ಕಾವೇರಿ ನದಿ ನೀರು ಹಂಚಿಕೆ ವಿವಾದ: ಎಲ್ಲರಿಗೂ ಸಮಾಧಾನ ತಂದ ಸುಪ್ರಿಂ ತೀರ್ಪು  
ಸುದ್ದಿ ಸಾರ

ಕಾವೇರಿ ನದಿ ನೀರು ಹಂಚಿಕೆ ವಿವಾದ: ಎಲ್ಲರಿಗೂ ಸಮಾಧಾನ ತಂದ ಸುಪ್ರಿಂ ತೀರ್ಪು  

ಕಾವೇರಿ ನದಿ ನೀರಿ ಹಂಚಿಕೆ ಸಂಬಂಧ ಶುಕ್ರವಾರ ಹೊರಬಿದ್ದ ಸುಪ್ರಿಂ ಕೋರ್ಟ್ ತೀರ್ಪು ರಾಜ್ಯಕ್ಕೆ ನ್ಯಾಯ ಒದಗಿಸಿದೆ; ಅದೇ ವೇಳೆ ತಮಿಳನಾಡಿಗೂ ನಿರಾಸೆ ಮೂಡಿಸಿಲ್ಲ. ಸುಪ್ರಿಂ ಕೋರ್ಟ್ ತ್ರಿಸದಸ್ಯ ಪೀಠ ನೀಡಲಿರುವ ತೀರ್ಪು ಕರ್ನಾಟಕಕ್ಕೆ ವ್ಯತಿರಿಕ್ತವಾಗಿರಲಿದೆ ಎಂಬ ಊಹಾಪೋಹಗಳಿಗೂ ಈ ಮೂಲಕ ತೆರೆ ಬಿದ್ದಿದೆ.

ಕಾವೇರಿ ಟ್ರಿಬ್ಯೂನಲ್ ಈ ಹಿಂದೆ ನೀಡಿದ್ದ ಏಕಪಕ್ಷೀಯವಾದ ತೀರ್ಮಾನವನ್ನು ಮಾರ್ಪಡಿಸಿರುವ ಸುಪ್ರಿಂ ಕೋರ್ಟ್, ನದಿ ನೀರನ್ನು ನೆಚ್ಚಿಕೊಂಡ ಮೂರು ರಾಜ್ಯಗಳು ಹಾಗೂ ಒಂದು ಕೇಂದ್ರಾಡಳಿತ ಪ್ರದೇಶಕ್ಕೆ ಸಮಾನ ನ್ಯಾಯ ಒದಗಿಸುವ ಪ್ರಯತ್ನ ಮಾಡಿದೆ.

ಈ ಹಿಂದೆ, ತಮಿಳುನಾಡಿಗೆ 192 ಟಿಎಂಸಿ ಕಾವೇರಿ ನೀರನ್ನು ಬಿಡುಗಡೆ ಮಾಡಬೇಕು ಎಂದು ಟ್ರಿಬ್ಯೂನಲ್ ಹೇಳಿತ್ತು. ಇದನ್ನು ಬದಲಾಯಿಸಿರುವ ಸುಪ್ರಿಂ ಕೋರ್ಟ್, ತಮಿಳುನಾಡಿಗೆ 177.25 ಟಿಎಂಸಿಗೆ ಮಿತಿಗೊಳಿಸಿದೆ. ಇದರ ಜತೆಗೆ, ಕೇರಳಕ್ಕೆ 30 ಟಿಎಂಸಿ ಮತ್ತು ಪುದುಚೇರಿಗೆ ನೀಡಲು ತೀರ್ಮಾನಿಸಿದ್ದ 7 ಟಿಎಂಸಿ ನೀರಿನ ಪ್ರಮಾಣದಲ್ಲಿ ಯಥಾಸ್ಥಿತಿಯನ್ನು ಕಾಯ್ದುಕೊಂಡಿದೆ.

ಇವುಗಳ ಜತೆಗೆ, ಬೋನಸ್ ರೀತಿಯಲ್ಲಿ ಕರ್ನಾಟಕ ಹೆಚ್ಚುವರಿಯಾಗಿ 14. 75 ಟಿಎಂಸಿ ನೀರನ್ನು ವಿನಿಯೋಗ ಮಾಡಿಕೊಳ್ಳಲು ಸುಪ್ರಿಂ ಕೋರ್ಟ್ ಅಸ್ತು ಎಂದಿದೆ. ಇದರಲ್ಲಿ ಬೆಂಗಳೂರಿಗರ ನಿತ್ಯ ಬಳಕೆಗಾಗಿ 4. 75 ಟಿಎಂಸಿ ನೀರು ಸೇರಿದೆ. ಕಾವೇರಿ ಕಣಿವೆ ಜಿಲ್ಲೆಗಳಲ್ಲಿ ಹೆಚ್ಚುವರಿ ಕೃಷಿ ಭೂಮಿಯನ್ನು ಅಭಿವೃದ್ಧಿಪಡಿಸಿಕೊಳ್ಳಲು ಅವಕಾಶ ನೀಡಿದೆ.

ಕಳೆದ ಬಾರಿ ಕಾವೇರಿ ಟ್ರಿಬ್ಯೂನಲ್ ತೀರ್ಪು ಹೊರಬಿದ್ದ ಸಮಯದಲ್ಲಿ ಕರ್ನಾಟಕ ಹೊತ್ತಿ ಉರಿದಿತ್ತು. ತಮಿಳುನಾಡು ಬೇಡಿಕೆಗಳಿಗೆ ಅಸ್ತು ಅಂದಿದ್ದ ನ್ಯಾಯಧೀಕರಣ ಏಕಮುಖ ತೀರ್ಮಾನಕ್ಕೆ ಬಂದಿದೆ ಎಂಬ ಟೀಕೆಗೆ ಗುರಿಯಾಗಿತ್ತು. ಹೀಗಾಗಿ ಕರ್ನಾಟಕ ಸುಪ್ರಿಂ ಕೋರ್ಟ್‌ಗೆ ಮೇನ್ಮನವಿ ಸಲ್ಲಿಸಿತ್ತು.

ಇದೀಗ ತೀರ್ಪು ನೀಡಿರುವ ಸುಪ್ರಿಂ ಕೋರ್ಟ್ ಎಲ್ಲಾ ರಾಜ್ಯಗಳಿಗೂ ಸಮಾನ ನ್ಯಾಯ ನೀಡುವ ಪ್ರಯತ್ನ ಮಾಡಿದೆ. ಮುಂದಿನ 15 ವರ್ಷಗಳಿಗೆ ಈ ತೀರ್ಪು ಅನ್ವಯವಾಗಲಿದೆ ಎಂಬ ಕಾಲಮಿತಿಯನ್ನೂ ನೀಡುವ ಮೂಲಕ ಸುಪ್ರಿಂ ಕೋರ್ಟ್ ದಕ್ಷಿಣ ಭಾರತದ ಸುದೀರ್ಘ ನದಿ ನೀರು ಹಂಚಿಕೆ ವಿವಾದಕ್ಕೆ ತೆರೆ ಎಳೆದಿದೆ.