ಅತ್ಯಾಚಾರ ಆರೋಪ: ಯೋಗಿ ಆದಿತ್ಯನಾಥ್ ಮನೆ ಮುಂದೆ ಪ್ರತಿಭಟನೆ ನಡೆಸಿದ್ದ ತಂದೆ ಸಾವು
ಸುದ್ದಿ ಸಾರ

ಅತ್ಯಾಚಾರ ಆರೋಪ: ಯೋಗಿ ಆದಿತ್ಯನಾಥ್ ಮನೆ ಮುಂದೆ ಪ್ರತಿಭಟನೆ ನಡೆಸಿದ್ದ ತಂದೆ ಸಾವು

2017ರ ಜೂನ್‌ನಲ್ಲಿ ಶಾಸಕ ಕುಲ್‌ದೀಪ್‌ ಮತ್ತು ಆತನ ಬೆಂಬಲಿಗರು ತನ್ನ ಮೇಲೆ ಅತ್ಯಾಚಾರ ಎಸಗಿದ್ದರು ಎಂದು ಆರೋಪಿಸಿದ್ದ ಯುವತಿ ಕುಟುಂಬ ಸಮೇತ ಆತ್ಮಹತ್ಯೆಗೆ ಯತ್ನಿಸಿದ್ದರು.

ಉತ್ತರ ಪ್ರದೇಶದ ಬಿಜೆಪಿ ಶಾಸಕ ಕುಲ್‌ದೀಪ್‌ ಸಿಂಗ್‌ ಸೆಂಗರ್‌ ವಿರುದ್ಧ ಅತ್ಯಾಚಾರದ ಆರೋಪ ಮಾಡಿದ್ದ ಯುವತಿಯ ತಂದೆ ಸೋಮವಾರ ಅನುಮಾನಾಸ್ಪದವಾಗಿ ಸಾವನ್ನಪ್ಪಿದ್ದಾರೆ.

ಈ ಘಟನೆಯ ಬೆನ್ನಲ್ಲೇ ಕರ್ತವ್ಯ ಲೋಪದ ಕಾರಣಕ್ಕೆ 6 ಮಂದಿ ಪೊಲೀಸ್‌ ಸಿಬ್ಬಂದಿಯನ್ನು ಅಮಾನತುಗೊಳಿಸಲಾಗಿದೆ. ಈ ಘಟನೆಯ ಬಗ್ಗೆ ತನಿಖೆಗೆ ಆದೇಶಿಸಲಾಗಿದೆ.

ಶಾಸಕ ಕುಲ್‌ದೀಪ್‌ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿ ಯುವತಿಯ ಕುಟುಂಬ ಸದಸ್ಯರು ಲಖನೌನಲ್ಲಿರುವ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ನಿವಾಸದ ಎದುರು ಭಾನುವಾರ ಆತ್ಮಹತ್ಯೆಗೆ ಯತ್ನಿಸಿದ್ದರು. ಈ ಘಟನೆಯ ಬಳಿಕ ಯುವತಿಯ ತಂದೆಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದರು.

ಪೊಲೀಸ್ ವಶದಲ್ಲಿದ್ದ ಯುವತಿಯ ತಂದೆ ವಿಷ ಕುಡಿದು ಆತ್ಮಹತ್ಯೆಗೆ ಯತ್ನಿಸಿದ್ದರು ಎನ್ನಲಾಗಿದೆ. ಅಸ್ವಸ್ಥಗೊಂಡಿದ್ದ ಯುವತಿಯ ತಂದೆಯನ್ನು ಪೊಲೀಸರು ಉನ್ನಾವ್‌ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿದ್ದರು. ಸೋಮವಾರ ಬೆಳಿಗ್ಗೆ ಅವರು ಸಾವನ್ನಪ್ಪಿದ್ದಾರೆ.

“ಹೊಟ್ಟೆ ನೋವು ಹಾಗೂ ವಾಂತಿಯ ಕಾರಣಕ್ಕೆ ಅವರನ್ನು ಭಾನುವಾರ ರಾತ್ರಿ ಪೊಲೀಸರು ಆಸ್ಪತ್ರೆಗೆ ಕರೆತಂದಿದ್ದರು. ಚಿಕಿತ್ಸೆಗೆ ಸ್ಪಂದಿಸದೆ ಅವರು ಸೋಮವಾರ ಬೆಳಿಗ್ಗೆ ಮೃತಪಟ್ಟಿದ್ದಾರೆ” ಎಂದು ಉನ್ನಾವ್‌ ಜಿಲ್ಲಾ ಆಸ್ಪತ್ರೆಯ ವೈದ್ಯ ಡಾ. ಅತುಲ್‌ ಹೇಳಿದ್ದಾರೆ.

2017ರ ಜೂನ್‌ನಲ್ಲಿ ಕುಲ್‌ದೀಪ್‌ ಮತ್ತು ಆತನ ಬೆಂಬಲಿಗರು ತನ್ನ ಮೇಲೆ ಅತ್ಯಾಚಾರ ಎಸಗಿದ್ದರು ಎಂದು ಯುವತಿ ಆರೋಪಿಸಿದ್ದರು.

“ನನಗೆ ನ್ಯಾಯ ಕೊಡಿಸಬೇಕೆಂದು ನಾನು ಒಂದು ವರ್ಷದಿಂದ ಎಲ್ಲಾ ಕಡೆಯೂ ಅಲೆದಿದ್ದೇನೆ. ನನ್ನ ಮೇಲೆ ಅತ್ಯಾಚಾರ ಎಸಗಿದವರನ್ನು ಪೊಲೀಸರು ಬಂಧಿಸಬೇಕು. ಇಲ್ಲವೇ ನಾನು ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ” ಎಂದು ಯುವತಿ ಹೇಳಿದ್ದರು.

ಯೋಗಿ ಆದಿತ್ಯನಾಥ್‌ ನಿವಾಸದ ಎದುರು ಯುವತಿಯ ಕುಟುಂಬ ಆತ್ಮಹತ್ಯೆಗೆ ಯತ್ನಿಸಿದ ಬಳಿಕ ಈ ಘಟನೆ ರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯಾಗಿತ್ತು.

ಯುವತಿ ಮಾಡಿರುವ ಆರೋಪದ ಕುರಿತೂ ಈಗಾಗಲೇ ತನಿಖೆಗೆ ಆದೇಶಿಸಲಾಗಿದೆ. ಆದರೆ, ಯುವತಿಯ ಆರೋಪವನ್ನು ತಳ್ಳಿಹಾಕಿರುವ ಬಂಗೆರ್‌ಮಾವ್‌ ಕ್ಷೇತ್ರದ ಬಿಜೆಪಿ ಶಾಸಕ ಕುಲ್‌ದೀಪ್‌, “ಇದೆಲ್ಲವೂ ಪೂರ್ವ ಯೋಜಿತ ಕೃತ್ಯ” ಎಂದಿದ್ದಾರೆ.

“ಯುವತಿಯ ಕುಟುಂಬದಲ್ಲಿ ಹಿಂದೆ ಘಟನೆಯೊಂದು ನಡೆದಿತ್ತು. ಆ ಬಗ್ಗೆ ಪ್ರಕರಣ ಕೂಡಾ ದಾಖಲಾಗಿತ್ತು. ಆ ಪ್ರಕರಣದಲ್ಲಿ ಇಬ್ಬರು ಅಮಾಯಕರನ್ನು ಬಲಿಪಶು ಮಾಡಲು ಯುವತಿಯ ಕುಟುಂಬ ಮುಂದಾಗಿತ್ತು. ಆದರೆ ಪೊಲೀಸರು ಆ ಇಬ್ಬರನ್ನು ರಕ್ಷಿಸಿದ್ದರು. ಆ ಇಬ್ಬರ ರಕ್ಷಣೆಗೆ ನಾನು ಸಹಾಯ ಮಾಡಿದ್ದೇನೆ ಎಂದು ಯುವತಿಯ ಕುಟುಂಬ ನನ್ನ ವಿರುದ್ಧ ಸಿಟ್ಟಾಗಿತ್ತು” ಎಂದು ಕುಲ್‌ದೀಪ್‌ ಹೇಳಿದ್ದಾರೆ.

"ನನ್ನ ವಿರುದ್ಧ ಆಗ ಕೋಪ ಕೊಂಡಿದ್ದ ಕುಟುಂಬ ಈಗ ಯುವತಿಯನ್ನು ಮುಂದಿಟ್ಟುಕೊಂಡು ಅತ್ಯಾಚಾರದ ಆರೋಪ ಮಾಡುತ್ತಿದೆ. ತನಿಖೆಗೆ ನಾನು ಸಿದ್ಧವಿದ್ದೇನೆ. ತನಿಖೆ ನಡೆದು ತಪ್ಪಿತಸ್ಥರಿಗೆ ಶಿಕ್ಷೆಯಾಗಲಿ” ಎಂದು ಕುಲ್‌ದೀಪ್‌ ತಿಳಿಸಿದ್ದಾರೆ.

“10-12 ವರ್ಷದಿಂದಲೂ ಯುವತಿಯ ಕುಟುಂಬ ಹಾಗೂ ಶಾಸಕರ ಮಧ್ಯೆ ಜಟಾಪಟಿ ಇದೆ. ಈ ಪ್ರಕರಣದಲ್ಲಿ ಎಲ್ಲಾ ಆಯಾಮದಿಂದಲೂ ತನಿಖೆ ನಡೆಸಲಾಗುವುದು” ಎಂದು ಲಖನೌ ವಿಭಾಗದ ಎಡಿಜಿ ರಾಜೀವ್ ಕೃಷ್ಣ ಹೇಳಿದ್ದಾರೆ.