samachara
www.samachara.com
7 ವರ್ಷದಲ್ಲಿ 888 ಯೋಧರ ಆತ್ಮಹತ್ಯೆ; ಸೈನ್ಯದಲ್ಲಿ ಕಾಲಾಳುಗಳೇಕೆ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ?
ದೇಶ

7 ವರ್ಷದಲ್ಲಿ 888 ಯೋಧರ ಆತ್ಮಹತ್ಯೆ; ಸೈನ್ಯದಲ್ಲಿ ಕಾಲಾಳುಗಳೇಕೆ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ?

ಭಾರತದ ಸೈನ್ಯದಲ್ಲಿ ಕಳೆದ 7 ವರ್ಷಗಳ ಅವಧಿಯಲ್ಲಿ ಭೂಸೇನೆಯ 704, ವಾಯುಸೇನೆಯ148 ಮತ್ತು ನೌಕಾಸೇನೆಯ 36 ಮಂದಿ ಸಾಮಾನ್ಯ ಸೈನಿಕರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಭಾರತೀಯ ಸೇನೆಯಲ್ಲಿ 2011ರಿಂದ 2018ರವರೆಗಿನ ಅವಧಿಯಲ್ಲಿ 888 ಮಂದಿ ಸೈನಿಕರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಆತ್ಮಹತ್ಯೆಗಳ ಪ್ರಮಾಣ ಭೂಸೇನೆಯಲ್ಲೇ ಹೆಚ್ಚಾಗಿದೆ. ಈ 7 ವರ್ಷಗಳ ಅವಧಿಯಲ್ಲಿ ಭೂಸೇನೆಯಲ್ಲಿ 704, ವಾಯುಸೇನೆಯಲ್ಲಿ 148 ಮತ್ತು ನೌಕಾಸೇನೆಯಲ್ಲಿ 36 ಮಂದಿ ಸೈನಿಕರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಕೇಂದ್ರ ಗೃಹ ಇಲಾಖೆ ಸಂಸತ್ತಿನಲ್ಲಿ ಮಂಡಿಸಿರುವ ವರದಿಯಿಂದ ಈ ಅಂಶ ಬಹಿರಂಗವಾಗಿದೆ. 2011ರಲ್ಲಿ ಅತಿ ಹೆಚ್ಚು ಸೈನಿಕರು ಅಂದರೆ 105 ಮಂದಿ ಆತ್ಮಹತ್ಯೆಗೆ ಶರಣಾಗಿದ್ದರು. 2016ರಲ್ಲಿ 101 ಮಂದಿ ಹಾಗೂ ಕಳೆದ ವರ್ಷ 80 ಮಂದಿ ಸೈನಿಕರು ಆತ್ಮಹತ್ಯೆ ಮಾಡಿಕೊಂಡು ಪ್ರಾಣ ಬಿಟ್ಟಿದ್ದಾರೆ. ಭೂಸೇನೆ, ವಾಯುಸೇನೆ ಮತ್ತು ನೌಕಾಸೇನೆಯಿಂದ ಪ್ರತಿ ವರ್ಷ ಸರಾಸರಿ 111 ಮಂದಿ ಸೈನಿಕರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ.

ಸೇನಾ ಪಡೆಗಳಲ್ಲಿ ಮಾತ್ರವಲ್ಲದೆ ಕೇಂದ್ರೀಯ ಸಶಸ್ತ್ರ ಪೊಲೀಸ್‌ ಪಡೆ (ಸಿಎಪಿಎಫ್‌) ಮತ್ತು ಅಸ್ಸಾಂ ರೈಫಲ್ಸ್‌ನಲ್ಲೂ ಆತ್ಮಹತ್ಯೆ ಪ್ರಮಾಣ ಹೆಚ್ಚಾಗಿದೆ ಎಂಬುದನ್ನು ಸರಕಾರ ಗುರುತಿಸಿದೆ. ಸಿಎಪಿಎಫ್‌ನಲ್ಲಿ 2012 ಮತ್ತು 2013ರ ನಡುವಿನ ಅವಧಿಯಲ್ಲಿ 149 ಮಂದಿ ಸಿಎಪಿಎಫ್‌ ಯೋಧರು ಹಾಗೂ 134 ಮಂದಿ ಗಡಿ ಭದ್ರತಾ ಪಡೆಯ (ಬಿಎಸ್ಎಫ್‌) ಯೋಧರು ಆತ್ಮಹತ್ಯೆ ಮಾಡಿಕೊಂಡು ಮೃತಪಟ್ಟಿದ್ದಾರೆ.

ಕಳೆದ ನಾಲ್ಕು ವರ್ಷಗಳ ಅವಧಿಯಲ್ಲಿ ಕೇಂದ್ರೀಯ ಕೈಗಾರಿಕಾ ಭದ್ರತಾ ಪಡೆಯ 56 ಯೋಧರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇಂಡೋ ಟಿಬೆಟಿಯನ್‌ ಗಡಿ ಪೊಲೀಸ್‌ (ಐಟಿಬಿಪಿ) ಮತ್ತು ಸಶಸ್ತ್ರ ಸೀಮಾ ಬಲ (ಎಸ್‌ಎಸ್‌ಬಿ) ಪಡೆಗಳಲ್ಲಿ ಒಟ್ಟು 25 ಮಂದಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಅಸ್ಸಾಂ ರೈಫಲ್ಸ್‌ನಲ್ಲಿ 30 ಮಂದಿ ಸೈನಿಕರು ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ಆತ್ಮಹತ್ಯೆ ಮಾಡಿಕೊಂಡಿರುವುದು ಸಾಮಾನ್ಯ ಸೈನಿಕರೇ ಹೊರತು ಗೆಜೆಟೆಡ್‌ ಆಫೀಸರ್‌, ಜೂನಿಯರ್‌ ಕಮಾಂಡಿಂಗ್‌ ಆಫೀಸರ್‌ ಅಥವಾ ಉನ್ನತ ಮಟ್ಟದ ಅಧಿಕಾರಿಗಳಲ್ಲ. ಆತ್ಮಹತ್ಯೆ ಮಾಡಿಕೊಂಡವರ ಪೈಕಿ ಹೆಚ್ಚಿನವರು ತಮಿಳುನಾಡು ಮತ್ತು ಮಹಾರಾಷ್ಟ್ರದ ಸೈನಿಕರು.

ವಿಶ್ರಾಂತಿ ಸಮಯದಲ್ಲಿ ಸೇನೆಯ ಯೋಧರು. 
ವಿಶ್ರಾಂತಿ ಸಮಯದಲ್ಲಿ ಸೇನೆಯ ಯೋಧರು. 
ಚಿತ್ರಕೃಪೆ: ಬಿಬಿಸಿ

ಸರಕಾರಕ್ಕೆ ಸೈನಿಕರ ಮಾನಸಿಕ ಆರೋಗ್ಯದ ಕಾಳಜಿ ಇದೆಯೇ?

ದೀರ್ಘ ಅವಧಿಗೆ ಕರ್ತವ್ಯಕ್ಕೆ ನಿಯೋಜನೆ ಸೈನಿಕರ ಆತ್ಮಹತ್ಯೆಗೆ ಪ್ರಮುಖ ಕಾರಣ ಎಂದು ಕೇಂದ್ರ ಗೃಹ ಇಲಾಖೆ ಹೇಳಿದೆ. ಇದರ ಜತೆಗೆ ಕೌಟುಂಬಿಕ ಸಮಸ್ಯೆಗಳು, ಸಂಸಾರ ತಾಪತ್ರಯಗಳು, ಮಾನಸಿಕ ಸಮಸ್ಯೆಗಳು ಹಾಗೂ ಆರ್ಥಿಕ ಮುಗ್ಗಟ್ಟು ಸೈನಿಕರನ್ನು ಆತ್ಮಹತ್ಯೆಗೆ ಪ್ರಚೋದಿಸುತ್ತವೆ. ಸೇನೆಯ ಕೆಲಸದಲ್ಲಿನ ಒತ್ತಡ ಸಹಿಸಿಕೊಳ್ಳಲು ಸಾಧ್ಯವಾಗದಿರುವುದು ಕೂಡಾ ಆತ್ಮಹತ್ಯೆ ಪ್ರಮಾಣ ಹೆಚ್ಚಾಗುತ್ತಿರುವುದಕ್ಕೆ ಕಾರಣ ಎನ್ನಲಾಗುತ್ತಿದೆ.

ಸೈನಿಕರ ಮಾನಸಿಕ ಆರೋಗ್ಯ ಸುಧಾರಣೆಗೆ ಹಾಗೂ ಒತ್ತಡ ನಿರ್ವಹಣೆಗೆ ಸಾಕಷ್ಟು ಕ್ರಮ ಕೈಗೊಂಡಿರುವುದಾಗಿ ಸರಕಾರ ಹೇಳುತ್ತಿದೆ. ಈ ನಿಟ್ಟಿನಲ್ಲಿ ಪ್ರಾಥಮಿಕ ಹಂತದಲ್ಲಿ ಸೈನಿಕರಿಗೆ ಉತ್ತಮ ಬಟ್ಟೆ, ಉತ್ತಮ ಆಹಾರ, ಉತ್ತಮ ಸಾರಿಗೆ ಸೌಲಭ್ಯಗಳನ್ನು ಒದಗಿಸಲಾಗುತ್ತಿದೆ. ವಿವಾಹಿತ ಸೈನಿಕರಿಗೆ ತಮ್ಮ ಸಂಗಾತಿಯೊಂದಿಗೆ ಜೀವಿಸಲು ವಸತಿ ವ್ಯವಸ್ಥೆ ಹಾಗೂ ಮಕ್ಕಳಿಗೆ ಶಿಕ್ಷಣದ ಸೌಲಭ್ಯ ನೀಡಲಾಗಿದೆ. ರಜೆಯ ನಿಯಮಗಳನ್ನೂ ಸಾಕಷ್ಟು ಸಡಿಸಲಾಗಿದೆ. ಸೈನಿಕರ ಸಮಸ್ಯೆಗಳ ನಿವಾರಣೆಗಾಗಿ ದೂರು ನಿರ್ವಹಣಾ ಕೇಂದ್ರಗಳನ್ನು ಆರಂಭಿಸಲಾಗಿದೆ ಎನ್ನುತ್ತದೆ ಸರಕಾರ.

ಮುಂಬೈ, ಗೋವಾ, ಕೊಚ್ಚಿ, ವಿಶಾಖಪಟ್ಟಣ, ಪೋರ್ಟ್‌ ಬ್ಲೇರ್‌, ಕಾರವಾರದ ನೌಕಾದಳದ ಆಸ್ಪತ್ರೆಗಳಲ್ಲಿ ಸೇನೆಗಾಗಿಯೇ ತರಬೇತಿಗೊಂಡ ಮನೋವೈದ್ಯರನ್ನು ಒಳಗೊಂಡ ಮಾನಸಿಕ ಆರೋಗ್ಯ ಚಿಕಿತ್ಸಾ ಕೇಂದ್ರಗಳಿವೆ.

ಕಾಲ ಕಾಲಕ್ಕೆ ಸೈನಿಕರೊಂದಿಗೆ ಸೌಖ್ಯ ಮಾತುಕತೆಯ ಆಪ್ತ ಸಮಾಲೋಚನೆಗಳನ್ನೂ ನಡೆಸಲಾಗುತ್ತಿದೆ. ಸೇನೆಯ ಅಧಿಕಾರಿಗಳಲ್ಲೇ ಕೆಲವರಿಗೆ ಆಪ್ತ ಸಮಾಲೋಚನೆ ನಡೆಸುವ ತರಬೇತಿ ನೀಡಲಾಗಿದೆ. ವೃತ್ತಿಪರ ಆಪ್ತ ಸಮಾಲೋಚಕರನ್ನೂ ಆಗಾಗ ಸೇನಾ ಶಿಬಿರಗಳಿಗೆ ಕರೆಸಿಕೊಂಡು ಆಪ್ತ ಸಮಾಲೋಚನೆ ನಡೆಸಲಾಗುತ್ತದೆ ಎಂದು ಗೃಹ ಇಲಾಖೆ ಹೇಳಿಕೊಂಡಿದೆ.

ಸೈನಿಕರ ಮಾನಸಿಕ ಸ್ವಾಸ್ಥ್ಯಕ್ಕಾಗಿ ಆಸ್ಪತ್ರೆಗಳೂ ಇವೆ, ಆಪ್ತ ಸಮಾಲೋಚನೆಗಳನ್ನೂ ನಡೆಸಲಾಗುತ್ತಿದೆ ಎಂದು ಸರಕಾರ ಹೇಳಿಕೊಳ್ಳುತ್ತಿದೆ. ಆದರೆ, ಇಷ್ಟೆಲ್ಲದರ ನಡುವೆಯೂ ಸಾಮಾನ್ಯ ಸೈನಿಕರ ಆತ್ಮಹತ್ಯೆ ಪ್ರಮಾಣವನ್ನು ನೋಡಿದರೆ ಸೈನಿಕರು ಅನುಭವಿಸುತ್ತಿರುವ ಮಾನಸಿಕ ಒತ್ತಡದ ಪ್ರಮಾಣ ಏನು ಎಂಬುದು ಗೊತ್ತಾಗುತ್ತದೆ.

ಸೈನ್ಯಕ್ಕೆ ಅಧಿಕಾರಿಗಳಾಗಿ ಹೋಗುವವರಿಗೂ, ಸಾಮಾನ್ಯ ಜವಾನರಾಗಿ ಹೋಗುವವರಿಗೂ ಸಾಕಷ್ಟು ವ್ಯತ್ಯಾಸವಿದೆ. ಮಾನಸಿಕ ಒತ್ತಡದಿಂದ ಬಳಲುವ ಸೈನಿಕರನ್ನು ಗುರುತಿಸಿ, ಅವರಿಗೆ ಆಪ್ತ ಸಮಾಲೋಚನೆ ನಂತರ ಚಿಕಿತ್ಸೆ ನೀಡುವ ಸಮರ್ಪಕ ವ್ಯವಸ್ಥೆ ಸೈನ್ಯದೊಳಗೆ ಬರಬೇಕು. ಇಲ್ಲವಾದರೆ, ಇಂಥ ಆತ್ಮಹತ್ಯೆ ಪ್ರಮಾಣಗಳು ಹೆಚ್ಚುತ್ತಲೇ ಇರುತ್ತವೆ.

ಮಾಹಿತಿ ಮೂಲ: ದಿ ವೈರ್