samachara
www.samachara.com
ಚೌಕಿದಾರ್‌ ಅಲ್ಲ ನಾನೊಬ್ಬ ನಿರುದ್ಯೋಗಿ; ಮೋದಿ ಆಡಳಿತದಲ್ಲಿ ಉದ್ಯೋಗಿಗಳ ಸಂಖ್ಯೆ ದಾಖಲೆಯ ಕುಸಿತ
COVER STORY

ಚೌಕಿದಾರ್‌ ಅಲ್ಲ ನಾನೊಬ್ಬ ನಿರುದ್ಯೋಗಿ; ಮೋದಿ ಆಡಳಿತದಲ್ಲಿ ಉದ್ಯೋಗಿಗಳ ಸಂಖ್ಯೆ ದಾಖಲೆಯ ಕುಸಿತ

ಒಟ್ಟಾರೆ 2011-12ರಿಂದ 17-18ರ ಹೊತ್ತಿಗೆ ಐದು ವರ್ಷದ ಅವಧಿಯಲ್ಲಿ ದೇಶದಲ್ಲಿ 4.7 ಕೋಟಿ ಜನರು ಉದ್ಯೋಗ ಕಳೆದುಕೊಂಡಿದ್ದಾರೆ. ಇದು ಸೌದಿ ಅರೇಬಿಯಾದ ಒಟ್ಟು ಜನಸಂಖ್ಯೆಗೆ ಸಮವಾಗಿದೆ.

ಎನ್. ಸಚ್ಚಿದಾನಂದ

ಎನ್. ಸಚ್ಚಿದಾನಂದ

ಒಂದು ಕಾಲದಲ್ಲಿ ನಮ್ಮನಾಳುತ್ತಿದ್ದ ಬ್ರಿಟನ್‌ ದೇಶ ಇಂದು ನಾಗಾಲೋಟದಲ್ಲಿ ಮುನ್ನಡೆಯುತ್ತಿದೆ. ಅಲ್ಲಿ 1971ರ ನಂತರ ಇದೇ ಮೊದಲ ಬಾರಿಗೆ ಗರಿಷ್ಠ ಜನರು ಉದ್ಯೋಗದಲ್ಲಿ ನಿರತರಾಗಿದ್ದಾರೆ. 6.6 ಕೋಟಿ ಜನರಿರುವ ಬ್ರಿಟನ್‌ ದೇಶದಲ್ಲಿ 3.27 ಕೋಟಿ ಜನರು ಕೆಲಸ ಮಾಡುತ್ತಿದ್ದಾರೆ. ದುಡಿಯುವ ವಯಸ್ಸೂ ಇದ್ದು ಕೆಲಸವಿಲ್ಲದೆ ಇರುವವರು ಸಂಖ್ಯೆ ಕೇವಲ 13.4 ಲಕ್ಷ ಮಾತ್ರ.

ಅಲ್ಲಿ ಕಳೆದ ಐದು ವರ್ಷದಲ್ಲಿ 77 ಸಾವಿರ ಪುರುಷರು ಮತ್ತು 1.44 ಲಕ್ಷ ಮಹಿಳೆಯರ ಉದ್ಯೋಗಗಳು ಹೆಚ್ಚುವರಿಯಾಗಿ ಸೃಷ್ಟಿಯಾಗಿವೆ. ಇವೆಲ್ಲದರ ಪರಿಣಾಮ ಸದ್ಯಕ್ಕೆ ಬ್ರಿಟನ್‌ನಲ್ಲಿ ದುಡಿಯುವ ವಯೋಮಾನ (16-64 ವರ್ಷ)ದ ಶೇಕಡಾ 76.1 ಜನರು ಉದ್ಯೋಗದಲ್ಲಿ ನಿರತವಾಗಿದ್ದಾರೆ. ಹೀಗೊಂದು ಮಾಹಿತಿಯನ್ನು ಅಲ್ಲಿನ ಅಂಕಿ ಅಂಶಗಳ ಇಲಾಖೆ ಬಿಡುಗಡೆ ಮಾಡಿದೆ.

ಆದರೆ ವಿಶ್ವಗುರು ಹಾದಿಯಲ್ಲಿರುವ, ಅಭಿವೃದ್ಧಿ ಹೊಂದಿದ ದೇಶಗಳ ಸಾಲಿನಲ್ಲಿ ಗುರುತಿಸಿಕೊಳ್ಳಲು ಹಾತೊರೆಯುತ್ತಿರುವ ಭಾರತದ ಪರಿಸ್ಥಿತಿ ಮಾತ್ರ ಸಂಪೂರ್ಣ ಭಿನ್ನವಾಗಿದೆ.

ಮೊದಲಿಗೆ ಇಲ್ಲಿ ಸರಕಾರಿ ಸಂಸ್ಥೆಯೇ ನಡೆಸಿದ ಸಮೀಕ್ಷೆಯನ್ನು ಬಿಡುಗಡೆ ಮಾಡಿಲ್ಲ. ಎರಡನೆಯದಾಗಿ ಇದರಲ್ಲಿ ನೀಡಿರುವ ಅಂಕಿ ಅಂಶಗಳು ದೇಶದಲ್ಲಿ ನಿರುದ್ಯೋಗದ ಪ್ರಮಾಣ 45 ವರ್ಷಗಳಲ್ಲೇ ಗರಿಷ್ಠ ಪ್ರಮಾಣದಲ್ಲಿದೆ ಎಂಬುದಾಗಿ ಹೇಳುತ್ತಿದೆ.

1972-73ರ ನಂತರ ಗರಿಷ್ಠ ಮಟ್ಟದಲ್ಲಿ ನಿರುದ್ಯೋಗ:

ಕೆಲವು ತಿಂಗಳ ಹಿಂದೆ 'ಆವರ್ತಕ ಕಾರ್ಮಿಕ ಶಕ್ತಿ ಸಮೀಕ್ಷೆ'ಯನ್ನು ಉಲ್ಲೇಖಿಸಿ ವರದಿ ಮಾಡಿದ್ದ 'ಬಿಸಿನೆಸ್ ಸ್ಟಾಂಡರ್ಡ್‌', ಕಳೆದ 45 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ನಿರುದ್ಯೋಗ ಪ್ರಮಾಣ ಗರಿಷ್ಠ ಶೇಕಡಾ 6.1ನ್ನು ತಲುಪಿದೆ ಎಂದು ಹೇಳಿತ್ತು. ಈ ಹಿಂದೆ 1972-73ರಲ್ಲಿ ನಿರುದ್ಯೋಗ ಸಮಸ್ಯೆ ಇದೇ ಹಂತಕ್ಕೆ ಬಿಗುಡಾಯಿಸಿತ್ತು. ಅದಾದ ಬಳಿಕ 2017-18ರ ಅವಧಿಯಲ್ಲೇ ಗರಿಷ್ಠ ಮಟ್ಟಕ್ಕೆ ನಿರುದ್ಯೋಗ ಹೆಚ್ಚಾಗಿದೆ ಎಂಬುದಾಗಿ ಸರಕಾರಿ ಸಂಸ್ಥೆ 'ನ್ಯಾಷನಲ್ ಸ್ಯಾಂಪಲ್‌ ಸರ್ವೇ ಆಫೀಸ್‌ (ಎನ್‌ಎಸ್‌ಎಸ್‌ಒ)' ನಡೆಸಿದ ಸಮೀಕ್ಷೆಯಲ್ಲಿ ತಿಳಿದು ಬಂದಿತ್ತು.

ಇದೀಗ ಈ ಸಮೀಕ್ಷೆಯನ್ನು ಮತ್ತಷ್ಟು ಪರಿಶೀಲನೆಗೆ ಒಳಪಡಿಸಿರುವ ‘ಇಂಡಿಯನ್‌ ಎಕ್ಸ್‌ಪ್ರೆಸ್‌’ ಇನ್ನೊಂದಿಷ್ಟು ಕುತೂಹಲಕಾರಿ ಮಾಹಿತಿಗಳನ್ನು ಹೆಕ್ಕಿ ತಂದಿದೆ. ದೇಶದಲ್ಲಿ 1993-94ರ ನಂತರ ಇದೇ ಮೊದಲ ಬಾರಿಗೆ ಕನಿಷ್ಠ ಪುರುಷರು ಉದ್ಯೋಗದಲ್ಲಿದ್ದಾರೆ ಎಂಬುದಾಗಿ ಪತ್ರಿಕೆ ಹೇಳಿದೆ. ಇನ್ನೂ ಬಿಡುಗಡೆಯಾಗದ ಸಮೀಕ್ಷೆಯ ವರದಿಯಲ್ಲಿ ಈ ಅಂಶಗಳಿದ್ದು ಸದ್ಯ ದೇಶದ 130 ಕೋಟಿ ಜನರಲ್ಲಿ ಕೇವಲ 28.6 ಕೋಟಿ ಪುರುಷರು ಮಾತ್ರ ಉದ್ಯೋಗದಲ್ಲಿ ನಿರತರಾಗಿದ್ದಾರೆ ಎಂದು ಅದು ಹೇಳಿದೆ.

ಈ ಹಿಂದೆ 1993-94ರಲ್ಲಿ ದೇಶದಲ್ಲಿ 21.9 ಕೋಟಿ ಜನರು ಉದ್ಯೋಗದಲ್ಲಿ ನಿರತರಾಗಿದ್ದರು. ಈ ಪ್ರಮಾಣ ವರ್ಷ ವರ್ಷ ಏರಿಕೆಯಾಗುತ್ತಾ ಬಂದು 2011-12ರಲ್ಲಿ 30.4 ಕೋಟಿಗೆ ತಲುಪಿತ್ತು. ಇದೀಗ ಐದು ವರ್ಷದ ನಂತರ ಮತ್ತೆ ಸಮೀಕ್ಷೆ ನಡೆಸಲಾಗಿದ್ದು ಉದ್ಯೋಗಸ್ಥ ಪುರುಷರ ಪ್ರಮಾಣ ಕುಸಿತವಾಗಿರುವುದು ಸಾಬೀತಾಗಿದೆ.

ಒಂದು ಕಡೆ ವರ್ಷಕ್ಕೆ ಎರಡು ಕೋಟಿ ಉದ್ಯೋಗಗಳನ್ನು ಸೃಷ್ಟಿಸುವುದಾಗಿ ಭರವಸೆ ಬಿತ್ತಿ ಪ್ರಧಾನಿ ನರೇಂದ್ರ ಮೋದಿ 2014ರಲ್ಲಿ ಈ ದೇಶದಲ್ಲಿ ಅಧಿಕಾರಕ್ಕೇರಿದ್ದರು. ಇದೀಗ ಅವರ ಅವಧಿ ಅಂತ್ಯಗೊಳ್ಳುವ ಹೊತ್ತಿಗೆ ಉದ್ಯೋಗ ಸೃಷ್ಟಿಯಾಗುವುದಿರಲಿ ಇರುವ ಉದ್ಯೋಗವೂ ನಾಪತ್ತೆಯಾಗಿದೆ.

ಗ್ರಾಮೀಣ ಪ್ರದೇಶದಲ್ಲೇ ಹೆಚ್ಚಿನ ಉದ್ಯೋಗ ನಷ್ಟ:

ನಗರ ಪ್ರದೇಶಕ್ಕೆ ಹೋಲಿಸಿದರೆ ಗ್ರಾಮೀಣ ಪ್ರದೇಶದಲ್ಲಿ ಹೆಚ್ಚಿನ ಉದ್ಯೋಗ ನಷ್ಟ ಉಂಟಾಗಿದೆ ಎಂಬುದನ್ನು ವರದಿ ಹೇಳುತ್ತಿದೆ. 2017ರ ಜುಲೈ ಅವಧಿಯಿಂದ 2018ರ ಜುಲೈ ಅವಧಿಯಲ್ಲಿ ಈ ಸಮೀಕ್ಷೆ ನಡೆಸಲಾಗಿದ್ದು, ಉದ್ಯೋಗ ನಷ್ಟವಾಗಿರುವುದು ಮತ್ತು ಹೊಸ ಉದ್ಯೋಗ ಸೃಷ್ಟಿಯಾಗದೇ ಇರುವುದು ಸಮೀಕ್ಷೆಯಲ್ಲಿ ಕಂಡು ಬಂದಿದೆ.

ಇದರಲ್ಲಿರುವ ಮಾಹಿತಿಗಳ ಪ್ರಕಾರ 2011-12 ರಿಂದ 2017-18ರ ಹೊತ್ತಿಗೆ ಗ್ರಾಮೀಣ ಭಾಗದಲ್ಲಿ 4.3 ಕೋಟಿ ಉದ್ಯೋಗ (30.9 ಕೋಟಿಯಿಂದ 26.6 ಕೋಟಿಗೆ ಇಳಿಕೆ) ನಷ್ಟವಾಗಿದೆ. ಇದೇ ಅವಧಿಯಲ್ಲಿ ನಗರ ಪ್ರದೇಶದಲ್ಲಿ 0.4 ಕೋಟಿ ಉದ್ಯೋಗ (11.1 ಕೋಟಿಯಿಂದ 10.7 ಕೋಟಿಗೆ ಇಳಿಕೆ) ನಾಪತ್ತೆಯಾಗಿದೆ.

ಗ್ರಾಮೀಣ ಭಾಗದ ಉದ್ಯೋಗ ನಷ್ಟ ನೇರವಾಗಿ ಮಹಿಳೆಯರ ಮೇಲೆ ಪರಿಣಾಮ ಬೀರಿದೆ. ಗ್ರಾಮೀಣ ಭಾಗದಲ್ಲಿ ಉದ್ಯೋಗ ಕಳೆದುಕೊಂಡ 4.3 ಕೋಟಿ ಜನರಲ್ಲಿ ಶೇಕಡಾ 68ರಷ್ಟು ಮಹಿಳೆಯರೇ ಸೇರಿದ್ದಾರೆ. ನಗರ ಪ್ರದೇಶಕ್ಕೆ ಬಂದಾಗ ಮಾತ್ರ ಪುರುಷರು ಹೆಚ್ಚಿನ ಸಂಖ್ಯೆಯಲ್ಲಿ ನಿರುದ್ಯೋಗಿಗಳಾಗಿದ್ದಾರೆ. ಇಲ್ಲಿ ಉದ್ಯೋಗ ಕಳೆದುಕೊಂಡ 40 ಲಕ್ಷ ಜನರಲ್ಲಿ ಶೇಕಡಾ 96ರಷ್ಟು ಪುರುಷರೇ ಇದ್ದಾರೆ.

ಒಟ್ಟಾರೆ 2011-12ರಿಂದ 17-18ರ ಹೊತ್ತಿಗೆ ಐದು ವರ್ಷದ ಅವಧಿಯಲ್ಲಿ ದೇಶದಲ್ಲಿ 4.7 ಕೋಟಿ ಜನರು ಉದ್ಯೋಗ ಕಳೆದುಕೊಂಡಿದ್ದಾರೆ. ಇದು ಸೌದಿ ಅರೇಬಿಯಾದ ಒಟ್ಟು ಜನಸಂಖ್ಯೆಗೆ ಸಮವಾಗಿದೆ.

ಪ್ರಾಮುಖ್ಯತೆ ಯಾಕೆ?

ಉದ್ಯೋಗಿಗಳ ಪ್ರಮಾಣದಲ್ಲಿ ಇಳಿಕೆಯಾಗುವುದು ಪರೋಕ್ಷವಾಗಿ ನಿರುದ್ಯೋಗವನ್ನೇ ಸೂಚಿಸುತ್ತಿದೆ. ಜತೆಗೆ ಹೊಸ ಉದ್ಯೋಗಗಳು ಸೃಷ್ಟಿಯಾಗುತ್ತಿಲ್ಲ ಎಂಬುದನ್ನೂ ಹೇಳುತ್ತದೆ. ಭಾರತದ ವಿಚಾರಕ್ಕೆ ಬಂದಾಗ ಇಲ್ಲಿ ಕಾರ್ಮಿಕರ ಪ್ರಮಾಣ ವರ್ಷ ವರ್ಷವೂ ಹೆಚ್ಚಾಗುತ್ತಲೇ ಇದೆ. ಆದರೆ ಅವರಿಗೆ ಬೇಕಾದಷ್ಟು ಉದ್ಯೋಗಗಳು ಸೃಷ್ಟಿಯಾಗುತ್ತಿಲ್ಲ.

ಇನ್ನೊಂದು ಆತಂಕಕಾರಿ ವಿಚಾರವೆಂದರೆ ಇದೇ ಅವಧಿಯಲ್ಲಿ ಉದ್ಯೋಗದ ವಯೋಮಾನವಿರುವ (15-59 ವರ್ಷ) ಜನರು ವೃತ್ತಿಪರ ಮತ್ತು ತಾಂತ್ರಿಕ ತರಬೇತಿ ಪಡೆಯುವ ಪ್ರಮಾಣ ಕೂಡ ಕಡಿಮೆಯಾಗಿದೆ. 2011-12ರಲ್ಲಿ ಶೇಕಡಾ 2.2ರಷ್ಟು ಜನರು ಈ ರೀತಿಯ ತರಬೇತಿ ಪಡೆಯುತ್ತಿದ್ದರು. ಈ ಪ್ರಮಾಣ ಈಗ ಶೇಕಡಾ 2ಕ್ಕೆ ಇಳಿಕೆಯಾಗಿದೆ.

ವಿಚಿತ್ರವೆಂದರೆ ಇಷ್ಟೊಂದು ಗಂಭೀರ ಸಮಸ್ಯೆಯತ್ತ ಬೆಟ್ಟು ಮಾಡುತ್ತಿರುವ ವರದಿಯನ್ನೇ ಕೇಂದ್ರ ಸರಕಾರ ಅಡಗಿಸಿಟ್ಟಿದೆ. ಸರಕಾರದ ಈ ತೀರ್ಮಾನವನ್ನು ವಿರೋಧಿಸಿ ರಾಷ್ಟ್ರೀಯ ಅಂಕಿ ಅಂಶಗಳ ಆಯೋಗದ ಹಂಗಾಮಿ ಮುಖ್ಯಸ್ಥ ಪಿ.ಸಿ. ಮೋಹನನ್‌ ಮತ್ತು ಸದಸ್ಯೆ ಜೆ.ವಿ. ಮೀನಾಕ್ಷಿ ಜನವರಿ ಅಂತ್ಯದಲ್ಲಿ ರಾಜೀನಾಮೆ ನೀಡಿ ಹೊರ ಬಂದಿದ್ದರು. ಈ ವರದಿಗೆ ಆಯೋಗ 2008ರ ಡಿಸೆಂಬರ್‌ನಲ್ಲೆ ಒಪ್ಪಿಗೆ ನೀಡಿತ್ತು. ಹೀಗಿದ್ದೂ ಸಮೀಕ್ಷೆಯನ್ನು ಬಿಡುಗಡೆ ಮಾಡದೇ ಇರುವುದು ಇವರ ಆಕ್ರೋಶಕ್ಕೆ ಕಾರಣವಾಗಿತ್ತು.

ಈ ಹಿನ್ನೆಲೆಯಲ್ಲಿ ಪ್ರತಿಕ್ರಿಯೆ ನೀಡಿರುವ ಮಾಜಿ ಹಣಕಾಸು ಸಲಹೆಗಾರ ಕೌಶಿಕ್‌ ಬಸು, ಉದ್ಯೋಗ ಮಾಹಿತಿಯನ್ನು ಬಹಿರಂಗಗೊಳಿಸುವಂತೆ ಆಗ್ರಹಿಸಿದ್ದಾರೆ. ಒಂದೊಮ್ಮೆ ಋಣಾತ್ಮಕವಾಗಿದ್ದರೂ ಪರವಾಗಿಲ್ಲ, ಅದನ್ನು ಬಹಿರಂಗಗೊಳಿಸಿ ಇದರಿಂದ ಸೂಕ್ತ ಪರಿಹಾರ ಕ್ರಮಗಳನ್ನು ತೆಗೆದುಕೊಳ್ಳಲು ಸಹಾಯಕವಾಗುತ್ತದೆ ಎಂದಿದ್ದಾರೆ.

ಚೌಕೀದಾರ್‌ ಹೆಸರಿನಲ್ಲಿ ಆಂದೋಲನ ನಿರತರು ಇದನ್ನು ಅರ್ಥ ಮಾಡಿಕೊಳ್ಳಬೇಕಿದೆ.