ಧರ್ಮ ನಿಂದನೆಗೆ ಮರಣ ದಂಡನೆ: ನೇಣು ಕುಣಿಕೆಯಿಂದ ಹೊರಬಂದ ಆಶಿಯಾ ಬೀಬಿ ಕತೆ- ವ್ಯಥೆ
ವಿದೇಶ

ಧರ್ಮ ನಿಂದನೆಗೆ ಮರಣ ದಂಡನೆ: ನೇಣು ಕುಣಿಕೆಯಿಂದ ಹೊರಬಂದ ಆಶಿಯಾ ಬೀಬಿ ಕತೆ- ವ್ಯಥೆ

ಪಾಕಿಸ್ತಾನದ ಕ್ರಿಶ್ಚಿಯನ್‌ ಮಹಿಳೆ ಆಶಿಯಾ ಬೀಬಿ ಧರ್ಮ ನಿಂದನೆ ಪ್ರಕರಣದ ಗಲ್ಲು ಶಿಕ್ಷೆಯನ್ನು ಅಲ್ಲಿನ ಸುಪ್ರೀಂಕೋರ್ಟ್‌ ರದ್ದುಗೊಳಿಸಿದೆ.

ಧರ್ಮ ನಿಂದನೆ ಪ್ರಕರಣದಲ್ಲಿ ಮರಣದಂಡನೆ ಶಿಕ್ಷೆಗೆ ಗುರಿಯಾಗಿದ್ದ ಪಾಕಿಸ್ತಾನದ ಕ್ರಿಶ್ಚಿಯನ್‌ ಮಹಿಳೆ ಆಶಿಯಾ ಬೀಬಿಯ ಶಿಕ್ಷೆಯನ್ನು ಪಾಕಿಸ್ತಾನದ ಸುಪ್ರೀಂಕೋರ್ಟ್‌ ಬುಧವಾರ ರದ್ದುಗೊಳಿಸಿದೆ.

ಧರ್ಮ ನಿಂದನೆ ಆರೋಪದ ಮೇಲೆ ಒಂಬತ್ತು ವರ್ಷಗಳ ಜೈಲು ವಾಸ ಅನುಭವಿಸಿರುವ ಆಶಿಯಾ ವಿರುದ್ಧದ ಧರ್ಮ ನಿಂದನೆಯ ಎಲ್ಲಾ ಆರೋಪಗಳೂ ಖುಲಾಸೆಗೊಂಡಿದ್ದು, ಆಕೆಯನ್ನು ಕೂಡಲೇ ಬಿಡುಗಡೆ ಮಾಡುವಂತೆ ಸುಪ್ರೀಂಕೋರ್ಟ್‌ ಆದೇಶಿಸಿದೆ.

ಪಾಕಿಸ್ತಾನದ ಪಂಜಾಬ್‌ ಪ್ರಾಂತ್ಯದ ಶೇಖುಪುರದ ಇಥಾನ್‌ ವಾಲಿ ಮೂಲದ ಆಶಿಯಾ 2009ರ ಜೂನ್‌ನಲ್ಲಿ ಸ್ಥಳೀಯ ಮಹಿಳೆಯರ ಜತೆಗಿನ ಸಣ್ಣ ಜಗಳದಲ್ಲಿ ಧರ್ಮ ನಿಂದನೆ ಹಾಗೂ ಪ್ರವಾದಿ ಮಹಮ್ಮದ್‌ ನಿಂದನೆಯ ಆರೋಪ ಹೊರಿಸಲಾಗಿತ್ತು. ಆಶಿಯಾ ಮುಸ್ಲಿಮೇತರ ಮಹಿಳೆ ಎಂಬ ಕಾರಣಕ್ಕೆ ಆಕೆಯ ಮೇಲೆ ಧರ್ಮ ನಿಂದನೆ ಆರೋಪ ಹೊರಿಸಲಾಗಿದೆ ಎಂದು ಮಾನವ ಹಕ್ಕುಗಳ ಹೋರಾಟಗಾರರು ವಾದಿಸಿದ್ದರು. ಆಶಿಯಾ ಕೂಡಾ ತಾವು ಧರ್ಮ ನಿಂದನೆ ಮಾಡಿಲ್ಲ ಎಂದು ಆರೋಪಗಳನ್ನು ನಿರಾಕರಿಸಿದ್ದರು.

2009ರಲ್ಲಿ ನಡೆದಿದ್ದೇನು?:

2009ರ ಜೂನ್‌ನಲ್ಲಿ ಆಶಿಯಾ ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ವೇಳೆ ನೀರು ಕುಡಿಯಲು ಇತರೆ ಮಹಿಳೆಯರು ಬಳಸುತ್ತಿದ್ದ ಲೋಟ ಬಳಸಲು ಮುಂದಾಗಿದ್ದರು. ಆದರೆ, ಅದಕ್ಕೆ ಮುಸ್ಲಿಂ ಮಹಿಳೆಯೊಬ್ಬರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಆಶಿಯಾ ಕ್ರಿಶ್ಚಿಯನ್‌ ಎಂಬ ಕಾರಣಕ್ಕೆ ನೀರು ಕುಡಿಯಲು ಆ ಲೋಟ ಬಳಸದಂತೆ ಉಳಿದ ಮಹಿಳೆಯರು ಒತ್ತಡ ಹೇರಿದ್ದರು. ಕ್ರಿಶ್ಚಿಯನ್‌ ಎಂಬ ಕಾರಣಕ್ಕೆ ಆಶಿಯಾ ಅವರನ್ನು ಕೊಳಕಿ ಎಂದು ಇತರೆ ಮುಸ್ಲಿಂ ಮಹಿಳೆಯರು ಮೂದಲಿಸಿದ್ದರು.

ಲೋಟ ಬಳಸುವ ವಿಚಾರದಲ್ಲಿ ಧರ್ಮ ಎಳೆದುತಂದಿದ್ದರಿಂದ ಸಿಟ್ಟಿಗೆದ್ದಿದ್ದ ಆಶಿಯಾ, “ನಾನು ನನ್ನ ಧರ್ಮ ಮತ್ತು ಯೇಸುವನ್ನು ನಂಬುತ್ತೇನೆ. ಯೇಸು ಮನುಷ್ಯರ ರಕ್ಷಣೆಗಾಗಿ ಶಿಲುಬೆ ಏರಿ ಸಾವನ್ನಪ್ಪಿದ. ನಿಮ್ಮ ಪ್ರವಾದಿ ಮಹಮ್ಮದ್‌ ಮನುಷ್ಯರನ್ನು ರಕ್ಷಿಸಲು ಏನು ಮಾಡಿದ್ದರು?” ಎಂದು ಪ್ರಶ್ನಿಸಿದ್ದ ಆರೋಪ ಅವರ ಮೇಲಿತ್ತು.

ಧರ್ಮ ನಿಂದನೆಯ ಆರೋಪದ ಮೇಲೆ ಆಶಿಯಾ ಅವರನ್ನು ಬಂಧಿಸಲಾಗಿತ್ತು. 2010ರ ನವೆಂಬರ್‌ನಲ್ಲಿ ಶೇಖುಪುರ ನ್ಯಾಯಾಲಯ ಆಶಿಯಾ ಅವರಿಗೆ ಮರಣ ದಂಡನೆ ಶಿಕ್ಷೆ ವಿಧಿಸಿತ್ತು. ಈ ಆದೇಶಕ್ಕೆ ಮಾನವ ಹಕ್ಕುಗಳ ಹೋರಾಟಗಾರರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಆದರೆ, ಕೆಳಹಂತದ ನ್ಯಾಯಾಲಯದ ಈ ಆದೇಶವನ್ನು ನಾಲ್ಕು ವರ್ಷಗಳ ಹಿಂದೆ ಲಾಹೋರ್‌ ಹೈಕೋರ್ಟ್‌ ಕೂಡಾ ಎತ್ತಿಹಿಡಿದಿತ್ತು.

ಪಿಪಿಸಿ ಸೆಕ್ಷನ್‌ 295-ಸಿ:

ಪಾಕಿಸ್ತಾನ್‌ ಪೀನಲ್‌ ಕೋಟ್‌ (ಪಿಪಿಸಿ) ಸೆಕ್ಷನ್‌ 295-ಸಿ ಪ್ರಕಾರ ಪ್ರವಾದಿ ಮಹಮ್ಮದ್‌ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡುವುದು ದಂಡನಾರ್ಹ ಅಪರಾಧ. ಈ ಅಪರಾಧ ಸಾಬೀತಾದರೆ ಮರಣ ದಂಡನೆ ಅಥವಾ ಜೀವಾವಧಿ ಶಿಕ್ಷೆ ಹಾಗೂ ದಂಡ ವಿಧಿಸಲು ಪಾಕಿಸ್ತಾನದ ಕಾನೂನಿನಲ್ಲಿ ಅವಕಾಶವಿದೆ.

ಆಶಿಯಾ ಪರವಾಗಿ ಸುಪ್ರೀಂಕೋರ್ಟ್‌ ತೀರ್ಪು ನೀಡಿರುವ ಬೆನ್ನಲ್ಲೇ ತೀರ್ಪು ನೀಡಿದ ನ್ಯಾಯಾಧೀಶರು, ಆಶಿಯಾ ಕುಟುಂಬಸ್ಥರು, ಆಶಿಯಾ ಪರ ಹೋರಾಟ ನಡೆಸಿದ ಮಾನವ ಹಕ್ಕುಗಳ ಕಾರ್ಯಕರ್ತರು ಹಾಗೂ ಆಶಿಯಾ ವಕೀಲರ ವಿರುದ್ಧ ಪಾಕಿಸ್ತಾನದ ಬಲಪಂಥೀಯ ಸಂಘಟನೆಗಳು ಪ್ರತೀಕಾರದ ಕರೆ ನೀಡಿವೆ.

ಪಾಕಿಸ್ತಾನದ ಕಟ್ಟಾ ಬಲಪಂಥೀಯ ಸಂಘಟನೆಯಾದ ತಹ್ರೀಕ್ – ಎ – ಲಬ್ಬೈಕ್‌ ಪಾಕಿಸ್ತಾನ್‌ (ಟಿಎಲ್‌ಪಿ) ಆಶಿಯಾ ಬೀಬಿಗೆ ಮರಣ ದಂಡನೆ ಶಿಕ್ಷೆ ಜಾರಿಗೊಳಿಸಬೇಕೆಂದು ಒತ್ತಾಯಿಸುತ್ತಲೇ ಬಂದಿದೆ. ಸುಪ್ರೀಂಕೋರ್ಟ್‌ ತೀರ್ಪಿನ ಬಗ್ಗೆ ಪ್ರತಿಕ್ರಿಯಿಸಿರುವ ಟಿಎಲ್‌ಪಿ ಇಮ್ರಾನ್‌ ಖಾನ್ ಸರಕಾರವನ್ನು ತರಾಟೆಗೆ ತೆಗೆದುಕೊಂಡಿದೆ. ಅಲ್ಲದೆ, ಈ ತೀರ್ಪು ನೀಡಿರುವ ನ್ಯಾಯಾಧೀಶರ ತಲೆದಂಡಕ್ಕೆ ಕರೆ ನೀಡಿದೆ.

“ನ್ಯಾಯಾಧೀಶರು ಪಾಶ್ಚಿಮಾತ್ಯರ ಗುಲಾಮರಾಗಿದ್ದಾರೆ. ಈ ತೀರ್ಪು ಹೀಗೆಯೇ ಬರುತ್ತದೆ ಎಂಬುದು ನಮಗೆ ಮೊದಲೇ ಗೊತ್ತಿತ್ತು” ಎಂದು ಟಿಎಲ್‌ಪಿ ಮುಖಂಡರು ಹೇಳಿದ್ದಾರೆ.

“ಸರಕಾರಕ್ಕೆ ನನ್ನ ಭದ್ರತೆಯ ಬಗ್ಗೆ ಉದಾಸೀನ. ನಾನು ಇಂದು ಬದುಕ್ಕಿದ್ದರೆ ಅದು ಅಲ್ಲಾನ ರಕ್ಷಣೆಯಿಂದ” ಎಂದು ಆಶಿಯಾ ಪರ ಸುಪ್ರೀಂಕೋರ್ಟ್‌ನಲ್ಲಿ ವಾದ ಮಂಡಿಸಿದ್ದ ಮಲೂಕ್‌ ಹೇಳಿದ್ದಾರೆ.