LIVE: ಕರ್ನಾಟಕ ವಿಧಾನಸಭಾ ಚುನಾವಣಾ ಫಲಿತಾಂಶ; ಪ್ರಜಾ ತೀರ್ಪು ಏನನ್ನುತ್ತೆ?
LIVE
live

LIVE: ಕರ್ನಾಟಕ ವಿಧಾನಸಭಾ ಚುನಾವಣಾ ಫಲಿತಾಂಶ; ಪ್ರಜಾ ತೀರ್ಪು ಏನನ್ನುತ್ತೆ?

ಹೇಗೇ ನೋಡಿದರೂ ಇದು ಒನ್‌ಸೈಡೆಡ್ ತೀರ್ಪು. ಇದೇ ಟ್ರೆಂಡ್ ಮುಂದುವರಿದಿದ್ದೇ ಆದರೆ ಬಿಜೆಪಿ ಸಾಮಾನ್ಯ ಬಹುಮತ ಪಡೆದು ಹೊಸ ಸರಕಾರದ ರಚನೆ ಮಾಡಲಿದೆ.

ಸಮಾಚಾರ ಲೈವ್‌ಗೆ ಸ್ವಾಗತ:

2019ರ ಲೋಕಸಭಾ ಚುನಾವಣೆಯ ದಿಕ್ಸೂಚಿ ಎಂದೇ ಕರೆಸಿಕೊಂಡಿರುವ ಕರ್ನಾಟಕ ವಿಧಾನಸಭಾ ಚುನಾವಣೆಯ ಫಲಿತಾಂಶ ಇಂದು ಹೊರಬೀಳಲಿದೆ.

ಬಿಜೆಪಿಯಿಂದ 222, ಕಾಂಗ್ರೆಸ್‌ ಪಕ್ಷದಿಂದ 220, ಜೆಡಿಎಸ್‌ ಪಕ್ಷದಿಂದ 199, ಬಿಎಸ್‌ಪಿಯಿಂದ 18 ಅಭ್ಯರ್ಥಿಗಳು ಸೇರಿದಂತೆ ಒಟ್ಟು 2,600ಕ್ಕೂ ಹೆಚ್ಚು ಚುನಾವಣಾ ಅಭ್ಯರ್ಥಿಗಳ ರಾಜಕೀಯ ಭವಿಷ್ಯದ ತೀರ್ಪು ಇದು. ಈ ಮೂಲಕ ರಾಜ್ಯದ 15ನೇ ವಿಧಾನಸಭೆಗೆ ಯಾವ ಪಕ್ಷ, ಯಾವ ಅಭ್ಯರ್ಥಿಯ ಆಯ್ಕೆ ಆಗುತ್ತಾರೆ ಎಂಬುದನ್ನು ಈ ಫಲಿತಾಂಶ ತಿಳಿಸಲಿದೆ.

ಮುಂದಿನ ಕೆಲವು ಗಂಟೆಗಳ ಕಾಲ ‘ಸಮಾಚಾರ’ದ ಲೈವ್‌ ಅಪ್‌ಡೇಟ್ಸ್‌ ನಿಮಗಿಲ್ಲಿ ಸಿಗಲಿದೆ. ಕ್ಷಣ ಕ್ಷಣ ಮಾಹಿತಿ ಜತೆಗೆ, ಫಲಿತಾಂಶದ ಸುತ್ತಲಿನ ಬೆಳವಣಿಗೆಗಳನ್ನು ಒಳನೋಟಗಳ ಜತೆಗೆ ನೀಡಲಾಗುವುದು. ಪ್ರತಿ ಸಾರಿ ಇಲ್ಲಿಗೆ ಬಂದಾಗ ಒಮ್ಮೆ ರಿಫ್ರೆಶ್ ಮಾಡುವುದನ್ನು ಮರೆಯದಿರಿ.

Last updated

ಮತ ಎಣಿಕೆಗೆ ಚಾಲನೆ:

ವಿಧಾನಸಭಾ ಚುನಾವಣೆಯ ಮತ ಎಣಿಕೆ ಕಾರ್ಯ ಪ್ರಾರಂಭಗೊಂಡಿದೆ. ಮೈಸೂರಿನಲ್ಲಿನ ಮತ ಎಣಿಕೆ ಕೇಂದ್ರವನ್ನು ತೆರೆದು ಮತ ಎಣಿಕೆಗೆ ಚಾಲನೆ ನೀಡಲಾಗಿದೆ. ಮೊದಲಿಗೆ ಅಂಚೆ ಮತಗಳ ಎಣಿಕೆಯನ್ನು ಪ್ರಾರಂಭಿಸಲಾಗುತ್ತದೆ.

Last updated

ಒಟ್ಟು 38 ಮತ ಎಣಿಕೆ ಕೇಂದ್ರಗಳು:

ರಾಜ್ಯದೆಲ್ಲೆಡೆ ಒಟ್ಟು 38 ಮತ ಎಣಿಕೆ ಕೇಂದ್ರಗಳನ್ನು ತೆರೆಯಲಾಗಿದೆ. ಬೆಂಗಳೂರಿನಲ್ಲಿ 5 ಕೇಂದ್ರಗಳು, ತುಮಕೂರಿನಲ್ಲಿ 3 ಮತ ಎಣಿಕೆ ಕೇಂದ್ರ , ಚಿತ್ರದುರ್ಗ, ಮೈಸೂರು ಹಾಗೂ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರಗಳಲ್ಲಿ 2, ಇನ್ನುಳಿದ ಜಿಲ್ಲೆಗಳಲ್ಲಿ ತಲಾ ಒಂದು ಮತ ಎಣಿಕೆ ಕೇಂದ್ರಗಳನ್ನು ತೆರೆಯಲಾಗಿದೆ. ಈ ಮತ ಎಣಿಕೆ ಕೇಂದ್ರಗಳಿಗೆ ಬಿಗಿ ಭದ್ರತೆಯನ್ನು ಒದಗಿಸಲಾಗಿದ್ದು, ಸ್ಟ್ರಾಂಗ್‌ ರೂಮ್‌ ಎಂದು ಕರೆಯಲಾಗಿದೆ.

Last updated

ರಾಜ್ಯದ 222 ವಿಧಾನಸಭಾ ಕ್ಷೇತ್ರಗಳ ಮತ ಎಣಿಕೆ:

ರಾಜ್ಯದ 224 ವಿಧಾನ ಸಭಾ ಕ್ಷೇತ್ರಗಳ ಪೈಕಿ 222 ಕ್ಷೇತ್ರಗಳ ಚುನಾವಣಾ ಅಭ್ಯರ್ಥಿಗಳ ಭವಿಷ್ಯ ಇಂದು ನಿರ್ಧಾರವಾಗಲಿದೆ. ಮಧ್ಯ ಕರ್ನಾಟಕ ಭಾಗದ 21 ಕ್ಷೇತ್ರಗಳು, ಬೆಂಗಳೂರು ಭಾಗದ 30, ಮುಂಬೈ ಕರ್ನಾಟಕದ 50, ಹಳೇ ಮೈಸೂರು ಭಾಗದ 57 ಕ್ಷೇತ್ರಗಳು, ಹೈದರಾಬಾದ್‌ ಕರ್ನಾಟಕದ 40 ಹಾಗೂ ಕರಾವಳಿ ಭಾಗದ 24 ವಿಧಾನ ಸಭಾ ಕ್ಷೇತ್ರಗಳ ಶಾಸಕರು ಯಾರು ಎನ್ನುವುದು ಇಂದು ತೀರ್ಮಾನಗೊಳ್ಳಲಿದೆ. ಮಧ್ಯಾಹ್ನದ ವೇಳೆಗೆ ಸ್ಪಷ್ಟ ಚಿತ್ರಣ ದೊರೆಯಲಿದೆ.

Last updated

ಗೆಲುವಿಗಾಗಿ ಹೋಮ:

ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಗೆಲುವು ತಮ್ಮದಾಗಲಿ ಎಂದು ಕಾಂಗ್ರೆಸ್‌ ಹವನವನ್ನು ನಡೆಸುತ್ತಿದೆ. ದೆಹಲಿಯಲ್ಲಿನ ಕಾಂಗ್ರೆಸ್‌ ಕಚೇರಿಯ ಮುಂದೆ ಕಾರ್ಯಕರ್ತರು ಹೋಮ ನಡೆಸಿ, ದೇವರಿಗೆ ಮೊರೆ ಸಲ್ಲಿಸದ್ದಾರೆ.

Last updated

ಎರಡರಲ್ಲಿ ಕಾಂಗ್ರೆಸ್‌, 1ರಲ್ಲಿ ಬಿಜೆಪಿ ಮುನ್ನಡೆ:

ರಾಜ್ಯದ 38 ಕ್ಷೇತ್ರಗಳಲ್ಲಿ ಮತ ಎಣಿಕೆ ಆರಂಭಗೊಂಡಿದೆ. ಹೊಳೆನರಸೀಪುರದಲ್ಲಿ ಎಚ್.ಡಿ.ರೇವಣ್ಣ, ಹರಿಹರ ಮತ್ತು ಜಗಳೂರಿನಲ್ಲಿ ಕಾಂಗ್ರೆಸ್‌, ಹರಪನಹಳ್ಳಿಯಲ್ಲಿ ಬಿಜೆಪಿ ಮುನ್ನಡೆ ಸಾದಿಸಿವೆ.

Last updated

ಕಾಂಗ್ರೆಸ್‌ ಮುನ್ನಡೆ:

ಒಟ್ಟು 12 ಕ್ಷೇತ್ರಗಳಲ್ಲಿ ಕಾಂಗ್ರೆಸ್‌, 3ರಲ್ಲಿ ಬಿಜೆಪಿ ಹಾಗೂ 2ರಲ್ಲಿ ಜೆಡಿಎಸ್‌ ಮುನ್ನಡೆ ಸಾಧಿಸುತ್ತಿವೆ. ರಾಮನಗರದಲ್ಲಿ ಎಚ್‌.ಡಿ.ಕುಮಾರಸ್ವಾಮಿ ಮುನ್ನಡೆ ಸಾಧಿಸಿದ್ದಾರೆ.

Last updated

ಪ್ರಾರಂಭಿಕ ಮುನ್ನಡೆ ಕಾಣುತ್ತಿರುವ ಕಾಂಗ್ರೆಸ್‌:

ಮತ ಎಣಿಕೆಯ ಪ್ರಾರಂಭದಲ್ಲಿಯೇ ಕಾಂಗ್ರೆಸ್‌ ಭರ್ಜರಿ ಮುನ್ನಡೆಯನ್ನು ಕಾಣುತ್ತಿದೆ. 18 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದ್ದು, ಬಿಜೆಪಿ 4 ಕ್ಷೇತ್ರಗಳಲ್ಲಿ ಮುಂದಿದೆ. ಜೆಡಿಎಸ್ 3 ಕ್ಷೇತ್ರಗಳಲ್ಲಿ ಮುಂದಿದೆ. ಇದು ಆರಂಭಿಕ ಮುನ್ನಡೆಯಷ್ಟೇ ಆಗಿದ್ದು, ಮುಂದಿನ ಗಂಟೆಗಳಲ್ಲಿ ಈ ಚಿತ್ರಣ ಸಂಪೂರ್ಣವಾಗಿ ಬದಲಾಗಬಹುದು.

Last updated

ಸಿಎಂ ಪುತ್ರನಿಗೆ ಆರಂಭಿಕ ಮುನ್ನಡೆ:

ವರುಣಾ ಕ್ಷೇತ್ರದಿಂದ ಅದೃಷ್ಟ ಪರೀಕ್ಷೆಗಿಳಿದಿದ್ದ ಸಿದ್ಧರಾಮಯ್ಯರ ಪುತ್ರ ಡಾ.ಯಂತೀದ್ರ ಆರಂಭಿಕ ಮುನ್ನಡೆಯನ್ನು ಕಂಡುಕೊಂಡಿದ್ದಾರೆ. ಉತ್ತರ ಕನ್ನಡ ಜಿಲ್ಲೆಯ ಆರೂ ಕ್ಷೇತ್ರಗಳಲ್ಲಿ ಕಾಂಗ್ರೆಸ್‌ ಮುನ್ನಡೆ ಸಾಧಿಸಿದೆ.

Last updated

ಕೆಲವೆಡೆ ಅರ್ಧ ಗಂಟೆ ತಡವಾದ ಮತ ಎಣಿಕೆ:

ಕೆಲವು ಜಿಲ್ಲಾ ಕೇಂದ್ರಗಳಲ್ಲಿನ ಮತ ಎಣಿಕೆ ಕೇಂದ್ರಗಳಲ್ಲಿ ಇನ್ನೂ ಮತ ಎಣಿಕೆ ಕಾರ್ಯ ಪ್ರಾರಂಭವಾಗಿಲ್ಲ. ಯಾದಗಿರಿ, ಬೀದರ್‌ ಹಾಗೂ ಬೆಂಗಳೂರು ಗ್ರಾಮಾಂತರಗಳು ಈ ಪಟ್ಟಿಯಲ್ಲಿವೆ.

Last updated

ಮುನ್ನಡೆ ಸಾಧಿಸುತ್ತಿರುವ ಕಾಂಗ್ರೆಸ್:

ಆರಂಭಿಕ ಹಂತದಲ್ಲೇ ಕಾಂಗ್ರೆಸ್‌ ಎರಡೂ ಪಕ್ಷಗಳನ್ನು ಹಿಂದಿಕ್ಕಿ ಮುನ್ನಡೆಯುತ್ತಿದೆ. ಮಂಗಳೂರಿನ 4 ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಹಾಗೂ 1 ಕ್ಷೇತ್ರದಲ್ಲಿ ಬಿಜೆಪಿ ಮುನ್ನಡೆಯಲ್ಲಿವೆ. ಒಟ್ಟು 21 ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಮುಂದಿದ್ದು, 9 ಕ್ಷೇತ್ರಗಳಲ್ಲಿ ಬಿಜೆಪಿ ಮುನ್ನಡೆಯಲ್ಲಿದೆ.

Last updated

ಚಾಮುಂಡೇಶ್ವರಿಯಲ್ಲಿ ಜಿ.ಟಿ.ದೇವೇಗೌಡರಿಗೆ ಮುನ್ನಡೆ:

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಸಿದ್ಧರಾಮಯ್ಯ ಆರಂಭಿಕ ಹಿನ್ನಡೆಯನ್ನು ಕಂಡಿದ್ದಾರೆ. ಜೆಡಿಎಸ್‌ನ ಜಿ.ಟಿ ದೇವೇಗೌಡ ಮೊದಲನೇ ಸುತ್ತಿನಲ್ಲಿ 3479 ಮತಗಳಿಂದ ಮುನ್ನಡೆಯಲ್ಲಿದ್ದಾರೆ.

Last updated

ಸಮಬಲದ ಪೈಪೋಟಿ ನಡೆಸುತ್ತಿರುವ ಕಾಂಗ್ರೆಸ್‌ ಹಾಗೂ ಬಿಜೆಪಿ:

ಸಧ್ಯ 65 ಕ್ಷೇತ್ರಗಳ ಮಾಹಿತಿ ಲಭ್ಯವಾಗುತ್ತಿದ್ದು 25 ಕ್ಷೇತ್ರಗಳಲ್ಲಿ ಬಿಜೆಪಿ ಮುನ್ನಡೆ ಸಾಧಿಸುತ್ತಿದೆ. ಕಾಂಗ್ರೆಸ್‌ 25 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದ್ದು, ಜೆಡಿಎಸ್ 10 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದೆ. ಕಾಂಗ್ರೆಸ್‌ ಮತ್ತು ಬಿಜೆಪಿಗಳು ಸಮಬಲದ ಪೈಪೋಟಿ ನಡೆಸುತ್ತಿವೆ.

Last updated

ಬಾದಾಮಿಯಲ್ಲಿ ಮುನ್ನಡೆ ಕಾಣುತ್ತಿರುವ ಸಿದ್ಧರಾಮಯ್ಯ:

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಹಿನ್ನಡೆಯನ್ನು ಕಾಣುತ್ತಿರುವ ಸಿದ್ಧರಾಮಯ್ಯ, ಈಗ ಬಾದಾಮಿ ಕ್ಷೇತ್ರದಲ್ಲಿ ಮುನ್ನಡೆಯಲ್ಲಿದ್ದಾರೆ. 384 ಅಂಚೆ ಮತಗಳಿಂದ ಸಿದ್ಧರಾಮಯ್ಯ ಮುಂದಿದ್ದಾರೆ.

Last updated

ಮಾಧ್ಯಮದವರನ್ನು ಕೂಡಿಹಾಕಿರುವ ಅಧಿಕಾರಿಗಳು:

ಬೆಂಗಳೂರಿನ ಬಿಎಂಎಸ್‌ ಕಾಲೇಜಿನಲ್ಲಿ ಮತ ಎಣಿಕೆ ಅಧಿಕಾರಿಗಳು ಮಾಧ್ಯಮದವರನ್ನು ಕೂಡಿ ಹಾಕಿದ್ದಾರೆ ಎನ್ನಲಾಗುತ್ತಿದೆ. ಅಂಚೆ ಎಣಿಕೆ ಮಾಹಿತಿಯನ್ನು ನೀಡದೇ ಕೂಡಿಹಾಕಲಾಗಿದೆ ಎನ್ನುವ ಮಾಹಿತಿ ಲಭ್ಯವಾಗಿದೆ.

Last updated

ಮುನ್ನಡೆ ಕಾಣುತ್ತಿರುವ ಬಿಜೆಪಿ:

ಪ್ರಾರಂಭಿಕ ಹಂತದಲ್ಲಿ ಮುನ್ನಡೆ ಕಂಡುಕೊಂಡ ಕಾಂಗ್ರೆಸ್‌ ಈಗ ಹಿಂದೆ ಬಿದ್ದಿದೆ. ಮುಂದಿರುವ ಬಿಜೆಪಿ 37 ಕ್ಷೇತ್ರಗಳಲ್ಲಿ ಮುನ್ನಡೆಯಲ್ಲಿದೆ. ಕಾಂಗ್ರೆಸ್‌ 27 ಕ್ಷೇತ್ರಗಳಲ್ಲಿ ಮುಂದಿದ್ದು, ಜೆಡಿಎಸ್‌ 14 ಸ್ಥಾನಗಳಲ್ಲಿ ಮುಂದಿದೆ.

Last updated

ಗೆಲುವಿಗಾಗಿ ದೇವರ ಮೊರೆ ಹೋದ ಬಿ.ಎಸ್.ಯಡಿಯೂರಪ್ಪ:

ಬಿಜೆಪಿಯ ಸಿಎಂ ಅಭ್ಯರ್ಥಿ ಬಿ.ಎಸ್.ಯಡಿಯೂರಪ್ಪ ದೇವರ ಮೊರೆ ಹೋಗಿದ್ದಾರೆ. ಶಿಕಾರಿಪುರದಲ್ಲಿ 5700 ಮತಗಳಿಂದ ಮುನ್ನಡೆ ಕಾಣುತ್ತಿದ್ದಾರೆ.

Last updated

ಮುನ್ನಡೆ ಸಾಧಿಸುತ್ತಿರುವ ಬಿಜೆಪಿ:

ಬಿಜೆಪಿ 73 ಕ್ಷೇತ್ರಗಳಲ್ಲಿ ಮುಂದಿದ್ದು, ಕಾಂಗ್ರೆಸ್‌ 53 ಕ್ಷೇತ್ರಗಳಲ್ಲಿ ಮುಂದಿದೆ. ಜೆಡಿಎಸ್‌ 21 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದೆ.

Last updated

ಚಾಮುಂಡೇಶ್ವರಿಯಲ್ಲಿ ಭಾರಿ ಹಿನ್ನಡೆ ಕಾಣುತ್ತಿರುವ ಸಿದ್ಧರಾಮಯ್ಯ:

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಮೊದಲ ಸುತ್ತಿನಿಂದಲೂ ಸಿದ್ಧರಾಮಯ್ಯ ಹಿನ್ನಡೆ ಕಾಣುತ್ತಿದ್ದಾರೆ. 4 ಸುತ್ತಿನ ಮತ ಎಣಿಕೆಯ ನಂತರ ಜೆಡಿಎಸ್‌ನ ಜಿ.ಟಿ.ದೇವೇಗೌಡ 11,624 ಮತಗಳಿಂದ ಸಿದ್ಧರಾಮಯ್ಯನವರನ್ನು ಹಿಂದಿಕ್ಕಿದ್ದಾರೆ. ಬಾದಾಮಿ ಕ್ಷೇತ್ರದಲ್ಲಿ 1575 ಮತಗಳಿಂದ ಸಿದ್ಧರಾಮಯ್ಯ ಮಂದಿದ್ದಾರೆ.

Last updated

ಸವದತ್ತಿ ಎಲ್ಲಮ್ಮ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿ ಮುನ್ನಡೆ:

ಎಲ್ಲೆಡೆ ಕಾಂಗ್ರೆಸ್‌ ಬಿಜೆಪಿ ಜಿದ್ದಾಜಿದ್ದು ಕಂಡುಬಂದರೆ ಸವದತ್ತಿ ಎಲ್ಲಮ್ಮ ವಿಧಾನಸಭಾ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿ ಆನಂದ್‌ ಚೋಪ್ರಾ ಮುನ್ನಡೆಯನ್ನು ಗಳಿಸಿಕೊಂಡಿದ್ದಾರೆ.

Last updated

ಸರಿಸುಮಾರು 100 ಕ್ಷೇತ್ರಗಳ ಹತ್ತಿರಕ್ಕೆ ಬಂದ ಬಿಜೆಪಿ:

ಸ್ಪಷ್ಟ ಬಹುಮತದತ್ತ ಭಾರತೀಯ ಜನತಾ ಪಾರ್ಟಿ ದಾಪುಗಾಲು ಹಾಕುತ್ತಿದೆ. ಈವರೆಗೆ ಬಿಜೆಪಿ 96 ಕ್ಷೇತ್ರಗಳಲ್ಲಿ ಮುನ್ನಡೆ ಕಂಡುಕೊಂಡಿದೆ. ಕಾಂಗ್ರೆಸ್‌ 59 ಕ್ಷೇತ್ರಗಳಲ್ಲಿ ಮಾತ್ರ ಮುನ್ನಡೆ ಕಾಣಲು ಸಾಧ್ಯವಾಗಿದ್ದು, ಜೆಡಿಎಸ್‌ 32 ಕ್ಷೇತ್ರದಲ್ಲಿ ಮುನ್ನಡೆಯಲ್ಲಿದೆ.

Last updated

ಮೂಡಬಿದ್ರೆ ಕ್ಷೇತ್ರದಲ್ಲಿ ಭಾರಿ ಮುನ್ನಡೆ ಗಳಿಸಿದ ಬಿಜೆಪಿ ಅಭ್ಯರ್ಥಿ:

ಮೂಡಬಿದ್ರೆಯ ಬಿಜೆಪಿ ಅಭ್ಯರ್ಥಿ 17,317 ಮತಗಳ ಭಾರಿ ಅಂತರದಲ್ಲಿ ಮುನ್ನಡೆ ಸಾಧಿಸಿದ್ದಾರೆ. ಕಾಂಗ್ರೆಸ್‌ ಅಭ್ಯರ್ಥಿ ಅಭಯಚಂದ್ರ ಜೈನ್‌ ಹಿನ್ನಡೆಯಲ್ಲಿದ್ದಾರೆ. ಮೂಡಬಿದ್ರೆಯಿಂದಲೇ ಬಿಜೆಪಿ ಜಯಭೇರಿ ಆರಂಭಿಸುವಂತೆ ಕಂಡುಬರುತ್ತಿದೆ.

Last updated

‘ಜೆಡಿಎಸ್‌ನಿಂದ ಭಾರೀ ಪ್ರಮಾಣದಲ್ಲಿ ಹಣ ಹಂಚಿಕೆ’:

“ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಜೆಡಿಎಸ್ ಭಾರೀ ಪ್ರಮಾಣದಲ್ಲಿ ಹಣ ಹಂಚಿಕೆ ಮಾಡಿದೆ. ಸೊಸೈಟಿ ಕಾರ್ಯದರ್ಶಿ ಎಂದು ಹೇಳಿಕೊಳ್ಳುವ ಜೆಡಿಎಸ್ ಅಭ್ಯರ್ಥಿಗೆ ಅಷ್ಟೊಂದು ಹಣ ಹೇಗೆ ಬಂತು? ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಜೆಡಿಎಸ್‌ಗೆ ಬಿಜೆಪಿ ಬಹಿರಂಗವಾಗಿ ಬೆಂಬಲ ನೀಡಿದೆ” ಎಂದು ಸಿದ್ದರಾಮಯ್ಯ ಆರೋಪಿಸಿದ್ದಾರೆ.

Last updated

ಎಚ್‌.ಡಿ. ಕುಮಾರಸ್ವಾಮಿ ಮುನ್ನಡೆ:

ರಾಮನಗರ ಮತ್ತು ಚನ್ನಪಟ್ಟಣ ಎರಡೂ ಕ್ಷೇತ್ರಗಳಲ್ಲಿ ಜೆಡಿಎಸ್‌ನ ಎಚ್.ಡಿ. ಕುಮಾರಸ್ವಾಮಿ ಮುನ್ನಡೆ.

Last updated

ನೂರು ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದ ಬಿಜೆಪಿ:

ಬಿಬೆಪಿ 100 ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸುತ್ತಿದೆ. ಕಾಂಗ್ರೆಸ್‌ 65 ಸ್ಥಾನಗಳಲ್ಲಿ ಮುಂದಿದ್ದು, ಜೆಡಿಎಸ್‌ 39 ಕ್ಷೇತ್ರಗಳಲ್ಲಿ ಮುಂದಿದೆ.

Last updated

ಮೇಲುಕೋಟೆ ಕ್ಷೇತ್ರದಲ್ಲಿ ಪುಟ್ಟರಾಜು ಮುನ್ನಡೆ:

ಮಂಡ್ಯ ಜಿಲ್ಲೆ ಮೇಲುಕೋಟೆ ವಿಧಾನಸಭಾ ಕ್ಷೇತ್ರದಲ್ಲಿ ಜೆಡಿಎಸ್‌ನ ಸಿ.ಎಸ್‌. ಪುಟ್ಟರಾಜು ಮುನ್ನಡೆಯಲ್ಲಿದ್ದಾರೆ. ಸ್ವರಾಜ್‌ ಇಂಡಿಯಾ ಪಕ್ಷದ ದರ್ಶನ್‌ ಪುಟ್ಟಣ್ಣಯ್ಯಗೆ ಹಿನ್ನಡೆ.

Last updated

ಖಾತೆ ತೆರೆದ ಬಿಜೆಪಿ:

ಮೂಡಬಿದರೆಯಲ್ಲಿ ಬಿಜೆಪಿ ಮೊದಲ ಗೆಲುವು ದಾಖಲಿಸಿದೆ. ಬಿಜೆಪಿ ಅಭ್ಯರ್ಥಿ ಉಮಾನಾಥ್‌ ಕೋಟ್ಯಾನ್‌ ಮೊದಲಬಾರಿಗೆ ಜಯ ಕಂಡಿದ್ದಾರೆ. 22,000ಕ್ಕೂ ಅಧಿಕ ಮತಗಳಿಂದ ಕಾಂಗ್ರೆಸ್‌ ಅಭ್ಯರ್ಥಿ ಅಭಯಚಂದ್ರ ಜೈನ್‌ರನ್ನು ಸೋಲಿಸಿದ್ದಾರೆ.

Last updated

ಬೆಳಗ್ಗೆ 11:30ರ ವೇಳೆಗೆ ಸ್ಪಷ್ಟ ಚಿತ್ರಣ ದೊರೆಯಲಿದೆ ಎಂದ ಮಲ್ಲಿಖಾರ್ಜುನ ಖರ್ಗೆ:

Last updated

ಬಹುಮತದತ್ತ ಬಿಜೆಪಿ

ಹೇಗೇ ನೋಡಿದರೂ ಇದು ಒನ್‌ಸೈಡೆಡ್ ತೀರ್ಪು. ಇದೇ ಟ್ರೆಂಡ್ ಮುಂದುವರಿದಿದ್ದೇ ಆದರೆ ಬಿಜೆಪಿ ಸಾಮಾನ್ಯ ಬಹುಮತ ಪಡೆದು ಹೊಸ ಸರಕಾರದ ರಚನೆ ಮಾಡಲಿದೆ. ಯಡಿಯೂರಪ್ಪ ತಾವು ಹೇಳಿದಂತೆ ಮೇ. 17 ಅಥವಾ ೧೮ರಂದು ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

ಈ ಹೊತ್ತಿಗೆ ಹೊರಬಿದ್ದಿರುವ ಮತ ಎಣಿಕೆಯ ಅಂಕಿ ಅಂಶಗಳನ್ನು ನೋಡುತ್ತಿದ್ದರೆ, ಎಲ್ಲಾ ಲೆಕ್ಕಾಚಾರಗಳನ್ನು ಮೀರಿದ ಫಲಿತಾಂಶ ಇದಾಗಲಿದೆ. ಕಾಂಗ್ರೆಸ್ ಸೋಲುವುದು ಮಾತ್ರವಲ್ಲ, ಘಟಾನುಘಟಿ ನಾಯಕರೂ ವಿಧಾನ ಸಭೆ ಪ್ರವೇಶ ಅನುಮಾನವಾಗಿದೆ.

Last updated

ಸಂಭ್ರಮಾಚರಣೆಯಲ್ಲಿ ಬಿಜೆಪಿ ಕಾರ್ಯಕರ್ತರು:

ಭಾರತೀಯ ಜನತಾ ಪಾರ್ಟಿ ಸ್ಪಷ್ಟ ಬಹುಮತಕ್ಕೆ ಹತ್ತಿರವಾಗುತ್ತಿರುವ ಬೆನ್ನಲ್ಲೇ ಕಾರ್ಯಕರ್ತರ ಸಂಭ್ರಮವೂ ಕೂಡ ಜೋರಾಗಿದೆ. ಬೆಂಗಳೂರಿನ ಬಿಜೆಪಿ ಕಚೇರಿಯ ಮುಂದೆ ನೆರೆದಿರುವ ಕಾರ್ಯಕರ್ತರು ಹರ್ಷೋದ್ಘಾರ ಮಾಡುತ್ತಿದ್ದಾರೆ.

Last updated

ತೀರ್ಥಹಳ್ಳಿಯಲ್ಲಿ ಬಿಜೆಪಿ ಅಭ್ಯರ್ಥಿ ಗೆಲುವು:

ಬಿಜೆಪಿ ಎರಡನೇ ಕ್ಷೇತ್ರದಲ್ಲಿ ಗೆಲವು ಕಂಡಿದೆ. ಶಿವಮೊಗ್ಗ ಜಿಲ್ಲೆಯ ತೀರ್ಥಹಳ್ಳಿ ವಿಧಾನಸಭಾ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿ ಅರಗ ಜ್ಞಾನೇಂದ್ರ ಗೆಲುವು ದಾಖಲಿಸಿದ್ದಾರೆ.

Last updated

ಬಿಜೆಪಿ ಮುನ್ನಡೆ; ಕಾರ್ಯಕರ್ತರ ಸಂಭ್ರಮ:

ನೂರಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ಬಿಜೆಪಿ ಮುನ್ನಡೆ ಸಾಧಿಸಿರುವುದರಿಂದ ಬಿಜೆಪಿ ಕಾರ್ಯಕರ್ತರು ಸಂಭ್ರಮಾಚರಣೆಯಲ್ಲಿ ತೊಡಗಿದ್ದಾರೆ.

Last updated

ಬಾರಿ ಮುನ್ನಡೆ ಕಾಣುತ್ತಿರುವ ಯಡಿಯೂರಪ್ಪ:

ಬಿಜೆಪಿ ರಾಜ್ಯದೆಲ್ಲೆಡೆ ಮುನ್ನಡೆಯಲ್ಲಿರುವಲ್ಲೇ, ಯಡಿಯೂರಪ್ಪ ಕೂಡ ಭಾರಿ ಮುನ್ನಡೆಯನ್ನು ಸಾಧಿಸಿದ್ದಾರೆ. ಶಿಕಾರಿಪುರದಲ್ಲಿ 18,000 ಮತಗಳ ಮುನ್ನಡೆಯಲ್ಲಿದ್ದಾರೆ.

Last updated

ಚಾಮುಂಡೇಶ್ವರಿ ಹಾಗೂ ಬಾದಾಮಿ ಎರಡೂ ಕ್ಷೇತ್ರಗಳಲ್ಲಿ ಹಿನ್ನಡೆ ಕಾಣುತ್ತಿರುವ ಸಿದ್ಧರಾಮಯ್ಯ:

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ 42,000 ಮತಗಳನ್ನು ಗಳಿಸಿರುವ ಜೆಡಿಎಸ್‌ ಅಭ್ಯರ್ಥಿ ಜಿ.ಟಿ.ದೇವೇಗೌಡ ಸಿದ್ಧರಾಮಯ್ಯರನ್ನು 16,000 ಮತಗಳಿಂದ ಹಿಂದಿಕ್ಕಿದ್ದಾರೆ. ಸಿದ್ಧರಾಮಯ್ಯ 26,000 ಮತಗಳನ್ನು ಗಳಿಸಿದ್ದಾರೆ.

ಬಾದಾಮಿ ಕ್ಷೇತ್ರದಲ್ಲೂ ಕೂಡ ಸಿದ್ಧರಾಮಯ್ಯ ಹಿನ್ನಡೆ ಕಾಣುತ್ತಿದ್ದಾರೆ. ಬಿಜೆಪಿ ಅಭ್ಯರ್ಥಿ ಶ್ರೀರಾಮುಲು 420 ಮತಗಳಿಂದ ಮುನ್ನಡೆ ಗಳಿಸಿದ್ದಾರೆ.

Last updated

ರಾಮನಗರದಲ್ಲಿ ಕುಮಾರಸ್ವಾಮಿಗೆ ಅಲ್ಪಮತಗಳ ಮುನ್ನಡೆ:

ಜೆಡಿಎಸ್‌ನ ಭದ್ರಕೋಟೆಯಾಗಿದ್ದ ರಾಮನಗರದಲ್ಲಿ ಜೆಡಿಎಸ್‌ ಮುಖ್ಯಮಂತ್ರಿ ಅಭ್ಯರ್ಥಿ ಎಚ್‌.ಡಿ.ಕುಮಾರಸ್ವಾಮಿ ಅಲ್ಪಮತಗಳಲ್ಲಿ ಮುನ್ನಡೆ ಕಂಡುಕೊಂಡಿದ್ದಾರೆ. ಕೇವಲ 832 ಮತಗಳಲ್ಲಷ್ಟೇ ಕುಮಾರಸ್ವಾಮಿ ಮುಂದಿದ್ದಾರೆ.

Last updated

ಸ್ಪಷ್ಟ ಬಹುಮತದತ್ತ ಬಿಜೆಪಿ:

ಸರಳ ಹಾಗೂ ಸ್ಪಷ್ಟ ಬಹುಮತದತ್ತ ಬಿಜೆಪಿ ದಾಪುಗಾಲು ಹಾಕುತ್ತಿದೆ. 112 ಕ್ಷೇತ್ರಗಳಲ್ಲಿ ಬಿಜೆಪಿ ಮುನ್ನಡೆ ಸಾಧಿಸಿದೆ. ಕಾಂಗ್ರೆಸ್‌ 64 ಕ್ಷೇತ್ರಗಳಿಂದ ಮೇಲೇಳುತ್ತಿಲ್ಲ. ಜೆಡಿಎಸ್‌ 44 ಕ್ಷೇತ್ರಗಳಲ್ಲಿ ಮುಂದಿದೆ.

Last updated

ಹಿನ್ನಡೆ ಕಾಣುತ್ತಿರುವ ಕಾಂಗ್ರೆಸ್‌ ಸಚಿವರು:

ಮುಖ್ಯಮಂತ್ರಿ ಸಿದ್ಧರಾಮಯ್ಯ ಮಾತ್ರವಲ್ಲದೇ ಸಚಿವ ಸಂಪುಟದ ಹಲವಾರು ಮಂತ್ರಿಗಳೂ ಕೂಡ ಹಿನ್ನಡೆ ಕಾಣುತ್ತಿದ್ದಾರೆ. ರಮಾನಾಥ್‌ ರೈ, ಟಿ.ಬಿ.ಜಯಚಂದ್ರ, ಎಚ್‌.ಆಂಜನೇಯ, ಉಮಾಶ್ರೀ , ವಿನಯ್‌ ಕುಲಕರ್ಣಿ ಸೇರಿದಂತೆ ಹಲವಾರು ಸಚಿವರು ಹಿನ್ನಡೆ ಕಾಣುತ್ತಿದ್ದಾರೆ.

Last updated

ಕೊಳ್ಳೇಗಾಲದಲ್ಲಿ ಬಿಎಸ್‌ಪಿ ಅಭ್ಯರ್ಥಿ ಗೆಲುವು:

ಚಾಮರಾಜನಗರ ಜಿಲ್ಲೆಯ ಕೊಳ್ಳೇಗಾಲ ವಿಧಾನಸಭಾ ಕ್ಷೇತ್ರದಲ್ಲಿ ಬಿಎಸ್‌ಪಿ ಅಭ್ಯರ್ಥಿ ಎನ್.ಮಹೇಶ್‌ ಗೆಲುವು ದಾಖಲಿಸಿದ್ದಾರೆ.

Last updated

ಎಚ್.ಆಂಜನೇಯಗೆ ಭಾರೀ ಸೋಲು:

ಕಾಂಗ್ರೆಸ್‌ ಸಚಿವ ಹಾಗೂ ಹೊಳಲ್ಕೆರೆಯ ಕಾಂಗ್ರೆಸ್‌ ಅಭ್ಯರ್ಥಿ ಎಚ್. ಆಂಜನೇಯ 24,800 ಮತಗಳ ಭಾರಿ ಸೋಲನ್ನು ಕಂಡಿದ್ದಾರೆ.

Last updated

ಬಾದಾಮಿಯಲ್ಲಿ ಕೊಂಚ ಮುನ್ನಡೆಯನ್ನು ಗಳಿಸಿರುವ ಸಿದ್ಧರಾಮಯ್ಯ:

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಬಾರಿ ಹಿನ್ನಡೆಯನ್ನು ಕಾಣುತ್ತಿರುವ ಸಿಎಂ ಸಿದ್ಧರಾಮಯ್ಯ ಬಾದಾಮಿ ಕ್ಷೇತ್ರದಲ್ಲಿ ಅಲ್ಪ ಮತಗಳ ಮುನ್ನಡೆಯನ್ನಷ್ಟೇ ಕಾಣುತ್ತಿದ್ದಾರೆ. 2780 ಮತಗಳ ಮುನ್ನಡೆಯಲ್ಲಿದ್ದಾರೆ.

Last updated

‘ಬಿಜೆಪಿಗೆ ಕರ್ನಾಟಕದಲ್ಲಿ ಐತಿಹಾಸಿಕ ಗೆಲುವು’:

ಕರ್ನಾಟಕದಲ್ಲಿ ಬಿಜೆಪಿ ಐತಿಹಾಸಿಕ ಗೆಲುವು ದಾಖಲಿಸಿದೆ ಎಂದಿರುವ ಛತ್ತೀಸ್‌ಗಢದ ಮುಖ್ಯಮಂತ್ರಿ ರಮಣ್ ಸಿಂಗ್‌, ಕರ್ನಾಟಕದ ಜನರಿಗೆ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ.

Last updated

ಶಿಕಾರಿಪುರದಲ್ಲಿ ಬಿ.ಎಸ್‌.ಯಡಿಯೂರಪ್ಪ ಗೆಲುವು:

ಬಿಜೆಪಿ ಮುಖ್ಯಮಂತ್ರಿ ಅಭ್ಯರ್ಥಿ ಬಿ.ಎಸ್.ಯಡಿಯೂರಪ್ಪ ಗೆಲುವು ದಾಖಲಿಸಿದ್ದಾರೆ. ಮಧ್ಯಾಹ್ನದ ವೇಳೆಗೆ ದೆಹಲಿಗೆ ತೆರಳಲಿರುವ ಯಡಿಯೂರಪ್ಪ ಬಿಜೆಪಿ ವರಿಷ್ಠರೊಂದಿಗೆ ಮಾತುಕತೆ ನಡೆಸುವ ಸಾಧ್ಯತೆಯಿದೆ.

Last updated

ರಾಮಲಿಂಗಾರೆಡ್ಡಿ ಗೆಲುವು:

ಬಿಟಿಎಂ ಲೇಔಟ್‌ನ ಕಾಂಗ್ರೆಸ್‌ ಅಭ್ಯರ್ಥಿ ರಾಮಲಿಂಗಾರೆಡ್ಡಿ ಭಾರೀ ಅಂತರದಿಂದ ಗೆಲುವು ದಾಖಲಿಸಿದ್ದಾರೆ.

Last updated

ರಾಮನಗರದಲ್ಲಿ ಎಚ್.ಡಿ.ಕುಮಾರಸ್ವಾಮಿ ಗೆಲುವು:

ಜೆಡಿಎಸ್ ಮುಖ್ಯಮಂತ್ರಿ ಅಭ್ಯರ್ಥಿ ಎಚ್‌.ಡಿ.ಕುಮಾರಸ್ವಾಮಿ 19,745 ಮತಗಳ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿದ್ದಾರೆ.

Last updated

ಸಚಿವೆ ಉಮಾಶ್ರೀ ಸೋಲು:

ಕಾಂಗ್ರೆಸ್‌ ಸಚಿವೆ ಉಮಾಶ್ರೀ ತೇರದಾಳ ಕ್ಷೇತ್ರದಲ್ಲಿ ಸೋಲು ಅನುಭವಿಸಿದ್ದಾರೆ. ಪ್ರತಿಸ್ಪರ್ಧಿಯಾಗಿದ್ದ ಬಿಜೆಪಿಯ ಸಿದ್ದು ಸವದಿ ಗೆಲುವು ದಾಖಲಿಸಿದ್ದಾರೆ.

Last updated

ಮೊಳಕಾಲ್ಮೂರಿನಲ್ಲಿ ಬಿಜೆಪಿ ಅಭ್ಯರ್ಥಿ ಶ್ರೀರಾಮುಲು ಗೆಲುವು:

ಬಿಜೆಪಿ ಅಭ್ಯರ್ಥಿ ಶ್ರೀರಾಮುಲು ಚಿತ್ರದುರ್ಗದ ಮೊಳಕಾಲ್ಮೂರು ಕ್ಷೇತ್ರದಲ್ಲಿ 25,000 ಮತಗಳ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿದ್ದಾರೆ. ಬಿಜೆಪಿಯಿಂದ ಟಿಕೆಟ್‌ ವಂಚಿತರಾಗಿ ಬಂಡಾಯ ಅಭ್ಯರ್ಥಿಯಾಗಿ ಸ್ವರ್ಧಿಸಿದ್ದ ತಿಪ್ಪೆಸ್ವಾಮಿ ಹೀನಾಯ ಸೋಲು ಕಂಡಿದ್ದಾರೆ.

Last updated

ದೆಹಲಿಯಲ್ಲೂ ಬಿಜೆಪಿ ಸಂಭ್ರಮಾಚಾರಣೆ:

ಕರ್ನಾಟಕದಲ್ಲಿ ಬಿಜೆಪಿ ಭರ್ಜರಿ ಮುನ್ನಡೆ ಸಾಧಿಸುತ್ತಿರುವುದು ದೆಹಲಿಯಲ್ಲಿನ ಬಿಜೆಪಿ ಕಾರ್ಯಕರ್ತರಿಗೂ ಸಂತಸವನ್ನು ತಂದಿದೆ.

Last updated

ಬಿಜೆಪಿ ಗೆಲುವಿಗೆ ಹರ್ಷ ವ್ಯಕ್ತ ಪಡಿಸಿದ ಪ್ರಕಾಶ್ ಜಾವಡೇಕರ್:

Last updated

ಮುನ್ನಡೆಯಲ್ಲಿರುವ ಬಿಜೆಪಿಗೆ 43 ಕ್ಷೇತ್ರಗಳಲ್ಲಿ ಗೆಲುವು:

ರಾಜ್ಯದ ಚುಕ್ಕಾಣಿ ಹಿಡಿಯುವಲ್ಲಿ ಭರದಿಂದ ಸಾಗುತ್ತಿರುವ ಬಿಜೆಪಿ, ಈಗಾಗಲೇ 43 ಕ್ಷೇತ್ರಗಳಲ್ಲಿ ಗೆಲುವು ದಾಖಲಿಸಿದೆ. ಕಾಂಗ್ರೆಸ್‌ 23 ಕ್ಷೇತ್ರಗಳಲ್ಲಿ ಗೆದ್ದದ್ದು, ಜೆಡಿಎಸ್‌ 11 ಕ್ಷೇತ್ರಗಳಲ್ಲಿ ಜಯಗಳಿಸಿದೆ.

Last updated

ಸಿದ್ಧರಾಮಯ್ಯರಿಗೆ ಜೈ ಎಂದ ಬಾದಾಮಿ:

ರಾಜ್ಯದೆಲ್ಲೆಡೆ ಕಾಂಗ್ರೆಸ್‌ ಅತೀವ್ರ ಹಿನ್ನಡೆ ಕಾಣುತ್ತಿರುವಲ್ಲಿ, ಸಿಎಂ ಸಿದ್ಧರಾಮಯ್ಯ ಬಾದಾಮಿಯಲ್ಲಿ ಗೆಲುವು ದಾಖಲಿಸಿದ್ದಾರೆ.

Last updated

ರೋಷನ್‌ ಬೇಗ್‌ ಗೆಲುವು:

ಬೆಂಗಳೂರು ನಗರ ಜಿಲ್ಲೆಯ ಶಿವಾಜಿನಗರ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ರೋಷನ್‌ ಬೇಗ್‌ ಗೆಲುವು ದಾಖಲಿಸಿದ್ದಾರೆ. ಬಿಜೆಪಿಯ ಕಟ್ಟಾ ಸುಬ್ರಮಣ್ಯ ನಾಯ್ಡು ಮುಖಭಂಗ ಅನುಭವಿಸಿದ್ದಾರೆ.

Last updated

ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಸಿದ್ಧರಾಮಯ್ಯ ಹೀನಾಯ ಸೋಲು:

ಬಾದಾಮಿಯಲ್ಲಿ ಗೆಲುವು ದಾಖಲಿಸಿರುವ ಸಿದ್ಧರಾಮಯ್ಯ ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಹೀನಾಯ ಸೋಲು ಕಂಡಿದ್ದಾರೆ. ಜೆಡಿಎಸ್ ಅಭ್ಯರ್ಥಿ ಜಿ.ಟಿ.ದೇವೇಗೌಡ 30,000 ಮತಗಳ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿದ್ದಾರೆ.

Last updated

ವರುಣಾ ಕ್ಷೇತ್ರದಲ್ಲಿ ಡಾ.ಯತೀಂದ್ರ ಗೆಲುವು:

ಸಿಎಂ ಸಿದ್ಧರಾಮಯ್ಯ ಪುತ್ರ ಡಾ.ಯತೀಂದ್ರ ವರುಣಾ ಕ್ಷೇತ್ರದಲ್ಲಿ ಗೆಲುವು ದಾಖಲಿಸಿದ್ದಾರೆ.

Last updated

ಕಾಂಗ್ರೆಸ್‌ನ ದಿನೇಶ್ ಗುಂಡೂರಾವ್‌ಗೆ ಗೆಲುವು:

ಬೆಂಗಳೂರಿನ ಗಾಂಧಿನಗರ ವಿಧಾನಸಭಾ ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ದಿನೇಶ್ ಗುಂಡೂರಾವ್‌ 10,000 ಮತಗಳ ಭರ್ಜರಿ ಅಂತರದಿಂದ ಗೆಲುವು ದಾಖಲಿಸಿದ್ದಾರೆ.

Last updated

ರೋಚಕ ಕ್ಲೈಮಾಕ್ಸ್‌ನತ್ತ ಫಲಿತಾಂಶ:

ಬೆಳಗ್ಗೆ ಸ್ಪಷ್ಟ ಬಹುಮತದತ್ತ ದಾಪುಗಾಲು ಹಾಕುತ್ತಿದ್ದ ಬಿಜೆಪಿ ಈಗ ಸರಕಾರ ರಚಿಸುವಷ್ಟು ಕ್ಷೇತ್ರಗಳಲ್ಲಿ ಅಧಿಕಾರ ಹಿಡಿಯುವುದು ಕಷ್ಟ ಎನ್ನಿಸುತ್ತಿದೆ. ಸುಮಾರು ೧೮ ವಿಧಾನಸಭಾ ಕ್ಷೇತ್ರಗಳಲ್ಲಿ ಒಂದೊಂದು ಸುತ್ತಿನಲ್ಲಿ ಒಂದೊಂದು ಪಕ್ಷ ಮುಂದಿರುವ ಹಿನ್ನೆಲೆಯಲ್ಲಿ ಸ್ಪಷ್ಟ ಚಿತ್ರಣ ಲಭ್ಯವಾಗುತ್ತಿಲ್ಲ. ಬದಲಿಗೆ, ಕೊನೆ ಹಂತದಲ್ಲಿ ಫಲಿತಾಂಶವನ್ನು ಈ ಕ್ಷೇತ್ರಗಳು ನಿರ್ಧಾರ ಮಾಡಲಿದೆ.

ಈ ನಡುವೆ ಜೆಡಿಎಸ್‌ಗೆ ಬಾಹ್ಯ ಬೆಂಬಲ ನೀಡಲು ಕಾಂಗ್ರೆಸ್ ಒಪ್ಪಿಗೆ ಸೂಚಿಸಿದೆ. ಈ ಮೂಲಕ ಬಿಜೆಪಿಯನ್ನು ಅಧಿಕಾರದಿಂದ ದೂರ ಇಡುವ ತೀರ್ಮಾನಕ್ಕೆ ಕೈ ಮುಂದಾಗಿದೆ.

Last updated

'ಬ್ಯಾಟ್ ಬೀಸದೆ ಸಿಕ್ಸ್‌': ಕುಮಾರಸ್ವಾಮಿ ಸ್ಟೈಲ್‌

LIVE: ಕರ್ನಾಟಕ ವಿಧಾನಸಭಾ ಚುನಾವಣಾ ಫಲಿತಾಂಶ; ಪ್ರಜಾ ತೀರ್ಪು ಏನನ್ನುತ್ತೆ?

ರಾಜ್ಯ ರಾಜಕಾರಣದ ಇತಿಹಾಸದಲ್ಲಿ ಅಚಾನಕ್ ಆಗಿ ಮುಖ್ಯಮಂತ್ರಿ ಆದವರು ಕುಮಾರಸ್ವಾಮಿ. ಸಿಕ್ಕ ೨೦ ತಿಂಗಳ ಅವಧಿಯಲ್ಲಿ ಮಾಧ್ಯಮಗಳಿಂದ ‘ನಾಡಿನ ದೊರೆ’ ಎಂಬ ಪಟ್ಟವನ್ನು ಅವರು ಅಲಂಕರಿಸಿದ್ದರು. ಮುಂದೆ ನಡೆದ ಅಧಿಕಾರ ಹಂಚಿಕೆಯಲ್ಲಿ ಕುಮಾರಸ್ವಾಮಿ ಆಲೋಚನೆ ಕೈಕೊಟ್ಟಿತು. ರಾಜ್ಯದಲ್ಲಿ ಕಮಲ ಅರಳಲು ಅನುವು ಮಾಡಿಕೊಟ್ಟರು.

೧೦ ವರ್ಷಗಳ ನಂತರ ಇದೀಗ ಅದೇ ಕುಮಾರಸ್ವಾಮಿ ಬಿಜೆಪಿಗೆ ಮುಳುವಾಗುವ ಸಾಧ್ಯತೆ ಇದೆ. ಕೊನೆಯ ಸೂಪರ್ ಓವರ್ ಕಾಂಗ್ರೆಸ್ ಪಾಲಿಗೆ ಒಂದಷ್ಟು ವಿಕೆಟ್ ತಂದುಕೊಟ್ಟರೆ ಗೆಲುವಿನ ಅಂಚಿನಲ್ಲಿ ಬಿಜೆಪಿ ಔಟ್‌ ಆಗಲಿದೆ. ಕುಮಾರಸ್ವಾಮಿ ಪೆವಿಲಿಯನ್‌ನಲ್ಲಿ ಕುಳಿತೇ ಸಿಕ್ಸರ್‌ ಹೊಡೆಯುತ್ತಾರೆ. ಎರಡನೇ ಬಾರಿಗೆ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

Last updated

ಮತ್ತೆ ಮುಖ್ಯಮಂತ್ರಿಯಾಗುವರೇ ಕುಮಾರಸ್ವಾಮಿ?

ರೋಚಕತೆಯನ್ನು ಮೂಡಿಸಿರುವ ಕರ್ನಾಟಕ ಚುನಾವಣಾ ಫಲಿತಾಂಶ. ಈಗ ರಾಜ್ಯ ರಾಜಕಾರಣಕ್ಕೆ ಮತ್ತೊಂದು ಟ್ವಿಸ್ಟ್ ನೀಡಿದೆ. ಕಾಂಗ್ರೆಸ್ ಆಧಿಕಾರದ ಗಾದಿ ಹಿಡಿಯುವ ಕನಸು ಬೆಳಗ್ಗೆಯೇ ನೆಲಕಚ್ಚಿದಾಗ, ತಾವೇ ಅಧಿಕಾರ ರಚಿಸುತ್ತೇವೆ ಎಂಬ ಭಾವ ಬಿಜೆಪಿಯಲ್ಲಿ ತುಂಬಿತ್ತು. ಆದರೆ ಮಧ್ಯಾಹ್ನ ಕಳೆಯುವ ಹೊತ್ತಿಗೆ ರಾಜಕಾರಣದ ರೂಪುರೇಶೆಯೇ ಬದಲಾಗಿದೆ. ಸಿದ್ಧರಾಮಯ್ಯ, ಯಡಿಯೂರಪ್ಪ ಇಬ್ಬರನ್ನೂ ಬದಿಗೆ ತಳ್ಳಿ ಕುಮಾರಸ್ವಾಮಿ ಸಿಎಂ ಪಟ್ಟಕ್ಕೆ ಕೈ ಚಾಚಿದ್ದಾರೆ. ಈ ಕುರಿತು ಮತ್ತಷ್ಟು ವಿಸ್ತೃತ ಲೇಖನಗಳನ್ನು ‘ಸಮಾಚಾರ’ ಶೀಘ್ರದಲ್ಲೇ ನಿಮ್ಮ ಮುಂದಿಡಲಿದೆ.

ಇದುವರೆಗೂ ‘ಸಮಾಚಾರ’ದ ಲೈವ್ ಮೂಲಕ ಚುನಾವಣಾ ಫಲಿತಾಂಶ ಮಾಹಿತಿ ಪಡೆದ ಎಲ್ಲರಿಗೂ ಧನ್ಯವಾದಗಳು.

Last updated