ಮುರಿದು ಬಿದ್ದ ಬಿಜೆಪಿ-ಶಿವಸೇನೆ ಸಂಬಂಧ
ಸುದ್ದಿ ಸಾರ

ಮುರಿದು ಬಿದ್ದ ಬಿಜೆಪಿ-ಶಿವಸೇನೆ ಸಂಬಂಧ

25 ವರ್ಷಗಳ ಮೈತ್ರಿಗೆ ಕೊನೆ ಹಾಡಿದ ಶಿವಸೇನೆ

ಶಿವಸೇನೆಯು 2019ರ ಲೋಕಸಭಾ ಚುನಾವಣೆ ಹಾಗೂ ವಿಧಾನಸಭಾ ಚುನಾವಣೆಗಳಲ್ಲಿ ಬಿಜೆಪಿಯೊಂದಿಗೆ ಮೈತ್ರಿ ಸಾಧ್ಯವಿಲ್ಲ ಎಂದು ತಿಳಿಸಿದೆ.

ಮಂಗಳವಾರ ಮುಂಬೈನಲ್ಲಿ ನಡೆದ ಪಕ್ಷದ ರಾಷ್ಟ್ರೀಯ ಕಾರ್ಯಕಾರಿಣಿ ಸಭೆಯಲ್ಲಿ ಈ ನಿರ್ಣಯವನ್ನು ಅಂಗೀಕರಿಸಲಾಗಿದೆ. ಉದ್ಧವ್ ಠಾಕ್ರೆಯ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಮುಂಬರಲಿರುವ ಚುನಾವಣೆಗಳಲ್ಲಿ ಬಿಜೆಪಿಯ ಜೊತೆಗೂಡದೆ ಒಂಟಿಯಾಗಿ ಸ್ಫರ್ಧಿಸುವ ನಿರ್ಣಯವನ್ನು ಶಿವಸೇನೆ ಸರ್ವಾನುಮತ ಅಂಗೀಕರಿಸಿದೆ.

ಶಿವಸೇನೆಯ ಮುಖ್ಯಸ್ಥ ಸಂಜಯ್ ರಾವತ್‌ರ ಈ ನಿರ್ಧಾರವನ್ನು ಸದಸ್ಯರೆಲ್ಲರೂ ಬೆಂಬಲಿಸಿದ್ದು, ಮುಂದಿನ ಲೋಕಸಭಾ ಚುನಾವಣೆಯಲ್ಲಿ 48ರಲ್ಲಿ 25 ಸ್ಥಾನಗಳನ್ನು, ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲಿ 288ರಲ್ಲಿ 150 ಸ್ಥಾನಗಳನ್ನು ಗೆಲ್ಲುವ ಪ್ರತಿಜ್ಞೆಯನ್ನು ಪಕ್ಷದ ಸದಸ್ಯರು ಕೈಗೊಂಡಿದ್ದಾರೆ.

“ಬಿಜೆಪಿ ಹಿಂದುತ್ವದ ಹೆಸರಿಡಿದು ಶಿವಸೇನೆಯೊಂದಿಗೆ ಮೈತ್ರಿ ಮಾಡಿಕೊಂಡಿತ್ತು. ಹಿಂದುತ್ವದ ಕಾರಣಕ್ಕಾಗಿ ಶಿವಸೇನೆ ತಾಳ್ಮೆಯಿಂದಿತ್ತು. ಆದರೆ ಬಿಜೆಪಿ ತನ್ನ ಮೂರು ವರ್ಷದ ಅಧಿಕಾರಾವಧಿಯಲ್ಲಿ ಶಿವಸೇನೆಯ ಎಂದೆಗುಂದಿಸಿದೆ,”
ಸಂಜಯ್‌ ರಾವತ್‌, ಶಿವಸೇನೆ ಮುಖ್ಯಸ್ಥ.

ಈ ಹಿಂದೆಯೇ ಶಿವಸೇನೆ ಬಿಜೆಪಿಯೊಂದಿಗಿನ ಮೈತ್ರಿಯನ್ನು ಬಿಟ್ಟು ಹೊರಬರುವ ಬಗ್ಗೆ ಮಾತುಗಳಿದ್ದವು. ಕಳೆದ ಡಿಸೆಂಬರ್‌ನಲ್ಲಿ ಶಿವಸೇನೆಯ ಯೂಥ್‌ವಿಂಗ್‌ನ ಮುಖ್ಯಸ್ಥ ಆದಿತ್ಯ ಠಾಕ್ರೆ ಮಹಾರಾಷ್ಟ್ರ ಸರಕಾರದಿಂದ ಹೊರನಡೆಯುತ್ತೇವೆ ಎಂದು ಬೆದರಿಕೆ ಹಾಕಿದ್ದರು. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯೇರಿಕೆಯನ್ನು ನಿಯಂತ್ರಿಸ ಕಾರಣಕ್ಕೆ ಅಸಮಾಧಾನಗೊಂಡಿದ್ದ ಪಕ್ಷದ ಅಧ್ಯಕ್ಷ ಉದ್ಧವ್ ಠಾಕ್ರೆ, ಬಿಜೆಪಿಯಿಂದ ವಿಭಜನೆಗೊಳ್ಳುವ ಸುಳಿವನ್ನು ನೀಡಿದ್ದರು.

ಈಗ ಬಿಜೆಪಿಯಿಂದ ಶಿವಸೇನೆ ಪೂರ್ತಿಯಾಗಿ ಹೊರಬರುವ ನಿರ್ಧಾರವನ್ನು ಪ್ರಕಟಿಸಿದೆ. ಆಡಳಿತ ಪಕ್ಷದ 227 ಸ್ಥಾನಗಳಲ್ಲಿ ಶಿವಸೇನೆ 84 ಸ್ಥಾನಗಳನ್ನು ಹೊಂದಿದ್ದು, ಬಿಜೆಪಿ ತನ್ನ ಸ್ವಂತ ಶಕ್ತಿಯಿಂದ 82 ಸ್ಥಾನಗಳನ್ನು ಗೆಲ್ಲಲಷ್ಟೇ ಸಾಧ್ಯವಾಗಿತ್ತು.

ಶಿವಸೇನೆ ನಡೆದು ಬಂದ ಹಾದಿ:

ಶಿವಸೇನೆ ಸ್ಥಾಪಿಸಲ್ಪಟ್ಟಿದು 1966ರಲ್ಲಿ. ಬಾಳಾಸಾಹೇಬ್ ಠಾಕ್ರೆ ಇದರ ಸೃಷ್ಟಿಕರ್ತ. ಮಹಾರಾಷ್ಟ್ರಕ್ಕೆ ವಲಸೆ ಬಂದ ಇತರ ಭಾರತೀಯ ರಾಜ್ಯಗಳ ವಸಲಿಗರಿಗಿಂತ ಮೊದಲು ಮರಾಠಿಗರಿಗೆ ಪ್ರಾಶಸ್ತ್ಯವನ್ನು ಕಲ್ಪಿಸಿಕೊಡುವ ಸಲುವಾಗಿ ಆರಂಭಗೊಂಡ ಶಿವಸೇನೆ, ಅರವತ್ತರ ದಶಕದಲ್ಲಿ ಮರಾಠಿ ಸಮುದಾಯದಲ್ಲಿ ಗಟ್ಟಿ ತಳಹದಿಯನ್ನು ಸ್ಥಾಪಿಸಿಕೊಂಡಿತು. ಈ ಸೇನೆಯ ಸದಸ್ಯರನ್ನು ಶಿವಸೈನಿಕರು ಎಂದು ಕರೆಯಲಾಗುತ್ತದೆ.

ಮರಾಠಿ ಪರ ಸಿದ್ಧಾಂತ ಹೊಂದಿದ್ದ ಶಿವಸೇನೆ 1970ರ ದಶಕದಲ್ಲಿ ವಿಶಾಲ ಹಿಂದೂ ರಾಷ್ಟ್ರೀಯತಾವಾದಿ ಸಿದ್ದಾಂತವನ್ನು ಒಪ್ಪಿಕೊಂಡು ಬಿಜೆಪಿ ಜೊತೆಗೆ ಮೈತ್ರಿಯಾಗಿತ್ತು. ಎರಡು ಪಕ್ಷಗಳು ಒಟ್ಟಾಗಿ 1989ರಲ್ಲಿ ಲೋಕಸಭೆ ಮತ್ತು ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದವು. 2014ರ ಚುನಾವಣೆ ವೇಳೆಗೆ ಎರಡರ ನಡುವಿನ ಮೈತ್ರಿಯು ಕುಸಿತ ಕಂಡಿತ್ತು, ಸಂಧಾನ ಮಾತುಕತೆಗಳೆಲ್ಲವೂ ವಿಫಲವಾಗಿದ್ದವು. ಚುನಾವಣೆಯಲ್ಲಿ ಬಹುಮತದಿಂದ ಗೆದ್ದ ಬಿಜೆಪಿ ಇತಿಹಾಸದಲ್ಲಿ ಮೊದಲ ಬಾರಿಗೆ ಅತಿ ಹೆಚ್ಚು ಸ್ಥಾನಗಳನ್ನು ಪಡೆದ ಪಕ್ಷವಾಗಿ ಹೊರಹೊಮ್ಮಿತ್ತು. ಬಿಜೆಪಿಯೊಂದಿಗೆ ಮೈತ್ರಿಯಾಗುವುದಷ್ಟೇ ಶಿವಸೇನೆಯ ಮುಂದಿದ್ದ ಏಕೈಕ ದಾರಿಯಾಗಿದ್ದರಿಂದ ಬಿಜೆಪಿಯೊಂದಿಗೆ ಸಮ್ಮಿಶ್ರಗೊಂಡಿತ್ತು.

ಶಿವಸೇನೆಯ ಮೇಲೆ ಹಿಂಸೆಯಲ್ಲಿ ತೊಡಗಿರುವ ಮತ್ತು ವಿರುದ್ಧ ಸಿದ್ದಾಂತಗಳ ಮೇಲೆ ದಾಳಿ ನಡೆಸಿರುವ ಆರೋಪಗಳಿವೆ. ಇದನ್ನು ಉಗ್ರಗಾಮಿ ಬಲಪಂಥೀಯ ಬಣ ಎಂದು ಸಹ ಬಣ್ಣಿಸಲಾಗುತ್ತದೆ.ತೆಲುಗು ದೇಶಂ ಪಕ್ಷ, ಲೋಕ್ ಜನಶಕ್ತಿ ಪಕ್ಷ ಸೇರಿದಂತೆ ಒಟ್ಟು 29 ಪಕ್ಷಗಳನ್ನೊಳಗೊಂಡ ಎನ್‌ಡಿಎ ಸರಕಾರದ ಬೆಂಬಲಕ್ಕಿದ್ದ ದೊಡ್ಡ ಶಕ್ತಿಯಾಗಿದ್ದ ಶಿವಸೇನೆ ಇಂದು ಜಿಜೆಪಿಯಿಂದ ಸಂಪೂರ್ಣವಾಗಿ ಹೊರಬಂದಿದೆ.