samachara
www.samachara.com
‘ಗದ್ದಲದಲ್ಲೇ ನಡೆದ ಹರಾಜು’; ವಿಧೇಯಕಗಳ ಮಂಡನೆ ಎಂಬ ಸಾಂವಿಧಾನಿಕ ಪ್ರಕ್ರಿಯೆ ಸುತ್ತ...
COVER STORY

‘ಗದ್ದಲದಲ್ಲೇ ನಡೆದ ಹರಾಜು’; ವಿಧೇಯಕಗಳ ಮಂಡನೆ ಎಂಬ ಸಾಂವಿಧಾನಿಕ ಪ್ರಕ್ರಿಯೆ ಸುತ್ತ...

ಸಾಮಾನ್ಯವಾಗಿ ವಿಧೇಯಕಗಳು ಗದ್ದಲದ ನಡುವೆಯೇ ಮಂಡನೆಯಾಗುವುದು ವಾಡಿಕೆ. ಈ ಬಾರಿಯೂ ಹಾಗೇ ಆಗಿದೆ. ಇಷ್ಟಕ್ಕೂ ಇದರಿಂದ ಯಾರಿಗೇನು ಉಪಯೋಗ? ವಿವರ ಇಲ್ಲಿದೆ. 

ಆಡಿಯೊ ಪ್ರಕರಣದ ಗದ್ದಲ, ಆಡಳಿತ- ವಿಪಕ್ಷಗಳ ನಡುವಿನ ಆರೋಪ- ಪ್ರತ್ಯಾರೋಪ, ಸ್ಪೀಕರ್‌ ರಮೇಶ್‌ ಕುಮಾರ್‌ ಭಾವನಾತ್ಮಕ ಮಾತು ಹಾಗೂ ಅಪಹಾಸ್ಯಗಳ ನಡುವೆ ಕರ್ನಾಟಕ ವಿಧಾನಸಭೆಯ ಬಜೆಟ್‌ ಅಧಿವೇಶನಲ್ಲಿ ಒಂದಷ್ಟು ಪ್ರಮುಖ ವಿಧೇಯಕಗಳನ್ನು ಮಂಡಿಸಲಾಗಿದೆ.

ಬುಧವಾರ ಕಲಾಪ ಆರಂಭವಾಗುತ್ತಿದ್ದಂತೆ ಬಿಜೆಪಿ ಸದಸ್ಯರು ಸದನದ ಬಾವಿಗಿಳಿದು ಎಸ್‌ಐಟಿ ತನಿಖೆಯ ಸರಕಾರದ ನಿರ್ಧಾರಕ್ಕೆ ವಿರೋಧ ವ್ಯಕ್ತಪಡಿಸಿದರು. ಈ ವಿರೋಧದ ಗದ್ದಲದ ಮಧ್ಯೆಯೇ ವಿಧೇಯಕಗಳ ಮಂಡನೆ ಸಂಪ್ರದಾಯ ನಡೆಯಿತು.

ಧನ ವಿಧೇಯಕದ ಜತೆಗೆ ಕಂದಾಯ ಇಲಾಖೆ, ಉನ್ನತ ಶಿಕ್ಷಣ ಇಲಾಖೆ, ಸಹಕಾರ ಇಲಾಖೆ ಹಾಗೂ ಹಣಕಾಸು ಇಲಾಖೆಯ ವಿಧೇಯಕಗಳನ್ನು ಮಂಡಿಸಲು ಸೋಮವಾರದ ಕಾರ್ಯಕಲಾಪ ಪಟ್ಟಿಯಲ್ಲೇ ನಿಗಧಿ ಪಡಿಸಲಾಗಿತ್ತು. ಬುಧವಾರ ಮಂಡನೆಯಾದ ಹಲವು ವಿಧೇಯಕಗಳು ಸೋಮವಾರವೇ ವಿಧಾನಸಭೆಯಲ್ಲಿ ಮಂಡನೆಯಾಗಬೇಕಿತ್ತು. ಆದರೆ, ಸೋಮವಾರ ಕಲಾಪ ಆರಂಭವಾಗುತ್ತಿದ್ದಂತೆ ಸ್ಪೀಕರ್‌ ರಮೇಶ್‌ ಕುಮಾರ್‌ ಆಡಿಯೊ ಪ್ರಕರಣದ ಚರ್ಚೆ ಆರಂಭಿಸಿದ ಕಾರಣ ಸೋಮವಾರ, ಮಂಗಳವಾರ, ಬುಧವಾರ ಇದೇ ವಿಚಾರವಾಗಿ ಸದನದಲ್ಲಿ ಗದ್ದಲ ನಡೆಯಿತೇ ಹೊರತು, ಶಾಸನ ರಚಿಸುವ ಪ್ರಕ್ರಿಯೆ ಸದನದೊಳಗೆ ಗೌರವಯುತವಾಗಿ ನಡೆಯಲಿಲ್ಲ.

ಒಂದು ಕಡೆ ಸದನದ ಬಾವಿಯೊಳಗೆ ವಿರೋಧ ಪಕ್ಷದ ಸದಸ್ಯರು ಎಸ್‌ಐಟಿ ತನಿಖೆಗೆ ವಿರೋಧ ವ್ಯಕ್ತಪಡಿಸಿ ಸರಕಾರದ ವಿರುದ್ಧ ಧಿಕ್ಕಾರ ಕೂಗುತ್ತಿದ್ದರೆ, ಅತ್ತ ಸಚಿವರು ಹಲವು ವಿಧೇಯಕಗಳನ್ನು ಮಂಡಿಸಿ ಅಂಗೀಕಾರ ಪಡೆಯುತ್ತಿದ್ದರು. ಶಾಸನ ಸಭೆಯಲ್ಲಿ ಶಾಸಕರು ಚರ್ಚೆ ನಡೆಸಿ ಮಂಡನೆಯಾಬೇಕಾದ ಕೆಲವು ವಿಧೇಯಕಗಳು ಗದ್ದಲದ ನಡುವೆ ಸಂಪ್ರದಾಯದಂತೆ ಮಂಡನೆಯಾಗಿ ಅಂಗೀಕಾರ ಪಡೆದವು.

ಉನ್ನತ ಶಿಕ್ಷಣ ಸಚಿವ ಜಿ.ಟಿ. ದೇವೇಗೌಡ ಖಾಸಗಿ ವಿಶ್ವವಿದ್ಯಾಲಯಗಳ ವಿಧೇಯಕವನ್ನು, ಕಂದಾಯ ಸಚಿವ ಆರ್‌.ವಿ. ದೇಶಪಾಂಡೆ ಭೂ ಸ್ವಾಧೀನ, ಪುನರ್‌ವ್ಯವಸ್ಥೆ ವಿಧೇಯಕವನ್ನು, ಸಹಕಾರ ಸಚಿವ ಬಂಡೆಪ್ಪ ಕಾಂಶೆಪೂರ್‌ ಪರ್ಯಾಲೋಚನೆಗಾಗಿ ರಾಷ್ಟ್ರಪತಿಗಳು ವಾಪಸ್‌ ಕಳಿಸಿದ್ದ ಕರ್ನಾಟಕ ಋಣ ಪರಿಹಾರ ವಿಧೇಯಕವನ್ನು ಹಾಗೂ ಮುಖ್ಯಮಂತ್ರಿ ಕುಮಾರಸ್ವಾಮಿ 2019ನೇ ಸಾಲಿನ ಧನ ವಿನಿಯೋಗ ವಿಧೇಯಕವನ್ನು ವಿಧಾನಸಭೆಯಲ್ಲಿ ಮಂಡಿಸುವುದು ಬುಧವಾರದ ಕಾರ್ಯಕಲಾಪ ಪಟ್ಟಿಯಲ್ಲೂ ಇತ್ತು. ಇಂದು ಆರ್‌.ವಿ. ದೇಶಪಾಂಡೆ ಅವರು ಗದ್ದಲದ ನಡುವೆ ವಿಧೇಯಕಗಳನ್ನು ಮಂಡಿಸಿದ್ದು ಮಾತ್ರ ಸದನದಲ್ಲಿ ಕಂಡುಬಂತು.

ದೇಶಪಾಂಡೆ, 2019ನೇ ಸಾಲಿನ ಭೂ ಸ್ವಾಧೀನ, ಪುನರ್‌ವಸತಿ ಮತ್ತು ಪುನರ್‌ ವ್ಯವಸ್ಥೆಯಲ್ಲಿ ನ್ಯಾಯುತ ಪರಿಹಾರ ಮತ್ತು ಪಾರದರ್ಶಕತೆ ಹಕ್ಕು (ಕರ್ನಾಟಕ ತಿದ್ದುಪಡಿ) ವಿಧೇಯಕ, 2019ನೇ ಸಾಲಿನ ಬಸವ ಕಲ್ಯಾಣ ಅಭಿವೃದ್ಧಿ ಮಂಡಳಿ (ತಿದ್ದುಪಡಿ) ವಿಧೇಯಕ, ಜಿ.ಟಿ. ದೇವೇಗೌಡ, 2019ನೇ ಸಾಲಿನ ಎನ್‌ಐಇ ವಿಶ್ವವಿದ್ಯಾಲಯ ವಿಧೇಯಕ, ಆದಿ ಚುಂಚನಗಿರಿ ವಿಶ್ವವಿದ್ಯಾಲಯ ವಿಧೇಯಕ, ಆರ್.ವಿ. ವಿಶ್ವವಿದ್ಯಾಲಯ ವಿಧೇಯಕ, ಕರ್ನಾಟಕ ರಾಜ್ಯ ವಿಶ್ವವಿದ್ಯಾಲಯಗಳ (ತಿದ್ದುಪಡಿ) ವಿಧೇಯಕ, ಬಂಡೆಪ್ಪ ಕಾಶಂಪೂರ್‌ ಕರ್ನಾಟಕ ಋಣ ಪರಿಹಾರ ವಿಧೇಯಕವನ್ನು ಪರ್ಯಾಲೋಚನೆಗೆ ಮಂಡಿಸುವುದು ಹಾಗೂ ಕುಮಾರಸ್ವಾಮಿ ಧನ ವಿಧೇಯಕದ ಜತೆಗೆ ರಾಜ್ಯ ಸಿವಿಲ್‌ ಸೇವೆಗಳ (ಶಿಕ್ಷಕರ ವರ್ಗಾವಣೆ ನಿಯಂತ್ರಣ) (ತಿದ್ದುಪಡಿ) ವಿಧೇಯಕವನ್ನು ಪರ್ಯಾಲೋಚನೆಗೆ ಮಂಡಿಸುವುದು ಪೂರ್ವ ನಿಗಧಿಯಾಗಿತ್ತು.

ಆದರೆ, ಆಡಿಯೊ ಗದ್ದಲದಲ್ಲಿ ಯಾರು ಯಾವ ವಿಧೇಯಕ ಮಂಡಿಸಿದರು, ಯಾರು ಅನುಮೋದಿಸಿದರು, ಯಾರು ಅಂಗೀಕರಿಸಿದರು ಎಂಬುದು ಅಲ್ಲಿದ್ದವರಿಗೇ ಗೊತ್ತಾಗಲಿಲ್ಲ. ವಿಧೇಯಕವನ್ನು ಶಾಸನಸಭೆಯ ಸದಸ್ಯರು ಮಂಡಿಸುವುದು, ಸಭಾ ನಾಯಕರು ಅನುಮೋದಿಸುವುದು ಸಾಮಾನ್ಯ. ಆದರೆ, ವಿಪಕ್ಷಗಳ ಗದ್ದಲದಲ್ಲಿ ಈ ಶಾಸನ ರಚನೆಯ ಪ್ರಕ್ರಿಯೆ ಗದ್ದಲಮಯವಾಗಿತ್ತು. ಕಾರ್ಯಕಲಾಪ ಪಟ್ಟಿಯಲ್ಲಿದ್ದ ಯಾವೆಲ್ಲಾ ವಿಧೇಯಕಗಳು ಅಂಗೀಕಾರವಾದವು ಎಂಬುದೂ ಗೊತ್ತಾಗದ ಮಟ್ಟಕ್ಕಿತ್ತು ಸದನದಲ್ಲಿ ಇಂದಿನ ಗದ್ದಲ.

Also read: ಆಡಿಯೊ ಹಗರಣಕ್ಕೆ ಎಸ್‌ಐಟಿ ತನಿಖೆ; ‘ಎಂಡ್‌ ಆಫ್‌ ದಿ ಸ್ಟೇಟ್‌’ನಲ್ಲಿ ಮಾನ ಉಳಿಸಿಕೊಂಡ ಸದನ

ವಿಧೇಯಕ ಮಂಡನೆ ಎಂಬ ಸಂಪ್ರದಾಯ

ವಿಧಾನಸಭೆಯ ಕಲಾಪದ ಗದ್ದಲಗಳಲ್ಲಿ ಈ ವಿಧೇಯಕ ಮಂಡನೆ ಹಾಗೂ ವಿಧೇಯಕ ಅಂಗೀಕಾರಗಳು ಎಷ್ಟೋ ಬಾರಿ ಸಂಪ್ರದಾಯವೆಂಬಂತೆ ನಡೆದು ಹೋಗುತ್ತವೆ. ವಿಧೇಯಕ ಮಂಡನೆ ಹಾಗೂ ಅಂಗೀಕಾರಗಳು ಶಾಸನ ರಚನೆಯ ಪ್ರಾಥಮಿಕ ಪ್ರಕ್ರಿಯೆಗಳು. ಯಾವುದೇ ಶಾಸನ ತರುವ ಮುನ್ನಾ ಅದರ ಕರಡು ರಚಿಸಿ, ಅಗತ್ಯವಿದ್ದರೆ ಆ ಶಾಸನ ರಚನೆಗೆ ಸದನ ಸಮಿತಿ ನೇಮಿಸಿ, ಆ ವಿಧೇಯಕವನ್ನು ವಿಧಾನಸಭೆಯಲ್ಲಿ ಮಂಡಿಸಿ ಅನುಮೋದನೆ ಪಡೆಯುವುದು ವಾಡಿಕೆ. ರಾಜ್ಯಗಳು ಹೀಗೆ ಶಾಸನ ರಚಿಸಲು ಸಂವಿಧಾನದ ಸಂವಿಧಾನದ 3ನೇ ಅಧ್ಯಾಯದಲ್ಲಿ (196ರಿಂದ 207ನೇ ಪರಿಚ್ಛೇದ) ಅಧಿಕಾರ ಕೊಡಲಾಗಿದೆ.

ಸಾಮಾನ್ಯವಾಗಿ ವಿಧೇಯಕಗಳನ್ನು ವಿಧಾನಸಭೆಯಲ್ಲಿ ಮಂಡಿಸಿ ಅನುಮೋದನೆ ಪಡೆದು ವಿಧಾನ ಪರಿಷತ್ತಿಗೆ ಕಳಿಸಲಾಗುತ್ತದೆ. ವಿಧಾನ ಪರಿಷತ್ತು ಅಂಗೀಕರಿಸಿದ ವಿಧೇಯಕ ರಾಜ್ಯಪಾಲರ ಅಂಕಿತಕ್ಕಾಗಿ ಹೋಗುತ್ತದೆ. ರಾಜ್ಯಪಾಲರು ಅನುಮೋದನೆಗೊಂಡ ವಿಧೇಯಕಕ್ಕೆ ಸಹಿ ಹಾಕಿದರೆ ಅದು ಶಾಸನವಾಗಿ ಜಾರಿಗೆ ಬರುತ್ತದೆ. ಇದು ಶಾಸನ ರಚನೆಯ ಸಾಮಾನ್ಯ ಪ್ರಕ್ರಿಯೆ. ಆದರೆ, ಎಲ್ಲಾ ಸಂದರ್ಭದಲ್ಲೂ ಈ ಪ್ರಕ್ರಿಯೆ ಇಷ್ಟು ಸರಾಗವಾಗಿರುವುದಿಲ್ಲ.

ಸಂವಿಧಾನ ಹೇಳುವುದೇನು?

ಧನ ವಿಧೇಯಕವನ್ನು ಬಿಟ್ಟು ಉಳಿದ ಯಾವುದೇ ವಿಧೇಯಕವನ್ನು ವಿಧಾನಮಂಡಲದ ಉಭಯ ಸದನಗಳ ಪೈಕಿ ಯಾವುದೇ ಸದನದಲ್ಲಿ ಮಂಡಿಸಬಹುದು. ಸಂವಿಧಾನದ 197ನೇ ಪರಿಚ್ಛೇದದ ಪ್ರಕಾರ ವಿಧಾನಸಭೆಯಿಂದ ಒಂದು ವಿಧೇಯಕವು ಅಂಗೀಕಾರವಾಗಿ ಅದನ್ನು ವಿಧಾನಪರಿಷತ್ತಿಗೆ ಕಳಿಸಿದ ಬಳಿಕ ಆ ವಿಧೇಯಕವನ್ನು ವಿಧಾನ ಪರಿಷತ್ತು ತಿರಸ್ಕರಿಸಿದರೆ ಅಥವಾ ಪರಿಷತ್ತಿನ ಮುಂದೆ ಅನುಮೋದನೆಗಾಗಿ ಬಂದ ದಿನದಿಂದ ಅಂಗೀಕಾರವಾಗದೆ 3 ತಿಂಗಳಿಗಿಂತಲೂ ಹೆಚ್ಚು ಸಮಯ ಕಳೆದಿದ್ದರೆ ಮುಂದಿನ ಅಧಿವೇಶನಕ್ಕೆ ಮತ್ತೆ ಆ ವಿಧೇಯಕ ವಿಧಾನಸಭೆಯ ಮುಂದೆ ಬರುತ್ತದೆ.

ವಿಧಾನಸಭೆಯು ಪರಿಷತ್ತು ಸೂಚಿಸಿದ ತಿದ್ದುಪಡಿಗಳೊಂದಿಗೆ ಅಥವಾ ತಿದ್ದುಪಡಿಗಳನ್ನು ಒಪ್ಪದೆಯೂ 2ನೇ ಬಾರಿ ಅನುಮೋದನೆಗಾಗಿ ವಿಧಾನ ಪರಿಷತ್ತಿಗೆ ಕಳಿಸಬಹುದು. ಹೀಗೆ 2ನೇ ಬಾರಿ ಅನುಮೋದನೆಗಾಗಿ ಪರಿಷತ್ತಿನ ಮುಂದೆ ಬಂದ ವಿಧೇಯಕವನ್ನು ಪರಿಷತ್ತು ಅನುಮೋದಿಸದಿದ್ದರೂ ಅಥವಾ ಒಂದು ತಿಂಗಳಿಗಿಂತ ಹೆಚ್ಚು ಅವಧಿಗೆ ಪರಿಷತ್ತಿನಲ್ಲೇ ಇಟ್ಟುಕೊಂಡಿದ್ದರೂ ಆ ಬಳಿಕ ಆ ವಿಧೇಯಕಕ್ಕೆ ಉಬಯ ಸದನಗಳ ಒಪ್ಪಿಗೆ ಇದೆ ಎಂದೇ ಭಾವಿಸಿ ಅದನ್ನು ರಾಜ್ಯಪಾಲರ ಅಂಕಿತಕ್ಕೆ ಕಳಿಸಲಾಗುತ್ತದೆ.

ಈ ನಿಮಯಗಳು ಯಾವುವೂ ಧನ ವಿಧೇಯಕಕ್ಕೆ ಅನ್ವಯವಾಗುವುದಿಲ್ಲ. ಸಂವಿಧಾನದ 198ನೇ ಪರಿಚ್ಛೇದದ ಪ್ರಕಾರ ಧನವಿಧೇಯಕವನ್ನು ವಿಧಾನಸಭೆಯಲ್ಲೇ ಮಂಡಿಸಬೇಕು. ಈ ವಿಧೇಯಕವನ್ನು ವಿಧಾನ ಪರಿಷತ್ತಿನಲ್ಲಿ ಮಂಡಿಸುವಂತಿಲ್ಲ. ವಿಧಾನಸಭೆಯಲ್ಲಿ ಧನವಿಧೇಯಕವನ್ನು ಅಂಗೀಕರಿಸಿದ ಬಳಿಕ ಶಿಫಾರಸು ಕೋರಿ ಅದನ್ನು ವಿಧಾನ ಪರಿಷತ್ತಿಗೆ ಕಳಿಸಲಾಗುತ್ತದೆ.

ವಿಧಾನ ಪರಿಷತ್ತು ಆ ವಿಧೇಯಕ ತನಗೆ ತಲುಪಿದ ದಿನದಿಂದ 14 ದಿನಗಳೊಳಗೆ ತನ್ನ ಶಿಫಾರಸುಗಳೊಡನೆ ಆ ವಿಧೇಯಕವನ್ನು ವಿಧಾನಸಭೆಗೆ ಹಿಂದಕ್ಕೆ ಕಳಿಸಬೇಕು. ಪರಿಷತ್ತು ಸೂಚಿಸಿದ ಶಿಫಾರಸುಗಳನ್ನು ವಿಧಾನಸಭೆ ಒಪ್ಪಬಹುದು ಅಥವಾ ತಿರಸ್ಕರಿಸಬಹುದು. ಒಂದು ವೇಳೆ ಪರಿಷತ್ತು 14 ದಿನಗಳೊಳಗೆ ವಿಧಾನ ಸಭೆಗೆ ವಿಧೇಯಕವನ್ನು ವಾಪಸ್‌ ಕಳಿಸದಿದ್ದರೆ 14 ದಿನಗಳ ನಂತರ ಅದಕ್ಕೆ ಪರಿಷತ್ತಿನ ಒಪ್ಪಿಗೆ ಇದೆ ಎಂದು ಭಾವಿಸಿ ಅದನ್ನು ರಾಜ್ಯಪಾಲರ ಅಂಕಿತಕ್ಕೆ ಕಳಿಸಲಾಗುತ್ತದೆ.

ತಮಗೆ ಬಂದ ಸಾಮಾನ್ಯ ವಿಧೇಯಕಕ್ಕೆ ರಾಜ್ಯಪಾಲರು ಸಹಿ ಹಾಕಬಹುದು. ಇಲ್ಲವೇ ಅದನ್ನು ಪರಿಶೀಲನೆಗಾಗಿ ರಾಷ್ಟ್ರಪತಿಗಳಿಗೆ ಕಳಿಸಬಹುದು. ರಾಷ್ಟ್ರಪತಿಗಳು ಅಂಥ ವಿಧೇಯಕಕ್ಕೆ ತಿದ್ದುಪಡಿ ಸೂಚಿಸಿ ಮತ್ತೆ ರಾಜ್ಯ ವಿಧಾನಸಭೆಗೆ ಕಳಿಸಬಹುದು. ಕರ್ನಾಟಕ ಋಣ ಪರಿಹಾರ ವಿಧೇಯಕವೂ ಹೀಗೆ ಸದ್ಯ ರಾಷ್ಟ್ರಪತಿಗಳಿಂದ ವಾಪಸ್‌ ಬಂದಿದೆ. ವಿಧೇಯಕವನ್ನು ತಿದ್ದುಪಡಿಯೊಂದಿಗೆ ಮಂಡಿಸಲು ಈಗ ರಾಜ್ಯ ಸರಕಾರ ಮುಂದಾಗಿದೆ.

ರಾಜ್ಯದ ವಿಧಾನಮಂಡಲದಲ್ಲಿ ಇತ್ಯರ್ಥದಲ್ಲಿರುವ ಯಾವುದೇ ವಿಧೇಯಕವು ಆ ವಿಧಾನಮಂಡಲದ ಯಾವುದೇ ಸದನವನ್ನು ಅಥವಾ ಉಭಯ ಸದನಗಳನ್ನು ಮುಕ್ತಾಯಗೊಳಿಸಿದ ಕಾರಣಕ್ಕೆ ಅಂತ್ಯಗೊಳ್ಳುವುದಿಲ್ಲ. ವಿಧಾನ ಪರಿಷತ್ತಿನಲ್ಲಿ ಮಂಡನಯಾಗಿ, ವಿಧಾನಸಭೆಯಿಂದ ಅಂಗೀಕೃತವಾಗಿರದ ವಿಧೇಯಕವು ವಿಧಾನಸಭೆ ವಿಸರ್ಜನೆಯಾದರೆ ಅಂತ್ಯಗೊಳ್ಳುವುದಿಲ್ಲ. ವಿಧಾನಸಭೆಯಲ್ಲಿ ಇತ್ಯರ್ಥದಲ್ಲಿರುವ ಅಥವಾ ವಿಧಾನಸಭೆಯಿಂದ ಅಂಗೀಕಾರಗೊಂಡಿರುವ ವಿಧೇಯಕವು ವಿಧಾನ ಪರಿಷತ್ತಿನ ಮುಂದಿದ್ದು ಆ ವೇಳೆಯಲ್ಲಿ ವಿಧಾನಸಭೆ ವಿಸರ್ಜನೆಯಾದರೆ ಅಂತಹ ವಿಧೇಯಕವು ಅಂತ್ಯವಾಗುತ್ತದೆ ಎನ್ನುತ್ತದೆ ಸಂವಿಧಾನದ 196ನೇ ಪರಿಚ್ಛೇದ.

ವಿಧೇಯಕಗಳ ಮಂಡನೆ ಹಾಗೂ ಅದು ಶಾಸನವಾಗಿ ಜಾರಿಗೆ ಬರುವ ಪ್ರಕ್ರಿಯೆಯನ್ನು ನೋಡಿದರೆ ಶಾಸನ ರೂಪಿಸುವುದರಲ್ಲಿ ಪರಿಷತ್ತಿಗಿಂತ ಹೆಚ್ಚಿನ ಅಧಿಕಾರವಿರುವುದು ವಿಧಾನಸಭೆಗೆ ಎಂಬುದು ಗೊತ್ತಾಗುತ್ತದೆ. ಸಾಮಾನ್ಯವಾಗಿ ವಿಧೇಯಕಗಳ ಮಂಡನೆ, ಚರ್ಚೆ, ಅನುಮೋದನೆಗಳು ವಿಧಾನಮಂಡಲದ ಕಲಾಪಗಳ ಗದ್ದಲದಂತೆ ಗಮನ ಸೆಳೆಯುವುದಿಲ್ಲ. ಹೀಗಾಗಿಯೇ ವಿಧೇಯಕ ಮಂಡನೆ ಪ್ರಕ್ರಿಯೆಯು ಹಲವು ಬಾರಿ ಗದ್ದಲದ ನಡುವೆ ನಡೆಯುವ ಹರಾಜಿನಂತೆ ಕಾಣುತ್ತದೆ.

Also read: ‘ಎಸ್‌ಐಟಿ ತನಿಖೆ’ಗೆ ಬಿಜೆಪಿ ವಿರೋಧ; ಸದನ ಸಮಿತಿ ತನಿಖೆಗೆ ರಚ್ಚೆ ಹಿಡಿದ ಬಿಎಸ್‌ವೈ