ಅನಾಣ್ಯೀಕರಣ ಘೋಷಣೆಗೂ ಮುಂಚೆ & ನಂತರ: ಅನುಮಾನಕ್ಕೆ ಎಡೆಮಾಡಿಕೊಟ್ಟ 5 ಲಕ್ಷ ಕೋಟಿ!
ಸುದ್ದಿ ಸಾಗರ

ಅನಾಣ್ಯೀಕರಣ ಘೋಷಣೆಗೂ ಮುಂಚೆ & ನಂತರ: ಅನುಮಾನಕ್ಕೆ ಎಡೆಮಾಡಿಕೊಟ್ಟ 5 ಲಕ್ಷ ಕೋಟಿ!

‘ಅನಾಣ್ಯೀಕರಣ’

ಅಥವಾ ನೋಟು ಬದಲಾವಣೆ ಪ್ರಕ್ರಿಯೆ ನಂತರ ದೇಶಾದ್ಯಂತ ಬ್ಯಾಂಕುಗಳಲ್ಲಿ ಜಮೆಯಾದ ಒಟ್ಟು ಹಣದ ಲೆಕ್ಕ ಶನಿವಾರದ ಅಂತ್ಯಕ್ಕೆ ಸಿಕ್ಕಿದೆ. ಇಲ್ಲೀವರೆಗೆ ಒಟ್ಟು ₹5 ಲಕ್ಷ ಕೋಟಿ ಹಣ ಬ್ಯಾಂಕುಗಳಲ್ಲಿ ಜಮೆಯಾಗಿದೆ ಖುದ್ದು ಪ್ರಧಾನಿ ನರೇಂದ್ರ ಮೋದಿ ತಿಳಿಸಿದ್ದಾರೆ. ಆದರೆ ಅನಾಣ್ಯೀಕರಣ ಘೋಷಣೆಗೂ ಸ್ವಲ್ಪ ಮುಂಚೆ, ಸೆಪ್ಟೆಂಬರ್ ತಿಂಗಳಲ್ಲಿ ಬರೋಬ್ಬರಿ ₹5.98 ಲಕ್ಷ ಕೋಟಿ ಹಣ ಬ್ಯಾಂಕುಗಳಿಗೆ ಹರಿದು ಬಂದಿದೆ. ಇದು ಕಳೆದ 2 ವರ್ಷಗಳಲ್ಲೇ ಬ್ಯಾಂಕಿನಲ್ಲಿ ಜಮೆಯಾದ ಅತೀ ದೊಡ್ಡ ಮೊತ್ತವಾಗಿತ್ತು. ಈ ಎರಡೂ ಅಂಕಿಅಂಶಗಳು ಒಟ್ಟಾರೆ ಪ್ರಕ್ರಿಯೆ ಬಗ್ಗೆಯೇ ಅನುಮಾನಗಳು ಹುಟ್ಟುವಂತೆ ಮಾಡಿವೆ.

ಭಾನುವಾರದ ಭಾಷಣದಲ್ಲಿ ಮೋದಿ ಅನಾಣ್ಯೀಕರಣದ ಯಶಸ್ಸಿನ ಬಗ್ಗೆ ಮಾತನಾಡಿದ್ದು, "ನವೆಂಬರ್ 19ರ ಅಂತ್ಯಕ್ಕೆ ₹5 ಲಕ್ಷ ಕೋಟಿ ಹಣ ಬ್ಯಾಂಕಿಗೆ ಬಂದು ಬಿದ್ದಿದೆ" ಎಂಬ ಮಾಹಿತಿ ನೀಡಿದ್ದಾರೆ. ಇದು ನವೆಂಬರ್ 8 ರಿಂದ ₹500 ಮತ್ತು ₹1000 ಮುಖಬೆಲೆಯ ನೋಟುಗಳು ನಿಷೇಧಿಸಲ್ಪಟ್ಟ ನಂತರದ 11 ದಿನಗಳಲ್ಲಿ ಬ್ಯಾಂಕುಗಳಲ್ಲಿ ದೇಶವಾಸಿಗಳು ಠೇವಣಿ ಇಟ್ಟ ಮೊತ್ತವಾಗಿದೆ.

ಆದರೆ ‘ಅನಾಣ್ಯೀಕರಣ’ದಂಥ ಯಾವ ಪ್ರೇರಣೆಗಳು ಇಲ್ಲದಿದ್ದಾಗ್ಯೂ ಸೆಪ್ಟೆಂಬರ್ ತಿಂಗಳಲ್ಲಿ ಜನ ಬರೋಬ್ಬರಿ ₹5.98 ಕೋಟಿ ಹಣವನ್ನು ಬ್ಯಾಂಕಿಗೆ ಜಮೆ ಮಾಡಿದ್ದಾರೆ; ಸಹಜವಾಗಿಯೇ ಇದು ಅಚ್ಚರಿ ಹುಟ್ಟಿಸುತ್ತದೆ. ಜತೆಗೆ, ನೋಟು ಬದಲಾವಣೆ ನಂತರ ಕಪ್ಪು ಹಣ ಅಗಾಧ ಪ್ರಮಾಣದಲ್ಲಿ ಬ್ಯಾಂಕುಗಳಿಗೆ ಹರಿದು ಬರಬಹುದು ಎಂಬ ನಂಬಿಕೆಯನ್ನು ಸುಳ್ಳಾಗಿಸಿದೆ.

ಅನಾಣ್ಯೀಕರಣ ‘ಹಗರಣ’:

ಈ ಹಿಂದೆ ನರೇಂದ್ರ ಮೋದಿ ಸರಕಾರದ ಅನಾಣ್ಯೀಕರಣ ಒಂದು ದೊಡ್ಡ ಹಗರಣ ಎಂದು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಆರೋಪ ಮಾಡಿದ್ದರು. ಮೋದಿ ತಮ್ಮ ಗೆಳೆಯರು ಮತ್ತು ಬಿಜೆಪಿ ಸಹವರ್ತಿಗಳಿಗೆ, ತಮಗೆ ಬೇಕಾದವರಿಗೆ ಮೊದಲೇ ಮಾಹಿತಿ ನೀಡಿದ್ದರು ಎಂದು ದೂರಿದ್ದರು. ಇದಕ್ಕೆ ಪೂರಕ ಎಂಬಂತೆ ರಾಜಸ್ಥಾನದ ಬಿಜೆಪಿ ಶಾಸಕರೊಬ್ಬರು ಅನಾಣ್ಯೀಕರಣ ಅಂಬಾನಿ ಮತ್ತು ಅದಾನಿಗೆ ಮೊದಲೇ ಗೊತ್ತಿತ್ತು ಎಂದು ಹೇಳಿದ್ದೂ ವರದಿಯಾಗಿತ್ತು.

ಅನಾಣ್ಯೀಕರಣಕ್ಕೂ ಸ್ವಲ್ಪವೇ ಮೊದಲು ಪಶ್ಚಿಮ ಬಂಗಾಳ ಬಿಜೆಪಿ ಘಟಕ 3 ಕೋಟಿ ಹಣ ಬ್ಯಾಂಕಿನಲ್ಲಿ ಠೇವಣಿ ಮಾಡಿದ್ದೂ ಚರ್ಚೆಗೆ ಗ್ರಾಸವಾಗಿತ್ತು. ಮೋದಿ ಅನಾಣ್ಯೀಕರಣದ ಘೋಷಣೆ ಮಾಡಿದ ದಿನವೇ ₹500, ₹1000 ಮುಖಬೆಲೆಯ ನೋಟುಗಳ ಕಟ್ಟುಗಳನ್ನು ತಂದು ಬ್ಯಾಂಕಿಗೆ ಜಮೆ ಮಾಡಿದ್ದರ ಬಗ್ಗೆ ಅಪಸ್ವರಗಳು ಕೇಳಿ ಬಂದಿದ್ದವು.

ಈ ಎಲ್ಲಾ ಘಟನೆಗಳು ಅನಾಣ್ಯೀಕರಣದ ಹಿಂದೆ ಇನ್ನೇನೋ ನಡೆದಿರುವುದರ ಮುನ್ಸೂಚನೆಯನ್ನಂತೂ ನೀಡಿವೆ.

ಬ್ಯಾಂಕುಗಳಿಗೆ ‘ದುಡ್ಡಿನ ಮಳೆ’:

ಪ್ರಧಾನಿ ನರೇಂದ್ರ ಮೋದಿ ನೋಟು ನಿಷೇಧ ಮಾಡುವ ಮೊದಲು, ಸೆಪ್ಟೆಂಬರ್ ತಿಂಗಳಲ್ಲಿ ಬ್ಯಾಂಕುಗಳಿಗೆ ಎಂದಿಗಿಂತ ಹೆಚ್ಚಿನ ಹಣ ಹರಿದು ಬಂದಿದೆ. ಒಟ್ಟು ₹5.98 ಲಕ್ಷ ಕೋಟಿ ಹಣ ಬ್ಯಾಂಕಿನಲ್ಲಿ ಜಮೆಯಾಗಿದ್ದು, ಕಳೆದ ಎರಡು ವರ್ಷಗಳಲ್ಲೇ ಇಷ್ಟೊಂದು ದೊಡ್ಡ ಮೊತ್ತ ಹಿಂದೆ ಯಾವತ್ತೂ ಬ್ಯಾಂಕಿಗೆ ಜಮೆಯಾಗಿಲ್ಲ. ಆರ್ಬಿಐ ದಾಖಲೆಗಳಲ್ಲಿ ಇವೆಲ್ಲಾ ನಮೂದಾಗಿವೆ.

ಸೆಪ್ಟೆಂಬರ್ ತಿಂಗಳಲ್ಲಿ ಬರೋಬ್ಬರಿ ಹಣ ಹರಿದು ಬರುವುದರೊಂದಿಗೆ, ಬ್ಯಾಂಕುಗಳಲ್ಲಿ ಜಮೆಯಾದ ಒಟ್ಟು ಮೊತ್ತ ₹1,02,08,290 ಕೋಟಿಗೆ ಏರಿಕೆಯಾಗಿದೆ. ಒಟ್ಟಾರೆ ಠೇವಣಿ ಶೇಕಡಾ 13.46ರಷ್ಟು ಹೆಚ್ಚಾಗಿದ್ದು, ಎಂದಿಗಿಂತ ತೀರಾ ಜಾಸ್ತಿಯಾಗಿದೆ.

ಇನ್ನು ಬ್ಯಾಂಕುಗಳೂ ತಮ್ಮ ತಮ್ಮ ತ್ರೈಮಾಸಿಕ ಠೇವಣಿಗಳ ಮಾಹಿತಿ ಬಿಡುಗಡೆ ಮಾಡಿದ್ದು, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಠೇವಣಿ ಮೊದಲ ತ್ರೈಮಾಸಿಕದಿಂದ ಎರಡನೇ ತ್ರೈಮಾಸಿಕಕ್ಕೆ ₹3 ಲಕ್ಷ ಕೋಟಿಯಿಂದ ₹4.3 ಲಕ್ಷ ಕೋಟಿಗೆ ಏರಿಕೆಯಾಗಿದೆ. ಅದೇ ರೀತಿ ಯೂನಿಯನ್ ಬ್ಯಾಂಕ್ ₹-1.2 ಲಕ್ಷ ಕೋಟಿಯಿಂದ ₹6.7 ಲಕ್ಷ ಕೋಟಿ, ಪಂಜಾಂಬ್ ನ್ಯಾಷನಲ್ ಬ್ಯಾಂಕ್ ₹0.2 ಲಕ್ಷ ಕೋಟಿಯಿಂದ ₹3.8 ಲಕ್ಷ ಕೋಟಿ, ಬ್ಯಾಂಕ್ ಆಫ್ ಇಂಡಿಯಾ ₹-2.9 ಲಕ್ಷ ಕೋಟಿಯಿಂದ ₹1.5 ಲಕ್ಷ ಕೋಟಿ, ಬ್ಯಾಂಕ್ ಆಫ್ ಬರೋಡ ₹-2.1 ಲಕ್ಷ ಕೋಟಿಯಿಂದ ₹1 ಲಕ್ಷ ಕೋಟಿಗೆ ಏರಿಕೆಯಾಗಿದೆ. ಹೀಗೆ ದೊಡ್ಡ ಮೊತ್ತದಲ್ಲಿ ಲಕ್ಷ ಲಕ್ಷ ಕೋಟಿ ಹಣ ಅನಾಣ್ಯೀಕರಣಕ್ಕೂ ಸ್ವಲ್ಪವೇ ಮೊದಲು ಬ್ಯಾಂಕಿಗೆ ಹರಿದು ಬಂದಿದೆ.

ಅನಾಣ್ಯೀಕರಣಕ್ಕೆ ಮೊದಲು ನಡೆದ ಈ ಅಚ್ಚರಿಯ ಬೆಳವಣಿಗೆಗೆ ಕೇಂದ್ರ ಹಣಕಾಸು ಸಚಿವ ಅರುಣ್ ಜೇಟ್ಲಿ ಉತ್ತರ ನೀಡಿದ್ದಾರೆ. 7ನೇ ವೇತನ ಆಯೋಗದಿಂದ ಹಣ ಹೆಚ್ಚುವರಿ ಬಿಡುಗಡೆಯಾಗಿತ್ತು. ಹಾಗಾಗಿ ಬ್ಯಾಂಕುಗಳಲ್ಲಿ ಠೇವಣಿ ರೂಪದಲ್ಲಿ ಬಂದು ಶೇಖರವಾಗಿದೆ ಎಂದಿದ್ದಾರೆ.

ಆದರೆ ಜೇಟ್ಲಿ ವಾದವನ್ನು ಕೆಲವು ಹಣಕಾಸು ತಜ್ಞರು ತಳ್ಳಿ ಹಾಕಿದ್ದಾರೆ. ಏಳನೇ ವೇತನ ಆಯೋಗದ ಹಣ ಎಂದುಕೊಂಡರೂ ‘ಹಣದ ಮೊತ್ತ ಅಚ್ಚರಿ’ ಹುಟ್ಟಿಸುತ್ತದೆ ಎಂದಿದ್ದಾರೆ ಇಂಡಿಯಾ ರೇಟಿಂಗ್ಸ್ ಹಣಕಾಸು ತಜ್ಞ ಡಿ. ಕೆ. ಪಂತ್.

ಹೀಗೆ ಅನಾಣ್ಯೀಕರಣಕ್ಕೂ ಮೊದಲು ನಡೆದ ಈ ‘ಠೇವಣಿ’ಯ ಬೆಳವಣಿಗೆಗಳು ಪ್ರಶ್ನೆಗಳನ್ನು ಹುಟ್ಟು ಹಾಕಿದ್ದು, ಸ್ಪಷ್ಟ ಉತ್ತರಕ್ಕೆ ಇನ್ನು ಕೆಲವು ದಿನಗಳ ಕಾಲಾವಕಾಶ ಬೇಕಿದೆ.

ಚಿಲ್ಲರೆ ಸಮಸ್ಯೆ:

ದೇಶಾದ್ಯಂತ ಚಿಲ್ಲರೆ ಸಮಸ್ಯೆ ಮುಂದುವರಿದಿದೆ. ನೋಟು ಬದಲಾವಣೆ ಪ್ರಕ್ರಿಯೆ ಘೋಷಣೆಯಾಗಿ 13 ದಿನ ಕಳೆಯುವ ಹೊತ್ತಿಗೆ 2 ಸಾವಿರ ಮುಖಬೆಲೆಯ ನೋಟುಗಳು ಚಲಾವಣೆಗೆ ಬಂದಿವೆ. ಆದರೆ, ಇದಕ್ಕೆ ಚಿಲ್ಲರೆಗಳು ಸಿಗದ ಹಿನ್ನೆಲೆಯಲ್ಲಿ ಒಟ್ಟಾರೆ ಉದ್ಯಮ ಇಳಿಮುಖವಾಗಿದೆ. ಚಿಲ್ಲರೆ ವ್ಯಾಪಾರಿಗಳು, ಸಣ್ಣ ಉದ್ಯಮಿಗಳ ಪರಿಪಾಟಲು ಮುಂದುವರಿದಿದೆ.