samachara
www.samachara.com
ಮತ್ತೆ ಅಪ್ಪಿಕೊಂಡ ‘ರಾಜಕೀಯ ಶತ್ರು’; ಹಿಂದುತ್ವದ ಹೆಸರಲ್ಲಿ ಅನಿವಾರ್ಯದ ಮಿಲನ
COVER STORY

ಮತ್ತೆ ಅಪ್ಪಿಕೊಂಡ ‘ರಾಜಕೀಯ ಶತ್ರು’; ಹಿಂದುತ್ವದ ಹೆಸರಲ್ಲಿ ಅನಿವಾರ್ಯದ ಮಿಲನ

ಶಿವಸೇನೆ ಜತೆ ಸಂಬಂಧ ಕೆಡಿಸಿಕೊಂಡು ಮಹಾರಾಷ್ಟ್ರದಲ್ಲಿ ಚುನಾವಣೆ ಎದುರಿಸುವುದು ಕಷ್ಟ ಎಂಬುದು ಬಿಜೆಪಿಗೂ ಗೊತ್ತಿದೆ. ಬಿಜೆಪಿಯನ್ನು ಬಿಟ್ಟು ಬಾಳುವುದು ಕಷ್ಟ ಎಂಬುದು ಶಿವಸೇನೆಗೂ ಅರಿವಾಗಿದೆ.

“ಶಿವಸೇನೆ ಬಿಜೆಪಿಯ ಅತಿದೊಡ್ಡ ರಾಜಕೀಯ ಶತ್ರು”

ಎಂಟು ತಿಂಗಳ ಹಿಂದೆ ಖುದ್ದು ಶಿವಸೇನೆಯೇ ಹೇಳಿದ್ದ ಮಾತುಗಳಿವು. ಮಹಾರಾಷ್ಟ್ರದ ಪಾಲ್ಗಾರ್‌ ಲೋಕಸಭಾ ಕ್ಷೇತ್ರದ ಉಪ ಚುನಾವಣೆಯಲ್ಲಿ ಶಿವಸೇನೆ ವಿರುದ್ಧ ಬಿಜೆಪಿ ಗೆದ್ದ ನಂತರ ಶಿವಸೇನೆಯು ಬಿಜೆಪಿಯನ್ನು ಇನ್ನಿಲ್ಲದಂತೆ ದ್ವೇಷಿಸಿತ್ತು. ಆದರೆ, ಈಗ ಅದೇ ರಾಜಕೀಯ ಶತ್ರು ಮುಂಬರುವ ಚುನಾವಣೆಗಾಗಿ ಬಿಜೆಪಿಯನ್ನು ಅಪ್ಪಿಕೊಂಡಿದೆ.

“ದೇಶದ ಜನತೆಗೆ ನರೇಂದ್ರ ಮೋದಿ ಮತ್ತು ಅಮಿತ್‌ ಶಾ ಜೋಡಿ ಬೇಕಾಗಿಲ್ಲ. ಕಾಂಗ್ರೆಸ್‌ ಅಥವಾ ಜೆಡಿಎಸ್‌ ವರಿಷ್ಠ ಎಚ್‌.ಡಿ. ದೇವೇಗೌಡರನ್ನು ದೇಶ ಒಪ್ಪಿಕೊಳ್ಳಬಹುದು” ಎಂದು ಶಿವಸೇನೆಯ ಮುಖವಾಣಿ ‘ಸಾಮ್ನಾ’ದ ತಮ್ಮ ಅಂಕಣ ‘ರೋಕ್‌ ಠೋಕ್‌’ನಲ್ಲಿ 8 ತಿಂಗಳ ಹಿಂದೆ ಶಿವಸೇನೆಯ ಸಂಸದ ಸಂಜಯ್‌ ರಾವತ್ ಹೇಳಿಕೊಂಡಿದ್ದರು. ಈಗ ಆ ಮಾತಿಗೆ ಶಿವಸೇನೆ ಎಳ್ಳುನೀರು ಬಿಟ್ಟಿದೆ.

ಹಿಂದುತ್ವ, ರಾಮಮಂದಿರ ನಿರ್ಮಾಣದ ವಿಚಾರ ಮುಂದಿಟ್ಟುಕೊಂಡು ಮುನಿಸಿಕೊಂಡು ಬಿಜೆಪಿಯಿಂದ ದೂರವಾಗಿದ್ದ ಶಿವಸೇನೆ ಮತ್ತೆ ಬಿಜೆಪಿ ತೆಕ್ಕೆಗೆ ಬಿದ್ದಿದೆ. 2019ರ ಲೋಕಸಭಾ ಚುನಾವಣೆಯಲ್ಲಿ ಎನ್‌ಡಿಎ ಮೈತ್ರಿಕೂಟದೊಂದಿಗೆ ಇರುವುದಿಲ್ಲ ಎಂದಿದ್ದ ಶಿವಸೇನೆ ಈಗ ಎನ್‌ಡಿಎ ಜತೆಗೆ ಹಳೆಯ ದೋಸ್ತಿ ಮುಂದುವರಿಸಿದೆ.

ಮಹಾರಾಷ್ಟ್ರದ 48 ಲೋಕಸಭಾ ಕ್ಷೇತ್ರಗಳ ಪೈಕಿ 25ರಲ್ಲಿ ಬಿಜೆಪಿ ಮತ್ತು 23ರಲ್ಲಿ ಶಿವಸೇನೆ ಸ್ಪರ್ಧಿಸಲು ನಿರ್ಧರಿಸಿವೆ. ಈ ವರ್ಷದ ಸೆಪ್ಟೆಂಬರ್‌ ವೇಳೆಗೆ ನಡೆಯುವ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲೂ 50:50 ಅನುಪಾತದಲ್ಲಿ ಸೀಟು ಹಂಚಿಕೆಗೆ ಪಕ್ಷಗಳು ನಿರ್ಧರಿಸಿವೆ.

ಹಾಗೆ ನೋಡಿದರೆ ಶಿವಸೇನೆ ಬಿಜೆಪಿ ಸಖ್ಯದಿಂದ ಹೊರ ಬರಲು ಕಾರಣವಾಗಿದ್ದು ರಾಮಮಂದಿರ ನಿರ್ಮಾಣ ವಿಚಾರ ಒಂದೇ ಅಲ್ಲ, ರಾಮಮಂದಿರ ಒಂದು ನೆಪಮಾತ್ರ. ಮಹಾರಾಷ್ಟ್ರದಲ್ಲಿ ತನ್ನ ರಾಜಕೀಯ ಹಿಡಿತವನ್ನು ಬಿಜೆಪಿ ಕಸಿದುಕೊಳ್ಳುತ್ತಿದೆ ಎಂಬ ಆತಂಕ ಶಿವಸೇನೆಯು ಬಿಜೆಪಿ ವಿರುದ್ಧ ಬಂಡೇಳುವಂತೆ ಮಾಡಿತ್ತು. ಅದೇ ಸಮಯಕ್ಕೆ ಎನ್‌ಡಿಎ ಒಳಗೆ ಬಿರುಕು ಕಾಣಿಸಿಕೊಂಡಿದ್ದೂ ಕಾಕತಾಳೀಯ.

Also read: ಎನ್‌ಡಿಎ ಮೈತ್ರಿ ಕಡಿದುಕೊಂಡ ಟಿಡಿಪಿ; ಮಿತ್ರಪಕ್ಷಗಳನ್ನು ಕಡೆಗಣಿಸುತ್ತಿದೆಯೇ ಬಿಜೆಪಿ?

ಟಿಡಿಪಿ ಅವಿಶ್ವಾಸ:

2018ರ ಮಾರ್ಚ್‌ ವೇಳೆಗೆ ಎನ್‌. ಚಂದ್ರಬಾಬು ನಾಯ್ಡು ನೇತೃತ್ವದ ತೆಲುಗು ದೇಶಂ ಪಕ್ಷ (ಟಿಡಿಪಿ) ಎನ್‌ಡಿಎ ಮೈತ್ರಿಕೂಟಕ್ಕೆ ಸಡ್ಡು ಹೊಡೆದು ಹೊರಬಂದಿತ್ತು. ಲಾಭ-ನಷ್ಟಗಳ ಲೆಕ್ಕಾಚಾರಗಳೇ ರಾಜಕೀಯ ಆಧಾರವಾಗಿರುವ ಟಿಡಿಪಿ ಮೊದಲ ಬಾರಿಗೆ ಮೈತ್ರಿಕೂಟದ ಅಸಮಾನತೆ ಹಾಗೂ ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳ ನೆಪವೊಡ್ಡಿ ಎನ್‌ಡಿಎದಿಂದ ಹೊರ ಬರುವ ನಿರ್ಧಾರಕ್ಕೆ ಬಂದಿತ್ತು. ಆದರೆ, ಟಿಡಿಪಿ ನಿಜಕ್ಕೂ ಸಿಟ್ಟಿಗೇಳಲು ಕಾರಣವಾಗಿದ್ದು ಬಜೆಟ್‌ನಲ್ಲಿ ಕೇಂದ್ರ ಸರಕಾರ ಆಂಧ್ರಪ್ರದೇಶ ನಿರೀಕ್ಷಿಸಿದಷ್ಟು ಅನುದಾನ ಕೊಡಲಿಲ್ಲ ಎಂಬುದು.

ಬಜೆಟ್‌ನಲ್ಲಿ ಆಂಧ್ರಪ್ರದೇಶಕ್ಕೆ ಅನ್ಯಾಯ ಮಾಡಲಾಗಿದೆ ಎಂದು ದೂರಿದ್ದ ಆಂಧ್ರದ ಮುಖ್ಯಮಂತ್ರಿಯೂ ಆದ ಚಂದ್ರಬಾಬು ನಾಯ್ಡು ಎನ್‌ಡಿಎ ಮೈತ್ರಿಕೂಟ ತೊರೆದು ಕೇಂದ್ರ ಸರಕಾರದ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸಲು ಮುಂದಾಗಿದ್ದರು. ಆದರೆ, ಸಂಖ್ಯಾಬಲದಲ್ಲಿ ಹೆಚ್ಚಿರುವ ಬಿಜೆಪಿ ಎನ್‌ಡಿಎ ಮೈತ್ರಿಕೂಟದ ಪಕ್ಷಗಳ ಬೆದರಿಕೆಯನ್ನು ಗಂಭೀರವಾಗಿ ತೆಗೆದುಕೊಳ್ಳಲಿಲ್ಲ. ಟಿಡಿಪಿ ಎನ್‌ಡಿಎದಿಂದ ಹೊರಬಂದ ಬೆನ್ನಲ್ಲೇ ಎನ್‌ಡಿಎ ತೊರೆಯುವ ಮಾತನ್ನಾಡಿದ್ದು ಶಿವಸೇನೆ.

ಪಾಲ್ಗಾರ್‌ ಉಪ ಚುನಾವಣೆಯಲ್ಲಿ ಶಿವಸೇನೆಗೆ ಅನುಕಂಪದ ಅಲೆಯೂ ಗೆಲುವು ತಂದುಕೊಡುವಲ್ಲಿ ಸೋತಿತ್ತು. ಪಾಲ್ಗಾರ್ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದ ಶಿವಸೇನೆಯ ಚಿಂತಾಮನ್‌ ವನಗಾ ನಿಧನದಿಂದ ತೆರವಾಗಿದ್ದ ಸ್ಥಾನಕ್ಕೆ 2018ರ ಮೇ ತಿಂಗಳಲ್ಲಿ ಉಪ ಚುನಾವಣೆ ನಡೆದಿತ್ತು. ಉಪ ಚುನಾವಣೆಯಲ್ಲಿ ಅನುಕಂಪ ಕೆಲಸ ಮಾಡುತ್ತದೆ ಎಂಬ ಕಾರಣಕ್ಕೆ ಶಿವಸೇನೆ ಚಿಂತಾಮನ್‌ ಅವರ ಮಗ ಶ್ರೀನಿವಾಸ್‌ ವನಗಾ ಅವರನ್ನು ಕಣಕ್ಕಿಳಿಸಿತ್ತು. ಆದರೆ, ಅನುಕಂಪ ಕೆಲಸ ಮಾಡದೆ ಈ ಕ್ಷೇತ್ರದಲ್ಲಿ ಬಿಜೆಪಿ ಗೆಲುವು ಸಾಧಿಸಿತ್ತು. ಅಂದ ಹಾಗೆ ಬಿಜೆಪಿಯಿಂದ ಗೆದ್ದಿದ್ದ ರಾಜೇಂದ್ರ ಗವಿತ್‌ ಮಾಜಿ ಕಾಂಗ್ರೆಸಿಗ.

ಪಾಲ್ಗಾರ್‌ ಕ್ಷೇತ್ರದಲ್ಲಿ ನೇರ ಹಣಾಹಣಿ ಇದ್ದಿದ್ದು ಬಿಜೆಪಿ ಮತ್ತು ಶಿವಸೇನೆಗೆ. ಕಾಂಗ್ರೆಸ್‌ ಇಲ್ಲಿ ಚಲಾವಣೆಯಾದ ಮತಗಳ ಪೈಕಿ ಶೇಕಡ 6ರಷ್ಟು ಮತ ಗಳಿಸಲೂ ಸಾಧ್ಯವಾಗಿರಲಿಲ್ಲ. ಚಿಂತಾಮನ್‌ ನಿಧನದ ಅನುಕಂಪ ಹಾಗೂ ಶಿವಸೇನೆಯ ಪ್ರಭಾವ ಎರಡೂ ಈ ಉಪ ಚುನಾವಣೆಯಲ್ಲಿ ಕೆಲಸ ಮಾಡದ ಕಾರಣಕ್ಕೆ ತನ್ನ ನೆಲದಲ್ಲೇ ತಾನು ಅತಂತ್ರವಾಗುತ್ತಿರುವ ಆತಂಕ ಶಿವಸೇನೆಗೆ ಕಾಡತೊಡಗಿತ್ತು. ಈ ಆತಂಕವೇ ಶಿವಸೇನೆ ಎನ್‌ಡಿಎ ಮೈತ್ರಿಕೂಟ ತೊರೆಯುವ ಮಾತನ್ನಾಡಿಸಿದ್ದು.

ಹಾಗೆ ನೋಡಿದರೆ, ಪಾಲ್ಗಾರ್‌ ಉಪ ಚುನಾವಣೆಗೂ ಮೊದಲೇ ಶಿವಸೇನೆ ಮತ್ತು ಬಿಜೆಪಿ ಸಂಬಂಧ ಹಳಸಿತ್ತು. 2017ರ ಅಂತ್ಯದ ವೇಳೆಗಾಗಲೇ ಶಿವಸೇನೆ ಬಿಜೆಪಿ ವಿರುದ್ಧ ಅಸಮಾಧಾನ ಹೊರಹಾಕಲು ಮುಂದಾಗಿತ್ತು. ಮಹಾರಾಷ್ಟ್ರದಲ್ಲಿ ಬಾಳಾ ಠಾಕ್ರೆ ನಂತರ ಬಿಜೆಪಿ ತನ್ನ ನೆಲೆಯನ್ನು ಹೆಚ್ಚು ಭದ್ರ ಬಡಿಸಿಕೊಳ್ಳಲು ಮುಂದಾಗಿದ್ದು ಶಿವಸೇನೆಯ ಬೇರುಗಳು ಅಲ್ಲಲ್ಲಿ ಸಡಿಲಗೊಳ್ಳುವಂತೆ ಮಾಡಿದ್ದವು. ಇದರ ಪರಿಣಾಮ ಪಾಲ್ಗಾರ್‌ ಉಪ ಚುನಾವಣೆಯಲ್ಲಿ ಸ್ಪಷ್ಟವಾಗಿತ್ತು.

ಎನ್‌ಡಿಎ ಮೈತ್ರಿಕೂಟದ ಸದಸ್ಯ ಬಲದಲ್ಲಿ ಬಿಜೆಪಿ ಪಕ್ಷದ ನಂತರದ ಸ್ಥಾನದಲ್ಲಿರುವ ಪಕ್ಷ ಶಿವಸೇನೆ. ಶಿವಸೇನೆಯ 18 ಸಂಸದರು ಸದ್ಯ ಎನ್‌ಡಿಎ ಮೈತ್ರಿಕೂಟದ ಜತೆಗಿದ್ದಾರೆ. ಬಿಜೆಪಿ ಪಕ್ಷದಂತೆಯೇ ಹಿಂದುತ್ವದ ಆಧಾರದ ಮೇಲೇ ಚುನಾವಣೆ ಎದುರಿಸುವ ಶಿವಸೇನೆ ಮತ್ತು ಬಿಜೆಪಿಯ ನಂಟು ಮೂರು ದಶಕದಷ್ಟು ಹಳೆಯದು. ಆದರೆ, ಶಿವಸೇನೆ ಕೂಡಾ ಆಗಾಗ ಎನ್‌ಡಿಎ ಮೈತ್ರಿ ಮುರಿದುಕೊಳ್ಳುವ ಮಾತುಗಳನ್ನಾಡುತ್ತಲೇ ಬಂದಿತ್ತು.

ಸುಳ್ಳಾದ ನಿರ್ಣಯ:

ಬಿಜೆಪಿ ಜತೆಗಿನ ಮೈತ್ರಿಗೆ 2019ರ ಚುನಾವಣೆಯಲ್ಲಿ ವಿದಾಯ ಹಾಡುವುದಾಗಿ ಶಿವಸೇನೆ ವರ್ಷದ ಹಿಂದೆಯೇ ಹೇಳಿತ್ತು. 2018ರ ಜನವರಿಯಲ್ಲಿ ನಡೆದಿದ್ದ ಬಾಳಾ ಠಾಕ್ರೆ ಅವರ 92ನೇ ಜಯಂತಿ ಕಾರ್ಯಕ್ರಮದಲ್ಲಿ ಶಿವಸೇನೆ ಈ ನಿರ್ಣಯ ತೆಗೆದುಕೊಂಡಿತ್ತು. ಲೋಕಸಭಾ ಚುನಾವಣೆಯಲ್ಲಿ ಶಿವಸೇನೆ ಎನ್‌ಡಿಎ ಮೈತ್ರಿಕೂಟದಿಂದ ದೂರ ಉಳಿದರೆ ಅದು ಬಿಜೆಪಿ ಮತ್ತು ಶಿವಸೇನೆಗೆ ತಕ್ಕಷ್ಟು ಹಿನ್ನಡೆ ಉಂಟುಮಾಡುವ ಸಾಧ್ಯತೆಗಳೂ ಇದ್ದವು. ಇದೇ ಕಾರಣಕ್ಕೆ ಮತ ವಿಭಜನೆಯ ಲಾಭ ವಿರೋಧಿಗಳಿಗೆ ಹೋಗಬಾರದೆಂಬ ಕಾರಣಕ್ಕೆ ಹಿಂದುತ್ವದ ಅಜೆಂಡಾ ಮೇಲೆ ಶಿವಸೇನೆ- ಬಿಜೆಪಿ ಮತ್ತೆ ಒಂದಾಗಿವೆ.

ಉತ್ತರ ಪ್ರದೇಶದ (80) ನಂತರ ಅತಿ ಹೆಚ್ಚು ಲೋಕಸಭಾ ಕ್ಷೇತ್ರಗಳನ್ನು (48) ಹೊಂದಿರುವ ಮಹಾರಾಷ್ಟ್ರದಲ್ಲಿ ಶಿವಸೇನೆಯೊಂದಿಗೆ ಸಂಬಂಧ ಕೆಡಿಸಿಕೊಂಡು ಚುನಾವಣೆ ಎದುರಿಸುವುದು ಕಷ್ಟವಿದೆ ಎಂಬುದು ಬಿಜೆಪಿಗೂ ಗೊತ್ತಿದೆ. ಈ ಹಂತದಲ್ಲಿ ಬಿಜೆಪಿಯನ್ನು ಬಿಟ್ಟು ಬಾಳುವುದು ಕಷ್ಟ ಎಂಬುದು ಶಿವಸೇನೆಗೂ ಅರಿವಾಗಿದೆ. ಹೀಗಾಗಿ ಇದೊಂದು ರಾಜಕೀಯ ಅನಿವಾರ್ಯದ ಪುನರ್‌ ಮಿಲನ.

ಶಿವಸೇನೆ ಮುಂದಿನ ಚುನಾವಣೆಯಲ್ಲಿ ಎನ್‌ಡಿಎ ಜತೆಗೆ ಹೋಗುದಿಲ್ಲ ಎಂದು ಹೇಳುತ್ತ ಬಂತೇ ಹೊರತು ಎನ್‌ಡಿಎ ಜತೆಗಿನ ಮೈತ್ರಿಯನ್ನು ಸಂಪೂರ್ಣವಾಗಿ ಮುರಿದುಕೊಂಡಿರಲಿಲ್ಲ. ರಾಮಮಂದಿರದ ವಿಚಾರ ಬಂದಾಗೆಲ್ಲಾ ಬಿಜೆಪಿ ವಿರುದ್ಧ ಕಿಡಿಕಿಡಿಯಾಗುತ್ತಿದ್ದ ಶಿವಸೇನೆಯ ಮುಖ್ಯಸ್ಥ ಉದ್ಧವ್‌ ಠಾಕ್ರೆ ಸೋಮವಾರ ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಕೈ ಕುಲುಕಿ, ಅಪ್ಪಿಕೊಂಡು ಹಿಂದಿನ ‘ಎಲ್ಲವನ್ನೂ’ ಮರೆತಿದ್ದಾರೆ.

“ರಾಜಕೀಯವೂ ಒಂದು ಆಟ. ಇಲ್ಲಿ ಶಾಶ್ವತ ಶತ್ರುಗಳು, ಶಾಶ್ವತ ಮಿತ್ರರು ಯಾರೂ ಇಲ್ಲ. ಶಾಶ್ವತವಾಗಿರುವುದು ರಾಜಕೀಯ ಹಿತಾಸಕ್ತಿಗಳು ಮಾತ್ರ” ಎಂಬ ವಿಲಿಯಂ ಕ್ಲೇ ಮಾತುಗಳನ್ನು ಶಿವಸೇನೆಯ ಈ ನಡೆ ನೆನಪಿಸಿದೆ. ಹೀಗಾಗಿಯೇ ನುರಿತ ರಾಜಕೀಯ ವಿಶ್ಲೇಷಕರು ಹೇಳುವ ರಾಜಕೀಯ ಭವಿಷ್ಯಗಳೂ ಹಲವು ಬಾರಿ ಸುಳ್ಳಾಗುವುದು!