ಬರಲಿವೆ ಮಲೇರಿಯಾ ತಡೆಗಟ್ಟುವ ‘ಜೆನೆಟಿಕಲಿ ಮಾಡಿಫೈಡ್‌’ ಸೊಳ್ಳೆ!
ಫೋಕಸ್

ಬರಲಿವೆ ಮಲೇರಿಯಾ ತಡೆಗಟ್ಟುವ ‘ಜೆನೆಟಿಕಲಿ ಮಾಡಿಫೈಡ್‌’ ಸೊಳ್ಳೆ!

ಮಲೇರಿಯಾವನ್ನು ಹರಡುವ ಹೆಣ್ಣು ಸೊಳ್ಳೆಗಳನ್ನು ತಡೆಗಟ್ಟುವ ಸಲುವಾಗಿ ವಿಜ್ಞಾನಿಗಳು ವಿಷಪೂರಿತ ಗಂಡು ಸೊಳ್ಳೆಗಳನ್ನು ಅಭಿವೃದ್ಧಿಪಡಿಸಿದ್ದಾರೆ.

ಕಳೆದ ತಿಂಗಳಿನಲ್ಲಿ ಬಿಲ್ ಅಂಡ್‌ ಮಿಲಿಂದಾ ಗೇಟ್ಸ್ ಫೌಂಡೇಷನ್‌ ಇಂಗ್ಲೆಂಡ್ ಮೂಲದ ಓಕ್ಸಿಟೆಕ್‌ ಎಂಜಿನಿಯರಿಂಗ್‌ ಕಂಪನಿಗೆ 4 ಮಿಲಿಯನ್‌ ಡಾಲರ್‌ ಹಣವನ್ನು ನೀಡಿದೆ. ಈ ಹಣದಿಂದ ಕಂಪನಿ ಮಾಡಬೇಕಿರುವ ಕೆಲಸ ‘ಮಾನವ ಸ್ನೇಹಿ ಕುಲಾಂತರಿ ಸೊಳ್ಳೆ’ಗಳನ್ನು ಸೃಷ್ಟಿಸುವುದು!

ವಿಶ್ವಾದ್ಯಂತ ಸೊಳ್ಳೆಗಳಿಂದ ಉಂಟಾಗುತ್ತಿರುವ ಮಾರಕ ರೋಗಗಳ ಪೈಕಿ ಮಲೇರಿಯಾ ಕೂಡ ಒಂದು. 2000ದಿಂದ 2015ರವರೆಗೂ ಮಲೇರಿಯಾ ಹರಡುವ ಪ್ರಮಾಣ ಶೇ.62ರಷ್ಟು ಕುಸಿದಿತ್ತು. ಇತ್ತೀಚಿನ ವರ್ಷಗಳಲ್ಲಿ ಮತ್ತೆ ಹೆಚ್ಚಾಗುತ್ತಿದೆ. ಮಲೇರಿಯಾದಿಂದ ನರಳುವ ಮನುಷ್ಯರ ಬದಲಾಗಿ ಮಲೇರಿಯಾ ಹರಡುವ ಸೊಳ್ಳೆಗಳನ್ನೇ ಇಲ್ಲವಾಗಿಸಿದರೆ ಹೇಗೆ ಎಂಬ ಯೋಚನೆ ವಿಜ್ಞಾನಿಗಳ ತಲೆಯಲ್ಲಿ ಮೂಡಿತ್ತು. ಈ ಯೋಚನೆಯ ಫಲವೇ ‘ಮಾನವ ಸ್ನೇಹಿ ಕುಲಾಂತರಿ ಸೊಳ್ಳೆಗಳು’.

ಈಗಾಗಲೇ ಮಾನವ ಸ್ನೇಹಿ ಸೊಳ್ಳೆಗಳು ಸೃಷ್ಟಿಯಾಗಿವೆ ಕೂಡ. ಬಹುಪಾಲು ರೋಗಗಳನ್ನು ಹರಡುವ ಸೊಳ್ಳೆಗಳು ಹೆಣ್ಣು ಸೊಳ್ಳೆಗಳೇ ಆಗಿರುತ್ತವೆ. ಮಲೇರಿಯಾ ಬರುವುದೂ ಕೂಡ ಹೆರ್ನನೂ ಸೊಳ್ಳೆಗಳಿಂದಲೇ. ಇಂತಹ ಹೆಣ್ಣು ಸೊಳ್ಳೆಗಳಿಗೆ ಕಡಿವಾಣ ಹಾಕಲು ಮಾನವ ಸ್ನೇಹಿ ಗಂಡು ಸೊಳ್ಳೆಗಳನ್ನು ವಿಜ್ಞಾನಿಗಳು ಅಭಿವೃದ್ಧಿ ಪಡಿಸಿದ್ದಾರೆ. ಈ ಸೊಳ್ಳೆಗಳು ಮಲೇರಿಯಾ ಹರಡುವ ಸೊಳ್ಳೆಗಳ ಸಂತತಿಯನ್ನೇ ನಾಶಗೊಳಿಸಲಿವೆ.

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಏನಿದು ‘ಮಾನವ ಸ್ನೇಹಿ ಸೊಳ್ಳೆ’?:

ವಿಜ್ಞಾನಿಗಳ ಪ್ರಕಾರ ಇದು ಮಾನವ ಸ್ನೇಹಿ ಸೊಳ್ಳೆ. ಆದರೆ ನೈಸರ್ಗಿಕ ಸೊಳ್ಳೆಗಳಿಗೆ ಮಾತ್ರ ಶತ್ರು. ಈ ಸೊಳ್ಳೆಗಳ ದೇಹದ ತುಂಬಾ ವಿಜ್ಞಾನಿಗಳು ವಿಷ ತುಂಬಿದ್ದಾರೆ. ಜೊತೆಗೆ ಈ ಸೊಳ್ಳೆಗಳ ಕಾಮಾಸಕ್ತಿಯನ್ನು ಕೂಡ ಹೆಚ್ಚಿಸಿದ್ದಾರೆ. ಮೈತುಂಬಾ ವಿಷವನ್ನೇ ಹೊದಿರುವ ಈ ಸೊಳ್ಳೆಗಳು ಹೆಚ್ಚು ದಿನ ಬದುಕಲು ‘ಟೈಟ್ರಾಸೈಕ್ಲಿನ್‌’ ಎಂಬ ವಿಷವಸ್ತು ಅತ್ಯಗತ್ಯ. ವಿಜ್ಞಾನಿಗಳು ಹೇಳುವ ಪ್ರಕಾರ ಈ ‘ಟೈಟ್ರಾಸೈಕ್ಲಿನ್‌’ ಪ್ರಕೃತಿಯಲ್ಲಿ ಸಿಗುವುದಿಲ್ಲ. ಅದನ್ನು ಪ್ರಯೋಗಾಲಯಗಳಲ್ಲೇ ಅಭಿವೃದ್ಧಿಪಡಿಸಬೇಕು.

ವಿಷಪೂರಿತ ಗಂಡು ಸೊಳ್ಳೆಗಳೆಲ್ಲಾ ಸಿದ್ಧವಾದ ಮೇಲೆ ಅವನ್ನು ಹೊರಜಗತ್ತಿಗೆ ಬಿಡಲಾಗುತ್ತದೆ. ಸಾಮಾನ್ಯ ಸೊಳ್ಳೆಗಳಿಗಿಂತ ಹೆಚ್ಚಿನ ಕಾಮಾಸಕ್ತಿ ಹೊಂದಿರುವ ಈ ಸೊಳ್ಳೆಗಳು ಬಂಧಮುಕ್ತವಾದೊಡನೆ, ಹೆಣ್ಣು ಸೊಳ್ಳೆಗಳನ್ನು ಹುಡುಕಿ ಮಿಲನ ಕ್ರಿಯೆಯಲ್ಲಿ ತೊಡಗುತ್ತವೆ. ಕೂಡಿದ ಹೆಣ್ಣು ಸೊಳ್ಳೆಯ ದೇಹದಲ್ಲೂ ಗಂಡು ಸೊಳ್ಳೆಯ ದೇಹದೊಳಗಿನ ವಿಷ ತುಂಬಿಕೊಳ್ಳುತ್ತದೆ. ಆಗ ಹೆಣ್ಣು ಸೊಳ್ಳೆ ಬದುಕುಳಿಯಲೂ ಸಹ ಟೈಟ್ರಾಸೈಕ್ಲಿನ್‌ ಬೇಕು. ಟೈಟ್ರಾಸೈಕ್ಲಿನ್‌ ದೊರೆಯದೇ ಹೆಣ್ಣು ಸೊಳ್ಳೆ ಮೃತಪಡುತ್ತದೆ.

ಇತ್ತ ವಿಷ ತುಂಬಿಕೊಂಡಿದ್ದ ಗಂಡು ಸೊಳ್ಳೆಗೂ ಕೂಡ ಟೈಟ್ರಾಸೈಕ್ಲಿನ್‌ ದೊರೆಯದೇ ಹೆಣ್ಣು ಸೊಳ್ಳೆಗೂ ಮುಂಚೆಯೇ ಮೃತಪಟ್ಟಿರುತ್ತದೆ. ಮಿಲನದಿಂದ ಹೆಣ್ಣು ಸೊಳ್ಳೆಯ ದೇಹದಲ್ಲಿ ಉತ್ಪಾದನೆಯಾಗುವ ಲಾರ್ವಾ ಕೂಡ ಬದುಕುಳಿಯುವುದಿಲ್ಲ. ಹೀಗೆ ವಿಜ್ಞಾನಿಗಳು ರೂಪಿಸಿರುವ ವಿಷಪೂರಿತ ಸೊಳ್ಳೆ ಮಾನವನ ಪರವಾಗಿ ನಿಂತು ತನ್ನ ಸಂತತಿಯನ್ನೇ ಮೋಸದಿಂದ ನಾಶಗೊಳಿಸುತ್ತದೆ.

2010ರ ವೇಳೆಯಲ್ಲೇ ಈ ಮಾನವಸ್ನೇಹಿ ಸೊಳ್ಳೆಗಳ ಪ್ರಯೋಗ ನಡೆದಿದೆ. 2010ರ ಮೇ ತಿಂಗಳಲ್ಲೇ ಕೆರೆಬಿಯನ್‌ ದ್ವೀಪವೊಂದರಲ್ಲಿ 30 ಲಕ್ಷ ಕುಲಾಂತರಿ ಸೊಳ್ಳೆಗಳನ್ನು ಬಿಡಲಾಗಿತ್ತು. ಅದೇ ವರ್ಷದ ಆಗಸ್ಟ್‌ ತಿಂಗಳ ವೇಳೆಗೆ ದ್ವೀಪದಲ್ಲಿನ ಶೇ.80ರಷ್ಟು ಸೊಳ್ಳೆಗಳು ನಾಶವಾಗಿದ್ದವು ಎಂದು ಕಂಪನಿ ಹೇಳಿಕೊಂಡಿತ್ತು. ಈ ಪ್ರಯೋಗಕ್ಕೆ ದುಡ್ಡು ನೀಡಿದ್ದು ಕೂಡ ಬಿಲ್ ಗೇಟ್ಸ್‌ ಒಡೆತನದ ಸಂಸ್ಥೆಯೇ.

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಇಂತಹ ಪ್ರಯತ್ನ ಇದೇ ಮೊದಲಾ?:

ಸೊಳ್ಳೆಗಳ ನಾಶಕ್ಕೆಂದು ಮಾನವರು ಹುಡುಕುತ್ತಿರುವ ದಾರಿಗಳಲ್ಲಿ ಇದೂ ಒಂದು ಅಷ್ಟೆಯೇ ಹೊರತು ಇದೇ ಮೊದಲನೆಯದೇನಲ್ಲ. ಈ ಹಿಂದೆ ಬ್ರೆಜಿಲ್‌ ದೇಶದ ಕಂಪಿನಾಸ್‌ ಪಟ್ಟಣದಲ್ಲಿ ಸೊಳ್ಳೆ ಫ್ಯಾಕ್ಟರಿಯನ್ನು ತೆರೆಯಲಾಗಿತ್ತು. ಫ್ರಾಕ್ಟರಿ ಡೆಂಗ್ಯೂ ಜ್ವರವನ್ನು ಹರಡುವ ಈಡಿಸ್‌ ಜಾತಿಯ ಗಂಡು ಸೊಳ್ಳೆಗಳನ್ನು ಉತ್ಪಾದಿಸಿ, ಬಲೂನುಗಳಲ್ಲಿ ತುಂಬಿ ಶೇಖರಿಸಿಡಲಾಗುತ್ತಿತ್ತು. ನಗರ ಸಭೆಗಳು ಈ ಸೊಳ್ಳೆ ಬಲೂನುಗಳನ್ನು ಕೊಂಡು ತಮ್ಮ ವ್ಯಾಪ್ತಿಯಲ್ಲಿ ಈ ಸೊಳ್ಳೆಗಳನ್ನು ಬಿಡುತ್ತಿದ್ದರು.

ವಿಶೇಷತೆ ಏನೆಂದರೆ ಈ ಸೊಳ್ಳೆಗಳು ರಕ್ತ ಹೀರುತ್ತಿರಲಿಲ್ಲ. ರಕ್ತ ಹೀರುವ ಕೆಲಸ ಹೆಣ್ಣು ಸೊಳ್ಳೆಗಳದ್ದು ಮಾತ್ರ. ಜತೆಗೆ ಡೆಂಗ್ಯು ಹರಡುವುದೂ ಕೂಡ ಹೆಣ್ಣು ಸೊಳ್ಳೆಯೇ. ನೈಸರ್ಗಿಕ ಹೆಣ್ಣು ಸೊಳ್ಳೆಗಳು ಮತ್ತು ಮಾನವ ಉತ್ಪಾದಿತ ಗಂಡು ಸೊಳ್ಳೆಗಳ ಮಿಲನದ ಫಲವಾಗಿ ಹುಟ್ಟುವ ಮರಿ ಸೊಳ್ಳೆಗಳಿಗೆ ಹಾರುವ ಶಕ್ತಿಯೇ ಇರುತ್ತಿರಲಿಲ್ಲ. ಹುಟ್ಟುವಾಗಲೇ ಅಂಗವಿಕಲವಾಗಿ ಹುಟ್ಟುವ ಸೊಳ್ಳೆಗಳಿಗೆ ರಕ್ತ ಹೀರುವ ಶಕ್ತಿ ಇನ್ನೆಲ್ಲಿಂದ ಬಂದೀತು? ಕೆಲವೇ ದಿನಗಳಲ್ಲಿ ಮರಿಸೊಳ್ಳೆಗಳು ಸತ್ತುಹೋಗುತ್ತಿದ್ದವು. ಆದರೆ ಈ ಪ್ರಕ್ರಿಯೆ ಹೆಚ್ಚು ದಿನ ಉಳಿಯಲಿಲ್ಲ.

ಸಾಂದರ್ಭಿಕ ಚಿತ್ರ.
ಸಾಂದರ್ಭಿಕ ಚಿತ್ರ.

ಯೋಚಿಸಬೇಕಾದ ಸಂಗತಿ:

ಹತ್ತಿ ಗಿಡಕ್ಕೆ ತೊಂದರೆ ನೀಡುತ್ತಿದ್ದ ಬಿಳಿ ಕಾಯಿಕೊರಕ ಹುಳುಗಳನ್ನು ತಡೆಯುವ ಸಲುವಾಗಿ ಬಿಟಿ ಹತ್ತಿಯನ್ನು ಅಭಿವೃದ್ಧಿಪಡಿಸಲಾಯಿತು. ಇದರಿಂದ ಬಿಳಿ ಕಾಯಿಕೊರಕ ಹುಳುಗಳೇನೋ ಕೊನೆಯಾದವು. ಆದರೆ ಅದರ ಜಾಗಕ್ಕೆ ಗುಲಾಬಿ ಬಣ್ಣದ ಕಾಯಿಕೊರಕ ಹುಳುಗಳು ಬಂದವು. ಪ್ರಕೃತಿಗೆ ಪರ್ಯಾಯವಾಗಿ ತಂತ್ರಜ್ಞಾನದ ಮೂಲಕ ಏನನ್ನಾದರೂ ಸೃಷ್ಟಿಸಿದರೆ ಕೆಲವೇ ದಿನಗಳಲ್ಲಿ ಪ್ರಕೃತಿ ಅದಕ್ಕೆ ಹೊಸದೊಂದು ಪರ್ಯಾಯವನ್ನು ಸೃಷ್ಟಿಸಿಕೊಳ್ಳಬಲ್ಲದು ಎಂಬುದಕ್ಕೆ ಇದೊಂದೇ ಉದಾಹರಣೆ ಸಾಕು.

ಸೊಳ್ಳೆಗಳ ವಿಚಾರದಲ್ಲೂ ಕೂಡ ಇದು ಸತ್ಯವೆಂದು ಸಾಬೀತಾಗಿದೆ. ಸೊಳ್ಳೆಗಳ ನಾಶಕ್ಕಾಗಿ ಡಿಡಿಟಿ ಪುಡಿಯನ್ನು ಬಳಸಲು ಪ್ರಾರಂಭಿಸಲಾಯಿತು. ಬೀದಿ ಬದಿಯಲ್ಲಿ ಚರಂಡಿಗಳ ಸುತ್ತಲೆಲ್ಲಾ ಡಿಡಿಟಿ ಪುಡಿಯನ್ನು ಉದುರಿಸುವ ಕಾರ್ಯ ಆರಂಭವಾಯಿತು. ಕೆಲದಿನಗಳ ಕಾಲ ಮನುಷ್ಯನ ಈ ಹೊಸ ಪ್ರಯೋಗಕ್ಕೆ ಸೊಳ್ಳೆಗಳು ಸತ್ತವು. ಆದರೆ ಕೆಲವೇ ದಿನಗಳಲ್ಲಿ ಡಿಡಿಟಿಯನ್ನು ಜೀರ್ಣಿಸಿಕೊಳ್ಳಬಲ್ಲ ರೋಗ ನಿರೋಧಕ ಶಕ್ತಿಯನ್ನು ಬೆಳೆಸಿಕೊಂಡು ಮುನುಷ್ಯನಿಗೆ ಎದುರಾದವು. ‘ಮಾನವ ಸ್ನೇಹಿ’ ಸೊಳ್ಳೆಗಳ ವಿಚಾರದಲ್ಲೂ ಇದೇ ರೀತಿ ಆದರೆ ಹೇಗೆ ಎನ್ನುವುದಕ್ಕೆ ಇನ್ನೂ ಉತ್ತರ ದೊರೆತಿಲ್ಲ.

ಇದೆಲ್ಲಕ್ಕಿಂತ ಮುಖ್ಯವಾಗಿ ಮತ್ತೊಂದು ಸಂಗತಿ ಪ್ರಾಮುಖ್ಯತೆ ಪಡೆದುಕೊಳ್ಳುತ್ತದೆ. ಸೊಳ್ಳೆಯೂ ಕೂಡ ಮನುಷ್ಯನಂತೆಯೇ ಒಂದು ಜೀವಿ. ಅದಕ್ಕೂ ಕೂಡ ಭೂಮಿಯ ಮೇಲೆ ಬದುಕುವ ಹಕ್ಕಿದೆ. ಆಹಾರಕ್ಕಾಗಿ ನಾವು ಸಸ್ಯಗಳನ್ನೋ ಅಥವಾ ಪ್ರಾಣಿಗಳನ್ನೋ ಅವಲಂಬಿಸಿರುವಂತೆ ಅವೂ ಕೂಡ ತಮ್ಮ ಆಹಾರಕ್ಕಾಗಿ ಇತರೆ ಪ್ರಾಣಿಗಳನ್ನು ಅವಲಂಬಿಸಿವೆ. ಅವುಗಳಿಂದ ನಮಗೆ ತೊಂದರೆಯಾಗುತ್ತಿದೆ ಎನ್ನುವ ಕಾರಣದಿಂದ ಅವುಗಳ ಸಂತತಿಯನ್ನೇ ನಾಶಪಡಿಸುವ ಯೋಜನೆಗೆ ಕೈಹಾಕುವ ಮುಂಚೆ ನಮಗೆ ಆ ಹಕ್ಕನ್ನು ಕೊಟ್ಟವರ್ಯಾರು ಎಂಬ ಪ್ರಶ್ನೆಯನ್ನು ಮನುಷ್ಯ ಹಾಕಿಕೊಳ್ಳಬೇಕಿದೆ.