samachara
www.samachara.com
ಆಡಿಯೊ ತಂತ್ರಕ್ಕೆ ವಿಡಿಯೊ ಪ್ರತಿತಂತ್ರ; ಇದು ರಾಜಕೀಯದ ‘ಕಳ್ಳ-ಪೊಲೀಸ್’ ಆಟ!
COVER STORY

ಆಡಿಯೊ ತಂತ್ರಕ್ಕೆ ವಿಡಿಯೊ ಪ್ರತಿತಂತ್ರ; ಇದು ರಾಜಕೀಯದ ‘ಕಳ್ಳ-ಪೊಲೀಸ್’ ಆಟ!

ರಾಜಕೀಯದಲ್ಲಿ ಲಾಭ-ನಷ್ಟಗಳ ಲೆಕ್ಕಾಚಾರಗಳಷ್ಟೇ ಈಗ ಮುಖ್ಯವಾಗಿದೆ. ಇದರ ಪರಿಣಾಮವೇ ಆಡಿಯೊ- ವಿಡಿಯೊ ಎಂಬ ‘ಕಳ್ಳ-ಪೊಲೀಸ್‌’ ಆಟ. ಇಲ್ಲಿ ಕಳ್ಳನೂ ಪೊಲೀಸ್‌, ಪೊಲೀಸನೂ ಕಳ್ಳ!

Team Samachara

ರಾಜ್ಯ ರಾಜಕೀಯದಲ್ಲಿ ಸದ್ಯ ಆಡಿಯೊ, ವಿಡಿಯೊಗಳ ಸದ್ದು ಜೋರಾಗಿದೆ. ಶುಕ್ರವಾರ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಆಡಿಯೊ ಬಿಡುಗಡೆ ಮಾಡಿ ಬಿಜೆಪಿಯನ್ನು ತಣ್ಣಗಾಗಿಸಲು ಪ್ರಯತ್ನಿಸಿದರೆ, ಇಂದು ಬಿಜೆಪಿ ಸುಮಾರು 5 ವರ್ಷದ ಹಿಂದಿನ ವಿಡಿಯೊ ಬಿಡುಗಡೆ ಮಾಡುವುದಾಗಿ ಹೇಳುವ ಮೂಲಕ ಕುಮಾರಸ್ವಾಮಿಯನ್ನು ಕಟ್ಟಿಹಾಕುವ ಯತ್ನ ನಡೆಸಿದೆ.

ಬಿಜೆಪಿ ಮುಖಂಡ ವಿಜುಗೌಡ ಪಾಟೀಲ್‌ ಅವರನ್ನು ಎಂಎಲ್‌ಸಿ ಮಾಡಲು ಕುಮಾರಸ್ವಾಮಿ 25 ಕೋಟಿ ರೂಪಾಯಿ ಹಣಕ್ಕೆ ಬೇಡಿಕೆ ಇಟ್ಟಿದ್ದರು ಎಂಬ ಆಡಿಯೊ ಅನ್ನು ಬಿಜೆಪಿ ಇಂದು ಬಿಡುಗಡೆ ಮಾಡಿದೆ. ವಿಜುಗೌಡ ಪಾಟೀಲ್‌ ಬೆಂಬಲಿಗರೊಂದಿಗೆ ಕುಮಾರಸ್ವಾಮಿ ನಡೆಸಿರುವ ಮಾತುಕತೆ ಇದು ಎಂಬುದು ಬಿಜೆಪಿ ಆರೋಪ. ಇದರ ವಿಡಿಯೊ ಕೂಡಾ ಬಿಜೆಪಿ ಬಳಿ ಇದ್ದು, ಇದನ್ನು ಸದನದಲ್ಲೇ ಬಿಡುಗಡೆ ಮಾಡಲು ಬಿಜೆಪಿ ನಿರ್ಧರಿಸಿದೆ ಎನ್ನಲಾಗುತ್ತಿದೆ.

ಈ ಬಗ್ಗೆ ಮಂಗಳೂರಿನಲ್ಲಿ ಪ್ರತಿಕ್ರಿಯಿಸಿರುವ ಕುಮಾರಸ್ವಾಮಿ, “ಆಡಿಯೊ ಸತ್ಯಾಸತ್ಯತೆಯ ಬಗ್ಗೆ ತನಿಖೆ ನಡೆಸಲು ನಿರ್ಧರಿಸುತ್ತೇವೆ. ತನಿಖೆ ನಂತರ ಎಲ್ಲವೂ ಗೊತ್ತಾಗುತ್ತದೆ. ಆಡಿಯೊದಲ್ಲಿ ಇರುವುದು ಬಿಎಸ್‌ವೈ ಧ್ವನಿ ಎಂದು ನಾನು ಹೇಳಿಲ್ಲ. ತನಿಖೆ ನಡೆದರೆ ಸತ್ಯ ಗೊತ್ತಾಗುತ್ತದೆ. ಬೇಕಿದ್ದರೆ ಪ್ರಧಾನಿ ನೇತೃತ್ವದಲ್ಲೇ ತನಿಖೆ ನಡೆಯಲಿ” ಎಂದಿದ್ದಾರೆ.

Also read: ‘ಐ ಆಮ್ ಎಕ್ಸ್‌ಪೋಸಿಂಗ್ ನೌ’: ಯಡಿಯೂರಪ್ಪ ಆಡಿಯೊ ಟೇಪ್‌; ಕುಮಾರಸ್ವಾಮಿ ಪತ್ರಿಕಾಗೋಷ್ಠಿ 

ಆಡಿಯೊ ಬಗ್ಗೆ ‘ಟಿವಿ 9’ ಜತೆಗೆ ಮಾತನಾಡಿದ ವಿಜುಗೌಡ ಪಾಟೀಲ್‌, “ನಾನು ಕುಮಾರಸ್ವಾಮಿ ಅವರನ್ನು ಭೇಟಿಯಾಗಿರಲಿಲ್ಲ. ಅಂದು ನಾನು ವಿಜಯಪುರದಲ್ಲಿದ್ದೆ. ನನ್ನ ಬೆಂಬಲಿಗರು ನನ್ನನ್ನು ಎಂಎಲ್‌ಸಿ ಮಾಡಬೇಕೆಂದು ಕುಮಾರಸ್ವಾಮಿ ಅವರನ್ನು ಭೇಟಿ ಮಾಡಿದ್ದರು. ಭೇಟಿ ವೇಳೆ ಕುಮಾರಸ್ವಾಮಿ 25 ಕೋಟಿ ರೂಪಾಯಿ ಬೇಡಿಕೆ ಇಟ್ಟಿದ್ದರು. ನಮ್ಮ ಬೆಂಬಲಿಗರು ಅಷ್ಟು ಕೊಡಲು ಸಾಧ್ಯವಿಲ್ಲ, 10 ಕೋಟಿ ಕೊಡುತ್ತೇವೆ ಎಂದು ಹೇಳಿದ್ದರು” ಎಂದು ತಿಳಿಸಿದ್ದಾರೆ.

“2013-14ರ ಆಡಿಯೊ ಇಟ್ಟುಕೊಂಡು ಬಿಜೆಪಿ ಈಗ ತಮ್ಮ ಮರ್ಯಾದೆ ಉಳಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ” ಎಂದು ಕಾಂಗ್ರೆಸ್‌ ಸಂಸದ ವಿ.ಎಸ್‌. ಉಗ್ರಪ್ಪ ಹೇಳಿದ್ದಾರೆ. “ಕುಮಾರಸ್ವಾಮಿ ತಪ್ಪು ಮಾಡಿದ್ದಾರೆ ಎಂದು ಗೊತ್ತಿದ್ದರೆ ಬಿಜೆಪಿ ಇಷ್ಟು ದಿನ ಏಕೆ ಸುಮ್ಮನಿತ್ತು. ತಮ್ಮ ತಪ್ಪನ್ನು ಮುಚ್ಚಿಕೊಳ್ಳಲು ಬಿಜೆಪಿ ಈಗ ಆಡಿಯೊ- ವಿಡಿಯೊ ಬಿಡುಗಡೆ ಮೊರೆ ಹೋಗಿದೆ” ಎಂದಿದ್ದಾರೆ.

ಆಪರೇಷನ್‌ ಕಮಲದ ಬಿಜೆಪಿ ತಂತ್ರಕ್ಕೆ ಪ್ರತಿಯಾಗಿ ಕುಮಾರಸ್ವಾಮಿ ನಿನ್ನೆ ಆಡಿಯೊ ಬಿಡುಗಡೆ ಮಾಡಿ ಬಜೆಟ್‌ ಮಂಡನೆಯನ್ನು ಸುಗಮಗೊಳಿಸಿಕೊಂಡಿದ್ದರು. ಇಂದು ಬಿಜೆಪಿ ಕುಮಾರಸ್ವಾಮಿ ಮಾತನಾಡಿದ್ದಾರೆ ಎನ್ನಲಾದ ಆಡಿಯೊ ಬಿಡುಗಡೆ ಮಾಡಿ ಕುಮಾರಸ್ವಾಮಿ ಅವರನ್ನು ಹಣಿಯಲು ಮುಂದಾಗಿದೆ.

ರಾಜ್ಯ ರಾಜಕೀಯದಲ್ಲಿ ಆಪರೇಷನ್‌ ಕಮಲ, ರೆಸಾರ್ಟ್‌ ರಾಜಕಾರಣ, ರೆಸಾರ್ಟ್‌ ಹೊಡೆದಾಟಗಳನ್ನು ನೋಡಿದ್ದ ರಾಜ್ಯದ ಜನತೆಗೆ ಈಗ ಕುಮಾರಸ್ವಾಮಿ ವಿಡಿಯೊ ತೋರಿಸುವುದಾಗಿ ಬಿಜೆಪಿ ಹೇಳುತ್ತಿದೆ. ರಾಜ್ಯದ ಜನ ಕಣ್ಣಿಂದ ನೋಡಲು ಬಾಕಿ ಇರುವುದು ಅದೊಂದೇ. ಅಂದಹಾಗೆ ‘ಬಾಂಬ್‌ ಹಾಕ್ತೀನಿ, ಬಾಂಬ್‌ ಹಾಕ್ತೀನಿ’ ಎಂದು ಹೇಳಿದಾಗೆಲ್ಲಾ ಬಿಎಸ್‌ವೈ ಬಾಂಬ್‌ಗಳು ಟುಸ್‌ ಆಗಿವೆ. ಸದನದಲ್ಲಿ ಬಿಜೆಪಿ ಹಾಕಲಿರುವ ವಿಡಿಯೊ ಬಾಂಬ್‌ ಸಿಡಿಯಲಿದೆಯೋ ಇಲ್ಲವೇ ಟುಸ್‌ ಆಗಲಿದೆಯೋ ನೋಡಬೇಕು.

Also read: ಬ್ರೇಕಿಂಗ್‌ ನ್ಯೂಸ್‌; ಸಾಮಾಜಿಕ ಜಾಲತಾಣಗಳಲ್ಲಿ ಬಿಎಸ್‌ವೈ ‘ಸಂತಾ-ಬಂತಾ’!