‘ಸೂರ್ಯನ ಮುಖ ನೋಡಲು’ ರಜೆ ಕೋರಿದ ಮಡಿಕೇರಿ ಪೇದೆ: ಪತ್ರದ ಅಸಲಿಯತ್ತೇನು? 
ಸುದ್ದಿ ಸಾರ

‘ಸೂರ್ಯನ ಮುಖ ನೋಡಲು’ ರಜೆ ಕೋರಿದ ಮಡಿಕೇರಿ ಪೇದೆ: ಪತ್ರದ ಅಸಲಿಯತ್ತೇನು? 

‘ಎರಡು ತಿಂಗಳಿನಿಂದ ಸೂರ್ಯನ ಮುಖವನ್ನು ನೋಡದ ಹಿನ್ನೆಲೆಯಲ್ಲಿ ನಮ್ಮ ಊರಿಗೆ ತೆರಳಿ ಸೂರ್ಯನನ್ನು ನೋಡಿಕೊಂಡು ಬರಲು ಹಾಗೂ ಬಟ್ಟೆಗಳನ್ನು ಒಣಗಿಸಿಕೊಂಡು ಬರಲು’ ರಜೆ ನೀಡುವಂತೆ ಕೋರಲಾಗಿದೆ.

ಮಳೆ ನೆರೆಯ ಕೇರಳ ಹಾಗೂ ರಾಜ್ಯದಲ್ಲಿ ಹವಾಮಾನವನ್ನೇ ಬದಲಿಸಿದೆ. ಜತೆಗೆ, ಚಂಡಿ ಹಿಡಿದ ಬದುಕು ಕೊಡಗು ಪೊಲೀಸ್ ಇಲಾಖೆಯಲ್ಲಿ ತಮಾಷೆಗೂ ಕಾರಣವಾಗಿದೆ.

ಕೊಡಗು ಜಿಲ್ಲೆ ಮಡಿಕೇರಿಯ ಪೊಲೀಸ್ ಕಾನ್ಸ್‌ಸ್ಟೇಬಲ್ ರಮೇಶ್ ಎಂಬುವವರ ಹೆಸರಿನಲ್ಲಿ ರಜೆ ಕೋರಿದ, ತಮಾಷೆಯ ಒಕ್ಕಣೆಗಳಿರುವ ಪತ್ರವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

‘5 ದಿನಗಳ ಸಾಂದರ್ಭಿಕ ರಜೆಯನ್ನು ಕೋರಿ’ ಎಂದು ಆರಂಭವಾಗುವ ಪತ್ರದಲ್ಲಿ, ‘ಎರಡು ತಿಂಗಳಿನಿಂದ ಸೂರ್ಯನ ಮುಖವನ್ನು ನೋಡದ ಹಿನ್ನೆಲೆಯಲ್ಲಿ ನಮ್ಮ ಊರಿಗೆ ತೆರಳಿ ಸೂರ್ಯನನ್ನು ನೋಡಿಕೊಂಡು ಬರಲು ಹಾಗೂ ಬಟ್ಟೆಗಳನ್ನು ಒಣಗಿಸಿಕೊಂಡು ಬರಲು’ ರಜೆ ನೀಡುವಂತೆ ಕೋರಲಾಗಿದೆ.

ರಮೇಶ್, ಪಿಸಿ ನಂಬರ್ 1121 ಹೆಸರಿನಲ್ಲಿ ಟೈಪ್ ಮಾಡಿರುವ ಪತ್ರದ ಯಥಾವತ್ ಪ್ರತಿ ಇಲ್ಲಿದೆ;

ನಕಲಿ ಹೆಸರಿನಲ್ಲಿ ತಯಾರಾದ ಪತ್ರ. 
ನಕಲಿ ಹೆಸರಿನಲ್ಲಿ ತಯಾರಾದ ಪತ್ರ. 

ಮೇಲಿನ ಪತ್ರವನ್ನು ‘ಸಮಾಚಾರ’ದ ಗಮನಕ್ಕೆ ತಂದವರು ಪತ್ರಕರ್ತ ಕೆ. ಆರ್. ರವೀಂದ್ರ. “ಬಳಸಿರುವ ಭಾಷೆ (ಸಮುಚಿತ ಮಾರ್ಗದಲ್ಲಿ)ಯನ್ನು ನೋಡಿದರೆ ಇದು ಪೊಲೀಸ್ ಇಲಾಖೆ ಒಳಗೇ ಇರುವವರು ಬರೆದ ಪತ್ರದಂತೆ ಕಾಣಿಸುತ್ತದೆ,’’ ಎನ್ನುತ್ತಾರೆ ರವೀಂದ್ರ.

ರಜೆ ಸಿಗದ, ಮಳೆಯಿಂದ ಕಂಗೆಟ್ಟಿರುವ ಮಡಿಕೇರಿ ಭಾಗದ ಪೊಲೀಸ್ ಸಿಬ್ಬಂದಿಗಳು ಕುಚೋದ್ಯಕ್ಕಾಗಿ ತಯಾರಿಸಿದ ಪತ್ರ ಇದಿರಬಹುದು ಎಂಬುದು ಅವರ ಅನುಮಾನ.

ಆದರೆ, ಮಡಿಕೇರಿ ಪೊಲೀಸ್‌ ಇಲಾಖೆಯನ್ನು ‘ಸಮಾಚಾರ’ ಸಂಪರ್ಕಿಸಿದ್ದಾಗ, ರಮೇಶ್ ಎಂಬ ಹೆಸರಿನ ಯಾವ ಪೇದೆಯೂ ನಮ್ಮಲ್ಲಿ ಇಲ್ಲ ಹಾಗೂ ಪಿಸಿ ಸಂಖ್ಯೆ1121 ಇರಲು ಸಾಧ್ಯವಿಲ್ಲ ಎಂಬ ಮಾಹಿತಿ ಲಭ್ಯವಾಯಿತು.

ಈ ಕುರಿತು ಪ್ರತಿಕ್ರಿಯಿಸಿದ ಕೊಡಗು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಸುಮನ್ ಡಿ ಪೆನ್ನೇಕರ್, “ಹೀಗೊಂದು ಪತ್ರ ಹರಿದಾಡುತ್ತಿದೆ ಎಂಬ ಮಾಹಿತಿ ಬಂದಿದೆ. ಆದರೆ ನಮ್ಮಲ್ಲಿ ಆ ಹೆಸರಿನವರು ಯಾರೂ ಇಲ್ಲ. ಹಾಗೆಯೇ ಪೊಲೀಸ್ ನಿರೀಕ್ಷಕರು ಎಂಬ ಹುದ್ದೆಯೂ ಇಲ್ಲ. ಇದು ಕಿಡಿಗೇಡಿಗಳ ಕೃತ್ಯ,’’ ಎಂದರು.

ಒಟ್ಟಿನಲ್ಲಿ, ಮಡಿಕೇರಿಯಲ್ಲಿ ಬಿಡದೆ ಸುರಿಯುತ್ತಿರುವ ಮಳೆ, ಮೂಡದ ಸೂರ್ಯನ ಜತೆಗೆ ಬಹುಶಃ ರಜೆ ಸಿಗದ ಪೇದೆಗಳ ಹಾಸ್ಯ ಪ್ರಜ್ಞೆ ಸೇರಿಕೊಂಡು ಇಂತಹದೊಂದು ಪತ್ರ ಹುಟ್ಟಲು ಕಾರಣವಾಗಿರಬಹುದು.