ಇಪಿಎಫ್‌ಓ ಅಂಕಿಅಂಶ: ಕಳೆದ 10 ತಿಂಗಳಲ್ಲಿ ಸಂಘಟಿತ ವಲಯ ತೊರೆದವರು 60 ಲಕ್ಷ ಮಂದಿ
ದೇಶ

ಇಪಿಎಫ್‌ಓ ಅಂಕಿಅಂಶ: ಕಳೆದ 10 ತಿಂಗಳಲ್ಲಿ ಸಂಘಟಿತ ವಲಯ ತೊರೆದವರು 60 ಲಕ್ಷ ಮಂದಿ

ಇತ್ತೀಚಿನ ದಿನಗಳಲ್ಲಿ ಭಾರತ ಸರಕಾರ ಉದ್ಯೋಗ ಲೆಕ್ಕ ಹಾಕಲು ಇಪಿಎಫ್‌ಓ ಅಂಕಿ ಅಂಶಗಳನ್ನು ಮಾನದಂಡವಾಗಿ ಬಳಸುತ್ತಿದೆ. ಇದರ ಪ್ರಕಾರ ಕಳೆದ 10 ತಿಂಗಳಲ್ಲಿ ದೇಶದ 1 ಕೋಟಿ ಜನ ಸಂಘಟಿತ ವಲಯದ ಉದ್ಯೋಗಕ್ಕೆ ಸೇರಿಕೊಂಡಿದ್ದಾರೆ.

ಶುಕ್ರವಾರ ಕೇಂದ್ರ ಸರಕಾರ ನೀಡಿರುವ ಮಾಹಿತಿಯಂತೆ ಕಳೆದ ಹತ್ತು ತಿಂಗಳಲ್ಲಿ ದೇಶದ ಸಂಘಟಿತ ವಲಯದ 60 ಲಕ್ಷಕ್ಕೂ ಹೆಚ್ಚು ಜನ ತಮ್ಮ ಉದ್ಯೋಗಗಳನ್ನು ತೊರೆದಿದ್ದಾರೆ. ಜೂನ್‌ ತಿಂಗಳ ಅಂತ್ಯದವರೆಗೂ ಈ ಮಂದಿ ಬೇರೆ ಯಾವ ಔಪಚಾರಿಕ ಉದ್ಯೋಗಕ್ಕೂ ಸೇರಿಲ್ಲ. ಈ 60 ಲಕ್ಷದ ಜನರ ಪೈಕಿ 46 ಲಕ್ಷದಷ್ಟು ಜನ 35ರ ಒಳಗಿವನರು.

ಪೇ ರೋಲ್‌ ಅಂಕಿ ಅಂಶಗಳ ಅಧಾರದ ಮೇಲೆ ಕೇಂದ್ರ ಸರಕಾರ ಇದೇ ಮೊದಲ ಬಾರಿಗೆ ಕೆಲಸ ತೊರೆದವರ ಮಾಹಿತಿ ನೀಡಿದೆ. ಸಂಘಟಿತ ವಲಯದಲ್ಲಿನ ಕೆಲಸಗಳನ್ನು ತೊರೆದಿರುವ ಉದ್ಯೋಗಿಗಳ ಸಂಖ್ಯೆಯನ್ನು ಸರಕಾರ ಮುಂದಿಟ್ಟಿದೆ. ಈ ಅಂಕಿ ಅಂಶಗಳನ್ನು ನೌಕರರ ಭವಿಷ್ಯ ನಿಧಿ ಸಂಘಟನೆಯಿಂದ ಪಡೆಯಲಾಗಿದೆ. ಕಳೆದ ವರ್ಷ ಹೊಸದಾಗಿ ಭವಿಷ್ಯ ನಿಧಿ ಸೇರಿದ ಮತ್ತು ಭವಿಷ್ಯ ನಿಧಿಯಿಂದ ಹೊರಗೆ ಹೊರಟ ಉದ್ಯೋಗಿಗಳ ಸಂಖ್ಯೆಯ ಆಧಾರದ ಮೇಲೆ ಈ ಅಂಕಿ ಅಂಶಗಳನ್ನು ನಿರ್ಧರಿಸಲಾಗಿದೆ.

ಕೇಂದ್ರ ಸರಕಾರ ಇತ್ತಿಚಿನ ದಿನಗಳಲ್ಲಿ ಸಂಘಟಿತ ವಲಯಗಳಲ್ಲಿನ ಉದ್ಯೋಗ ಸೃಷ್ಟಿ ಮತ್ತು ನಷ್ಟಗಳ ಅಂದಾಜು ಮಾಡಲು ನೌಕರರ ಭವಿಷ್ಯ ನಿಧಿ ಸಂಘಟನೆಯ ಅಂಕಿ ಅಂಶಗಳನ್ನು ಪ್ರಮುಖ ಅಳತೆಗೋಲಾಗಿ ಬಳಸುತ್ತಿದೆ. ಈ ಅಂಕಿ ಅಂಶಗಳು ಹೇಳುವಂತೆ 2017ರ ಸೆಪ್ಟೆಂಬರ್‌ ತಿಂಗಳಿನಿಂದ ಸುಮಾರು 1.07 ಕೋಟಿ ಉದ್ಯೋಗಿಗಳು ನೌಕರರ ಭವಿಷ್ಯ ನಿಧಿ ಸಂಘಟನೆಗೆ ಸೇರ್ಪಡೆಯಾಗಿದ್ದಾರೆ. 60.04 ಲಕ್ಷ ಮಂದಿ ಇಪಿಎಫ್‌ಓನಿಂದ ಹೊರ ಹೋಗಿದ್ದು, ಬೇರೆ ಯಾವ ಸಂಘಟಿತ ವಲಯಗಳಲ್ಲಿ ಉದ್ಯೋಗ ಹುಡುಕಿಕೊಂಡಿಲ್ಲ.

ಈ ಕುರಿತು ಲೈವ್‌ ಮಿಂಟ್‌ ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿರುವ ಸರಕಾರಿ ಅಧಿಕಾರಿಯೊಬ್ಬರು, “ಭಾರತದಲ್ಲಿ ಉದ್ಯೋಗಗಳನ್ನು ಅಳೆಯುವ ಸಲುವಾಗಿ ಯಾವುದೇ ನಿರ್ದಿಷ್ಟ ಮಾನದಂಡಗಳಿಲ್ಲ. ಬಳಕೆಯಾಗುತ್ತಿರುವ ಹಲವು ಮಾನದಂಡಗಳಲ್ಲಿ ಇಪಿಎಫ್‌ಓ ಕೂಡ ಒಂದು. ಹೊಸದಾಗಿ ನೌಕರರ ಭವಿಷ್ಯ ನಿಧಿ ಸಂಘಟನೆಗೆ ಸೇರ್ಪಡೆಗೊಂಡವರು ಮಾಡುತ್ತಿರುವ ಉದ್ಯೋಗಗಳನ್ನು ಹೊಸ ಉದ್ಯೋಗಗಳು ಎಂದು ಕರೆದರೆ, ಸಂಘಟನೆಯಿಂದ ಹೊರ ಹೋದವರ ಸಂಖ್ಯೆಯನ್ನು ನಷ್ಟ ಎಂದು ಪರಿಗಣಿಸಬೇಕಾಗುತ್ತದೆ,” ಎಂದಿದ್ದಾರೆ.

ಅಧಿಕಾರಿಗಳು ಹೇಳುವಂತೆ ಈ ಲೆಕ್ಕಾಚಾರದಲ್ಲಿ ಹಲವಾರು ಅಂಕಿ ಅಂಶಗಳು ಸೇರಿಕೊಂಡಿವೆ. ಜವಳಿ ಉದ್ದಿಮೆ, ನಿರ್ಮಾಣ ವಲಯ ಇತ್ಯಾದಿಗಳಲ್ಲಿ ನಿಗದಿತ ಅವಧಿಗೆ ಎಂದು ದುಡಿಯುತ್ತಿರುವ ಗುತ್ತಿಗೆ ಕಾರ್ಮಿಕರಿದ್ದಾರೆ. ಇಂತಹ ಗುತ್ತಿಗೆ ಕಾರ್ಮಿಕರಲ್ಲಿ ಹಲವಾರು ಜನ ಸಂಬಳದಲ್ಲಿನ ಏರಿಳಿತಗಳಿಂದ ಔಪಚಾರಿಕ ವಲಯವನ್ನು ಬಿಟ್ಟು ಅನೌಪಚಾರಿಕ ವಲಯಗಳಲ್ಲಿನ ಉದ್ಯೋಗಗಳಿಗೆ ತೆರಳುತ್ತಾರೆ. ಈ ದೃಷ್ಟಿಯಿಂದ ನೋಡುವುದಾದರೆ ಇಪಿಎಫ್‌ಓ ಅಡಿಯಲ್ಲಿ ದೊರೆತ ಅಂಕಿ ಅಂಶಗಳನ್ನು ನಿಖರವಾದ ಮಾಹಿತಿ ಎನ್ನಲಾಗುವುದಿಲ್ಲ.

ಉತ್ತಮ ಉದ್ಯೋಗಗಳು ಎನ್ನುವುದು ಭಾರತದ ಉದ್ಯೋಗ ಮಾರುಕಟ್ಟೆಯಲ್ಲಿ ದೊಡ್ಡ ಸಮಸ್ಯೆಯಾಗಿರುವ ವಿಷಯ. ಅಂತರರಾಷ್ಟ್ರೀಯ ಕಾರ್ಮಿಕ ಸಂಘಟನೆ, ವಿಶ್ವ ಬ್ಯಾಂಕ್‌ ಸೇರಿದಂತೆ ಹಲವಾರು ಅಂತರರಾಷ್ಟ್ರೀಯ ಏಜೆನ್ಸಿಗಳು ಜಾಗತಿಕ ಮಟ್ಟದಲ್ಲಿಯೂ ಕೂಡ ಗುಣಮಟ್ಟದ ಉದ್ಯೋಗಗಳ ಸಂಖ್ಯೆ ಕಡಿಮೆ ಎನ್ನುತ್ತವೆ. ಈ ಸಮಸ್ಯೆಯನ್ನು ಪರಿಹರಿಸಲು ಮುಂದಾಗಿರುವುದಾಗಿ ಹೇಳುತ್ತವೆ.

ಭಾರತದ ಮಟ್ಟಿಗೆ ಸೂಕ್ತ ಕೌಶಲ್ಯಕ್ಕೆ ಸರಿಯಾದ ಉದ್ಯೋಗ ಇಲ್ಲದಿರುವುದು ವ್ಯಾಪಕವಾಗಿ ಹರಡಿರುವ ಸಮಸ್ಯೆ. ಉದ್ಯೋಗ ಭದ್ರತೆ ಇಲ್ಲದೆ ದುಡಿಯುತ್ತಿರುವ ಕೋಟ್ಯಾಂತರ ಮಂದಿ ಭಾರತದಲ್ಲಿದ್ದಾರೆ. ಹೀಗೆ ನೋಡಿದಾಗ ಇಪಿಎಫ್‌ಓನ ಅಂಕಿ ಅಂಶಗಳನ್ನು ಉದ್ಯೋಗ ಸೃಷ್ಟಿ ಎಂದು ಪರಿಗಣಿಸಲಾಗುವುದಿಲ್ಲ. “ಉದ್ಯೋಗ ಸೃಷ್ಟಿ ಎಂದರೆ ಕೇವಲ ಉದ್ಯೋಗಗಳನ್ನು ನೀಡುವುದಲ್ಲ. ಉದ್ಯೋಗ ಭದ್ರತೆಯನ್ನೂ ಕೂಡ ಒದಗಿಸುವುದು,” ಎನ್ನುತ್ತಾರೆ ಜೆಎನ್‌ಯು ಪ್ರಾಧ್ಯಾಪಕ ಹಿಮಾಂಶು.

“ನೌಕರರ ಭವಿಷ್ಯ ನಿಧಿ ಸಂಘಟನೆಯಿಂದ ಹೊರಹೋದ ಉದ್ಯೋಗಿಗಳು ಇಪಿಎಫ್‌ಓ ಇಲ್ಲದ ಮತ್ತೊಂದು ವಯಲದಲ್ಲಿ ಉದ್ಯೋಗ ಹುಡುಕಿಕೊಂಡಿರಬಹುದು. ಅಥವಾ ಸ್ವಂತ ಉದ್ಯೋಗವನ್ನು ಪ್ರಾರಂಭಿಸಿರಬಹುದು. ಇವೆರಡನ್ನೂ ಬಿಟ್ಟು ಹೊಸ ಕೆಲಸಕ್ಕಾಗಿ ಅಲೆದಾಟ ನಡೆಸುತ್ತಿರಬಹುದು. ಹೊಸಾದಾಗಿ ಇಪಿಎಫ್‌ಓ ಭಾಗವಾದವರ ಕತೆಯೂ ಹೀಗೆಯೇ ಆಗಿರುತ್ತದೆ. ಆದ್ದರಿಂದ ಇಪಿಎಫ್‌ಓ ಅಂಕಿ ಅಂಶಗಳನ್ನು ಉದ್ಯೋಗ ಸೃಷ್ಟಿಯ ಅಂಕಿ ಅಂಶಗಳನ್ನಾಗಿ ಪರಿಗಣಿಸುವುದು ಕಷ್ಟ ಸಾಧ್ಯ,” ಎನ್ನುತ್ತಾರೆ ಹಿಮಾಂಶು.

ಈ ಹಿಂದೆ ಜುಲೈ ತಿಂಗಳಿನಲ್ಲಿ ಕೂಡ ಕೇಂದ್ರ ಸರಕಾರ ಇಪಿಎಫ್‌ಓನ 9 ತಿಂಗಳ ಅಂಕಿ ಅಂಶಗಳನ್ನು ನೀಡಿತ್ತು. ಆ ಅಂಕಿ ಅಂಶಗಳ ಪ್ರಕಾರ 2018ರ ಮೇ ತಿಂಗಳ ಅಂತ್ಯದ ವೇಳೆಗೆ 9 ತಿಂಗಳ ಅವಧಿಯಲ್ಲಿ 44.7 ಲಕ್ಷ ಮಂದಿ ಇಪಿಎಫ್‌ಓಗೆ ಸೇರಿಕೊಂಡಿದ್ದರು. ಈಗ ನೀಡಿರುವ ಅಂಕಿ ಅಂಶಗಳ ಪ್ರಕಾರ ಜೂನ್‌ ತಿಂಗಳ ಅಂತ್ಯದವರೆಗೆ ಹೊಸದಾಗಿ ಸೇರ್ಪಡೆಯಾದವರ ಸಂಖ್ಯೆ 96.9 ಲಕ್ಷ ಎಂದಿದೆ. ಒಂದೆ ತಿಂಗಳ ಅವಧಿಯಲ್ಲಿ ಮೊದಲು ಇದ್ದಿದ್ದಕ್ಕೂ 2 ಪಟ್ಟು ಹೆಚ್ಚು ಜನ ಹೊಸದಾಗಿ ನೊಂದಾವಣೆಗೊಂಡಿರುವುದು ಆಶ್ಚರ್ಯ ಮೂಡಿಸುತ್ತದೆ.