ನೋಟ್ ಬ್ಯಾನ್, ಜಿಎಸ್‌ಟಿ ಪರಿಣಾಮ: ಒಂದೇ ವರ್ಷದಲ್ಲಿ ಸಾಲಗಾರರ ಸಂಖ್ಯೆ ಡಬಲ್!
ದೇಶ

ನೋಟ್ ಬ್ಯಾನ್, ಜಿಎಸ್‌ಟಿ ಪರಿಣಾಮ: ಒಂದೇ ವರ್ಷದಲ್ಲಿ ಸಾಲಗಾರರ ಸಂಖ್ಯೆ ಡಬಲ್!

2017ರ ಮಾರ್ಚ್‌ ಅಂತ್ಯದಲ್ಲಿ ಸುಸ್ತಿ ಸಾಲದ ಮೊತ್ತ 8,249 ಕೋಟಿ ರೂಪಾಯಿ ಆಗಿದ್ದರೆ, ಮಾರ್ಚ್‌ 2018ರ ಮಾರ್ಚ್‌ ಅಂತ್ಯಕ್ಕೆ ಒಂದು ವರ್ಷದಲ್ಲಿ ಈ ಪ್ರಮಾಣ 16,118 ಕೋಟಿ ರೂಪಾಯಿಗೆ ಏರಿಕೆಯಾಗಿದೆ. ಅಂದರೆ ಬರೊಬ್ಬರಿ ಎರಡು ಪಟ್ಟು ಹೆಚ್ಚಳ. 

ಜಿಎಸ್‌ಟಿ ಜಾರಿಯಾಗಿ ವರ್ಷ ಕಳೆದಿದ್ದರೆ, ಅನಾಣ್ಯೀಕರಣಕ್ಕೆ ಎರಡು ವರ್ಷ ತುಂಬುತ್ತಿದೆ. ಹೀಗಿದ್ದೂ ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳ ಸಂಕಷ್ಟ ಮಾತ್ರ ನಿವಾರಣೆಯಾಗಿಲ್ಲ. ಪರಿಣಾಮ ಕಳೆದೊಂದು ವರ್ಷದಲ್ಲಿ ಈ ವಲಯದ ದುಪ್ಪಟ್ಟು ಉದ್ಯಮಿಗಳು ಸುಸ್ತಿದಾರರಾಗಿದ್ದಾರೆ. ಇದನ್ನು ಯಾರೋ ಬಿಜೆಪಿ ವಿರೋಧಿಗಳು ಹೇಳುತ್ತಿಲ್ಲ; ಬದಲಿಗೆ ಸ್ವತಃ ಆರ್‌ಬಿಐ ನೀಡಿರುವ ಮಾಹಿತಿ ಇದು.

ಆರ್‌ಟಿಐ ಮೂಲಕ ‘ಇಂಡಿಯನ್‌ ಎಕ್ಸ್‌ಪ್ರೆಸ್‌’ ದಿನ ಪತ್ರಿಕೆ ಪಡೆದುಕೊಂಡ ಮಾಹಿತಿಯಲ್ಲಿ ಈ ಅಂಶಗಳು ಬಹಿರಂಗವಾಗಿವೆ. 2017ರ ಮಾರ್ಚ್‌ಗೆ ಅಂತ್ಯಗೊಂಡ ವರ್ಷದಲ್ಲಿ ಸುಸ್ತಿ ಸಾಲದ ಮೊತ್ತ 8,249 ಕೋಟಿ ರೂಪಾಯಿ ಆಗಿದ್ದರೆ, ಮಾರ್ಚ್‌ 2018ರ ಮಾರ್ಚ್‌ ಅಂತ್ಯಕ್ಕೆ ಒಂದು ವರ್ಷದಲ್ಲಿ ಈ ಪ್ರಮಾಣ 16,118 ಕೋಟಿ ರೂಪಾಯಿಗೆ, ಅಂದರೆ ದುಪ್ಪಟ್ಟು ಏರಿಕೆಯಾಗಿದೆ.

ಉತ್ಪಾದನಾ ಘಟಕಗಳನ್ನು ಸ್ಥಾಪಿಸಲು ಮತ್ತು ಯಂತ್ರಗಳ ಖರೀದಿಗೆ ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳು ರೂ. 25 ಲಕ್ಷದಿಂದ 5 ಕೋಟಿ ರೂಪಾಯಿ ಒಳಗೆ ಪಡೆದ ಸಾಲಗಳು ಹೆಚ್ಚಿನ ಪ್ರಮಾಣದಲ್ಲಿ ಸುಸ್ತಿಯಾಗಿವೆ.

2017ರ ಮಾರ್ಚ್‌ ಅಂತ್ಯಕ್ಕೆ 9,83,655 ಕೋಟಿ ರುಪಾಯಿ ಸಾಲವನ್ನು ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳಿಗೆ ನೀಡಲಾಗಿತ್ತು. ಈ ಪ್ರಮಾಣ ಮಾರ್ಚ್‌ 2018ಕ್ಕೆ ಶೇಕಡಾ 6.72ರಷ್ಟು ಹೆಚ್ಚಾಗಿದ್ದು 10,49,796 ಕೋಟಿ ರೂಪಾಯಿಗೆ ಏರಿಕೆಯಾಗಿದೆ. ಇದೇ ವೇಳೆ ಒಟ್ಟಾರೆ 2017ರಲ್ಲಿ ಮಾರ್ಚ್‌ ಅಂತ್ಯಕ್ಕೆ 82,382 ಕೋಟಿ ರೂಪಾಯಿ ಇದ್ದ ಸುಸ್ತಿ ಸಾಲದ ಮೊತ್ತ 2018ರ ಮಾರ್ಚ್‌ ಅಂತ್ಯಕ್ಕೆ 98,500 ಕೋಟಿ ರೂಪಾಯಿಗೆ ಏರಿಕೆಯಾಗಿದೆ.

ಜಿಡಿಪಿ ಏರಿಕೆ ಬೆನ್ನಲ್ಲೇ ಹೊಡೆತ:

ಇತ್ತೀಚೆಗೆ ಕೇಂದ್ರ ಸರಕಾರ ಬಿಡುಗಡೆ ಮಾಡಿದ ಏಪ್ರಿಲ್‌-ಜೂನ್‌ ಅವಧಿಯ ಮೊದಲ ತ್ರೈಮಾಸಿಕ ವರದಿಯಲ್ಲಿ ನಿವ್ವಳ ಉತ್ಪನ್ನ ದರ (ಜಿಡಿಪಿ) ಶೇಕಡಾ 8.2ರಷ್ಟು ಏರಿಕೆಯಾಗಿದೆ ಎಂದು ಹೇಳಿತ್ತು. ಕಳೆದ ವರ್ಷ ಇದೇ ಅವಧಿಯಲ್ಲಿ ಶೇಕಡಾ 5.7ರಷ್ಟು ಜಿಡಿಪಿ ಇತ್ತು. ಜಿಡಿಪಿಯಲ್ಲಿ ದೊಡ್ಡ ಮಟ್ಟದ ಬೆಳವಣಿಗೆ ದರ ದಾಖಲಾಗಿದ್ದರೂ ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳು ನಷ್ಟದ ಹಾದಿ ಹಿಡಿದಿರುವುದು ಹೆಚ್ಚಿನ ಆತಂಕವನ್ನು ಉಂಟು ಮಾಡಿದೆ. ದೇಶದಲ್ಲಿ ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳೇ ಹೆಚ್ಚಿನ ಜನರಿಗೆ ಉದ್ಯೋಗ ನೀಡಿರುವುದರಿಂದ ಈ ವಲಯದ ತಲ್ಲಣಗಳು ಎಚ್ಚರಿಕೆಯ ಗಂಟೆ ಬಾರಿಸುತ್ತಿವೆ.

ನವೆಂಬರ್ 8, 2016ರಲ್ಲಿ ಆರ್ಬಿ‌ಐ ಹಳೆಯ 500 ಮತ್ತು 1000 ರೂಪಾಯಿ ಮುಖಬೆಲೆಯ ನೋಟುಗಳನ್ನು ವಾಪಸ್‌ ಪಡೆದುಕೊಂಡಿತ್ತು. ಕೇಂದ್ರ ಬ್ಯಾಂಕ್‌ನ ಈ ನಿರ್ಧಾರ ಸಣ್ಣ ಮತ್ತು ಅತಿ ಸಣ್ಣ ಉದ್ದಿಮೆಗಳ ಮೇಲೆ ಬರೆ ಎಳೆದಿತ್ತು. ಇದೀಗ ಈ ಪ್ರಕ್ರಿಯೆ ನಡೆದು 21 ತಿಂಗಳ ನಂತರವೂ ಹಲವು ಉದ್ದಿಮೆಗಳು ಲಾಭದ ಮುಖ ಕಂಡಿಲ್ಲ.

ಎರಡು ವಾರಗಳ ಹಿಂದೆ ಸ್ವತಃ ಆರ್‌ಬಿಐ ಬಿಡುಗಡೆಗೊಳಿಸಿದ ಅತಿ ಸಣ್ಣ, ಸಣ್ಣ ಮತ್ತು ಮಧ್ಯಮ ಉದ್ದಿಮೆಗಳ ಮೇಲಿನ ಅಧ್ಯಯನ ವರದಿಯೇ ಜಿಎಸ್‌ಟಿ ಮತ್ತು ಅನಾಣ್ಯೀಕರಣ ಈ ಉದ್ದಿಮೆಗಳ ಮೇಲೆ ಆಘಾತಕಾರಿ ಪರಿಣಾಮ ಬೀರಿದೆ ಎಂಬುದಾಗಿ ಹೇಳಿದೆ.

“ಬಹಳ ಮುಖ್ಯವಾಗಿ ಅನಾಣ್ಯೀಕರಣದ ನಂತರ ವಸ್ತ್ರೋದ್ಯಮ, ಆಭರಣ ವಲಯದ ಗುತ್ತಿಗೆ ನೌಕರರ ಸಂಬಳಕ್ಕೆ ಕುತ್ತು ಬಂದಿದೆ. ನೋಟ್‌ ಬ್ಯಾನ್‌ನಿಂದ ಉದ್ದಿಮೆದಾರರು ಹಣ ಪಾವತಿಯ ಶಕ್ತಿಯನ್ನು ಕಳೆದುಕೊಂಡಿದ್ದಾರೆ. ಇದರ ಜತೆಗೆ ಜಿಎಸ್‌ಟಿ ಜಾರಿಯಿಂದ ಕಾರ್ಯಾಚರಣೆ ವೆಚ್ಚವೂ ಅಧಿಕವಾಗಿದ್ದು ಉದ್ದಿಮೆಗಳ ಮೇಲೆ ಋಣಾತ್ಮಕ ಪರಿಣಾಮ ಬೀರಿದೆ,” ಎಂಬುದಾಗಿ ವರದಿ ಹೇಳಿದೆ. ಈ ಬಗ್ಗೆ ಹಲವು ರೇಟಿಂಗ್‌ ಏಜೆನ್ಸಿಗಳು ಕೂಡ ಸಮೀಕ್ಷೆಗಳನ್ನು ನಡೆಸಿದ್ದು ಅವುಗಳು ಕೂಡ ಇದೇ ಮಾದರಿಯ ಉತ್ತರ ನೀಡಿವೆ.

ಒಂದು ಕಡೆ ಜಿಡಿಪಿ ಬೆಳವಣಿಗೆ ದೇಶದ ಆರ್ಥಿಕ ಕ್ಷೇತ್ರ ಚೇತರಿಸಿಕೊಳ್ಳುವ ಮುನ್ಸೂಚನೆಗಳನ್ನು ನೀಡಿದ್ದರೆ, ಇನ್ನೊಂದು ಕಡೆ ಹಲವು ಕ್ಷೇತ್ರಗಳು ಆಘಾತದಿಂದ ಹೊರಬರಲು ಒದ್ದಾಡುತ್ತಿರುವುದನ್ನು ಇದು ಸೂಚಿಸುತ್ತಿದೆ. ಈ ಕ್ಷೇತ್ರಗಳು ಚೇತರಿಕೆ ಕಾಣದ ಹೊರತು ‘ಜಿಡಿಪಿ ಬೆಳವಣಿಗೆ’ ಎನ್ನುವುದು ಜನಸಾಮಾನ್ಯರ ಪಾಲಿಗೆ ಕೇವಲ ಅಂಕಿ ಸಂಖ್ಯೆಗಳು ಮಾತ್ರವೇ ಆಗಿರಲಿವೆ.