ಚಿತ್ರಕೃಪೆ: ದಿ ವೈರ್
ಸುದ್ದಿ ಸಾಗರ

‘ಅಂತರ್ಯುದ್ಧ’: ಮುಂಡಾ ಆದಿವಾಸಿಗಳ ‘ದಿಶೋಂ’ಗೆ ದಾಳಿ ಇಟ್ಟ ಅರೆಸೇನಾ ಪಡೆಗಳು

ತಮ್ಮ ಹಕ್ಕು ಹಾಗೂ ಅಸ್ಥಿತ್ವಕ್ಕಾಗಿ ಹೋರಾಡುತ್ತಿರುವ ಜಾರ್ಖಂಡ್‌ನ ಖುಂಟೀ ಪ್ರಾಂತ್ಯದ ಮುಂಡಾ ಆದಿವಾಸಿಗಳ ಮೇಲೆ ಸರಕಾರ ಅಪಹರಣ, ಅತ್ಯಾಚಾರದ ಆರೋಪ ಹೊರಿಸಿ ಹಿಂಸೆ ನೀಡುತ್ತಿದೆ.

ಜಾರ್ಖಂಡ್‌ನ ಖುಂಟೀ ಜಿಲ್ಲೆಯ ಆದಿವಾಸಿ ಹೋರಾಟಗಾರರು ಹಾಗೂ ಪೊಲೀಸರ ನಡುವಿನ ಘರ್ಷಣೆಯಿಂದ ಇಲ್ಲಿನ ಸಾಮಾನ್ಯ ಆದಿವಾಸಿಗಳ ಬದುಕು ಈಗ ಅಕ್ಷರಶಃ ಬೀದಿಗೆ ಬಿದ್ದಿದೆ. ಈ ಹಿಂದೆ ಐವರು ಮಹಿಳೆಯರ ಅಪಹರಣ ಮತ್ತು ಅತ್ಯಾಚಾರದ ಆರೋಪವಿರುವ ಆದಿವಾಸಿ ಹೋರಾಟಗಾರರ ವಿರುದ್ಧ ಈಗ ಮೂರು ಮಂದಿ ಕಾವಲುಗಾರರನ್ನು ಅಪಹರಿಸಿರುವ ಆರೋಪ ಹೊರಿಸಲಾಗಿದೆ.

ವಾರದ ಹಿಂದೆ ಮಾನವ ಕಳ್ಳಸಾಗಣೆ ಬಗ್ಗೆ ಜಾಗೃತಿ ಮೂಡಿಸುವ ಬೀದಿ ನಾಟಕದಲ್ಲಿ ಪಾಲ್ಗೊಂಡಿದ್ದ ಸ್ವಯಂಸೇವಾ ಸಂಸ್ಥೆಯ ಐದು ಮಂದಿ ಕಾರ್ಯಕರ್ತೆಯರನ್ನು ಅಪಹರಿಸಿ, ಅತ್ಯಾಚಾರ ಎಸಗಿದ್ದ ಆರೋಪ ಇಲ್ಲಿನ ಆದಿವಾಸಿ ಹೋರಾಟಗಾರರ ಮೇಲಿತ್ತು. ಮೂರು ದಿನಗಳ ಹಿಂದೆ (ಜೂನ್‌ 26) ಲೋಕಸಭೆಯ ಮಾಜಿ ಸ್ಪೀಕರ್‌ ಕರಿಯ ಮುಂಡಾ ನಿವಾಸದ ಮೂರು ಮಂದಿ ಕಾವಲುಗಾರರನ್ನು ಕೂಡಾ ಈ ಹೋರಾಟಗಾರರು ಅಪಹರಿಸಿದ್ದಾರೆ ಎಂದು ಪೊಲೀಸರು ಆರೋಪಿಸಿದ್ದಾರೆ.

ಅಪಹರಿಸಿರುವ ಕಾವಲುಗಾರರನ್ನು ಬಿಡುಗಡೆಗೊಳಿಸಲು ಕಾರ್ಯಾಚರಣೆ ನಡೆಸುತ್ತಿರುವ ಪೊಲೀಸರು ವಿಚಾರಣೆ ಹೆಸರಲ್ಲಿ ಗ್ರಾಮಸ್ಥರ ಮೇಲೆ ದೌರ್ಜನ್ಯ ನಡೆಸುತ್ತಿದ್ದಾರೆ. ಪೊಲೀಸ್‌, ಅರೆಸೇನಾ ಪಡೆಯ ಜತೆಗೆ ಖುಂಟೀ ಜಿಲ್ಲೆಯ ಜಿಲ್ಲಾಧಿಕಾರಿ ಮತ್ತು ಪೊಲೀಸ್‌ ವರಿಷ್ಠಾಧಿಕಾರಿಗಳು ಜೂನ್‌ 26ರಂದು ಪಥಲ್‌ಗಡಿ ಆಚರಣೆ ನಡೆದ ಘಾಘ್ರಾ ಗ್ರಾಮದಲ್ಲಿ ಬೀಡುಬಿಟ್ಟಿದ್ದಾರೆ. ಪೊಲೀಸರ ಗುಂಡೇಟಿಗೆ ಈವರೆಗೆ ಒಬ್ಬ ಆದಿವಾಸಿ ಬಲಿಯಾಗಿದ್ದಾನೆ. ಹಲವರು ಗಾಯಗೊಂಡಿದ್ದಾರೆ.

“ಇಲ್ಲಿನ ಗ್ರಾಮಗಳೆಲ್ಲವೂ ಈಗ ಪೊಲೀಸ್‌ ಕಂಟೋನ್ಮೆಂಟ್‌ಗಳಾಗಿವೆ. ಘಾಘ್ರಾ ಗ್ರಾಮದ ಮಹಿಳೆಯರು, ಮಕ್ಕಳು ಸೇರಿ ಸುಮಾರು 200 ಮಂದಿಯನ್ನು ಪೊಲೀಸರು ತುಂಬಿಕೊಂಡು ಬಂದು ಪೊಲೀಸ್‌ ಟೆಂಟ್‌ಗಳಲ್ಲಿ ಇಟ್ಟುಕೊಂಡಿದ್ದಾರೆ. ಮಾಡದ ತಪ್ಪಿಗಾಗಿ ಗ್ರಾಮಗಳ ಅಮಾಯಕ ಮಹಿಳೆಯರು, ಮಕ್ಕಳು ಹಿಂಸೆ ಅನುಭವಿಸಬೇಕಾದ ಸ್ಥಿತಿ ನಿರ್ಮಾಣವಾಗಿದೆ” ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.

ಐವರು ಮಹಿಳೆಯರನ್ನು ಅಪಹರಿಸಿ ಅತ್ಯಾಚಾರ ಎಸಗಿರುವವರು ಆದಿವಾಸಿ ಹೋರಾಟಗಾರರಲ್ಲ, ಈ ಕೃತ್ಯವನ್ನು ಆದಿವಾಸಿ ಹೋರಾಟಗಾರರ ತಲೆಗೆ ಕಟ್ಟಲಾಗುತ್ತಿದೆ ಎಂಬ ದೂರು ಆದಿವಾಸಿಗಳದ್ದು. ಅಲ್ಲದೆ ಕರಿಯ ಮುಂಡಾ ನಿವಾಸದ ಮೂರು ಮಂದಿ ಕಾವಲುಗಾರರನ್ನು ಅಪಹರಿಸಿ ಒತ್ತೆ ಇಟ್ಟುಕೊಂಡಿರುವ ಆರೋಪವೂ ಸತ್ಯಕ್ಕೆ ದೂರವಾದುದು ಎನ್ನುತ್ತಾರೆ ಗ್ರಾಮಸ್ಥರು.

ಗ್ರಾಮಸ್ಥರನ್ನು ವಶದಲ್ಲಿಟ್ಟುಕೊಂಡಿರುವ ಪೊಲೀಸರು. -ಚಿತ್ರಕೃಪೆ: ದಿ ವೈರ್
ಗ್ರಾಮಸ್ಥರನ್ನು ವಶದಲ್ಲಿಟ್ಟುಕೊಂಡಿರುವ ಪೊಲೀಸರು. -ಚಿತ್ರಕೃಪೆ: ದಿ ವೈರ್

ಪಥಲ್‌ಗಡಿ ಹೋರಾಟ:

ಪಥಲ್‌ಗಡಿ ಎಂಬುದು ಇಲ್ಲಿನ ಮುಂಡಾ ಆದಿವಾಸಿ ಸಮುದಾಯದ ಪ್ರಮುಖ ಆಚರಣೆ. ಮುಂಡಾ ಭೂಮಿಯಿಂದ ಜನಿಸಿದವಳು ಎಂಬುದನ್ನು ಇಲ್ಲಿನ ಆದಿವಾಸಿಗಳು ನಂಬಿದ್ದಾರೆ. ಆಕೆ ಸತ್ತಾಗ ನೆಲದಲ್ಲಿ ಹುಗಿದು ತಲೆಯ ಭಾಗಕ್ಕೆ ಒಂದು ಎತ್ತರವಾದ ಕಲ್ಲನ್ನು ನೆಟ್ಟಿದ್ದರು ಎಂಬುದು ನಂಬಿಕೆ. ಆ ಕಲ್ಲೇ ಪಥಲ್‌ಗಡಿ.

ಆದಿವಾಸಿಗಳು ತಮ್ಮಲ್ಲಿ ಯಾರೇ ಮೃತಪಟ್ಟರೂ ಮೃತದೇಹವನ್ನು ನೆಲದಲ್ಲಿ ಹುಗಿದು ತಲೆಯ ಭಾಗಕ್ಕೆ ಒಂದು ಕಲ್ಲನ್ನು ನೆಡುವ ಆಚರಣೆಯನ್ನು ರೂಡಿಸಿಕೊಂಡು ಬಂದಿದ್ದಾರೆ. ಈ ಮೊದಲು ಹೀಗೆ ಕಲ್ಲನ್ನು ನೆಡುವ ಆಚರಣೆಗೆ ‘ಸಸಂದಿರಿ’ ಎಂದು ಕರೆಯಲಾಗುತ್ತಿತ್ತು. 1996ರ ಸುಮಾರಿಗೆ ಪಂಚಾಯತ್‌ ಕಾಯ್ದೆಯ ಬಗ್ಗೆ ಈ ಭಾಗದಲ್ಲಿ ಜಾಗೃತಿ ಮೂಡಿಸಿದ ಸಾಮಾಜಿಕ ಕಾರ್ಯಕರ್ತರಾದ ಮಾಜಿ ಐಎಎಸ್‌ ಅಧಿಕಾರಿ ಬಿ.ಡಿ. ಶರ್ಮಾ ಮತ್ತು ನಿವೃತ್ತ ಐಪಿಎಸ್ ಅಧಿಕಾರಿ ಬಂದಿ ಒರನಾನ್‌ ಅವರು ಈ ಆಚರಣೆಗೆ ಪಥಲ್‌ಗಡಿ ಎಂಬ ಹೆಸರನ್ನು ಕೊಟ್ಟರು.

ಗ್ರಾಮಸ್ಥರಲ್ಲಿ ಜಾಗೃತಿ ಮೂಡಿಸುವ ಸಲುವಾಗಿ ಈ ಪಥಲ್‌ಗಡಿ ಎಂಬ ದೊಡ್ಡ ಚಪ್ಪಡಿ ಕಲ್ಲುಗಳ ಮೇಲೆ ಭಾರತದ ಸಂವಿಧಾನ ಆದಿವಾಸಿಗಳಿಗೆ ನೀಡಿರುವ ವಿಶೇಷ ಸ್ಥಾನಮಾನ ಹಾಗೂ ಗ್ರಾಮ ಸಭೆಯ ಮಹತ್ವವನ್ನು ಬರೆಸಲಾಗುತ್ತಿತ್ತು.

ಪಥಲ್‌ಗಡಿ
ಪಥಲ್‌ಗಡಿ

ಭಾರತದ ಸಂವಿಧಾನದ ಬಗ್ಗೆ ಗೌರವವಿದೆ ಎಂದು ಹೇಳಿಕೊಳ್ಳುವ ಹಾಗೂ ಗ್ರಾಮ ಪಂಚಾಯತ್‌ ಆಡಳಿತದಲ್ಲಿ ನಂಬಿಕೆ ಇರುವ ಈ ಭಾಗದ ಆದಿವಾಸಿ ಜನ ತಮ್ಮದು ಪ್ರತ್ಯೇಕ ದೇಶ ಎಂದೇ ಕರೆದುಕೊಳ್ಳುತ್ತಾರೆ. ಇವರ ಹಲವು ತೀರ್ಮಾನಗಳು ಗ್ರಾಮ ಸಭೆಯಲ್ಲೇ ಮುಗಿಯುತ್ತವೆ. ಪಥಲ್‌ಗಡಿ ಕಲ್ಲಿನ ಕೊನೆಯಲ್ಲಿ ‘ನಮ್ಮ ಗ್ರಾಮಗಳಿಗೆ ಗ್ರಾಮ ಸಭೆಯ ಒಪ್ಪಿಗೆ ಇಲ್ಲದೆ ಹೊರಗಿನ ಯಾರಿಗೂ ಪ್ರವೇಶವಿಲ್ಲ’ ಎಂಬ ಬರಹವೂ ಇರುತ್ತದೆ.

ಮೂಲ ಆಚರಣೆಯಿಂದ ಜಾಗೃತಿ ಕಲ್ಲುಗಳಾಗಿ ಬದಲಾಗಿ ಪಥಲ್‌ಗಡಿ ಆದಿವಾಸಿಗಳ ಹಕ್ಕುಗಳ ಹೋರಾಟಕ್ಕೆ ಪ್ರೇರಣೆಯಾಯಿತು. ಇಲ್ಲಿನ ಆದಿವಾಸಿ ಹೋರಾಟಗಾರರು ತಮ್ಮದು ‘ಪಥಲ್‌ಗಡಿ ಹೋರಾಟ’ ಎಂದು ಘೋಷಿಸಿಕೊಂಡರು. ಸಂವಿಧಾನ ಆದಿವಾಸಿಗಳಿಗೆ ನೀಡಿರುವ ವಿಶೇಷ ಸ್ಥಾನಮಾನಗಳನ್ನು ಸರಕಾರಗಳು ಕಸಿದುಕೊಳ್ಳುತ್ತಿವೆ ಎಂಬುದು ಈ ಹೋರಾಟಗಾರರು ವ್ಯವಸ್ಥೆಯ ವಿರುದ್ಧ ಅಸಮಾಧಾನಗೊಳ್ಳುವಂತೆ ಮಾಡಿದೆ.

ಖುಂಟೀ ಪ್ರಾಂತ್ಯದ ಗ್ರಾಮಗಳಲ್ಲಿ ಪೊಲೀಸರು ನಡೆಸಿರುವ ದೌರ್ಜನ್ಯ:

ಭೂ ಹಕ್ಕಿನ ವಿಶೇಷ ನಿಯಮ:

ಜಾರ್ಖಂಡ್‌ ಇತರೆ ಭಾಗಗಳಲ್ಲಿರುವ ಭೂ ಹಕ್ಕಿನ ನಿಯಮಗಳಿಗಿಂತ ಖುಂಟೀ ಪ್ರಾಂತ್ಯದ ನಿಯಮ ವಿಶಿಷ್ಟವಾಗಿದೆ. ಇಲ್ಲಿನ ಭೂ ಹಕ್ಕಿನ ನಿಯಮವನ್ನು ರಿಜಿಸ್ಟರ್‌-2 ಎಂದು ಕರೆಯಲಾಗಿದೆ. ಈ ವಿಶೇಷ ನಿಯಮದಡಿ ಮುಂಡಾ ಕುಟುಂಬ ಜಮೀನ್ದಾರಿ ಹಕ್ಕನ್ನು ಹೊಂದಬಹುದು. ತಮ್ಮ ವಶದಲ್ಲಿರುವ ಅರಣ್ಯ ಜಾಗವೂ ಸೇರಿದಂತೆ ತಮ್ಮ ಭೂಮಿಯನ್ನು ಗೇಣಿಗೆ ಕೊಟ್ಟು ಅವರಿಂದ ಕಂದಾಯ ವಸೂಲಿ ಮಾಡಲು ಮುಂಡಾ ಕುಟುಂಬಗಳಿಗೆ ಅಧಿಕಾರವಿದೆ.

2000ಕ್ಕೂ ಮುನ್ನಾ ಜಾರ್ಖಂಡ್‌ ಅವಿಭಜಿತ ಬಿಹಾರದ ಭಾಗವಾಗಿತ್ತು. 1947ರಲ್ಲಿ ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕ ಸಂದರ್ಭದಲ್ಲಿ ಬಿಹಾರ ರಾಜ್ಯ ಸರಕಾರ ಮುಂಡಾ ಕುಟುಂಬಗಳಿಗೆ ಸೇರಿದ್ದ ಅರಣ್ಯ ಭೂಮಿಯನ್ನು ‘ಬಿಹಾರ ಖಾಸಗಿ ಸಂರಕ್ಷಿತ ಅರಣ್ಯ ಕಾಯ್ದೆ’ಯಡಿ ತನ್ನ ವಶಕ್ಕೆ ತೆಗೆದುಕೊಂಡಿತ್ತು. ಆದರೂ ಸುಮಾರು 200 ಅರಣ್ಯ ಭೂ ಭಾಗಗಳು ಇನ್ನೂ ಮುಂಡಾ ಕುಟುಂಬ ಬಳಿಯೇ ಇವೆ.

2006ರಲ್ಲಿ ಕೇಂದ್ರ ಸರಕಾರ ‘ಪರಿಶಿಷ್ಟ ಪಂಗಡ ಮತ್ತು ಇತರೆ ಸಾಂಪ್ರದಾಯಿಕ ಅರಣ್ಯ ಹಕ್ಕುದಾರರ ಕಾಯ್ದೆ’ಯನ್ನು ಜಾರಿಗೆ ತಂದಿತು. ಅರಣ್ಯ ಪ್ರದೇಶದಲ್ಲಿ ವ್ಯವಸಾಯ ಮಾಡುತ್ತಿರುವವರು ಅದರ ಮಾಲೀಕತ್ವಕ್ಕಾಗಿ ಸರಕಾರಕ್ಕೆ ಅರ್ಜಿ ಸಲ್ಲಿಸಬೇಕು ಎಂದು ಈ ಕಾಯ್ದೆ ಹೇಳಿತ್ತು. ಆದರೆ, ಈ ಕಾಯ್ದೆಯಡಿ ಸರಕಾರಕ್ಕೆ ಅರ್ಜಿ ಸಲ್ಲಿಸಲು ಮುಂಡಾ ಸಮುದಾಯ ನಿರಾಕರಿಸಿತ್ತು. ಅಲ್ಲದೆ ಈ ಕಾಯ್ದೆ ತಮಗೆ ವಿಶೇಷ ಸ್ಥಾನಮಾನ ನೀಡುವ ರಿಜಿಸ್ಟರ್‌-2 ನಿಯಮವನ್ನು ಉಲ್ಲಂಘಿಸುತ್ತಿದೆ ಎಂದು ವಾದಿಸಿದರು.

ಅರಣ್ಯದ ಭೂ ಹಕ್ಕಿನ ವಿಚಾರವಾಗಿ ಆದಿವಾಸಿಗಳು ಮತ್ತು ಸರಕಾರದ ನಡುವೆ ಹವಲು ವರ್ಷಗಳಿಂದ ಈ ತಿಕ್ಕಾಟ ನಡೆಯುತ್ತಲೇ ಬಂದಿದೆ. 2006ರ ಕೇಂದ್ರ ಸರಕಾರದ ಅರಣ್ಯ ಹಕ್ಕು ಕಾಯ್ದೆಯನ್ನು ವಿರೋಧಿಸಲು ಪಥಲ್‌ಗಡಿ ಹೋರಾಟ ಮುನ್ನೆಲೆಗೆ ಬಂತು. ಪಥಲ್‌ಗಡಿ ಹೋರಾಟಗಾರರು ಇತ್ತೀಚೆಗೆ ಖುಂಟೀ ಪ್ರಾಂತ್ಯದಲ್ಲಿ ಪ್ರತ್ಯೇಕ ಆಡಳಿತ ವ್ಯವಸ್ಥೆಯನ್ನೇ ಜಾರಿಗೆ ತಂದಿದ್ದಾರೆ ಎನ್ನಲಾಗಿದೆ.

ತಮ್ಮದು ಸ್ವತಂತ್ರವಾದ ಪ್ರತ್ಯೇಕ ದೇಶ (ದಿಶೋಂ) ಎಂದು ಕರೆದುಕೊಳ್ಳುವ ಪಥಲ್‌ಗಡಿ ಹೋರಾಟಗಾರರು ತಮ್ಮದೇ ಆದ ಬ್ಯಾಂಕಿಂಗ್‌ ವ್ಯವಸ್ಥೆ ಮತ್ತು ತಮ್ಮದೇ ಆದ ಪ್ರತ್ಯೇಕ ಶಿಕ್ಷಣ ನೀತಿಯನ್ನೂ ಹೊಂದಿದ್ದಾರೆ ಎನ್ನಲಾಗಿದೆ. ತಮ್ಮ ಪ್ರತ್ಯೇಕತೆಯ ಹೋರಾಟದ ಭಾಗವಾಗಿ ಹಲವು ಗ್ರಾಮಸ್ಥರು ತಮಗೆ ನೀಡಲಾಗಿದ್ದ ಮತದಾರರ ಗುರುತಿನ ಚೀಟಿಗಳು ಹಾಗೂ ಆಧಾರ್‌ ಕಾರ್ಡ್‌ಗಳನ್ನು ಸುಟ್ಟು ಹಾಕಿದ್ದಾರೆ.

ಹೋರಾಟಗಾರ ಬಿರ್ಸಾ ಮುಂಡಾ ಮತ್ತು ಜೈಪಾಲ್‌ ಸಿಂಗ್‌ ಮುಂಡಾ ಅವರಂಥ ನಾಯಕರು ಬಂದಿದ್ದು ಇದೇ ಖುಂಟೀ ಪ್ರಾಂತ್ಯದಿಂದ. ಬಿರ್ಸಾ ಮುಂಡಾಯಿಂದ ಹಿಡಿದು ಈಗಿನ ಪಥಲ್‌ಗಡಿ ಹೋರಾಟಗಾರರವರೆಗೆ ಈ ಆದಿವಾಸಿಗಳು ನಿರಂತರವಾಗಿ ಹೋರಾಡುತ್ತಾ ಬಂದಿರುವುದು ತಮ್ಮ ವಿಶಿಷ್ಟ ಹಕ್ಕು ಹಾಗೂ ಅಸ್ಥಿತ್ವಕ್ಕಾಗಿ. ಆದರೆ, ಸರಕಾರಿ ವ್ಯವಸ್ಥೆ ಎಲ್ಲಾ ಆದಿವಾಸಿಗಳೊಂದಿಗೆ ನಡೆದುಕೊಳ್ಳುವಂತೆ ಇವರ ಮೇಲೂ ತನ್ನ ದಬ್ಬಾಳಿಕೆಯ ನೀತಿಯನ್ನು ಹೇರುತ್ತಿದೆ.

ದೇಶದ ಬೇರೆ ಬೇರೆ ಭಾಗದ ಆದಿವಾಸಿಗಳು ಹೆಚ್ಚಿನ ಪ್ರತಿರೋಧ ತೋರದೆ ಸರಕಾರದ ನೀತಿಗಳನ್ನು ಒಪ್ಪುತ್ತಾ ಬಂದಿದ್ದರೆ ಮುಂಡಾಗಳು ಮಾತ್ರ ತಮ್ಮದೇ ‘ದೇಶ’ಕ್ಕಾಗಿ ಇಂದಿಗೂ ಹೋರಾಡುತ್ತಿದ್ದಾರೆ. ಆದರೆ, ಸರಕಾರ ಮುಂಡಾಗಳ ಮೇಲೆ ಅಪಹರಣ, ಅತ್ಯಾಚಾರದ ಆರೋಪಗಳನ್ನು ಹೊರಿಸುತ್ತಿದೆ. ಸದ್ಯ ಶಸ್ತ್ರಸಜ್ಜಿತವಾಗಿ ಖುಂಟೀ ಪ್ರಾಂತ್ಯದಲ್ಲಿ ಬೀಡು ಬಿಟ್ಟಿರುವ ಜಿಲ್ಲಾಡಳಿತ ಬಂದೂಕಿನ ತುದಿಯಲ್ಲಿ ಮುಂಡಾ ಆದಿವಾಸಿಗಳನ್ನು ಬೆದರಿಸಿ ಅವರ ವಿಶೇಷ ಸ್ಥಾನಮಾನಗಳನ್ನು ಕಸಿದುಕೊಳ್ಳುವ ಪ್ರಯತ್ನದಲ್ಲಿದ್ದಂತಿದೆ.