‘ಚಿಕ್ಕ ಟೆಂಟ್, ಪುಟ್ಟ ಲೌಡ್‌ ಸ್ಪೀಕರ್‌’: ರಾಹುಲ್ ಗಾಂಧಿ ಮರೆವಣಿಗೆಗೆ  ಷರತ್ತು
ಸುದ್ದಿ ಸಾರ

‘ಚಿಕ್ಕ ಟೆಂಟ್, ಪುಟ್ಟ ಲೌಡ್‌ ಸ್ಪೀಕರ್‌’: ರಾಹುಲ್ ಗಾಂಧಿ ಮರೆವಣಿಗೆಗೆ ಷರತ್ತು

ಜೂನ್‌ 6ರಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಮಧ್ಯಪ್ರದೇಶದ ಮಂಡ್ಸಾರ್‌ನಲ್ಲಿ ಮೆರವಣಿಗೆಯನ್ನು ನಡೆಸಲಿದ್ದಾರೆ. ಈ ಮೆರವಣಿಗೆಯಲ್ಲಿ ಏನಿರಬೇಕು? ಏನಿರಬಾರದು? ಎನ್ನುವುದನ್ನು ಸ್ಥಳೀಯ ಸರಕಾರಿ ಅಧಿಕಾರಿಗಳು ತಿಳಿಸಿದ್ದಾರೆ. 

ಮಧ್ಯ ಪ್ರದೇಶದ ಮಲ್ಹರ್‌ಗಢ್‌ನ ಸರಕಾರಿ ಅಧಿಕಾರಿಗಳು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್ ಗಾಂಧಿಯ ಮುಂದೆ 19 ಷರತ್ತುಗಳನ್ನು ಇಟ್ಟಿದ್ದರು. ಕಾಂಗ್ರೆಸಿಗರಿಂದ ವ್ಯಾಪಕ ಟೀಕೆ  ವ್ಯಕ್ತವಾದ ನಂತರ ಷರತ್ತುಗಳ ಸಂಖ್ಯೆ19ರಿಂದ 6ಕ್ಕೆ ಇಳಿದಿದೆ. ಜೂನ್‌ 6ರಂದು ಮಧ್ಯ ಪ್ರದೇಶದ ಮಂಡ್ಸಾರ್‌ ನಗರದಲ್ಲಿ ರಾಹುಲ್‌ ಗಾಂಧಿ ಮೆರವಣಿಗೆಯನ್ನು ನಡೆಸಲಿದ್ದು, ಮೆರವಣಿಗೆಯ ವೇಳೆ ಈ ಷರತ್ತುಗಳನ್ನು ಪಾಲಿಸಬೇಕಿದೆ.

ಕಳೆದ ವರ್ಷ ಮಂಡ್ಸಾರ್‌ ನಗರದಲ್ಲಿ ರೈತರು ದೊಡ್ಡದೊಂದು ಪ್ರತಿಭಟನೆಯನ್ನು ನಡೆಸಿದ್ದರು. ಈ ವೇಳೆ ಪ್ರತಿಭಟನೆ ಹಿಂಸಾ ಸ್ವರೂಪವನ್ನು ಪಡೆದಿತ್ತು. ಪೊಲೀಸರು ಸಿಡಿಸಿದ ಗುಂಡಿಗೆ 5 ಮಂದಿ ಪ್ರತಿಭಟನಾ ನಿರತ ರೈತರು ಹತರಾಗಿದ್ದರು. ಈಗ ಇದೇ ನಗರದಲ್ಲಿ ರಾಹುಲ್‌ ಗಾಂಧಿ ಮೆರವಣಿಗೆ ನಡೆಸಲಿದ್ದಾರೆ. ನಗರದ ಕಾಲೇಜೊಂದರ ಮೈದಾನದಲ್ಲಿ ಕಾರ್ಯಕ್ರಮ ನಡೆಯಲಿದೆ.

ಈ ಷರತ್ತುಗಳ ಪಟ್ಟಿಯನ್ನು ನೋಟೀಸ್‌ ಮೂಲಕ ಕಾಂಗ್ರೆಸಿಗರಿಗೆ ತಲುಪಿಸಿರುವ ಅಧಿಕಾರಿಗಳು, ಮೆರವಣಿಗೆಯ ವೇಳೆ ದೊಡ್ಡ ಧ್ವನಿವರ್ಧಕಗಳನ್ನು ಬಳಸದಂತೆ ಸೂಚಿಸಿದ್ದಾರೆ. ಧ್ವನಿ ವರ್ಧಕಗಳು 10 ಡೆಸಿಬಲ್‌ನ ಒಳಗಿನವಾಗಿರಬೇಕಿದೆ. ಜತೆಗೆ ರಾಹುಲ್‌ ಗಾಂದಿ ಎಲ್ಲಿಯೂ ಕೂಡ ಧಾರ್ಮಿಕ ಭಾವನೆಗಳಗೆ ಧಕ್ಕೆಯಾಗುವಂತೆ ಮಾತನಾಡಬಾರದು ಎಂದಿದ್ದಾರೆ.

ಮೆರವಣಿಗೆಗೆ ಎಂದು ಹಾಕಲಾಗುವ ಶಾಮಿಯಾನ, ಟೆಂಟ್‌ಗಳ ಅಳತೆಯನ್ನೂ ಕೂಡ ಅಧಿಕಾರಿಗಳೇ ನಿರ್ಧರಿಸಿದ್ದು, 15X15 ಅಡಿಯ ಟೆಂಟ್‌ಅನ್ನು ಮಾತ್ರವೇ ಹಾಕಬೇಕಿದೆ. ವಾಹನಗಳ ನಿಲುಗಡೆಗೆ ಸ್ಥಳಾವಕಾಶ, ವಿದ್ಯುತ್‌ ವ್ಯವಸ್ಥೆ, ಕುಡಿಯುವ ನೀರಿನ ವ್ಯವಸ್ಥೆ, ಅಗ್ನಿ ಶಾಮಕ ದಳವ ವ್ಯವಸ್ಥೆಗಳೆವನ್ನೂ ಕೂಡ ಮೆರವಣಿಗೆಯ ಆಯೋಜಕರೇ ನೋಡಿಕೊಳ್ಳಬೇಕಿದೆ.

ಅಕಸ್ಮಿಕವಾಗಿ ಎದುರಾಗಬಹುದಾದ ಮಳೆ, ಗಾಳಿ, ಬೆಂಕಿ ಅವಗಢ ಇತ್ಯಾದಿಗಳೆಲ್ಲದಕ್ಕೂ ಅಗತ್ಯವಿರುವ ಮುನ್ನೆಚ್ಚರಿಕಾ ಕ್ರಮಗಳನ್ನು ಮೊದಲೇ ತೆಗೆದುಕೊಳ್ಳುವಂತೆ ನೋಟಿಸ್‌ನಲ್ಲಿ ತಿಳಿಸಿಲಾಗಿದೆ.

 ಅಧಿಕಾರಿಗಳು ನೀಡಿರುವ ಷರತ್ತುಗಳ ಪ್ರತಿ.
ಅಧಿಕಾರಿಗಳು ನೀಡಿರುವ ಷರತ್ತುಗಳ ಪ್ರತಿ.

ರಾಹುಲ್‌ ಗಾಂಧಿ ಮೆರವಣಿಗೆಯನ್ನು ನಡೆಸುವ ವೇಳೆ ಸ್ಥಳದಲ್ಲಿ ಟ್ರಾಫಿಕ್‌ ಜಾಮ್‌ ಕಿರಿಕಿರಿ ಉಂಟಾಗಬಾರದು. ವಾಹನಗಳು ಸರಾಗವಾಗಿ ಚಲಿಸಲು ಅನುವು ಮಾಡಿಕೊಡಬೇಕು. ಎಲ್ಲಿಯೂ ಅವ್ಯವಸ್ಥೆ ಉಂಟಾಗಬಾರದು. ಸಮಸ್ಯೆ ಉಂಟಾದರೆ ಅದಕ್ಕೆ ಕಾರ್ಯಕ್ರಮದ ಆಯೋಜಕರನ್ನೇ ಹೊಣೆಗಾರಾಗಿಸುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಕಳ್ಳತನಗಳ ಪ್ರಕರಣಗಳು ಕಂಡುಬಂದರೆ ಅದಕ್ಕೂ ಕೂಡ ಆಯೋಜಕರೇ ಜವಾಬ್ಧಾರರು.

ಮೆರವಣಿಗೆಯ ವೇಳೆ ಯಾವುದೇ ಸಮಸ್ಯೆ ಉಂಟಾಗದಂತೆ ಎಚ್ಚರಿಕೆ ವಹಿಸಲು ಹಲವು ಮಂದಿಯನ್ನು ಆಯೋಜಕರೇ ನೇಮಿಸಬೇಕಿದೆ. ಆ ಸಮಯದಲ್ಲಿನ ಕಾರ್ಯನಿರತರಾದವರ ಮೊಬೈಲ್‌ ಸಂಖ್ಯೆಗಳ ಪಟ್ಟಿಯನ್ನು ನಿಗಧಿತ ವೇಳೆಯೊಳಗೆ ಸ್ಥಳೀಯ ಪೊಲೀಸ್‌ ಕಚೇರಿಗೆ ಸಲ್ಲಿಸಬೇಕು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನೋಟೀಸ್‌ ಹೇಳುವ ಪ್ರಕಾರ, ಆಯೋಜಕರು ಯಾರೂ ಕೂಡ ಮೆರವಣಿಗೆ ಮತ್ತು ಕಾರ್ಯಕ್ರಮದ ವೇಳೆಯಲ್ಲಿ ಮಿತಿಮೀರಿ ವರ್ತಿಸುವಂತಿಲ್ಲ. ಜನ ಸಾಮಾನ್ಯರಿಗೆ ತೊಂದರೆ ನೀಡುವಂತಿಲ್ಲ. ಇಂತಹ ಪ್ರಕರಣಗಳು ಸಂಭವಿಸಿದರೆ ಆ ಕೂಡಲೇ ಮೆರವಣಿಗೆಯ ಅನುಮತಿಯನ್ನು ರದ್ದುಗೊಳಿಸಿ, ಕಾರ್ಯಕ್ರಮಕ್ಕೆ ಅವಕಾಶ ನೀಡುವುದಿಲ್ಲ ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ.

ಈ ಷರತ್ತುಗಳೊಟ್ಟಿಗೆ ಸುಪ್ರಿಂ ಕೋರ್ಟ್‌ ಮತ್ತು ಹೈಕೋರ್ಟ್‌ಗಳು ನೀಡಿರುವ ಮಾರ್ಗದರ್ಶನಗಳನ್ನು ಆಯೋಜಕರು ಕಡ್ಡಾಯವಾಗಿ ಪಾಲಿಸಬೇಕಿದೆ. ಇಲ್ಲವೆಂದದಾದರೆ ಕಾರ್ಯಕ್ರಮವನ್ನು ನಿಲ್ಲಿಸಬೇಕಿದೆ.

ಸಾರ್ವಜನಿಕರ ಹಿತಾಸಕ್ತಿಯಿಂದಾಗಿ ಮಧ್ಯಪ್ರದೇಶದ ಅಧಿಕಾರಿಗಳು ಇಂತಹದ್ದೊಂದು ನೋಟಿಸ್‌ಅನ್ನು ಕಾಂಗ್ರೆಸ್‌ ನಾಯಕರಿಗೆ ನೀಡಿದ್ದಾರೆ. ರಾಜಕೀಯ ಕಾರ್ಯಕ್ರಮಗಳು ಸಾಮಾನ್ಯ ಜನರಿಗೆ ತೆಲೆನೋವಾಗಿ ಪರಿಣಮಿಸದಂತೆ ತಡೆಯಲು ಮುಂದಾಗಿದ್ದಾರೆ. ಅಧಿಕಾರಿಗಳ ಈ ಕ್ರಮ ಶ್ಲಾಘನೀಯವಾಗಿದ್ದು, ಯಾವುದೇ ಪಕ್ಷದ, ನಾಯಕರ ಮೆರವಣಿಗೆ ಅಥವಾ ಕಾರ್ಯಕ್ರಮಗಳ ಸಂಧರ್ಭದಲ್ಲಿ ಇಂತಹದ್ದೇ ಕ್ರಮಗಳನ್ನು ಕೈಗೊಳ್ಳಲು ಅಧಿಕಾರಿಗಳು ಮುಂದಾಗಬೇಕಿದೆ.