ಪೊಲೀಸ್ ಇಲಾಖೆ ಆಡಿಟ್ ಚೆಕ್- 2: ಹೊರಗೆ ಥಳಕು, ಠಾಣೆಗಳಲ್ಲಿ ಹುಳುಕು; ಮಕಾಡೆ ಮಲಗಿದ ಎಂಪಿಎಫ್ ಯೋಜನೆ!
INSIDE STORY

ಪೊಲೀಸ್ ಇಲಾಖೆ ಆಡಿಟ್ ಚೆಕ್- 2: ಹೊರಗೆ ಥಳಕು, ಠಾಣೆಗಳಲ್ಲಿ ಹುಳುಕು; ಮಕಾಡೆ ಮಲಗಿದ ಎಂಪಿಎಫ್ ಯೋಜನೆ!

3 ಠಾಣೆಗಳಲ್ಲಿ ಕಂಪ್ಯೂಟರ್‌ಗೆಂದು ಪ್ರತ್ಯೇಕ ಕೋಣೆಯೇ ಇಲ್ಲ. ತಪಾಸಣೆ ನಡೆಸಲಾದ ಪೊಲೀಸ್ ಠಾಣೆಗಳಲ್ಲೊಂದಾದ ಕಲ್ಬುರ್ಗಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಲಾಕಪ್‌ನೊಳಗೇ ಕಂಪ್ಯೂಟರ್ ರೂಂ ವ್ಯವಸ್ಥೆ ಮಾಡಿರುವ ಹಾಸ್ಯಾಸ್ಪದ ಬೆಳವಣಿಗೆ ಪತ್ತೆಯಾಗಿದೆ.

ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಜಂಟಿ ಸಹಯೋಗದಲ್ಲಿ ಆಚರಣೆಗೆ ಬಂದಿದ್ದು ‘ಮೆಗಾಸಿಟಿ ಪೊಲೀಸ್ ಫೋರ್ಸ್’ (ಎಂಪಿಎಫ್) ಯೋಜನೆ. ಇದರ ಕೆಳಗೆ ನೀಡಲಾಗುವ ಹಣಕಾಸಿನ ನೆರವನ್ನು ಮೊದಲ ಆದ್ಯತೆಯಾಗಿ ಪೊಲೀಸ್ ಸ್ಟೇಷನ್‌ಗಳ ಮೂಲಸೌಕರ್ಯ ಅಭಿವೃದ್ಧಿಗೆ ಬಳಸಬೇಕೆನ್ನುವುದು ಯೋಜನೆಯ ಕಡ್ಡಾಯ ನಿಯಮಗಳಲ್ಲೊಂದು.

ಈ ನಿಯಮದಂತೆ ದೊರೆತ ಅನುದಾನವನ್ನು ಬಳಸಿಕೊಂಡು ರಾಜ್ಯವ್ಯಾಪಿ ಇರುವ ಪೊಲೀಸ್ ಸ್ಟೇಷನ್‌ಗಳನ್ನು ಆಧುನೀಕರಣಗೊಳಿಸುವುದು ಪೊಲೀಸ್ ಇಲಾಖೆಯ ಕರ್ತವ್ಯವಾಗಿತ್ತು. ಇದನ್ನು ಇಲಾಖೆಯು ಸರಿಯಾಗಿ ನಿರ್ವಹಿಸಿದೆಯೇ ಇಲ್ಲವೇ ಎಂಬುದನ್ನು ತಿಳಿಯಲು ಸಿಎಜಿಯ ಲೆಕ್ಕಾಧಿಕಾರಿಗಳು ಕರ್ನಾಟಕದಾದ್ಯಂತ 60 ‘ಟೆಸ್ಟ್ ಚೆಕ್’ ತಪಾಸಣೆ ನಡೆಸಿತು. ಈ ಸಂದರ್ಭದಲ್ಲಿ ರಾಜ್ಯದ ವಿವಿಧ ಜಿಲ್ಲೆಗಳ 60 ಪೊಲೀಸ್ ಠಾಣೆಗಳನ್ನು ಸಂದರ್ಶಿಸಿ ಅವು ಆಧುನೀಕರಣಗೊಂಡಿವೆಯೇ ಇಲ್ಲವೇ ಎಂಬುದನ್ನು ಗೊತ್ತುಮಾಡಿಕೊಳ್ಳುವುದು ಲೆಕ್ಕಾಧಿಖಾರಿಗಳ ಉದ್ದೇಶವಾಗಿತ್ತು. ಸ್ಥಳಕ್ಕೆ ಹೋಗಿ ಚೆಕ್ ಮಾಡಲು ಶುರುವಿಡುತ್ತಿದ್ದಂತೆ ಲೆಕ್ಕಾಧಿಕಾರಿಗಳಿಗೇ ಸಿಡಿಲು ಬಡಿದಂತೆ ಈ ಪೊಲೀಸ್ ಠಾಣೆಗಳು 50 ವರ್ಷಗಳಷ್ಟು ಹಳೆಯ ಶೈಲಿಯಲ್ಲಿ ಕಾರ್ಯಾಚರಿಸುತ್ತಿರುವುದು ಕಂಡು ಬಂತು.

ಪುರುಷ-ಮಹಿಳಾ ಖೈದಿಗಳು ಒಂದೇ ಲಾಕಪ್ಪಿನಲ್ಲಿ:

ಟೆಸ್ಟ್ ಚೆಕ್ ಮಾಡಲಾದ ಒಟ್ಟು 60 ಪೊಲೀಸ್ ಠಾಣೆಗಳಲ್ಲಿ 6 ಠಾಣೆಗಳಿಗೆ ಸ್ವಂತ ಕಟ್ಟಡವೆಂಬುದೇ ಇರಲಿಲ್ಲ. ಬಾಡಿಗೆ ಕಟ್ಟಡಗಳಲ್ಲಿ, ಹಳೆಯ ಪಳೆಯುಳಿಕೆಯಂಥಹ ಕಳಪೆ ಕಟ್ಟಡಗಳಲ್ಲಿ ಪೊಲೀಸರು ಕರ್ತವ್ಯ ನಿರ್ವಹಿಸುತ್ತಿದ್ದರು. 16 ಪೊಲೀಸ್ ಠಾಣೆಗಳಿಗೆ ಕಾಂಪೌಂಡ್ ಎಂಬುವುದೇ ಇರಲಿಲ್ಲ. 17 ಠಾಣೆಗಳಲ್ಲಿ ವಾಹನಗಳ ಪಾರ್ಕಿಂಗ್ ವ್ಯವಸ್ಥೆಯಿರಲಿಲ್ಲ. ದೂರು ಮತ್ತಿತರ ಕಾರಣಗಳಿಗಾಗಿ ಪೊಲೀಸ್ ಠಾಣೆಗೆ ಬರುವ ಜನರಿಗೆಂದು ಪ್ರತ್ಯೇಕ ರಿಸೆಪ್ಷನ್ ವ್ಯವಸ್ಥೆ ಇರುವುದು ಕಡ್ಡಾಯ. 5 ಠಾಣೆಗಳಲ್ಲಿ ಈ ವ್ಯವಸ್ಥೆಯೇ ನಾಪತ್ತೆಯಾಗಿತ್ತು.

ಅಪರಾಧ ಸಂಬಂಧಿತ ಚಟುವಟಿಕೆಗಳಲ್ಲಿ ಬಂಧಿಸಲ್ಪಟ್ಟ ಅಪರಾಧಿಗಳನ್ನು ಮಹಿಳಾ ಆರೋಪಿಗಳು, ಪುರುಷ ಆರೋಪಿಗಳೆಂದು ಪ್ರತ್ಯೇಕ ಸೆಲ್‌ನಲ್ಲಿ ಬಂಧಿಸಿಡುವುದು, ಇದಕ್ಕೆಂದು ಪ್ರತ್ಯೇಕ ಸೆಲ್‌ಗಳನ್ನು ನಿರ್ಮಿಸಬೇಕೆಂಬುದು ಕಡ್ಡಾಯ ನಿಯಮ. ಆದರೆ 20 ಪೊಲೀಸ್ ಠಾಣೆಗಳಲ್ಲಿ ಇರುವುದು ಒಂದೇ ಲಾಕಪ್ ಸೆಲ್, ಒಂದೇ ಲಾಕಪ್‌ನಲ್ಲಿ ಮಹಿಳಾ-ಪುರುಷ ಆರೋಪಿಗಳನ್ನು ಬಂಧಿಸಿಡುವ ವಿಚಿತ್ರ ಸಂಪ್ರದಾಯವೊಂದನ್ನು ಕರ್ನಾಟಕದ ಪೊಲೀಸರು ಪಾಲಿಸುತ್ತಿರುವುದು ಕಂಡುಬಂತು.

ಶಿವಮೊಗ್ಗದ ದೊಡ್ಡಪೇಟೆ ಪೊಲೀಸ್ ಠಾಣೆಯಲ್ಲಿ ಮಹಿಳಾ ಬಂಧಿಗಳನ್ನು ಇಡುವ ಲಾಕಪ್ಪಿನೊಳಗೆ ಹಳೆಯ ಪೀಠೋಪಕರಣನ್ನು ಒಟ್ಟಿ ಗೋಡೋನಿನಂತೆ ಬಳಸಲಾಗುತ್ತಿದೆ ಎಂಬುದು ಸಿಎಜಿ ಲೆಕ್ಕಾಧಿಕಾರಿಗಳ ಗಮನಕ್ಕೆ ಬಂತು.

ಕಂಪ್ಯೂಟರ್ ರೂಮ್ ಆದ ಲಾಕಪ್ ಸೆಲ್:

ಟೆಸ್ಟ್ ಚೆಕ್ ಮಾಡಲಾದ ಪೊಲೀಸ್ ಠಾಣೆಗಳಲ್ಲಿ ಬಂದೂಕುಗಳಂತಹ ಆಯುಧಗಳನ್ನಿಡಲು ಪ್ರತ್ಯೇಕ ಕೊಠಡಿಯ ವ್ಯವಸ್ಥೆಯಿರಬೇಕಿತ್ತು. ಆದರೆ, 6 ಠಾಣೆಗಳಲ್ಲಿ ಈ ವ್ಯವಸ್ಥೆಯೇ ಇಲ್ಲದೆ ಬಂದೂಕುಗಳನ್ನು ಎಲ್ಲೆಂದರಲ್ಲಿ ಕಸದಂತೆ ಇಡಲಾಗಿತ್ತು. ಉಡುಪಿಯ ಕೋಟ ಠಾಣೆಯಲ್ಲಿ ಸ್ಟೇಷನ್ ಬಂದೂಕುಗಳು ಮತ್ತು ದುಷ್ಕರ್ಮಿಗಳಿಂದ ವಶಪಡಿಸಿಕೊಳ್ಳಾದ ಅಕ್ರಮ ಆಯುಧಗಳನ್ನು ಒಟ್ಟಿಗೆ ಸೇರಿಸಿ ಇಡಲಾಗಿತ್ತು. ಮೈಸೂರಿನ ದೇವರಾಜ ಪೊಲೀಸ್ ಠಾಣೆಯಲ್ಲಿ ಬಂದೂಕುಗಳನ್ನು ವಸ್ತು ಪ್ರದರ್ಶನಕ್ಕಿಟ್ಟಂತೆ ಠಾಣೆಯೊಂದರ ಮೂಲೆಯಲ್ಲಿ ಪೇರಿಸಿಡಲಾಗಿತ್ತು.

ಪೊಲೀಸ್ ಠಾಣೆಗಳೆಂದ ಮೇಲೆ ಪುರುಷ ಮತ್ತು ಮಹಿಳಾ ಸಿಬ್ಬಂದಿಗಳಿಗೆಂದು ಪ್ರತ್ಯೇಕ ಕೋಣೆಗಳು ಅಟ್ಯಾಚ್ಡ್ ಟಾಯ್ಲೆಟ್ ಇರಬೇಕಾದುದು ನಿಯಮ. ಆದರೆ 31 ಪೊಲೀಸ್ ಠಾಣೆಗಳಿಗಳಲ್ಲಿ ಮಹಿಳಾ ಸಿಬ್ಬಂದಿಗೆ ಪ್ರತ್ಯೇಕ ಕೊಠಡಿಯಾಗಲೀ, ಶೌಚಾಲಯದ ವ್ಯವಸ್ಥೆಯೇ ಇರಲಿಲ್ಲ.

ಸಾಕ್ಷಿಗಳ ವಿಚಾರಣೆಗೂ ಸಹ ಪ್ರತ್ಯೇಕ ಕೊಠಡಿಯ ವ್ಯವಸ್ಥೆ ಮಾಡಬೇಕೆಂಬುದು ಯೋಜನೆ ಮತ್ತು ಪೊಲೀಸ್ ಕಾನೂನಿನ ನಿಯಮ. 41 ಠಾಣೆಗಳಲ್ಲಿ ಸಾಕ್ಷಿಗಳ ವಿಚಾರಣೆಗೆಂದು ಪ್ರತ್ಯೇಕ ಕೊಠಡಿಯ ವ್ಯವಸ್ಥೆಯೇ ಇಲ್ಲವಾಗಿದೆ. ಸರ್ಕಾರಿ ಕಚೇರಿಗಳ ಕಂಪ್ಯೂಟರೀಕರಣ ನಡೆದು ದಶಕಗಳೇ ಕಳೆದಿವೆ. ಠಾಣೆಯ ದಾಖಲಾತಿಗಳನ್ನು ಕಂಪ್ಯೂಟರಿನಲ್ಲಿ ದಾಖಲಿಸಿ ಸಂಗ್ರಹಿಸಲು ಠಾಣೆಗಳಿಗೆ ಕಂಪ್ಯೂಟರ್‌ಗಳನ್ನೂ ಒದಗಿಸಲಾಗಿದೆ. ಈ ಕಂಪ್ಯೂಟರ್ ದಾಖಲಾತಿಗಳ ಸಂಗ್ರಹಣೆಯ ಗೌಪ್ಯತೆಗೆಂದು ಪ್ರತ್ಯೇಕ ಕೋಣೆಯೊಂದನ್ನು ಆಯೋಜಿಸಬೇಕೆಂಬುದು ನಿಯಮವೂ ಇದೆ.

ಆದರಿಲ್ಲಿ 13 ಠಾಣೆಗಳಲ್ಲಿ ಕಂಪ್ಯೂಟರ್‌ಗೆಂದು ಪ್ರತ್ಯೇಕ ಕೋಣೆಯೇ ಇಲ್ಲ. ತಪಾಸಣೆ ನಡೆಸಲಾದ ಪೊಲೀಸ್ ಠಾಣೆಗಳಲ್ಲೊಂದಾದ ಕಲ್ಬುರ್ಗಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಲಾಕಪ್‌ನೊಳಗೇ ಕಂಪ್ಯೂಟರ್ ರೂಂ ವ್ಯವಸ್ಥೆ ಮಾಡಿರುವ ಹಾಸ್ಯಾಸ್ಪದ ಬೆಳವಣಿಗೆ ಪತ್ತೆಯಾಗಿದೆ. 7 ಪೊಲೀಸ್ ಠಾಣೆಗಳಲ್ಲಿನ ಪೊಲೀಸ್ ಸಿಬ್ಬಂದಿಯು ಓಡಾಟಕ್ಕೆಂದು ದ್ವಿಚಕ್ರ ವಾಹನಗಳೇ ಇಲ್ಲದೆ ಕಾರ್ಯನಿರ್ವಹಿಸುತ್ತಿದ್ದಾರೆ.

ನಾಳೆಗೆ: ಆಯುಧ-ಮದ್ದುಗುಂಡುಗಳೇ ಇಲ್ಲದ ಖಾಲಿ ಬಂದೂಕು; ಪೊಲೀಸರಿಂದ ಲಾ & ಆರ್ಡರ್ ರಕ್ಷಣೆ!

Also read: ಪೊಲೀಸ್‌ ಇಲಾಖೆ ಆಡಿಟ್ ಚೆಕ್- 1: ಇಲಾಖೆಯ ಆಧುನೀಕರಣ ಯೋಜನೆಯಲ್ಲೇ ಹೆಗ್ಗಣಗಳು...