ದ್ವೇಷ ಭಾಷಣ: ‘ಯೋಗಿ ಆದಿತ್ಯನಾಥ್‌ ವಿರುದ್ಧ ಕ್ರಮ ಯಾಕಾಗಲಿಲ್ಲ’ ಸುಪ್ರೀಂಕೋರ್ಟ್‌ ಪ್ರಶ್ನೆ
ಸುದ್ದಿ ಸಾರ

ದ್ವೇಷ ಭಾಷಣ: ‘ಯೋಗಿ ಆದಿತ್ಯನಾಥ್‌ ವಿರುದ್ಧ ಕ್ರಮ ಯಾಕಾಗಲಿಲ್ಲ’ ಸುಪ್ರೀಂಕೋರ್ಟ್‌ ಪ್ರಶ್ನೆ

ದೇಶ ಮರೆತು ಹೋಗಿದ್ದ ಕೋಮು ದಳ್ಳುರಿಯ ಪ್ರಕರಣವೊಂದು ಮತ್ತೆ ಸುಪ್ರೀಂಕೋರ್ಟ್‌ನಲ್ಲಿ ಜೀವ ಪಡೆದು ಯೋಗಿ ಆದಿತ್ಯನಾಥ್‌ ಮೇಲೆ ತೂಗುಗತ್ತಿ ಓಲಾಡುವಂತೆ ಮಾಡಿದೆ.

ದ್ವೇಷ ಭಾಷಣ ಪ್ರಕರಣದಲ್ಲಿ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ವಿರುದ್ಧ ಏಕೆ ಕ್ರಮ ಕೈಗೊಂಡಿಲ್ಲ ಎಂದು ಪ್ರಶ್ನಿಸಿರುವ ಸುಪ್ರೀಂಕೋರ್ಟ್‌ ನಾಲ್ಕು ವಾರಗಳಲ್ಲಿ ಈ ಬಗ್ಗೆ ಉತ್ತರಿಸುವಂತೆ ಉತ್ತರ ಪ್ರದೇಶ ಸರಕಾರಕ್ಕೆ ಸೋಮವಾರ ನೋಟಿಸ್‌ ನೀಡಿದೆ.

2007ರಲ್ಲಿ ಗೋರಖ್‌ಪುರದಲ್ಲಿ ಸಂಭವಿಸಿದ ಕೋಮು ದಳ್ಳುರಿಗೆ ಆಗ ಸಂಸದರಾಗಿದ್ದ ಯೋಗಿ ಆದಿತ್ಯನಾಥ್‌ ಅವರು ಮಾಡಿದ್ದ ಪ್ರಚೋದನಾಕಾರಿ ದ್ವೇಷ ಭಾಷಣವೇ ಕಾರಣ. ಈ ಬಗ್ಗೆ ಸಿಬಿಐ ತನಿಖೆಗೆ ಆದೇಶಿಸಬೇಕು ಎಂದು ಸಲ್ಲಿಸಿದ್ದ ಅರ್ಜಿಯನ್ನು ಅಲಹಾಬಾದ್‌ ಹೈಕೋರ್ಟ್‌ ವಜಾಗೊಳಿಸಿತ್ತು.

ಗೋರಖ್‌ಪುರ ನಿವಾಸಿ ಪರ್ವಾಜ್‌ ಮತ್ತು ಪ್ರತ್ಯಕ್ಷದರ್ಶಿ ಮೊಹಮ್ಮದ್‌ ಅಸದ್‌ ಹಯಾತ್‌ ಎಂಬುವರು ಅಲಹಾಬಾದ್‌ ಹೈಕೋರ್ಟ್‌ಗೆ 2008ರ ನವೆಂಬರ್‌ನಲ್ಲಿ ಅರ್ಜಿ ಸಲ್ಲಿಸಿದ್ದರು. ಯೋಗಿ ಆದಿತ್ಯನಾಥ್‌ ದ್ವೇಷ ಭಾಷಣದಿಂದ ಪ್ರಚೋದನೆ ಉಂಟಾಗಿ ಹಿಂಸಾಚಾರ ನಡೆದ ಆರೋಪವಿದೆ. ಈ ಘಟನೆಯ ಬಗ್ಗೆ ಪರ್ವಾಜ್‌ ಪೊಲೀಸರಿಗೆ ದೂರನ್ನೂ ನೀಡಿದ್ದರು.

ಅಲಹಾಬಾದ್ ಹೈಕೋರ್ಟ್‌ ಅರ್ಜಿಯನ್ನು ವಜಾಗೊಳಿಸಿದ್ದನ್ನು ಪ್ರಶ್ನಿಸಿ ಅರ್ಜಿದಾರರು ಸುಪ್ರೀಂಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿದ್ದರು. ಈ ಅರ್ಜಿಯ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ನ್ಯಾಯಪೀಠವು ಉತ್ತರ ಪ್ರದೇಶ ಸರಕಾರಕ್ಕೆ ನೋಟಿಸ್‌ ಜಾರಿ ಮಾಡಿದೆ.

ಗೋರಖ್‌ಪುರದಲ್ಲಿ 2007ರ ಜನವರಿಯಲ್ಲಿ ಮೊಹರಂ ಮೆರವಣಿಗೆ ವೇಳೆ ಹಿಂದೂ- ಮುಸ್ಲಿಂ ಗುಂಪುಗಳ ನಡುವೆ ಮಾರಾಮಾರಿ ನಡೆದು ಹಿಂದೂ ಯುವಕ ರಾಜ್‌ ಕುಮಾರ್‌ ಅಗ್ರಹಾರಿ ಎಂಬಾತ ಆಸ್ಪತ್ರೆಗೆ ದಾಖಲಾಗಿದ್ದ. ಇದರಿಂದ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದ್ದ ಗೋರಖ್‌ಪುರಕ್ಕೆ ಯೋಗಿ ಆದಿತ್ಯನಾಥ್‌ ಭೇಟಿ ನೀಡದಂತೆ ಜಿಲ್ಲಾಧಿಕಾರಿ ನಿರ್ಬಂಧ ಹೇರಿದ್ದರು. ಆರಂಭದಲ್ಲಿ ಇದಕ್ಕೆ ಒಪ್ಪಿದ್ದ ಆದಿತ್ಯನಾಥ್‌, ರಾಜ್‌ ಕುಮಾರ್‌ ಅಗ್ರಹಾರಿ ಸಾವಿನ ನಂತರ ನಿರ್ಬಂಧ ಉಲ್ಲಂಘಿಸಿ ತಮ್ಮ ಬೆಂಬಲಿಗರೊಂದಿಗೆ ಗೋರಖ್‌ಪುರಕ್ಕೆ ಹೋಗಿದ್ದರು.

ರಾಜ್‌ ಕುಮಾರ್‌ ಅಗ್ರಹಾರಿ ಸಾವಿಗೆ ನ್ಯಾಯ ಒದಗಿಸಬೇಕೆಂದು ಧರಣಿ ಆರಂಭಿಸಿದ್ದ ಆದಿತ್ಯನಾಥ್‌, ಅದೇ ವೇಳೆ ದ್ವೇಷ ಭಾಷಣ ಮಾಡಿದ್ದರು. ಇದರಿಂದ ಕೆರಳಿದ ಅವರ ಕೆಲ ಹಿಂಬಾಲಕರು ಅಲ್ಲಿನ ಮುಸ್ಲಿಂ ಪ್ರಾರ್ಥನಾ ಸ್ಥಳಕ್ಕೆ ಬೆಂಕಿ ಇಟ್ಟಿದ್ದರು. ಗಲಭೆ ಹೆಚ್ಚಾದ ಹಿನ್ನೆಲೆಯಲ್ಲಿ ಪೊಲೀಸರು ಗೋರಖ್‌ಪುರದಲ್ಲಿ ಕರ್ಫ್ಯೂ ವಿಧಿಸಿದ್ದರು. ನಿರ್ಬಂಧ ಉಲ್ಲಂಘಿಸಿದ್ದ ಆರೋಪದ ಮೇಲೆ ಆದಿತ್ಯನಾಥ್‌ ಅವರನ್ನು ಪೊಲೀಸರು ಬಂಧಿಸಿದ್ದರು.

ಯೋಗಿ ಆದಿತ್ಯನಾಥ್‌ ಬಂಧನದ ಬಳಿಕ ಉತ್ತರ ಪ್ರದೇಶದ ಹಲವು ಕಡೆಗಳಲ್ಲಿ ಹಿಂಸಾಚಾರ ನಡೆಯಿತು. ಮುಂಬೈ – ಗೋರಖ್‌ಪುರ ರೈಲಿಗೆ ಬೆಂಕಿ ಹಾಕಲಾಗಿತ್ತು. ಹಿಂದು ಯುವ ವಾಹಿನಿ ಕಾರ್ಯಕರ್ತರೇ ಈ ಕೃತ್ಯ ಎಸಗಿದ್ದ ಆರೋಪವಿತ್ತು. ಗೋರಖ್‌ಪುರದ ಹಲವು ಮುಸ್ಲಿಂ ಪ್ರಾರ್ಥನಾ ಸ್ಥಳಗಳು, ಮನೆಗಳು, ಬಸ್‌ಗಳು ಈ ಹಿಂಸಾಚಾರದಲ್ಲಿ ಹೊತ್ತಿ ಉರಿದವು. 2007ರ ಫೆಬ್ರುವರಿಯಲ್ಲಿ ಗೋರಖ್‌ಪುರ ನ್ಯಾಯಾಲಯ ಆದಿತ್ಯನಾಥ್‌ ಅವರಿಗೆ ಜಾಮೀನು ನೀಡಿತ್ತು.

ದಶಕದ ಹಿಂದಿನ ಈ ಪ್ರಕರಣ ಭೂತಕಾಲಕ್ಕೆ ಸರಿಯಿತು ಎನ್ನುವ ವೇಳೆಗೆ ಸುಪ್ರೀಂಕೋರ್ಟ್‌ ಈ ಪ್ರಕರಣಕ್ಕೆ ಜೀವ ನೀಡಿದೆ. ಈ ಮೂಲಕ ಯೋಗಿ ಆದಿತ್ಯನಾಥ್‌ ಮೇಲೆ ಹಳೆಯ ಪ್ರಕರಣದ ತೂಗುಗತ್ತಿಯೊಂದು ಮತ್ತೆ ಓಲಾಡುತ್ತಿದೆ.