಾರದ ಬಣ್ಣ ಬಯಲಾಗಲಿದೆ” ಎಂದು ಸುರ್ಜೆವಾಲಾ ಹೇಳಿದ್ದಾರೆ.

Also read: ‘ಇನ್ ಡೀಟೆಲ್’: 21ನೇ ಶತಮಾನದ ಮೆಘಾ ಡೀಲ್; ಏನಿದು ರಫೇಲ್‌?

ಕಾಂಗ್ರೆಸ್‌ ಮುಖಂಡರು ಸಿಎಜಿ ಭೇಟಿ ಮಾಡಿ ಮನವಿ ಸಲ್ಲಿಸಿರುವ ಬಗ್ಗೆ ಪ್ರತಿಕ್ರಿಯಿಸಿರುವ ಕೇಂದ್ರ ಕಾನೂನು ಸಚಿವ ರವಿಶಂಕರ್‌ ಪ್ರಸಾದ್‌, “ರಫೇಲ್‌ ಒಪ್ಪಂದ ಕುರಿತಂತೆ ಕಾಂಗ್ರೆಸ್‌ನವರೇ ಸಾಕಷ್ಟು ಪ್ರಶ್ನೆಗಳಿಗೆ ಉತ್ತರಕೊಡಬೇಕಿದೆ. ಈಗ ರಫೇಲ್‌ ಒಪ್ಪಂದದ ಬಗ್ಗೆ ಮಾತನಾಡುತ್ತಿರುವ ಹಿಂದಿನ ರಕ್ಷಣಾ ಸಚಿವ ಎ.ಕೆ. ಆಂಟನಿ ಅವರು ಉತ್ತರಿಸಬೇಕಿರುವ ಪ್ರಶ್ನೆಗಳೂ ಸಾಕಷ್ಟಿವೆ” ಎಂದಿದ್ದಾರೆ.

“ಕಾಂಗ್ರೆಸ್‌ ಆಧಾರ ರಹಿತ ಆರೋಪಗಳಿಗಾಗಿ ರಫೇಲ್‌ ಒಪ್ಪಂದದ ಬಗ್ಗೆ ಜಂಟಿ ಸಂಸದೀಯ ಸಮಿತಿಯಿಂದಾಗಲೀ ಅಥವಾ ಸಿಎಜಿಯಿಂದಾಗಲೀ ತನಿಖೆಗೆ ಸರಕಾರ ಆದೇಶ ನೀಡುವುದಿಲ್ಲ. ರಫೇಲ್‌ ಒಪ್ಪಂದದ ವಿಷಯವನ್ನೇ ದೊಡ್ಡದು ಮಾಡುತ್ತಿರುವ ಕಾಂಗ್ರೆಸ್‌ ದೇಶದ ಭದ್ರತೆಯ ವಿಚಾರದಲ್ಲಿ ಒಗ್ಗಟ್ಟು ತೋರುತ್ತಿಲ್ಲ” ಎಂದು ಪ್ರಸಾದ್‌ ಹೇಳಿದ್ದಾರೆ.

Also read: ‘ರಫೇಲ್ ಅಕಾ ಮೋದಿ ಬೋಫೋರ್ಸ್‌’: ಹಗರಣ ಅರ್ಥಮಾಡಿಕೊಳ್ಳಲು ಮುಂದಿಟ್ಟ ಆ 22 ಅಂಶಗಳು...