ಸುದ್ದಿ ಸಾಗರ

ಮಸೀದಿ ಸ್ಫೋಟ - ಹಿಂದೂ ಭಯೋತ್ಪಾದನೆ ಆರೋಪ; ಸಾಕ್ಷಾಧಾರವಿಲ್ಲದೆ ಅಸೀಮಾನಂದ ಖುಲಾಸೆ

2007ರ ಹೈದರಾಬಾದ್‌ನ ಮೆಕ್ಕಾ ಮಸೀದಿ ಸ್ಫೋಟ ಪ್ರಕರಣದ ತೀರ್ಪು ಹೊರಬಿದ್ದಿದೆ. ಹಿಂದೂ ಭಯೋತ್ಪಾದನೆಯ ಇರುವಿಕೆಗೆ ಸಾಕ್ಷಿಯಾದ ಪ್ರಕರಣದ ಪ್ರಮುಖ ಆರೋಪಿ ಸ್ವಾಮಿ ಅಸೀಮಾನಂದ ಸಾಕ್ಷಾಧಾರಗಳ ಕೊರತೆಯಿಂದ ಖುಲಾಸೆ ಗೊಂಡಿದ್ದಾನೆ

ಭಯೋತ್ಪಾದನೆಗೆ ಮತ್ತು ಭಯೋತ್ಪಾದಕರಿಗೆ ಧರ್ಮವಿಲ್ಲ. ಭಯೋತ್ಪಾದನೆಯೇ ಅವರ ಧರ್ಮ ಎಂಬ ಮಾತಿದೆ. ಆದರೆ ಜಾಗತಿಕವಾಗಿ ಇಸ್ಲಾಂ ಭಯೋತ್ಪಾದನೆಯ ಬಗ್ಗೆ ಚರ್ಚೆ ನಡೆಯುತ್ತಲೇ ಇರುತ್ತದೆ. ಇಡೀ ಭಯೋತ್ಪಾದನೆ ಚಟುವಟಿಕೆಯನ್ನು ಇಸ್ಲಾಂ ಧರ್ಮಕ್ಕೆ ಅಂಟಿಸುವ ಕೆಲಸಗಳೂ ವ್ಯವಸ್ಥಿತವಾಗಿ ನಡೆದುಕೊಂಡು ಬಂದಿದೆ.

ಇವೆಲ್ಲದರ ನಡುವೆಯೇ ಪ್ರಗತಿಪರ ಚಿಂತಕರು ‘ಹಿಂದೂ ಭಯೋತ್ಪಾದನೆ’ಯ ಬಗ್ಗೆ ದನಿಯೆತ್ತಿದ್ದರು. ಬಲಪಂಥೀಯ ಸಂಘಟನೆಗಳೂ ಭಯೋತ್ಪಾದನೆಯಲ್ಲಿ ತೊಡಗಿವೆ ಎಂಬ ಆರೋಪಗಳನ್ನು ಮಾಡಿದ್ದರು. ಅದಕ್ಕೆ ಸಾಕ್ಷಿಯಾಗಿ ನಿಂತ ಪ್ರಕರಣ, ಹೈದರಾಬಾದಿನ ಮೆಕ್ಕಾ ಮಸೀದಿ ಸ್ಫೋಟ ಪ್ರಕರಣ. ಅಲ್ಲಿಯ ವರೆಗೂ ಭಯೋತ್ಪಾದನೆಗೂ ಬಲಪಂಥೀಯ ಸಂಘಟನೆಗಳಿಗೂ ಯಾವುದೇ ಸಂಬಂಧವಿಲ್ಲ, ಎಡಪಂಥೀಯ ಸಂಘಟನೆಗಳು ಮತ್ತು ಬುದ್ಧಿ ಜೀವಿಗಳು ಸೃಷ್ಟಿಸಿರುವ ಸುಳ್ಳು ಕಲ್ಪನೆ ಎಂದು ಹಿಂದೂ ಭಯೋತ್ಪಾದನೆಯನ್ನು ಅಲ್ಲಗಳೆಯಲಾಗಿತ್ತು.

ಎಡಪಂಥೀಯ ಸಂಘಟನೆಗಳು ಮಾಡುತ್ತಿದ್ದ ಆರೋಪಕ್ಕೆ ಪ್ರಬಲ ಉದಾಹರಣೆಯಾಗಿ ಹೈದರಾಬಾದ್‌ ಸ್ಫೋಟ ಪ್ರಕರಣ ನಿಂತಿತ್ತು. ಜಾಗತಿಕ ಮಟ್ಟದಲ್ಲೂ ಈ ಬಗ್ಗೆ ವ್ಯಾಪಕ ಖಂಡನೆ ವ್ಯಕ್ತವಾಗಿದ್ದವು. ನಂತರ ಪ್ರಕರಣದ ಪ್ರಮುಖ ಆರೋಪಿ ಮತ್ತು ಅಭಿನವ ಭಾರತ್‌ನ ಸದಸ್ಯ ಸ್ವಾಮಿ ಅಸೀಮಾನಂದ ಬಂಧನಕ್ಕೊಳಗಾಗಿದ್ದ. ಅದಾದ ನಂತರ ಪ್ರಕರಣ ತೀವ್ರ ಕುತೂಹಲ ಪಡೆದಿತ್ತು. ಸೋಮವಾರ ಈ ಪ್ರಕರಣ ಸಂಬಂಧ ಹೈದರಾಬಾದ್‌ ರಾಷ್ಟ್ರೀಯ ತನಿಖಾ ತಂಡದ ವಿಶೇಷ ನ್ಯಾಯಾಲಯ ತೀರ್ಪು ನೀಡಿದ್ದು, ಸಾಕ್ಷಾಧಾರಗಳ ಕೊರತೆ ಹಿನ್ನೆಲೆಯಲ್ಲಿ ಅಸೀಮಾನಂದ ಸೇರಿದಂತೆ ಪ್ರಕರಣದ ಎಲ್ಲ ಆರೋಪಿಗಳು ಖುಲಾಸೆಯಾಗಿದ್ದಾರೆ.

ಪ್ರಕರಣದ ಆರೋಪಿಯಾದ ಸ್ವಾಮಿ ಅಸೀಮಾನಂದ ಅಲಿಯಾಸ್ ನಬ ಕುಮಾರ್ ಸರ್ಕಾರ್ ಸೇರಿದಂತೆ ಇತರರು ಮೊಕದ್ದಮೆಯಿಂದ ಖುಲಾಸೆಗೊಂಡಿದ್ದಾರೆ. ಈ ಮೂಲಕ ಹಿಂದೂ ಭಯೋತ್ಪಾದನೆಯ ಇರುವಿಕೆಗೆ ಸಾಕ್ಷಿಯಾಗಿದ್ದ ಪ್ರಕರಣಕ್ಕೆ ಅಂತಿಮ ತೆರೆ ಬಿದ್ದಿದೆ. ಹಿಂದೂ ಭಯೋತ್ಪಾದನೆಯನ್ನು ಸಾಭೀತುಪಡಿಸಲು ಎನ್‌ಐಎ ಸೋತಿದೆ.

ಏನಿದು ಪ್ರಕರಣ?:

ಅದು 2007ರ ಮೇ 18. ಹೈದ್ರಾಬಾದ್‌ನ ಜನ ನಿಬಿಡ ಪ್ರದೇಶವಾದ ಮೆಕ್ಕಾ ಮಸೀದಿಯಲ್ಲಿ ಎಂದಿನಂತೆ ನೂರಾರು ಮಂದಿ ಸೇರಿದ್ದರು. ಅದು ಶುಕ್ರವಾರವಾದ್ದರಿಂದ ಹೆಚ್ಚಿನ ಜನ ಪ್ರಾರ್ಥನೆಗೆ ನೆರೆದಿದ್ದರು. ಎಂದಿನ ದಿನಕ್ಕಿಂತಲೂ ದೊಡ್ಡ ಮಟ್ಟದಲ್ಲಿ ಮುಸಲ್ಮಾನರು ಶುಕ್ರವಾರ ಮಸೀದಿಗೆ ಪ್ರಾರ್ಥನೆಗೆ ಹೋಗುತ್ತಾರೆ. ಇದ್ದಕ್ಕಿದ್ದಂತೆ ಮಸೀದಿಯೊಳಗೆ ನೂರು ಸಿಡಿಲು ಹೊಡೆದಷ್ಟು ದೊಡ್ಡ ಶಬ್ಧ ಕೇಳಿಬಂದಿತ್ತು. ಏನಾಯಿತು ಎಂದು ಅರಿಯುವ ಮುನ್ನವೇ 9 ಮಂದಿ ಮೃತಪಟ್ಟಿದ್ದರು. ಜತೆಗೆ 58 ಮಂದಿ ಗಾಯಾಳುಗಳಾಗಿದ್ದರು. ಬಾಂಬ್‌ ಸ್ಫೋಟದ ಬಗ್ಗೆ ಅರಿವೇ ಇಲ್ಲದ ಮತ್ತು ಧರ್ಮ ರಾಜಕಾರಣದ ಕುರುಹೂ ಗೊತ್ತಿಲ್ಲದ ಅಮಾಯಕ ವ್ಯಕ್ತಿಗಳು ಹೀಗೆ ದುರಂತ ಅಂತ್ಯ ಕಂಡಿದ್ದರು.

ನಂತರದಲ್ಲಿ ನಡೆದಿದ್ದ ಹೋರಾಟಗಳಲ್ಲಿ ಮುಷ್ಕರ ನಿರತ 5 ಮಂದಿ ಪೊಲೀಸರ ಗುಂಡೇಟಿಗೆ ಬಲಿಯಾಗಿದ್ದರು. ಪ್ರಕರಣದ ತನಿಖೆಯನ್ನು ಸ್ಥಳೀಯ ಪೊಲೀಸರು ಆರಂಭಿಸಿದ್ದರು. ನಂತರದ ದಿನಗಳಲ್ಲಿ ಸಿಬಿಐ ಪ್ರಕರಣದ ತನಿಖೆಯನ್ನು ವಹಿಸಿಕೊಂಡಿತ್ತು. ಅದಾಗಿ ಕೆಲ ವರ್ಷಗಳ ನಂತರ ರಾಷ್ಟ್ರೀಯ ತನಿಖಾ ದಳ ತನಿಖೆಯನ್ನು ಕೈಗೆತ್ತಿಕೊಂಡಿತ್ತು. 2011ರಲ್ಲಿ ಸ್ಪೋಟ ಕುರಿತಾದ ವಿಚಾರಣೆ ಆರಂಭವಾಗಿತ್ತು. 2013ರ ವೇಳೆಗೆ ರಾಷ್ಟ್ರೀಯ ತನಿಖಾ ದಳ ಮೂರು ದೋಷಾರೋಪ ಪಟ್ಟಿಗಳನ್ನು ನ್ಯಾಯಾಲಯಕ್ಕೆ ಸಲ್ಲಿಸಿತ್ತು. ವಿಚಾರಣೆಯ ವೇಳೆಯಲ್ಲಿ ಸ್ಟೋಟಕ್ಕೆ ಸಂಬಂಧಿಸಿದ 226 ಸಾಕ್ಷಾಧಾರಗಳನ್ನು ಮತ್ತು 411 ದಾಖಲೆಗಳನ್ನು ನ್ಯಾಯಾಲಯಕ್ಕೆ ಸಲ್ಲಿಸಲಾಗಿತ್ತು.

2007ರ ಅಜ್ಮೀರ್ ಶರೀಫ್ ದರ್ಗಾ ಸ್ಟೋಟದಿಂದ ಮೊದಲುಗೊಂಡು 2008 ಮಾಲೆಗಾಂವ್ ಬಾಂಬ್ ಸ್ಟೋಟ ಮತ್ತು ಸಂಜೋತಾ ಎಕ್ಸ್‌ಪ್ರೆಸ್‌ ದಾಳಿಯವರೆಗೂ ಈ ಕೃತ್ಯ ಮುಂದುವರೆದಿತ್ತು. ತನಿಖೆಯ ವೇಳೆ ಈ ಅಂಶ ಬಹಿರಂಗಗೊಂಡಿತ್ತು.

2010ರ ಜೂನ್‌ ತಿಂಗಳಿನಲ್ಲಿ ಆರ್‌ಎಸ್‌ಎಸ್‌ ಕಾರ್ಯಕರ್ತ ಸುನಿಲ್ ಜೋಶಿಯನ್ನು ಆರೋಪಿ ಎಂದು ತನಿಖಾದಳ ಹೆಸರಿಸಿತ್ತು. 2010ರ ನವೆಂಬರ್ 19ರಂದು ಹಿಂದೂ ಸಂಘಟನೆ ಅಭಿನವ್ ಭಾರತ್‌ನ ಸದಸ್ಯ ಅಸೀಮಾನಂದನನ್ನು ಸಿಬಿಐ ಬಂದಿಸಿತ್ತು.

2010ರಲ್ಲಿ ದೇವೇಂದರ್ ಗುಪ್ತಾ ಮತ್ತು ಲೋಕೇಶ್ ಶರ್ಮಾ ಸೇರಿದಂತೆ ಇತರ ಆರೋಪಿಗಳು ಸಿಬಿಐನಿಂದ ಬಂಧನಕ್ಕೆ ಒಳಪಟ್ಟಿದ್ದರು. 2010ರ ಡಿಸೆಂಬರ್ 18ರಂದು ನ್ಯಾಯಾಲಯಕ್ಕೆ ಸ್ಟೋಟದಲ್ಲಿ ಪಾಲ್ಗೊಂಡಿದ್ದ ಎಂಬ ಆರೋಪದ ಮೇಲೆ ಅಸೀಮಾನಂದನನ್ನು ನ್ಯಾಯಾಲಯಕ್ಕೆ ಒಪ್ಪಿಸಲಾಗಿತ್ತು. 2011ರ ಏಪ್ರಿಲ್ ತಿಂಗಳಿನಲ್ಲಿ ಸಿಬಿಐನ ಕೈನಲ್ಲಿದ್ದ ಮೊಖದ್ದಮೆಯನ್ನು ರಾಷ್ಟ್ರೀಯ ತನಿಖಾ ಏಜೆನ್ಸಿ(NIA)ಗೆ ವರ್ಗಾಯಿಸಲಾಗಿತ್ತು.

ಅಂತಿಮವಾಗಿ ಬಲಪಂಥೀಯ ಸಂಘಟನೆಗೆ ಸೇರಿದ 10 ಕಾರ್ಯಕರ್ತರನ್ನು ಪ್ರಕರಣದ ಆರೋಪಿಗಳು ಎಂದು ಹೆಸರಿಸಲಾಗಿತ್ತು. 10 ಜನರಲ್ಲಿ ದೇವೇಂದ್ರ ಗುಪ್ತಾ, ಲೋಕೇಶ್ ಶರ್ಮಾ. ಸ್ವಾಮಿ ಅಸೀಮಾನಂದ ಅಲಿಯಾಸ್ ನಬ ಕುಮಾರ್ ಸರ್ಕಾರ್, ಭಾರತ್ ಮೋಹನಾಲ್ ರತ್ನೇಶ್ವರ್ ಅಲಿಯಾಸ್ ಭರತ್ ಬಾತಿ ಮತ್ತು ರಾಜೇಂದ್ರ ಚೌಧರಿ ಬಂಧನಕ್ಕೆ ಒಳಪಟ್ಟಿದ್ದರು.

ಇದೇ ಸಂದರ್ಭದಲ್ಲಿ 2017ರ ಮಾರ್ಚ್ 23ರಂದು ಹೈದ್ರಾಬಾದ್ ನ್ಯಾಯಾಲಯ ಏಳು ವರ್ಷಗಳಿಂದ ಜೈಲಿನಲ್ಲಿದ ಅಸೀಮಾನಂದನಿಗೆ ಜಾಮೀನು ನೀಡಿತ್ತು. 2017ರ ಮಾರ್ಚ್‌ 31ರಂದು ಚಂಚಲ್‌ಗಡ ಜೈಲಿನಿಂದ ಅಸೀಮಾನಂದನ ಬಿಡುಗಡೆಗೊಂಡಿದ್ದ.

ಕೊನೆಯದಾಗಿ 2018ರ ಏಪ್ರಿಲ್‌ 16ರಂದು ಹೈದರಾಬಾದ್‌ನ ವಿಶೇಷ ನ್ಯಾಯಲಯ ತನ್ನ ಅಂತಿಮ ತೀರ್ಪನ್ನು ಪ್ರಕಟಿಸಿದೆ. ಪ್ರಕರಣಕ್ಕೆ ಸಂಬಂಧಿಸಿದ ಆರೋಪಿಗಳ ಕುರಿತಾಗಿ ಯಾವುದೇ ದೃಢವಾಗ ಸಾಕ್ಷಿಗಳು ದೊರೆಯದಿದ್ದರಿಂದ ಮೊಖದ್ದಮೆಯನ್ನು ಖುಲಾಸೆಗೊಳಿಸಿದೆ.

ಏನಿದು ಅಭಿನವ ಭಾರತ್‌?:

‘ಅಭಿನವ ಭಾರತ್‌’ ಮಹಾರಾಷ್ಟ್ರದ ಮುಂಬೈ ಮೂಲದ ಒಂದು ಟ್ರಸ್ಟ್‌. 2002ರಲ್ಲಿ ಈ ಟ್ರಸ್ಟ್‌ ಅಧಿಕೃತವಾಗಿ ಚಾಲನೆಗೆ ಬಂದಿದ್ದು, ಮಹಾರಾಷ್ಟ್ರ ಬ್ಯಾಂಕ್‌ ಜತೆ ನೇರ ಸಂಪರ್ಕವನ್ನು ಹೊಂದಿದೆ. ಭಾರತ ಸ್ವತಂತ್ರ ಸಂಗ್ರಾಮದಲ್ಲಿ ಮಡಿದವರ ಮತ್ತು ಹೋರಾಡಿದವರ ಬಗ್ಗೆ ಪ್ರಚಾರ ಮಾಡುವುದು, ಸ್ವತಂತ್ರ ಹೋರಾಟಗಾರರ ತ್ಯಾಗ - ಬಲಿದಾನಗಳ ಬಗ್ಗೆ ಜನಜಾಗೃತಿ ಮೂಡಿಸುವ ಕೆಲಸ ಮಾಡುತ್ತಿರುವುದಾಗಿ ಟ್ರಸ್ಟ್‌ ಹೇಳಿಕೊಂಡಿದೆ. ಆದರೆ ಬಲಪಂಥೀಯ ಚಿಂತನೆಗಳನ್ನು ಹೊಂದಿರುವ ಟ್ರಸ್ಟ್‌ ಸಂಘ ಪರಿವಾರದ ಜತೆ ನಂಟು ಹೊಂದಿರುವ ಬಗ್ಗೆ ಆರೋಪವಿದೆ.

ಸತತ 11 ವರ್ಷಗಳ ಸುದೀರ್ಘ ತನಿಖೆಯನ್ನು ನಡೆಸಿದ್ದರೂ ಕೂಡ ತನಿಖಾ ದಳಗಳಿಗೆ ಸಮರ್ಪಕ ಸಾಕ್ಷ್ಯಾಧಾರಗಳನ್ನು ಕಲೆ ಹಾಕಲು ಸಾಧ್ಯವಾಗಿಲ್ಲ. ಸರ್ವಧರ್ಮ ಸಮನ್ವಯ ದೇಶ ಎನಿಸಿಕೊಳ್ಳುವ ಭಾರತದಲ್ಲಿ ಧಾರ್ಮಿಕ ಭಯೋತ್ಪಾದನೆಗೆ ಯಾವುದೇ ಅಂಕುಶವಿಲ್ಲದಂತಾಗಿದೆ. ಹಿಂಸಾ ಕೃತ್ಯಗಳು ಯಾವುದೇ ಸಾಕ್ಷಿಗಳಿಲ್ಲದೆ ಖುಲಾಸೆಗೊಳ್ಳುತ್ತಿವೆ ಎಂಬ ಮಾತುಗಳೂ ತೀರ್ಪಿನ ಬೆನ್ನಲ್ಲೇ ಪ್ರಗತಿಪರ ವಲಯದಲ್ಲಿ ಕೇಳಿ ಬಂದಿದೆ.

ಧಾರ್ಮಿಕ ಭಯೋತ್ಪಾದನೆ, ಹಿಂದೂ - ಮುಸ್ಲಿಂ ಕೋಮು ದ್ವೇಷ, ಇವೆಲ್ಲದರಾಚೆಗೆ ತುತ್ತು ಊಟಕ್ಕಾಗಿ ಪರದಾಡುತ್ತಿರುವ ಅಮಾಯಕ ಜನತೆ ಒಂದಿದೆ. ಸಮಾಜದ ಕಟ್ಟಕಡೆಯ ವ್ಯಕ್ತಿಗೆ, ಜಾತಿ, ಧರ್ಮ, ಕೋಮು, ಪಂಥಗಳಿಂದ ಸಿಗುವುದೇನು ಇಲ್ಲ. ಭಯೋತ್ಪಾದಕ ಕೃತ್ಯಗಳಿಂದ ಅಮಾಯಕರು ಸಾವಿಗೀಡಾಗುತ್ತಿದ್ದಾರೆ ಎಂಬುದು ಸಾರ್ವತ್ರಿಕ ಸತ್ಯ. ಕೋಮು ದ್ವೇಷಗಳನ್ನು ಮರೆತು ಮಾನವೀಯತೆಯತ್ತ ಹೆಜ್ಜೆ ಹಾಕುವ ದಿನಗಳತ್ತ ಚಿತ್ತ ಹರಿಸುವ ಅಗತ್ಯತೆಯಿದೆ.