‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?
ಸುದ್ದಿ ಸಾಗರ

‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?

ಸದ್ಯದ ಪರೀಕ್ಷಾ ಪದ್ಧತಿ ಮಕ್ಕಳನ್ನು ಕೇವಲ ಕಂಠಪಾಠ ಮಾಡುವುದಕ್ಕೆ ಪ್ರೇರೇಪಿಸುತ್ತಿದೆಯೇ ಹೊರತು ನೈಜ ಜ್ಞಾನವನ್ನು ತುಂಬುತ್ತಿಲ್ಲ. ಇದಕ್ಕೆ ಪರ್ಯಾಯ ಎನ್ನಲಾಗುತ್ತಿರುವ ಮುಕ್ತ ಪುಸ್ತಕ ಪರೀಕ್ಷಾ ಪದ್ಧತಿಯಲ್ಲಿಯೂ ಕೂಡ ಹಲವಾರು ಲೋಪದೋಷಗಳಿವೆ.

ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಎನ್‌. ಮಹೇಶ್‌ ಪ್ರಾಥಮಿಕ ಮತ್ತ ಪ್ರೌಢಶಾಲೆಯ ವಿದ್ಯಾರ್ಥಿಗಳಿಗೆ ಮುಕ್ತ ಪುಸ್ತಕ ಪರೀಕ್ಷೆ ನಡೆಸುವ ಪ್ರಸ್ತಾಪ ಮಾಡಿದ್ದಾರೆ. ಸಚಿವರ ಈ ಪ್ರಸ್ತಾವನೆ ಹಲವಾರು ಪರ ವಿರೋಧ ಚರ್ಚೆಗಳಿಗೆ ದಾರಿ ಮಾಡಿಕೊಟ್ಟಿದೆ.

ಶಿಕ್ಷಣ ತಜ್ಞರ ಪ್ರಕಾರ ಯಾವ ದೇಶದಲ್ಲಿಯೂ ಕೂಡ ಪ್ರಾಥಮಿಕ ಮತ್ತು ಪ್ರೌಢಶಾಲಾ ವಿದ್ಯಾರ್ಥಿಗಳು ಪುಸ್ತಕ ನೋಡಿಕೊಂಡು ಪರೀಕ್ಷೆ ಬರೆಯುತ್ತಿಲ್ಲ. ಕೆಲವು ದೇಶಗಳ ಉನ್ನತ ಶಿಕ್ಷಣದಲ್ಲಷ್ಟೇ ಈ ಪದ್ಧತಿ ಜಾರಿಯಲ್ಲಿದ್ದು, ಅಲ್ಲಿಯೂ ಕೂಡ ಹಲವಾರು ವಿಭಿನ್ನತೆಗಳನ್ನು ಹೊಂದಿದೆ. ಈಗ ಈ ಪದ್ಧತಿಯನ್ನು ಜಾರಿಗೆ ತಂದರೆ ಮಕ್ಕಳ ಕಲಿಕೆಗೆ ಪೆಟ್ಟು ಬೀಳುತ್ತದೆ ಎಂಬ ಅಭಿಪ್ರಾಯಗಳು ವ್ಯಕ್ತವಾಗಿವೆ.

ಹಾಗಾದರೇ ಸದ್ಯದ ಶಿಕ್ಷಣ ಪದ್ಧತಿ ಉತ್ತಮವಾಗಿಯೇ ಎನ್ನುವುದಕ್ಕೆ ನಿರ್ದಿಷ್ಟ ಉತ್ತರವಿಲ್ಲ. ಇಂದಿನ ದಿನಮಾನಗಳಲ್ಲಿ ಬಹುಪಾಲು ಜನರ ಪ್ರಕಾರ ಶಾಲೆ ಕಾಲೇಜುಗಳ ಕೆಲಸ ಮಕ್ಕಳ ತಲೆಯೊಳಗೆ ಮಾಹಿತಿಯನ್ನು ತುಂಬುವುದಷ್ಟೇ ಎನ್ನುವಂತಾಗಿದೆ. ಮಕ್ಕಳಲ್ಲಿ ಜ್ಞಾನ ಪ್ರಸರಣ ಆಗಿದೆಯೋ ಇಲ್ಲವೋ ಎನ್ನುವುದನ್ನು ಹೊರಗೆಡುವಲು ಬಳಸುವ ಸಾಧನವೇ ಪರೀಕ್ಷೆಗಳು. ಪರೀಕ್ಷೆಗಳಲ್ಲಿ ಮಗುವೊಂದು ಉತ್ತಮವಾದ ಅಂಕ ಗಳಿಸಲಿಲ್ಲವೆಂದರೆ, ಅದು ಅದರದ್ದೇ ತಪ್ಪಾಗುತ್ತದೆ. ಹಿಂದುಳಿದ ವಿದ್ಯಾರ್ಥಿಗಳ ಸಾಲಿನಲ್ಲಿ ಕೂರಬೇಕಾಗುತ್ತದೆ.

ಪಠ್ಯಗಳಲ್ಲಿನ ಮಾಹಿತಿಯನ್ನು ಮಕ್ಕಳ ತಲೆಯೊಳಗೆ ತುಂಬುವುದಷ್ಟೇ ಶಿಕ್ಷಣ ಎನ್ನುವಂತಾಗಿರುವ ಸಮಯದಲ್ಲಿ, ಮಗುವಿನ ತಲೆಯೊಳಗೆ ಉಳಿದಿದ್ದಾದರೂ ಎಷ್ಟು ಎನ್ನುವುದಕ್ಕೆ ಉತ್ತರವಿಲ್ಲ. ಇಲ್ಲಿ ಪಠ್ಯಗಳಲ್ಲಿನ ವಿಷಯವನ್ನು ಮಕ್ಕಳ ತಲೆಗೆ ವರ್ಗಾಯಿಸುವುದು ಶಿಕ್ಷಕರ ಕೆಲಸ ಮತ್ತು ಪಠ್ಯಗಳಲ್ಲಿ ಇದ್ದದ್ದನ್ನು ಕರಾರುವಕ್ಕಾಗಿ ಕಂಠಪಾಠ ಮಾಡುವುದು ಮಕ್ಕಳ ಕೆಲಸ. ಮಕ್ಕಳ ಮತ್ತು ಶಿಕ್ಷಕರ ಈ ಶ್ರಮವನ್ನು ತೂಗುವುದಕ್ಕೆ ಇರುವ ಮಾಪನ ಅಂತಿಮ ಪರೀಕ್ಷೆಗಳು.

 ‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?

ಈ ಕುರಿತು ಹಲವಾರು ಚರ್ಚೆಗಳು ಕೂಡ ನಡೆದಿವೆ. ಈ ಶಿಕ್ಷಣ ಪದ್ಧತಿಯ ಬದಲಾಗಿ ಪರ್ಯಾಯವನ್ನು ಹುಡುಕುವ ಕಡೆಗೂ ಹಲವಾರು ಜನರ ಗಮನ ಹರಿದಿದೆ. ಭೋಧನೆ ಎಂದರೆ ಪಠ್ಯದಲ್ಲಿರುವ ವಿಷಯವನ್ನು ವಿದ್ಯಾರ್ಥಿಗಳ ಮೆದುಳಿಗೆ ತುಂಬುವುದಲ್ಲ, ಬದಲಾಗಿ ಹೇಗೆ ಮಾಹಿತಿ ಕಲೆ ಹಾಕಬೇಕು ಎನ್ನುವುದನ್ನು ಕಲಿಸುವುದು ಎನ್ನುವ ವಾದಗಳೂ ಕೂಡ ಕೇಳಿಬಂದಿವೆ.

ಮೌಲ್ಯಯುತವಾದ ಶಿಕ್ಷಣವು ವಿದ್ಯಾರ್ಥಿಯ ಮಾಹಿತಿ ಕಲೆಹಾಕುವ ಶಕ್ತಿಯನ್ನು ಅಭಿವೃದ್ಧಿಪಡಿಸಬೇಕು, ವಿದ್ಯಾರ್ಥಿಗಳು ಹೊಸ ಅನ್ವೇಷನೆಗಳಿಗೆ ಮುಂದಾಗುವಂತೆ ಪ್ರೇರೇಪಿಸಬೇಕು, ವಿದ್ಯಾರ್ಥಿಯು ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳಲು ಹೊಸ ದಾರಿಗಳನ್ನು ತಾನೇ ಅನ್ವೇಷಿಸಿಕೊಳ್ಳುವಂತೆ ಮಾಡಬೇಕು. ಆಲೋಚನಾ ಶಕ್ತಿಯನ್ನು ಬೆಳೆಸಬೇಕು.

ಇದು ನಿಜವಾದ ಶಿಕ್ಷಣದ ಮಾದರಿ ಎಂದೆನ್ನಿಸಿದರೆ ಪಠ್ಯದ ಮಾಹಿತಿಗಳನ್ನು ಬೋಧಿಸುವ ಮೊದಲು ವಿದ್ಯಾರ್ಥಿಗಳಲ್ಲಿನ ಕೌಶಲ್ಯಗಳನ್ನು ಅಭಿವೃದ್ಧಿ ಪಡಿಸಬೇಕು. ಸುಲಭವಾಗಿ ಹೇಳುವುದಾದರೆ ವಿದ್ಯಾರ್ಥಿಯ ಬೌದ್ಧಿಕ ಸಾಮರ್ಥ್ಯವನ್ನು ಹೆಚ್ಚಿಸುವ ಮೊದಲು ಮಾನಸಿಕ ಸಾಮರ್ಥ್ಯವನ್ನು ಉದ್ದೀಪಿಸಬೇಕು.

 ‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?

ಶಾಲಾ ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳಿಗೆ ದೈಹಿಕ ಶಿಕ್ಷಣ ನೀಡುತ್ತಿದ್ದು, ವಿದ್ಯಾರ್ಥಿಗಳ ದೈಹಿಕ ಕ್ಷಮತೆ ಹೆಚ್ಚಾಗುವಲ್ಲಿ ಸಹಕಾರಿಯಾಗುತ್ತಿದೆ. ಅದೇ ರೀತಿ ಮಾನಸಿಕ ಕ್ಷಮತೆಯನ್ನೂ ಕೂಡ ಹೆಚ್ಚಿಸುವತ್ತ ಹೆಜ್ಜೆ ಹಾಕಬೇಕಿದೆ. ವಿದ್ಯಾರ್ಥಿಗಳಲ್ಲಿ ಹುಡುಕುವ, ವಿಶ್ಲೇಷಿಸುವ, ಶೀಘ್ರ ನಿರ್ಧಾರ ಕೈಗೊಳ್ಳುವ, ಚಿಂತನೆ ನಡೆಸುವ ಗುಣಗಳನ್ನು ಅಭಿವೃದ್ಧಿಪಡಿಸಬೇಕಿದೆ. ಈ ಎಲ್ಲಾ ಗುಣಗಳು ಅಭಿವೃದ್ಧಿಯಾಗುವಲ್ಲಿ ಓಪನ್‌ ಬುಕ್‌ ಎಕ್ಸಾಮ್‌ ಸಹಕಾರಿಯಾಗಬಲ್ಲದು ಎನ್ನಲಾಗುತ್ತಿದೆ.

ಏನಿದು ‘ಓಪನ್‌ ಬುಕ್‌ ಎಕ್ಸಾಮ್’?:

 ‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?

ಓಪನ್‌ ಬುಕ್ ಎಕ್ಸಾಮಿನೇಷನ್‌ ಎಂದಕೂಡಲೇ ಎಲ್ಲರ ತಲೆಯಲ್ಲಿ ಬರುವುದು ಪುಸ್ತಕ ನೋಡಿಕೊಂಡು ಪರೀಕ್ಷೆ ಬರೆಯುವುದು. ಅದು ನಿಜವೂ ಕೂಡ. ಈ ಪರೀಕ್ಷಾ ಪದ್ಧತಿಯ ಅಡಿಯಲ್ಲಿ ಪರೀಕ್ಷಾರ್ಥಿಗಳು ಪರೀಕ್ಷಾ ಕೊಠಡಿಗೆ ಪಠ್ಯ ಪುಸ್ತಕ, ನೋಟ್ಸ್‌ ಇತ್ಯಾದಿಗಳನ್ನು ತಂದು, ಅವುಗಳ ಸಹಾಯ ಪಡೆದು ಪರೀಕ್ಷೆ ಬರೆಯಬಹುದು.

ಈ ಮುಕ್ತ ಪುಸ್ತಕ ಪರೀಕ್ಷೆಯ ಪರಿಕಲ್ಪನೆ ಹೊಸದೇನಲ್ಲ. ಕಾನೂನು ಪರೀಕ್ಷೆಗಳಲ್ಲಿ ಹಾಗೂ ಉನ್ನತ ಶಿಕ್ಷಣದ ಕೆಲವು ಪರೀಕ್ಷೆಗಳಲ್ಲಿ ಈ ಪದ್ಧತಿ ಈಗಾಗಲೇ ಬಳಕೆಯಲ್ಲಿದೆ. ಆದರೆ ಇನ್ನಿತರ ವಿಷಯಗಳಿಗೆ ಈ ಪರೀಕ್ಷಾ ಪದ್ಧತಿ ಅಪರಿಚಿತ. ಇದುವರೆಗೂ ವರ್ಷಪೂರ್ತಿ ಕಂಠಪಾಠ ಮಾಡಿದ್ದನ್ನು ಮೂರು ಗಂಟೆಗಳ ಅವಧಿಯಲ್ಲಿ ಉತ್ತರ ಪತ್ರಿಕೆಯ ಮೇಲೆ ಗೀಚಿ, ಪರೀಕ್ಷೆ ಎಂದರೆ ಹೀಗೆಯೇ ಎಂದುಕೊಂಡವರಿಗೆ ಈ ಪದ್ಧತಿ ಕಸಿವಿಸಿಯನ್ನು ಉಂಟುಮಾಡಬಹುದು. ಇದು ಅತೀ ಸುಲಭವಾದ ಪರೀಕ್ಷಾ ವಿಧಾನ ಎನಿಸಬಹುದು. ಆದರೆ ಎಣಿಸಿದಷ್ಟು ಇದು ಸುಲಭವಾದದ್ದಲ್ಲ.

ಓಪನ್‌ ಬುಕ್‌ ಎಕ್ಸಾಮ್‌ ವಿದ್ಯಾರ್ಥಿಗಳ ಚಿಂತನಾ ಮಟ್ಟವನ್ನು ಅಭಿವೃದ್ಧಿ ಪಡಿಸುತ್ತದೆ ಎನ್ನುವುದೇನೋ ನಿಜ. ಆದರೆ ಸದ್ಯದ ಪ್ರಶ್ನೆ ಪತ್ರಿಕೆಗಳಲ್ಲಿ ಪ್ರಶ್ನೆಗಳನ್ನೇ ಮತ್ತೆ ಕೇಳಿದರೆ ಉಪಯೋಗವಾಗಲಾರದು. ‘ಯಾರು ಯಾರಿಗೆ ಹೇಳಿದರು?’ ‘ಬಿಟ್ಟಸ್ಥಳ ಭರ್ತಿ ಮಾಡಿ’, ‘ಒಂದು ವಾಕ್ಯದಲ್ಲಿ ಉತ್ತರಿಸಿ’, ‘ಈ ಕೆಳಗಿನ ಪದ್ಯಭಾಗವನ್ನು ಪೂರ್ಣಗೊಳಿಸಿ’, ಎಂದರೆ ವಿದ್ಯಾರ್ಥಿಗಳ ಚಿಂತನಾ ಶಕ್ತಿ ವೃದ್ಧಿಯಾಗುವುದಿಲ್ಲ. ಪರೀಕ್ಷಾ ವಿಧಾನವನ್ನು ಬದಲಿಸಿದರೆ ಪ್ರಶ್ನೆ ಕೇಳುವ ವಿಧಾನವನ್ನೂ ಬದಲಿಸಿಕೊಳ್ಳಬೇಕಾಗುತ್ತದೆ. ಹಳೆಯ ಪ್ರಶ್ನೆಗಳೇ ಮುಂದುವರಿದರೆ ವಿದ್ಯಾರ್ಥಿಗಳು ಓದುವುದನ್ನೇ ನಿಲ್ಲಿಸಬಹುದು.

ಮುಕ್ತ ಪುಸ್ತಕ ವಿಧಾನ ಕುರಿತಾದ ತಪ್ಪು ಗ್ರಹಿಕೆಗಳು:

ಈ ಪರೀಕ್ಷಾ ವಿಧಾನಕ್ಕೆ ಸಂಬಂಧಿಸಿದಂತೆ ಹಲವಾರು ತಪ್ಪು ಗ್ರಹಿಕೆಗಳಿವೆ. ಈ ಪರೀಕ್ಷೆಯ ವಿಧಾನ ತುಂಬಾ ಸುಲಭ ಎನಿಸಬಹುದು. ಆದರೆ ಅದು ತಪ್ಪು. ಹೊಸ ಪರೀಕ್ಷಾ ವಿಧಾನದ ಜತೆ ಪ್ರಶ್ನೆಗಳ ಮಾದರಿಯೂ ಬದಲಾಗುವುದರಿಂದ ಕೇವಲ ಪುಸ್ತಕದಲ್ಲಿರುವುದನ್ನು ಅಚ್ಚೊತ್ತಲು ಸಾಧ್ಯವಿಲ್ಲ. ವಿದ್ಯಾರ್ಥಿಗಳು ಉತ್ತರ ಬರೆಯುವುದಕ್ಕೂ ಮುಂಚೆ ಚಿಂತಿಸುವ ಅಗತ್ಯವಿರುತ್ತದೆ.

ಈ ವಿಧಾನ ಜಾರಿಗೆ ಬಂದರೆ ಓದುವ ಅಗತ್ಯವಿಲ್ಲ ಎಂದುಕೊಳ್ಳುವುದು ಮತ್ತೊಂದು ದೊಡ್ಡ ತಪ್ಪು ಗ್ರಹಿಕೆ. ಓದದೇ ಪರೀಕ್ಷಾ ಕೇಂದ್ರಕ್ಕೆ ಕಾಲಿಟ್ಟರೆ, ನೀಡಿದ ಪ್ರಶ್ನೆಗಳಿಗೆ ಉತ್ತರವೆಲ್ಲಿದೆ ಎಂದು ಹುಡುಕುವಲ್ಲಿಯೇ ಸಮಯ ಕಳೆದು ಹೋಗುತ್ತದೆ. ಸಮಯದ ಜತೆ ಹೊಂದಾಣಿಕೆ ಮಾಡಿಕೊಂಡು ಉತ್ತರ ಬರೆಯುವುದು ಈ ವಿಧಾನದ ಸವಾಲು.

ಈ ವಿಧಾನದಲ್ಲಿ ಪುಸ್ತಕದಲ್ಲಿರುವುದನ್ನು ಪತ್ರಿಕೆಗೆ ಇಳಿಸುವುದಷ್ಟೇ ವಿದ್ಯಾರ್ಥಿಗಳ ಕೆಲಸ ಎನ್ನುವುದು ಸಾಮಾನ್ಯವೆನಿಸುವ ನಂಬಿಕೆ. ಆದರೆ ಈ ವಿಧಾನದಲ್ಲಿ ನೀಡಲ್ಪಡುವ ಪ್ರಶ್ನೆಗಳಿಗೆ ಪಠ್ಯದಲ್ಲಿರುವುದನ್ನೇ ಯಥಾವತ್ತಾಗಿ ಬರೆಯಲು ಮುಂದಾದರೆ ಯಾವುದೋ ಪ್ರಶ್ನೆಗೆ ಇನ್ಯಾವುದೋ ಉತ್ತರ ಬರೆದಂತಾಗುತ್ತದೆ. ಇಲ್ಲಿ ಪಠ್ಯಪುಸ್ತಗಳು ಸಹಾಯಕರಾಗಿ ಕೆಲಸ ಮಾಡುತ್ತವೆಯೇ ಹೊರತು, ಸಂಪೂರ್ಣ ಉತ್ತರಗಳನ್ನು ನೀಡುವುದಿಲ್ಲ.

ಎಷ್ಟು ಪುಸ್ತಕಗಳನ್ನು ಬೇಕಾದರೂ ಕೊಂಡೊಯ್ದು, ನೋಡಿಕೊಂಡು ಉತ್ತರ ಬರೆಯುವುದು ಸಲುಭದ ಕೆಲಸ ಎಂದೆನಿಸಬಹುದು. ಆದರೆ ಪುಸ್ತಕಗಳ ಸಂಖ್ಯೆ ಜಾಸ್ತಿಯಾದರೆ, ವಿದ್ಯಾರ್ಥಿಗಳ ಹುಡುಕಾಟದ ವ್ಯಾಪ್ತಿಯೂ ವಿಸ್ತೀರ್ಣಗೊಳ್ಳುತ್ತದೆ. ನಿಗದಿತ ಸಮಯದಲ್ಲಿ ಉತ್ತರ ಬರೆಯಲು ಸಾಧ್ಯವಾಗುವುದಿಲ್ಲ.

ಈ ವಿಧಾನದ ಉಪಯೋಗಗಳೇನು?:

ಈ ವಿಧಾನದಲ್ಲಿ ನಿರ್ಧಿಷ್ಟ ಪ್ರಶ್ನೆಗೆ ವಿದ್ಯಾರ್ಥಿಗಳ ತಲೆಯಲ್ಲಿರುವ ಉತ್ತರ ಸರಿಯೋ ತಪ್ಪೋ ಎಂದು ಪರೀಕ್ಷಿಸಿಕೊಳ್ಳುವ ಅವಕಾಶವಿರುತ್ತದೆ. ಇದರಿಂದಾಗಿ ಪರೀಕ್ಷೆ ಬರೆಯುವ ವೇಳೆ ವಿದ್ಯಾರ್ಥಿಗಳು ಮತ್ತಷ್ಟು ಸ್ವತಂತ್ರರಾಗಿರುತ್ತಾರೆ. ಉತ್ತರ ಹುಡುಕುವ, ತತ್‌ಕ್ಷಣದ ನಿರ್ಧಾರ ಕೈಗೊಳ್ಳುವ ಕೌಶಲ್ಯಗಳು ಈ ಪರೀಕ್ಷಾ ವಿಧಾನದಿಂದ ವೃದ್ಧಿಗೊಳ್ಳುತ್ತವೆ. ವಿದ್ಯಾರ್ಥಿಯ ಜ್ಞಾನದ ಮಟ್ಟವನ್ನು ವಿಸ್ತಿರಿಸಿಕೊಳ್ಳು ಈ ವಿಧಾನ ಸಹಕಾರಿಯಾಗಿ ನಿಲ್ಲುತ್ತದೆ.

ವಿದ್ಯಾರ್ಥಿಗಳು ಪರೀಕ್ಷೆ ಬರೆಯಲು ಹೊಸ ಹೊಸ ತಂತ್ರಗಾರಿಕೆಯನ್ನು ಹೆಣೆಯಲು ಪ್ರಾರಂಭಿಸುತ್ತಾರೆ. ಈ ಬೆಳವಣೆಗೆ ವಿದ್ಯಾರ್ಥಿಗಳಲ್ಲಿನ ತಂತ್ರಗಾರಿಕಾ ಕೌಶಲ್ಯವನ್ನು ವೃದ್ಧಿಸುತ್ತದೆ. ನೇರ ಪ್ರಶ್ನೆಗಳಿರದೇ, ಉತ್ತರಕ್ಕಾಗಿ ಬುದ್ಧಿ ಖರ್ಚು ಮಾಡುವ ಅಗತ್ಯ ಬಿದ್ದಾಗ ವಿದ್ಯಾರ್ಥಿಗಳ ಜ್ಞಾನದ ಪರಿಧಿಯೂ ವಿಸ್ತೃತಗೊಳ್ಳುತ್ತದೆ. ಇರುವ ಮಾಹಿತಿಯನ್ನು ಹೇಗೆ ಪರಿಣಾಮಕಾರಿಯಾಗಿ ಬಳಸಿಕೊಳ್ಳಬಹುದು ಎನ್ನುವುದನ್ನೂ ಕೂಡ ವಿದ್ಯಾರ್ಥಿಗಳು ಕಲಿಯುತ್ತಾರೆ.

ಅನಾನುಕೂಲಗಳೇನು?:

ಈ ವಿಧಾನದಲ್ಲಿರುವ ದೊಡ್ಡ ಅನಾನುಕೂಲತೆಯೆಂದರೆ ವಿದ್ಯಾರ್ಥಿಗಳು ಸಂಪೂರ್ಣವಾಗಿ ಪುಸ್ತಕಗಳ ಮೇಲೆಯೇ ಅವಂಬಿತರಾಗಿಬಿಡುವ ಸಾಧ್ಯತೆಗಳು. ಪರೀಕ್ಷೆಗಿಂತ ತಿಂಗಳುಗಳ ಮುಂಚೆಯೇ ವಿದ್ಯಾಭ್ಯಾಸವನ್ನು ಆರಂಭಿಸಿದೇ, ಮುಂದೆ ನೋಡಿಕೊಂಡರಾಯಿತು ಎಂಬ ಭಾವ ವಿದ್ಯಾರ್ಥಿಗಳಲ್ಲಿ ಬಲಿಯಬಹುದು. ಪರೀಕ್ಷೆಗೂ ಮುಂಚೆ ಪಠ್ಯ ಪುಸ್ತಕಗಳಷ್ಟೇ ಅಲ್ಲದೇ ಬೇರೆ ಬೇರೆ ಮೂಲಗಳಿಂದ ಮಾಹಿತಿ ಸಂಗ್ರಹಿಸಿ, ಅವುಗಳನ್ನೆಲ್ಲಾ ಒಂದೆಡೆ ಜೊಡಿಸಿಟ್ಟುಕೊಳ್ಳುವುದೇ ದೊಡ್ಡ ಹೊರೆಯಾಗಿ ಕಾಡಬಹುದು. ಪಠ್ಯಪುಸ್ತಕಗಳಷ್ಟೇ ಅಲ್ಲದೇ ಹೆಚ್ಚಿನ ಜ್ಞಾನಾರ್ಜನೆಗಾಗಿ ಹೆಚ್ಚಿನ ಬೆಲೆಯ ಬೇರೆ ಬೇರೆ ಪುಸ್ತಕಗಳನ್ನು ಕೊಳ್ಳುವ ಪರಿಸ್ಥಿತಿ ಉಂಟಾಗಬಹುದು.

 ‘ಓಪನ್‌ ಬುಕ್‌ ಎಕ್ಸಾಮ್‌’; ಹೊಸ ಪರೀಕ್ಷಾ ಪದ್ಧತಿಯಿಂದ ಮಕ್ಕಳಿಗೆಷ್ಟು ಲಾಭ?

ಆದರೆ ಈಗ ಸದ್ಯದ ಪ್ರಶ್ನೆ ಎಂದರೆ 6ರಿಂದ 10 ವರ್ಷದ ಮಕ್ಕಳಿಗೆ ಈ ಪರೀಕ್ಷಾ ಪದ್ಧತಿ ಸೂಕ್ತವೇ ಎಂಬುದು. ಅದಾಗ ತಾನೇ ಕಣ್ಣು ಬಿಟ್ಟು ಪ್ರಪಂಚವನ್ನು ಅರಿಯಲು ಆರಂಭಿಸುವ ಮಕ್ಕಳಿಗೆ ನಿರ್ದಿಷ್ಟ ಸಮಯದಲ್ಲಿ ಪ್ರಶ್ನೆಗಳಿಗೆ ಪುಸ್ತಕದಲ್ಲಿನ ಸೂಕ್ತ ಉತ್ತರ ಹುಡುಕಿ, ಆ ಉತ್ತರವನ್ನು ವಿಶ್ಲೇಷಿಸಿ ಬರೆಯಲು ಸಾಧ್ಯವೇ ಎಂದು ಯೋಚಿಸಬೇಕಿದೆ.

ಈ ಕುರಿತು ‘ಸಮಾಚಾರ’ಕ್ಕೆ ಪ್ರತಿಕ್ರಿಯೆ ನೀಡಿದ ಶಿಕ್ಷಣ ತಜ್ಞ ಡಾ.ಪಿ.ವಿ. ನಿರಂಜನಾರಾಧ್ಯ , ಚಿಕ್ಕ ಮಕ್ಕಳಿಗೆ ಈ ಪರೀಕ್ಷಾ ಪದ್ಧತಿ ಸೂಕ್ತವಲ್ಲ ಎಂದರು. ಈ ರೀತಿ ಮುಕ್ತ ಪುಸ್ತಕ ಪರೀಕ್ಷೆಯ ಬದಲು ಆಟಗಳ ಮೂಲಕ, ಮೌಖಿಕವಾಗಿ, ಪಠ್ಯೇತರ ಚಟುವಟಿಕೆಗಳ ಮೂಲಕ ಮಕ್ಕಳಿಗೆ ಪರೀಕ್ಷೆ ಒಡ್ಡಬಹುದು ಎನ್ನುವುದು ಅವರ ಅಭಿಪ್ರಾಯ.

ಓಪೆನ್ ಬುಕ್‌ ಎಕ್ಸಾಮ್‌ ಎಂಬ ಪರಿಕಲ್ಪನೆ ಬಹಳ ಹಳೆಯದೇ. ಇಲ್ಲಿಯವರೆಗೂ ಈ ವಿಧಾನವನ್ನು ಉನ್ನತ ಶಿಕ್ಷಣದ ಹಂತಗಳಲ್ಲಿ ಅನುಸರಿಸಲಾಗಿದೆ. ಈ ವಿಧಾನ ವಿಶೇಷವಾಗಿ 1ರಿಂದ 5ನೇ ತರಗತಿಯ ಮಕ್ಕಳಿಗೆ ಸರಿಹೊಂದುವುದಿಲ್ಲ. ಆ ವಯಸ್ಸಿನಲ್ಲಿ ಮಕ್ಕಳಿಗೆ ವಿಶ್ಲೇಷಣೆ ನಡೆಸುವಂತಹ, ವ್ಯಾಖ್ಯಾನ ಮಾಡುವಂತಹ ಶಕ್ತಿ ಇರುವುದಿಲ್ಲ. ಇದರಿಂದ ಹೆಚ್ಚಿನ ಪ್ರಯೋಜನವೇನೂ ದೊರೆಯುವುದಿಲ್ಲ.
- ಡಾ.ಪಿ.ವಿ. ನಿರಂಜನಾರಾಧ್ಯ, ಶಿಕ್ಷಣ ತಜ್ಞರು.

ಪ್ರಾಥಮಿಕ ಹಂತದಲ್ಲಿ ಮುಕ್ತ ಪುಸ್ತಕ ಪರೀಕ್ಷೆಯನ್ನು ಅಳವಡಿಸುವಾಗ, ಮಕ್ಕಳಷ್ಟೇ ಒತ್ತನ್ನು ಶಿಕ್ಷಕರಿಗೂ ಕೂಡ ನೀಡಬೇಕಾಗುತ್ತದೆ. ಶಿಕ್ಷಕರು ಹೆಚ್ಚು ಹೆಚ್ಚು ಸೃಜನಾತ್ಮಕವಾಗಿ ಚಿಂತಸಬೇಕಾಗುತ್ತದೆ. ಮಕ್ಕಳಿಗಿಂತಲೂ ಮೊಂದಲು ಶಿಕ್ಷಕರು ಈ ಪದ್ಧತಿಗೆ ಹೊಂದಿಕೊಳ್ಳುವ ಅನಿವಾರ್ಯತೆ ಇದೆ. ಮಕ್ಕಳಿಗೆ ಈ ಪ್ರಶ್ನೆಗೆ ಇದೇ ಉತ್ತರ ಎಂದು ಕಂಠಪಾಠ ಮಾಡಿಸಿ, ಅದೇ ಉತ್ತರವನ್ನು ಮಕ್ಕಳಿಂದ ನಿರೀಕ್ಷಿಸುವ ಬದಲು ಮಕ್ಕಳ ಕ್ರಿಯಾತ್ಮಕತೆಗೆ ಅವಕಾಶ ನೀಡಬೇಕಾಗುತ್ತದೆ.

ಚಿಕ್ಕ ಮಕ್ಕಳಿಗೆ ಮುಕ್ತ ಪುಸ್ತಕ ಪರೀಕ್ಷೆ ನೀಡುವುದೆಂದರೆ, ಉತ್ತರ ಹುಡುಕಿ ವಿಶ್ಲೇಷಣೆ ಮಾಡುವಂತೆ ತಿಳಿಸುವುದಲ್ಲ ಎನ್ನುತ್ತಾರೆ ಮಕ್ಕಳ ಹಕ್ಕುಗಳ ಕಾರ್ಯಕರ್ತ ವಾಸುದೇವ ಶರ್ಮಾ. ಮಕ್ಕಳಿಗೆ ಪುಸ್ತಕ ಕೊಡುವುದಕ್ಕಿಂತ ಮುಂಚೆ, ಶಿಕ್ಷಕರು ಒಂದು ಪ್ಯಾರಾವನ್ನು ವಿಶ್ಲೇಷಿಸಿ ಬರೆಯುವ ಶಕ್ತಿಯನ್ನು ಮಕ್ಕಳೊಳಗೆ ತುಂಬಬೇಕಾಗುತ್ತದೆ. ಇದಕ್ಕಾಗಿ ಶಿಕ್ಷಕರು ಹೆಚ್ಚಿನ ತರಬೇತಿ ಪಡಿಯಬೇಕಾಗುತ್ತದೆ ಎನ್ನುವುದು ವಾಸುದೇವ ಶರ್ಮಾ ಅಭಿಪ್ರಾಯ.

ಇಂದು ಅನೇಕ ಶಿಕ್ಷಕರು ಮಕ್ಕಳಿಗೆ ಕಂಠಪಾಟ ಮಾಡಿಸುವ ಪ್ರಯತ್ನದಲ್ಲಿ ನಿರತರಾಗಿದ್ದಾರೆ. ಇದರಿಂದ ಮಕ್ಕಳಿಗೆ ಅರಿತುಕೊಂಡು ವಿಶ್ಲೇಷಿಸುವ ಶಕ್ತಿ ಬೆಳೆಯುತ್ತಿಲ್ಲ. ಮುಕ್ತ ಪುಸ್ತಕ ಪರೀಕ್ಷೆ ತಂದರೆ ಮಕ್ಕಳಲ್ಲಿ ಓದುವ ಸಾಮರ್ಥ್ಯ ಬೆಳೆಯುತ್ತದೆ. ಆದ್ದರಿಂದ ಈ ಪದ್ಧತಿ ಉತ್ತಮವಾದದ್ದು. ಈ ಪದ್ಧತಿಯ ಕುರಿತಾದಂತೆ ಶಿಕ್ಷಕರು, ಶಿಕ್ಷಣ ತಜ್ಞರು, ಇಲಾಖೆಗಳು ಈ ಕುರಿತು ಮಾತನಾಡಬೇಕಿದೆ. ಮುಕ್ತ ಪುಸ್ತಕ ಪರೀಕ್ಷೆ ಬೇಡ ಎನ್ನುವುದಕ್ಕೂ ಮುಂಚೆ ಅದರ ಬಗ್ಗೆ ಪೂರ್ಣವಾಗಿ ತಿಳಿದುಕೊಳ್ಳಬೇಕಿದೆ 
- ವಾಸುದೇವ ಶರ್ಮಾ, ಮಕ್ಕಳ ಹಕ್ಕುಗಳ ಕಾರ್ಯಕರ್ತ

ಒಂದೆಡೆ ಮಕ್ಕಳಿಗೆ ವಿಶ್ಲೇಷಣೆ ಮಾಡಿ ಬರೆಯುವ ಶಕ್ತಿ ಇದೆಯೇ ಎನ್ನುವ ಪ್ರಶ್ನೆಯ ಜತೆಗೆ ಏಕೆ ಮಕ್ಕಳಲ್ಲಿ ವಿಶ್ಲೇಷಣಾತ್ಮ ಶಕ್ತಿ ತುಂಬಲಾಗುವುದಿಲ್ಲ ಎಂಬ ಪ್ರಶ್ನೆಯೂ ಇದೆ. ಎರಡೂ ಪ್ರಶ್ನೆಗಳು ಕೂಡ ಪ್ರಮುಖವಾದವೇ. ಮಕ್ಕಳ ಜ್ಞಾನದ ಮಟ್ಟವನ್ನು ವೃದ್ಧಿಸುವಲ್ಲಿ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಎನ್‌. ಮಹೇಶ್‌ ಪ್ರಸ್ತಾಸಿರುವ ಈ ಮುಕ್ತ ಪುಸ್ತಕ ಪರೀಕ್ಷಾ ಪದ್ಧತಿ ಹಲವಾರು ಆಯಾಮಗಳ ಚಿಂತನೆಗೆ ದಾರಿ ಮಾಡಿಕೊಟ್ಟಿದೆ.

ಏಕಾಏಕಿ ಈ ಪದ್ಧತಿಯನ್ನು ಅವಳಡಿಸಿದರೆ ಅದರಿಂದ ಯಾವ ಉಪಯೋಗವೂ ಇಲ್ಲ, ಅಳವಡಿಸಿಕೊಳ್ಳದೇ ಈಗಿರುವ ಪದ್ಧತಿಯನ್ನು ಮುಂದುವರಿಸಿದರೂ ಕೂಡ ಲಾಭವಿಲ್ಲ. ಈ ಎರಡೂ ನೆಲೆಗಳ ಮಧ್ಯೆ ನಿಂತು ಮತ್ತಾವ ಬದಲಾವಣೆಯನ್ನು ತರಬಹುದು ಎನ್ನುವುದರ ಕುರಿತು ಸರಕಾರ ಈಗ ಚಿಂತಿಸಬೇಕಿದೆ. ಆಗಷ್ಟೇ ಶಿಕ್ಷಣ ವ್ಯವಸ್ಥೆಯ ಪರೀಕ್ಷಾ ಸುಧಾರಣೆಯ ಆಶಯ ಸ್ವಲ್ಪವಾದರೂ ಸಾಕಾರಗೊಳ್ಳಲು ಸಾಧ್ಯ.