‘ಡಿಎನ್‌ಎ ಪ್ರೊಫೈಲಿಂಗ್‌’  ಕಾಯ್ದೆ: ಅಪರಾಧ ಪತ್ತೆಗೆ ತಂತ್ರಜ್ಞಾನ ಎಷ್ಟು ಸಹಕಾರಿ?
ದೇಶ

‘ಡಿಎನ್‌ಎ ಪ್ರೊಫೈಲಿಂಗ್‌’ ಕಾಯ್ದೆ: ಅಪರಾಧ ಪತ್ತೆಗೆ ತಂತ್ರಜ್ಞಾನ ಎಷ್ಟು ಸಹಕಾರಿ?

ದೇಶದ ನ್ಯಾಯಾಂಗ ವ್ಯವಸ್ಥೆಗೆ ವೇಗ ಕಲ್ಪಿಸುವ ಸಲುವಾಗಿ ಕೇಂದ್ರ ಸರಕಾರ ಪ್ರಾಸ್ತಾಪಿಸಿರುವ ಡಿಎನ್‌ಎ ಟೆಕ್ನಾಲಜಿ ಬಿಲ್‌ಗೆ ವಿರೋಧ ವ್ಯಕ್ತವಾಗಿದೆ. ಯಾಕೆ ಎಂದರೆ, 

ಕೇಂದ್ರ ಸರಕಾರದ ಪ್ರಾಸ್ತಾಪಿತ ಡಿಎನ್‌ಎ ಟೆಕ್ನಾಲಜಿ (ಯೂಸ್‌ ಅಂಡ್‌ ಅಪ್ಲಿಕೇಷನ್) ರೆಗ್ಯುಲೇಷನ್‌ ಬಿಲ್‌ಗೆ ಕಾಂಗ್ರೆಸ್‌ ವಕ್ತಾರ ಮತ್ತು ರಾಜ್ಯ ಸಭಾ ಸದಸ್ಯ ಅಭಿಷೇಕ್‌ ಸಿಂಗ್ವಿ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. “ಭಾರತದ ಪ್ರಜೆಗಳನ್ನು 360 ಡಿಗ್ರಿ ಕೋನದಲ್ಲಿ ಅಳೆಯಲು ಹೊರಟಿರುವ ಬಿಜೆಪಿ ನೇತೃತ್ವದ ಕೇಂದ್ರ ಸರಕಾರ, ಭಾರತವನ್ನು ಇಷ್ಟ ಬಂದಂತೆ ವ್ಯಾಖ್ಯಾನಿಸಲು ಮುಂದಾಗಿದೆ ಎಂದು ದೂಷಿಸಿದ್ದಾರೆ.

ಕೇಂದ್ರ ಸಚಿವ ಸಂಪುಟದಲ್ಲಿ ಅಂಗೀಕಾರ ಪಡೆದಿರುವ ಡಿಎನ್‌ಎ ಟೆಕ್ನಾಲಜಿ ಮಸೂದೆಯನ್ನು ಆಗಸ್ಟ್‌ 9ರಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಹರ್ಷವರ್ಧನ್‌ ಲೋಕಸಭೆಯ ಮುಂದಿಟ್ಟಿದ್ದರು. ಈ ಮಸೂದೆಗೆ ವಿರೋಧ ವ್ಯಕ್ತಪಡಿಸಿರುವ ಅಭಿಷೇಕ್‌ ಸಿಂಗ್ವಿ, “ಸರಕಾರ ಪ್ರಜೆಗಳ ಖಾಸಗಿ ಮಾಹಿತಿಯನ್ನು ಸಂಗ್ರಹಿಸಲು ಮುಂದಾಗಿದೆ,” ಎಂದಿದ್ದಾರೆ.

“ಡಿಎನ್‌ಎಯಂತಹ ಸೂಕ್ಷ್ಮ ದತ್ತಾಂಶಗಳನ್ನು ರಕ್ಷಿಸಲು ಬೇಕಾಗಿರುವ ಭದ್ರತೆಯ ಬಗ್ಗೆ ಮಸೂದೆಯಲ್ಲಿ ಪೂರ್ವ ಸಿದ್ಧತೆಯಿಲ್ಲ. ಸಂಗ್ರಹಿಸಿದ ಮಾಹಿತಿಗಳನ್ನು ಎಷ್ಟು ದಿನಕ್ಕೆ ಅಳಿಸಿಹಾಕಲಾಗುತ್ತದೆ ಎನ್ನುವುದನ್ನೂ ಕೂಡ ಮಸೂದೆ ತಿಳಿಸುವುದಿಲ್ಲ. ಇಡೀ ದೇಶದ ಡಿಎನ್‌ಎ ಮಾಹಿತಿಯನ್ನು ಲ್ಯಾಬೋರೇಟರಿಗಳಲ್ಲಿ ಹೇಗೆ ಕಾಪಾಡುತ್ತೀರಿ?” ಎಂದು ಅಭಿಷೇಕ್‌ ಸಿಂಗ್ವಿ ಕೇಂದ್ರವನ್ನು ಪ್ರಶ್ನಿಸಿದ್ದಾರೆ.

ಡಿಎನ್‌ಎ ಟೆಕ್ನಾಲಜಿ ಕಾಯ್ದೆಯನ್ನು ತರುವ ಮೊದಲು ದೇಶದ ಜನತೆಯ ದತ್ತಾಂಶಗಳನ್ನು ಭದ್ರವಾಗಿರಿಸಲು ಅಗತ್ಯವಿರುವ ಕಾಯ್ದೆಯನ್ನು ತನ್ನಿ ಎಂದಿರುವ ಅಭಿಷೇಕ್‌ ಸಿಂಗ್ವಿ, ಇತ್ತೀಚಿಗಿನ ಆಧಾರ್‌ ಮಾಹಿತಿ ಸೋರಿಕೆಯನ್ನು ಕೇಂದ್ರ ಸರಕಾರಕ್ಕೆ ನೆನಪು ಮಾಡಿದ್ದಾರೆ. ಡಿಎನ್‌ಎ ಟೆಕ್ನಾಲಜಿ ಮಸೂದೆಯನ್ನು ಹಿಂಪಡೆಯುವಂತೆ ಆಗ್ರಹಿಸಿದ್ದಾರೆ.

ಏನಿದು ‘ಡಿಎನ್‌ಎ ಟೆಕ್ನಾಲಜಿ ಬಿಲ್’?:

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ದೇಶದಲ್ಲಿ ಅಪರಾಧ ಪ್ರಕರಣಗಳಲ್ಲಿ ನ್ಯಾಯಾಂಗ ವ್ಯವಸ್ಥೆಯ ಪ್ರಕ್ರಿಯೆಯನ್ನು ವೇಗಗೊಳಿಸಿ, ಆದಷ್ಟು ಬೇಗ ಶಿಕ್ಷೆ ವಿಧಿಸುವಂತಾಗಲು, ನಿಜವಾದ ಅಪರಾಧಿಗಳಿಗೆ ಶಿಕ್ಷೆ ದೊರೆಯುವಂತಾಗಲು ಕೇಂದ್ರ ಸರಕಾರ ಪ್ರಸ್ತಾಪಿಸಿರುವ ಮಸೂದೆಯಿದು. ಈ ಮುಸೂದೆಗೆ ಕೇಂದ್ರ ಸರಕಾರ ‘ಡಿಎನ್‌ಎ ಟೆಕ್ನಾಲಜಿ (ಯೂಸ್‌ ಅಂಡ್‌ ಅಪ್ಲಿಕೇಷನ್‌) ರೆಗ್ಯುಲೇಷನ್‌ ಬಿಲ್, 2018’ ಎಂಬ ಹೆಸರು ನೀಡಿದೆ.

ಮಸೂದೆಯ ಅಂತಿಮ ಕರಡು ಹೇಳುವಂತೆ, ಕೆಲವು ನಿರ್ದಿಷ್ಟ ವ್ಯಕ್ತಿಗಳ ಡಿಎನ್‌ಎ ಮಾಹಿತಿಯನ್ನು ಸಂಗ್ರಹಿಸಿ ಅಪರಾಧಗಳನ್ನು ಪತ್ತೆ ಹಚ್ಚಲು ಬಳಸಲಾಗುತ್ತದೆ. ಸಂತ್ರಸ್ತರು, ಅರೋಪಿಗಳು, ಅಪರಾಧಿಗಳು, ವಿಚಾರಣಾಧೀನರು, ಕಳೆದು ಹೋದ ವ್ಯಕ್ತಿಗಳು ಹೀಗೆ ಹಲವಾರು ವ್ಯಕ್ತಿಗಳು ಈ ಕಾಯ್ದೆಯಡಿ ಬರುತ್ತಾರೆ. ಇವರೆಲ್ಲರ ಡಿಎನ್‌ಎ ದತ್ತಾಂಶಗಳ ಆಧಾರದ ಮೇಲೆ ನ್ಯಾಯ ವ್ಯವಸ್ಥೆಯ ವಿಚಾರಣೆಯಲ್ಲಿ ಪಾಲ್ಗೊಳ್ಳುತ್ತಾರೆ.

ಡಿಎನ್‌ಎ ಟೆಕ್ನಾಲಜಿಯ ಮೂಲಕ ದತ್ತಾಂಶಗಳನ್ನು ಸಂಗ್ರಹಿಸುವುದಕ್ಕಾಗಿಯೇ ಮಂಡಳಿಯೊಂದನ್ನು ಸ್ಥಾಪಿಸಲಾಗುತ್ತದೆ. ಈ ಮಂಡಳಿ ತನಗೆ ಅಗತ್ಯವಿರುವಷ್ಟು ಸ್ಥಳೀಯ ಕಚೇರಿಗಳನ್ನು ತೆರೆಯಲಿದೆ. ಈ ಕಚೇರಿಗಳಲ್ಲಿ ಲ್ಯಾಬ್‌ಗಳಿರಲಿದ್ದು, ಮಂಡಳಿಯ ಮೇಲ್ವಿಚಾರಣೆಯಲ್ಲಿ ಡಿಎನ್‌ಎ ಪರೀಕ್ಷೆಗಳನ್ನು ನಡೆಸುತ್ತವೆ. ಡಿಎನ್‌ಎ ಡಾಟಾ ಬ್ಯಾಂಕ್‌ಗಳ ಸ್ಥಾಪನೆ, ಡಿಎನ್‌ಎ ದತ್ತಾಂಶ ಸಂಗ್ರಹಕ್ಕೆ ಅಗತ್ಯವಾದ ನಿರ್ದೇಶನ, ಪ್ರಕಿಯೆ, ಸಂಗ್ರಹಣೆ, ಹಂಚಿಕೆ, ದತ್ತಾಂಶಗಳ ಅಳಿಸುವಿಕೆ ಇತ್ಯಾದಿ ಕಾರ್ಯಗಳನ್ನು ಮಂಡಳಿ ನಿರ್ವಹಿಸುತ್ತದೆ.

ಡಿಎನ್‌ಎ ಡಾಟಾ ಬ್ಯಾಂಕ್:

ರಾಷ್ಟ್ರೀಯ ಮತ್ತು ಸ್ಥಳೀಯ ಮಟ್ಟದಲ್ಲಿ ಡಿಎನ್‌ಎ ಡಾಟಾ ಬ್ಯಾಂಕ್‌ಗಳು ಸ್ಥಾಪನೆಯಾಗಿಲಿದ್ದು, ನಿರ್ದಿಷ್ಟ ಸ್ವರೂಪದಲ್ಲಿ ಡಿಎನ್‌ಎ ದತ್ತಾಂಶಗಳನ್ನು ಸಂಗ್ರಹಿಸಿಕೊಳ್ಳುತ್ತವೆ. ಅಪರಾಧಿಗಳ ಡಿಎನ್‌ಎ, ಸಂತ್ರಸ್ತರ ಡಿಎನ್‌ಎ, ಕಳೆದುಹೋದ ವ್ಯಕ್ತಿಗಳ ಬಗ್ಗೆ ದೂರು ನೀಡಿದವರ ಡಿಎನ್‌ಎ, ಹೀಗೆ ಹಲವಾರು ವರ್ಗಗಳಲ್ಲಿ ಡಿಎನ್‌ಎ ಸಂಗ್ರಹ ನಡೆಯುತ್ತದೆ. ಡಿಎನ್‌ಎ ಆಧಾರದ ಮೇಲೆ ಆಪರಾಧಿಗಳನ್ನು ಪತ್ತೆ ಹಚ್ಚಲಾಗುತ್ತದೆ.

ಎನ್‌ಸಿಆರ್‌ಬಿ ನೀಡುವ ಮಾಹಿತಿ ಪ್ರಕಾರ ದೇಶದಲ್ಲಿ ಸದ್ಯ 40,000 ಗುರುತಿಸಲ್ಪಡದ ಶವಗಳಿವೆ. ಶವಗಳ ಡಿಎನ್‌ಎ ಮಾಹಿತಿಯ ಜತೆಗೆ, ದೂರು ನೀಡಿದವರ ಡಿಎನ್‌ಎ ಮಾಹಿತಿ ಸಂಗ್ರಹಿಸಿ, ಈ ಡಿಎನ್‌ಎ ಯಾವ ಶವದ ಡಿಎನ್‌ಎ ಜತೆಗಾದರೂ ಹೊಂದಾಣಿಕೆ ಆಗುತ್ತದೆಯೇ ಎಂದು ಪರೀಕ್ಷಿಸಲಾಗುತ್ತದೆ. ಡಿಎನ್‌ಎಗಳು ಹೊಂದಾಣಿಕೆಯಾದರೆ ಆ ಶವವನ್ನು ದೂರು ನೀಡಿದವರಿಗೆ ಹಸ್ತಾಂತರಿಸಲಾಗುತ್ತದೆ. ಇದು ಡಿಎನ್‌ಎ ಪರೀಕ್ಷೆಗಳಿಂದ ದೊರೆಯಬಹುದಾದ ಫಲಿತಾಂಶಗಳ ಚಿಕ್ಕ ಉದಾಹರಣೆ.

ಡಿಎನ್‌ಎ ದತ್ತಾಂಶದ ಬಳಕೆ ಹೇಗೆ?:

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಸಂಗ್ರಹಿಸಲ್ಪಟ್ಟ ಡಿಎನ್‌ಎ ಮಾಹಿತಿಯನ್ನು ಗುರುತಿಸುವಿಕೆಗಷ್ಟೇ ಬಳಸಬೇಕು ಎಂದು ಕಾಯ್ದೆ ಹೇಳುತ್ತದೆ. ಅಪರಾಧ ಪ್ರಕರಣಗಳಲ್ಲಿ ದಾಖಲೆಯಾಗಿ ಈ ಡಿಎನ್‌ಎ ಮಾಹಿತಿಗಳು ಬಳಕೆಯಾಗಲಿದ್ದು, ನಂತರದಲ್ಲಿ ಅಳಿಸಿಹಾಕಲಾಗುತ್ತದೆ. ಆರೋಪಿಗಳು, ವಿಚಾರಣಾಧೀನರ ವಿಷಯಕ್ಕೆ ಬಂದಾಗ, ಡಿಎನ್‌ಎ ಹೊಂದಾಣಿಕೆಯಾಗದಿದ್ದಲ್ಲಿ ಅವರ ಡಿಎನ್‌ಎ ಮಾಹಿತಿಯನ್ನು ಅಳಸಿ ಹಾಕಲಾಗುತ್ತದೆ.

ಕಾಯ್ದೆಯ ಪ್ರಕಾರ ನಿರ್ದಿಷ್ಟ ಪ್ರಕರಣಗಳನ್ನು ಹೊರತುಪಡಿಸಿ ಎಲ್ಲಾ ಪ್ರಕರಣಗಳಲ್ಲಿ ಡಿಎನ್‌ಎ ಪರೀಕ್ಷೆ ನಡೆಸುವಂತಿಲ್ಲ. ಬಂಧಿತ ವ್ಯಕ್ತಿಯ ಅನುಮತಿಯನ್ನು ಪಡೆದ ಮೇಲಷ್ಟೇ ಡಿಎನ್‌ಎ ಪರೀಕ್ಷೆ ನಡೆಸಬಹುದು. ಕಳೆದು ಹೋದ ಪ್ರಕರಣಗಳಲ್ಲಿ ಪ್ರಕರಣ ದಾಖಲಿಸಿದವರಿಂದ, ಕಳೆದುಹೋದ ವ್ಯಕ್ತಿಯ ಕುಟುಂಬದವರಿಂದ ಕೂಡ ಡಿಎನ್‌ಎ ಪಡೆಯಬಹುದು. ಕೆಲವು ಪ್ರಕರಣಗಳಲ್ಲಿ ಸಾಮಾನ್ಯ ಜನರು ಸ್ವಯಿಚ್ಚೆಯಿಂದ ಡಿಎನ್‌ಎ ಪರೀಕ್ಷೆಗೆ ಒಳಗಾಗಬಹುದು. ಆದರೆ ಡಿಎನ್‌ಎ ಸಂಗ್ರಹಿಸುವ ಮುಂಚೆ ನ್ಯಾಯಾಧೀಶರ ಅನುಮತಿಯನ್ನು ಪಡೆಯಬೇಕು.

ಇದೆಲ್ಲದರ ಜತೆಗೆ, ಈ ಮಾಹಿತಿ ರಕ್ಷಣೆಯ ಬಗ್ಗೆಯೂ ಕೂಡ ಕಾಯ್ದೆ ಮಾತನಾಡುತ್ತದೆ. ಕಾಯ್ದೆ ಹೇಳುವಂತೆ ನಿರ್ದಿಷ್ಟ ಅಧಿಕಾರಿಗಳನ್ನು ಹೊರತುಪಡಿಸಿ ಇತರರಿಗೆ ಡಿಎನ್‌ಎ ಮಾಹಿತಿಯನ್ನು ನೀಡುವಂತಿಲ್ಲ. ಜತೆಗೆ ಪ್ರಕರಣಕ್ಕೆ ಸಂಬಂಧಿವಿಲ್ಲದ ವಿಷಯಗಳಲ್ಲೂ ಕೂಡ ಡಿಎನ್‌ಎ ಮಾಹಿತಿಯನ್ನು ಬಹಿರಂಗ ಪಡಿಸುವಂತಿಲ್ಲ. ಡಿಎನ್‌ಎ ಡಾಟಾ ಬ್ಯಾಂಕ್‌‌ ಸಿಬ್ಬಂದಿಗಳು ಅನಾವಶ್ಯಕವಾಗಿ ಡಿಎನ್‌ಎ ಮಾಹಿತಿಯನ್ನು ಬಹಿರಂಗಪಡಿಸಿದರೆ 3 ವರ್ಷ ಜೈಲು ಶಿಕ್ಷೆ ಮತ್ತು 1 ಲಕ್ಷ ರೂಪಾಯಿಗಳ ದಂಡ ವಿಧಿಸಬಹುದಾಗಿದೆ.

ಇದೇ ಮೊದಲಲ್ಲ:

ಡಿಎನ್‌ಎ ಟೆಕ್ನಾಲಜಿ ಬಿಲ್‌ನ ಪ್ರಸ್ತಾಪ ಆಗಿದ್ದು ಇದೇ ಮೊದಲ ಬಾರಿ ಏನಲ್ಲ. ಈ ಮುಂಚೆಯೇ ಬೇರೆ ಬೇರೆ ಹೆಸರುಗಳಲ್ಲಿ ಸರಕಾರಗಳು 3 ಬಾರಿ ಈ ಕಾಯ್ದೆಯನ್ನು ತರಲು ಪ್ರಯತ್ನಿಸಿದ್ದವು. 2007ರಲ್ಲಿ ಯುಪಿಎ ನೇತೃತ್ವದ ಕೇಂದ್ರ ಸರಕಾರ ‘ಡಿಎನ್‌ಎ ಪ್ರೊಫೈಲಿಂಗ್‌ ಬಿಲ್‌’ ಎಂಬ ಹೆಸರಿನಲ್ಲಿ ಈ ಕಾಯ್ದೆಯನ್ನು ತರಲು ಮುಂದಾಗಿತ್ತು. 2015ರಲ್ಲಿ ಈ ಕಾಯ್ದೆ ‘ಹ್ಯೂಮನ್‌ ಡಿಎನ್‌ಎ ಪ್ರೊಫೈಲಿಂಗ್‌ ಬಿಲ್‌’ ಎಂದು ಕರೆಸಿಕೊಂಡು ಪ್ರಸ್ತಾಪಿಸಲ್ಪಟ್ಟಿತ್ತು.

2017ರಲ್ಲಿ ಈ ಕಾಯ್ದೆಗೆ ಸಂಬಂಧಿಸಿದಂತೆ ದುರ್ಬಳಕೆ ತಡೆಗಟ್ಟುವಿಕೆ, ಖಾಸಗಿ ಮಾಹಿತಿ ಸೋರಿಕೆಯನ್ನು ತಡೆಗಟ್ಟುವುದು ಹೀಗೆ ಕೆಲವು ಚಿಕ್ಕ ಪುಟ್ಟ ಬದಲಾವಣೆಗಳನ್ನು ಮಾಡಿ ‘ಡಿಎನ್‌ಎ ಬೇಸ್ಡ್ ಟೆಕ್ನಾಲಜಿ (ಯೂಸ್‌ ಅಂಡ್‌ ರೆಗ್ಯುಲೇಷನ್‌) ಬಿಲ್‌’ ಹೆಸರಿನಲ್ಲಿ ಪ್ರಸ್ತಾಪಿಸಲ್ಪಟ್ಟಿತ್ತು. ಈಗ ಲೋಕಸಭೆಯಲ್ಲಿ ಅಂಗೀಕಾರಗೊಂಡಿರುವ ‘ಡಿಎನ್‌ಎ ಟೆಕ್ನಾಲಜಿ (ಯೂಸ್‌ ಅಂಡ್‌ ಅಪ್ಲಿಕೇಷನ್‌) ರೆಗ್ಯುಲೇಷನ್‌ ಬಿಲ್‌, 2018’ ಕೆಲವು ಹೆಸರಿನ ಬದಲಾವಣೆಯನ್ನು ಮಾತ್ರ ಒಳಗೊಂಡಿದೆ.

ಅಭಿವೃದ್ಧಿ ಹೊಂದಿದ ಹಲವಾರು ದೇಶಗಳ ಜತೆಗೆ ಹೋಲಿಸಿಕೊಂಡರೆ ಅಪರಾಧಿಗಳನ್ನು ಪತ್ತೆ ಹಚ್ಚಲು ಡಿಎನ್‌ಎ ಟೆಕ್ನಾಲಜಿ ಬಳಸಿಕೊಳ್ಳುತ್ತಿರುವುದಲ್ಲಿ ಭಾರತ ಸುಮಾರು 15 ವರ್ಷಗಳಷ್ಟು ಹಿಂದೆ ಉಳಿದಿದೆ ಎನ್ನುವುದು ತಜ್ಞರ ಮಾತು. ಈ ಹಿಂದೆ ಭಾರತದಲ್ಲಿ ರಾಜೀವ್‌ ಗಾಂಧಿ ಹತ್ಯೆ ನಡೆದ ಸಂಧರ್ಭದಲ್ಲಿ ಡಿಎನ್‌ಎ ಟೆಕ್ನಾಲಜಿಯನ್ನು ಬಳಸಲಾಗಿತ್ತು. ತಂದೂರ್‌ ಹತ್ಯೆ ಪ್ರಕರಣದಲ್ಲಿಯೂ ಕೂಡ ಡಿಎನ್‌ಎ ಫಿಂಗರ್‌ಪ್ರಿಂಟಿಂಗ್‌ ಬಳಕೆಯಾಗಿತ್ತು. 2007ರ ನಂತರದ ದಿನಗಳಲ್ಲಿ ಹಿನ್ನಡೆ ಕಂಡಿದ್ದ ಡಿಎನ್‌ಎ ಟೆಕ್ನಾಲಜಿ, ದೇಶದ ಜನರಲ್ಲಿ ಖಾಸಗೀತನದ ಪ್ರಶ್ನೆ ಮೂಡಿದ್ದರಿಂದ ಹಿಂದುಳಿಯುವಂತಾಗಿತ್ತು.

ಈಗಲೂ ಕೂಡ ಹಲವಾರು ಸಾಮಾಜಿಕ ಕಾರ್ಯಕರ್ತರು, ವಕೀಲರು ಡಿಎನ್‌ಎ ಟೆಕ್ನಾಲಜಿ ವಿರುದ್ಧ ನಿಂತಿದ್ದಾರೆ. ಸರಕಾರವೇನೋ ಡಿಎನ್‌ಎ ಟೆಕ್ನಾಲಜಿಯಿಂದ ಸುಲಭವಾಗಿ ಅಪರಾಧಗಳನ್ನು ಬಗೆಹರಿಸಬಹುದು ಎನ್ನುತ್ತಿದೆ. ಆದರೆ ದೇಶದ ಹಲವಾರು ಕಾನೂನು ತಜ್ಞರ ಪ್ರಕಾರ ಪ್ರಜೆಗಳ ಖಾಸಗಿ ಮಾಹಿತಿಗಳನ್ನು ಸಂಪೂರ್ಣವಾಗಿ ರಕ್ಷಿಸಬಲ್ಲ ಕಾನೂನು ಭಾರತದಲ್ಲಿಲ್ಲ. ಈಗಿರುವ ದತ್ತಾಂಶಗಳೇ ಭದ್ರವಾಗಿವೆ ಎಂಬ ನಂಬಿಕೆ ಇಲ್ಲದಿರುವ ಸಂಧರ್ಭದಲ್ಲಿ ಡಿಎನ್‌ಎ ದತ್ತಾಂಶಗಳನ್ನು ಸರಕಾರಗಳು ಕಾಪಾಡಬಲ್ಲವು ಎಂಬ ನಂಬಿಕೆ ಇರಿಸಲು ಸಾಧ್ಯವಿಲ್ಲ.

ಇನ್ನೊಂದು ದಿಕ್ಕಿನಲ್ಲಿ ಈಗಾಗಲೇ ಡಿಎನ್‌ಎ ಟೆಕ್ನಾಲಜಿ ಬಳಸುತ್ತಿರುವ ದೇಶಗಳಲ್ಲಿ ಅಪರಾಧ ನಿರ್ಣಯದ ಪ್ರಮಾಣವೇನೂ ಜಾಸ್ತಿ ಆಗಿಲ್ಲ ಎಂಬ ವಾದವೂ ಇದೆ. ಒಟ್ಟಾರೆ ಬದಲಾದ ಕಾಲಘಟ್ಟದಲ್ಲಿ ಸರಕಾರ ಅಪರಾಧ ನಿರ್ವಹಣೆ ನಿಟ್ಟಿನಲ್ಲಿ ಹೊಸ ತಂತ್ರಜ್ಞಾನದ ಕಡೆ ಹೆಜ್ಜೆ ಹಾಕುತ್ತಿದೆ. ಆದರೆ ಜನರ ವೈಯಕ್ತಿಕ ಮಾಹಿತಿಯನ್ನು ಅದು ಒಳಗೊಳ್ಳುವ ಮೂಲಕ ಗುರುತರ ಹೊಣೆಗಾರಿಕೆಯನ್ನೂ ಮೈಮೇಲೆ ಎಳೆದುಕೊಳ್ಳಲು ಹೊರಟಿದೆ.