‘ರಾಷ್ಟ್ರೀಯ ಜಾನುವಾರು ಗಣತಿ’: ಉತ್ತರ ಕನ್ನಡದಲ್ಲಿ ಆಟಕ್ಕುಂಟು ಲೆಕ್ಕಕ್ಕಿಲ್ಲ!
GROUND REPORT

‘ರಾಷ್ಟ್ರೀಯ ಜಾನುವಾರು ಗಣತಿ’: ಉತ್ತರ ಕನ್ನಡದಲ್ಲಿ ಆಟಕ್ಕುಂಟು ಲೆಕ್ಕಕ್ಕಿಲ್ಲ!

ಭಾರತದಲ್ಲಿ 1919-1920ರಿಂದಲೂ ಜಾನುವಾರು ಗಣತಿಯನ್ನು ನಡೆಸಿಕೊಂಡು ಬರಲಾಗುತ್ತಿದೆ. ಈ ವರೆಗೆ ಇಂತಹ 19 ಗಣತಿಯನ್ನು ಕೈಗೊಳ್ಳಲಾಗಿದೆ.

ಇದು ಜನ ಗಣತಿಯ ಕತೆ ಅಲ್ಲ; ದನ ಗಣತಿಯ ಕತೆ.

ಈ ದೇಶದಲ್ಲಿ ಪ್ರತಿ ಹತ್ತು ವರ್ಷಕ್ಕೊಮ್ಮೆ ಜನರೆಷ್ಟಿದ್ದಾರೆ, ಅವರ ಆದಾಯ ಏನು? ಅವರ ಸಾಮಾಜಿಕ ಪರಿಸ್ಥಿತಿ ಹೇಗೆದೆ? ಎಂಬುದನ್ನು ಅರ್ಥ ಮಾಡಿಕೊಳ್ಳಲು ಗಣತಿ ಕಾರ್ಯ ನಡೆಯುತ್ತದೆ. ಅದೇ ರೀತಿ ಸಾಕು ಪ್ರಾಣಿ, ಪಕ್ಷಿಗಳ ವಿಚಾರದಲ್ಲಿಯೂ ಇಂತಹದ್ದೇ ಒಂದು ಗಣತಿ ಇಲ್ಲಿ ಜಾರಿಯಲ್ಲಿದೆ. ಆದರೆ, ಈ ಬಾರಿ ಅದು ನಾನಾ ಸಮಸ್ಯೆಗಳಿಂದ ಕೂಡಿದ್ದು, ಉದ್ದೇಶ ಈಡೇರುವ ಸಾಧ್ಯತೆಗಳು ಉತ್ತರ ಕನ್ನಡ ಜಿಲ್ಲೆಯಲ್ಲಿ ಕಂಡು ಬರುತ್ತಿಲ್ಲ.

ಏನಿದು ಜಾನುವಾರು ಗಣತಿ?:

ಭಾರತದಲ್ಲಿ 1919-1920ರಿಂದಲೂ ಜಾನುವಾರು ಗಣತಿಯನ್ನು ನಡೆಸಿಕೊಂಡು ಬರಲಾಗುತ್ತಿದೆ. ಈ ವರೆಗೆ ಇಂತಹ 19 ಗಣತಿಯನ್ನು ಕೈಗೊಳ್ಳಲಾಗಿದೆ. ಈಗ 20ನೇ ಜಾನುವಾರು ಗಣತಿಯನ್ನು ಕೇಂದ್ರ ಸರಕಾರ ಆಯೋಜಿಸಿದೆ. ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಪ್ರತಿ ಜಿಲ್ಲೆಯಲ್ಲೂ ಈ ಗಣತಿ ನಡೆಯುತ್ತಿದೆ.

ಜಾನುವಾರು ಗಣತಿಯಲ್ಲಿ ಪ್ರಮುಖವಾಗಿ ಪ್ರಬೇಧವಾರು, ತಳಿವಾರು ಒಟ್ಟೂ ಸಂಖ್ಯೆಯನ್ನು ಅವುಗಳ ವಯಸ್ಸು, ಲಿಂಗ ಮತ್ತು ಉಪಯುಕ್ತತೆಯನ್ನು ಗುರುತಿಸುವ ಉದ್ದೇಶದಿಂದ ನಡೆಸಲಾಗುತ್ತಿದೆ. ದನಗಳು, ಕುರಿಗಳು, ಮೇಕೆಗಳು, ಹಂದಿಗಳು, ಕುದುರೆಗಳು, ಸಣ್ಣ ಕುದುರೆಗಳು, ಹೇಸರಗತ್ತೆಗಳು, ಕತ್ತೆಗಳು, ಒಂಟೆಗಳು, ನಾಯಿಗಳು, ಮೊಲಗಳು, ಆನೆಗಳು ಮತ್ತು ಕುಕ್ಕುಟದ ಹಕ್ಕಿಗಳಾದ ಕೋಳಿಗಳು, ಹುಂಜಗಳು, ಬಾತುಕೋಳಿಗಳು, ಟರ್ಕಿ ಕೋಳಿಗಳು ಹಾಗೂ ಏಮು, ಕ್ವಿಲ್ಸ್, ಗಿನಿಕೋಳಿಗಳು, ಆಸ್ಟ್ರಿಚ್ ಮತ್ತು ಹೆಬ್ಬಾತು ಮತ್ತು ಮೀನುಗಾರಿಕೆ ಹೊಂದಿರುವ ಕುಟುಂಬಗಳು, ಉದ್ಯಮಗಳು ಮತ್ತು ಸಂಸ್ಥೆಗಳ ಗಣತಿ ಕಾರ್ಯವನ್ನು ಸ್ಥಳದಲ್ಲಿಯೇ ಮಾಡಬೇಕಾಗಿದೆ. ಅಲ್ಲದೇ ಇವುಗಳನ್ನು ಸಾಕಣೆ ಮಾಡುವ ಸ್ಥಳ, ಕಟ್ಟಡ, ಯಜಮಾನನ ಮನೆ, ಹಿಡುವಳಿ, ಹಾಲು ಮಾಂಸಗಳ ಇಳುವರಿ, ಲಾಭ, ಬಳಸಲಾಗುತ್ತಿರುವ ಚಿಕ್ಕ-ದೊಡ್ಡ ಯಂತ್ರೋಪಕರಣಗಳು ಮುಂತಾದ ವಿವರಗಳನ್ನು ಕರಾರುವಾಕ್ಕಾಗಿ ಜಾನುವಾರು ಗಣತಿ ನಮೂದಿಸಬೇಕು.

ಉದ್ದೇಶಕ್ಕೆ ಸಮಸ್ಯೆಗಳೇ ಅಡ್ಡಿ:

ಜಾನುವಾರು ಗಣತಿದಾರರಾಗಿ ಪಶುವೈದ್ಯಕೀಯ ಪರೀಕ್ಷಕರು/ಸಹಾಯಕರು, ಅರೆಕಾಲಿಕ ಪಶುವೈದ್ಯರು, ಪಶುವೈದ್ಯಕೀಯ ಪದವೀಧರರು ಅಥವಾ ನಿವೃತ್ತಿ ಹೊಂದಿದವರು ಕೈಗೊಳ್ಳಬಹುದಾಗಿದೆ. ಆದರೆ ಉತ್ತರಕನ್ನಡ ಜಿಲ್ಲೆಯ ತಾಲೂಕುಗಳಲ್ಲಿ ಕಡಿಮೆ ಪಶು ವೈದ್ಯರುಗಳು ಕೆಲಸ ನಿರ್ವಹಿಸುತ್ತಿದ್ದು, ಗಣತಿಗೆ ಬಹುಪಾಲು ಸಮಯ ಹೋಗುತ್ತಿದೆ. ಖಾಲಿ ಇರುವ ಹುದ್ದೆಗಳನ್ನು ಭರ್ತಿ ಮಾಡಲಾಗಿಲ್ಲ. ಎನ್.ಬಿ.ಎ.ಜಿ.ಆರ್. ನಿರ್ದೇಶನದ ಪ್ರಕಾರ ಪ್ರತಿ ಕುಟುಂಬದ ಗಣತಿ ಪೂರೈಸಲು ಕಡಿಮೆಯೆಂದರೂ 1 ಗಂಟೆ ಹಿಡಿಯುತ್ತಿದೆ. ಒಂದು ತಾಲೂಕಿನಲ್ಲಿ 13-15 ಸಿಬ್ಬಂದಿಗಳು ಮಾತ್ರ ಕೆಲಸ ನಿರ್ವಹಿಸುತ್ತಿದ್ದಾರೆ. ಸರಾಸರಿ ಒಂದು ಊರಿಗೆ ಒಂದೂವರೆಯಿಂದ ಎರಡು ದಿನ ಕಡಿಮೆಯೆಂದರೂ ಹಿಡಿಯುತ್ತದೆ. ಈ ಜಾನುವಾರು ಗಣತಿಯನ್ನು ಗ್ರಾಮೀಣ ಮತ್ತು ಪಟ್ಟಣ ಪ್ರದೇಶಗಳೆರಡರಲ್ಲೂ ಕೈಗೊಳ್ಳಬೇಕಾಗಿದೆ.

ಉದಾಹರಣೆಗೆ, ಉತ್ತರಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನಲ್ಲಿ ಸುಮಾರು 30000 ಕುಟುಂಬಗಳನ್ನು ಸಿಬ್ಬಂದಿ ಗಣತಿಗಾಗಿ ಸಂಪರ್ಕಿಸಬೇಕಿದೆ. ಇರುವ 13 ಸಿಬ್ಬಂದಿಗಳಲ್ಲಿ ಪ್ರತಿಯೊಬ್ಬರೂ ದಿನಕ್ಕೆ 8 ಮನೆಗಳನ್ನು ಪೂರೈಸಿದರೂ ಸುಮಾರು 268 ದಿನಗಳು ಬೇಕಾಗುತ್ತವೆ. ಆದರೆ ಗಣತಿ 90 ದಿನಗಳಲ್ಲಿಯೇ ಮುಗಿಯಬೇಕಿದೆ. ಈಗಾಗಲೇ ಆಯೋಜಿಸಲಾಗಿದ್ದ ತರಬೇತಿ ಅವಧಿ ಕಳೆದರೆ 70-80 ದಿನಗಳು ಮಾತ್ರ ಸಿಗಲಿದೆ.

ಜಾನುವಾರು ಗಣತಿಯ ಕೈಪಿಡಿಯ ಒಂದು ಸ್ಯಾಂಪಲ್. 
ಜಾನುವಾರು ಗಣತಿಯ ಕೈಪಿಡಿಯ ಒಂದು ಸ್ಯಾಂಪಲ್. 

ತಾಂತ್ರಿಕ ತೊಂದರೆ; ಉತ್ತರವಿಲ್ಲ:

ತಾಲೂಕಿನಿಂದ ಮೂವರನ್ನು ಬೆಂಗಳೂರಿಗೆ ತರಬೇತಿಗೆ ಕಳುಹಿಸಲಾಯಿತಾದರೂ, ತರಬೇತಿ ಆಯೋಜಿಸಿದ್ದೇ ಗಣತಿ ಪ್ರಾರಂಭಿಸಬೇಕಿದ್ದ ದಿನ ಕಳೆದು ವಾರದ ನಂತರ. ತರಬೇತಿ ಪಡೆದವರು ಸ್ಥಳೀಯ ಸಿಬ್ಬಂದಿಗೆ ತರಬೇತಿ ನೀಡಿ, ಸರಕಾರದಿಂದ ಇದಕ್ಕಾಗಿಯೇ ನೀಡಲಾಗಿದ್ದ ಟ್ಯಾಬ್ ಗಳನ್ನು ಸಿಬ್ಬಂದಿಗೆ ಹಸ್ತಾಂತರಿಸಿದರು.

ಎಷ್ಟೋ ಸಿಬ್ಬಂದಿಗಳಿಗೆ ಈ ಟ್ಯಾಬ್ ತಂತ್ರಜ್ಞಾನ ಸರಿಯಾಗಿ ಅರ್ಥವಾಗದೇ ಟ್ಯಾಬ್ ನಲ್ಲಿ ಡಾಟಾ ಸಂಗ್ರಹದ ಜೊತೆಗೆ ಪೇಪರ್‌ನಲ್ಲಿಯೂ ಅಂಕಿ ಅಂಶಗಳನ್ನು ತಂದು ಟ್ಯಾಬ್‌ನಲ್ಲಿ ಭರ್ತಿಮಾಡಲ್ಪಟ್ಟ ಡಾಟಾಗಳನ್ನು ನಂತರದಲ್ಲಿ ಅರಿತವರಿಂದ ಸರಿಪಡಿಸಿ ಕಾರ್ಯನಿರ್ವಹಿಸುವ ಅನಿವಾರ್ಯತೆ ಎದುರಾಯಿತು. ಇದು ಗಣತಿ ಪ್ರಕ್ರಿಯೆಯನ್ನು ಇನ್ನಿಲ್ಲದ ನಿಧಾನಗತಿಗೆ ದೂಡಿತು.

ಇದರಿಂದ ಹಾಲು ಒಕ್ಕೂಟದ ಪ್ರಾಥಮಿಕ ಸಹಕಾರಿ ಸಂಘಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಸಿಬ್ಬಂದಿಗಳ ಮೊಬೈಲ್ ಗೆ ಆ್ಯಪ್ ಡೌನ್ಲೋಡ್ ಮಾಡಿಸಿ ಅವರು ಗರ್ಭಧಾರಣೆಗೆ ಹೋದಾಗ ಅಲ್ಲಿನ ಮಾಹಿತಿ ತರುವಂತೆ ಚಿಕ್ಕ ತರಬೇತಿ ನೀಡಿ ಸೂಚನೆ ನೀಡಲಾಯಿತು. ಆದರೆ ಇವರಲ್ಲಿ ರಾಷ್ಟ್ರೀಯ ಜಾನುವಾರು ಗಣತಿಯಲ್ಲಿ ನಿರ್ದೇಶಿಸಲಾದ ಪ್ರಬೇಧ, ತಳಿವಾರು ಮಾಹಿತಿ ಇರುವವರು ತುಂಬಾ ಕಡಿಮೆ.

ಸರ್ವರ್ ಕೈಕೊಟ್ಟಿತು:

ಪ್ರಾರಂಭದಲ್ಲಿ 9 ಹಳ್ಳಿಗಳ ಅಂಕಿಂ-ಅಂಶಗಳನ್ನು ಸಂಗ್ರಹಿಸಿ ರಾಷ್ಟ್ರೀಯ ಸರ್ವರ್‌ಗೆ ಅಪ್ಲೋಡ್ ಮಾಡಲಾಯಿತು. ಆದರೆ ಈ ಅಂಕಿಅಂಶಗಳು ಬೇರೆ ರಾಜ್ಯದ ವಿವಿಧ ಹಳ್ಳಿಗಳ ಹೆಸರಿನಲ್ಲಿ ಸರ್ವರ್‌ನಿಂದ ಸ್ವೀಕೃತವಾಗಿ ಗೊಂದಲವೆದ್ದಿದೆ. ಇದನ್ನು ರಾಷ್ಟ್ರೀಯ ಮಟ್ಟದಲ್ಲೇ ಪರಿಹರಿಸಬೇಕು. ನಾವು ಏನೂ ಮಾಡುವ ಹಾಗಿಲ್ಲ ಯಾವಾಗ ಸರಿಹೋಗುತ್ತದೋ ಗೊತ್ತಿಲ್ಲ ಎಂಬುದು ಪಶು ಸಂಗೋಪನಾ ಇಲಾಖೆಯ ಹಿರಿಯ ಅಧಿಕಾರಿಗಳ ಅಳಲು.

ಚಿಕಿತ್ಸೆಗೇ ಸಿಬ್ಬಂದಿ ಕೊರತೆ:

ಇರುವ ಎಲ್ಲ ಸಿಬ್ಬಂದಿಗಳೂ ಜಾನುವಾರು ಗಣತಿಯಲ್ಲಿ ತೊಡಗಿಸಲಾಗಿದ್ದರಿಂದ ತಾಲುಕು ಕೇಂದ್ರದ ಪಶು ಆಸ್ಪತ್ರೆಗಳಲ್ಲಿ ಹಾಗೂ ಗ್ರಾಮೀಣ ಭಾಗದ ಪ್ರಾಥಮಿಕ ಪಶು ವೈದ್ಯಕೀಯ ಘಟಕಗಳಲ್ಲಿ ಯಾವುದೇ ಸಿಬ್ಬಂದಿಗಳೂ ಚಿಕಿತ್ಸೆಗೆ ದೊರಕುತ್ತಿಲ್ಲ. ಮುಂಜಾನೆ ಬೇಗ ಭೇಟಿಯಾಗಿ ಪಶು ಆರೋಗ್ಯ ಸಮಸ್ಯೆ ಹೇಳಿಕೊಂಡರೂ ಪುರುಸೊತ್ತಿಲ್ಲ ಎಂದೋ, ಅನಾರೋಗ್ಯ ಪೀಡಿತ ಜಾನುವಾರುಗಳ ಮಲ-ಮೂತ್ರ ಸಂಗ್ರಹಿಸಿ ಲ್ಯಾಬ್ ಟೆಸ್ಟ್ ಮಾಡಿಸಿಕೊಂಡು ಬನ್ನಿ ಎಂದೋ ಸಾಗಹಾಕಲಾಗುತ್ತಿದೆ. ನೊಂದ ರೈತರು ಅಧಿಕ ವೆಚ್ಛ ಭರಿಸಿ ಖಾಸಗಿ ಆಸ್ಪತ್ರೆಗಳಿಗೆ ಎಡತಾಕಬೇಕಾದ ಅನಿವಾರ್ಯ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದು ಜಾನುವಾರು ಗಣತಿಯ ಅಡ್ಡ ಪರಿಣಾಮ.

ಮುಂದಿನ ದಿನಗಳಲ್ಲಿ ಪಶುಸಂಗೋಪನೆ, ಮೀನುಗಾರಿಕೆಯೇ ಮುಂತಾದ ವಿಭಾಗಗಳಲ್ಲಿ ರೈತ ಪ್ರಗತಿಪರ ಯೋಜನೆಗಳನ್ನು ಹಮ್ಮಿಕೊಳ್ಳುವ ಮಹತ್ವಾಕಾಂಕ್ಷೆಯಿಂದ ಕೈಗೊಳ್ಳಲಾದ ಕೇಂದ್ರ ಸರಕಾರದ ಈ ಯೋಜನೆ, ತಾಂತ್ರಿಕ ದೋಷ ಹಾಗೂ ಮಾನವ ಸಂಪನ್ಮೂಲಗಳ ಕೊರತೆ ಎದುರಿಸಿ ಹಳ್ಳ ಹಿಡಿಯುವಂತಾಗಿದೆ. ಈ ಗಡಿಬಿಡಿ ಗಣತಿಯಿಂದ ಯಾವ ಉದ್ದೇಶಗಳೂ ರೈತಪರವಾಗಲಾರವು ಎಂಬುದು ಸ್ಪಷ್ಟ. ಗಣತಿಪೂರ್ವ ಯೋಜನೆ, ಸಿಬ್ಬಂದಿಗಳ ತರಬೇತಿಗಳಾವವೂ ಪರಿಣಾಮಕಾರಿಯಾಗಿ ಆಗದೇ ಇರುವುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಸುಮ್ಮನೆ ದುಂದುವೆಚ್ಛ ಮಾಡುವ ಬದಲು ಸರಿಯಾದ ಪೂರ್ವನಿಯೋಜತೆಯಿಂದ ಪರಿಣಾಮಕಾರಿಯಾಗಿ ಇನ್ನೊಮ್ಮೆ ಕೈಗೊಳ್ಳಬೇಕಿದೆ.