samachara
www.samachara.com
ಎಚ್ಚರಿಕೆಯ ಗಂಟೆ: ಮೋದಿ ಯುಗದಲ್ಲಿ ನೀವು ಊಹಿಸದ ಮಟ್ಟಕ್ಕೆ ಏರಿಕೆಯಾಗಿದೆ ನಿರುದ್ಯೋಗ
COVER STORY

ಎಚ್ಚರಿಕೆಯ ಗಂಟೆ: ಮೋದಿ ಯುಗದಲ್ಲಿ ನೀವು ಊಹಿಸದ ಮಟ್ಟಕ್ಕೆ ಏರಿಕೆಯಾಗಿದೆ ನಿರುದ್ಯೋಗ

ಈ ಹಿಂದೆ 1972-73ರಲ್ಲಿ ನಿರುದ್ಯೋಗ ಸಮಸ್ಯೆ ಇದೇ ಹಂತಕ್ಕೆ ಬಿಗುಡಾಯಿಸಿತ್ತು. ಅದಾದ ನಂತರ ಇದೇ ಮೊದಲ ಬಾರಿಗೆ ನಿರುದ್ಯೋಗ ಪ್ರಮಾಣದಲ್ಲಿ ತೀವ್ರ ಏರಿಕೆಯಾಗಿದೆ.

Team Samachara

ಕಳೆದ 45 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ನಿರುದ್ಯೋಗ ಸಮಸ್ಯೆಯ ದರ ಗರಿಷ್ಠ ಶೇಕಡಾ 6.1ನ್ನು ತಲುಪಿದೆ. ಹೀಗಂತ ‘ಆವರ್ತಕ ಕಾರ್ಮಿಕ ಶಕ್ತಿ ಸಮೀಕ್ಷೆ’ಯನ್ನು ಉಲ್ಲೇಖಿಸಿ ‘ಬಿಸಿನೆಸ್ ಸ್ಟಾಂಡರ್ಡ್‌’ ವರದಿ ಮಾಡಿದೆ. ಸರಕಾರಿ ಸಂಸ್ಥೆ ‘ನ್ಯಾಷನಲ್ ಸ್ಯಾಂಪಲ್‌ ಸರ್ವೇ ಆಫೀಸ್‌ (ಎನ್‌ಎಸ್‌ಎಸ್‌ಒ)‘ ಈ ಸಮೀಕ್ಷೆ ನಡೆಸಿದೆ.

ಇದೇ ವರದಿಯ ಬಿಡುಗಡೆಗೆ ಕೇಂದ್ರ ಸರಕಾರ ಹಿಂದೇಟು ಹಾಕುತ್ತಿದೆ ಎಂಬ ಕಾರಣ ನೀಡಿ ಪ್ರಭಾರ ಅಧ್ಯಕ್ಷರು ಸೇರಿ ಇಬ್ಬರು ರಾಷ್ಟ್ರೀಯ ಅಂಕಿ ಅಂಶಗಳ ಆಯೋಗದ ಸದಸ್ಯರು ಸೋಮವಾರ ರಾಜೀನಾಮೆ ನೀಡಿದ್ದರು. ಈ ವರದಿ ಬಿಡುಗಡೆಗೆ ಸಮಿತಿ ಅನುಮೋದನೆ ನೀಡಿದ್ದಾಗಲೂ ಸರಕಾರ ಇದನ್ನು ಬಿಡುಗಡೆ ಮಾಡಿರಲಿಲ್ಲ.

ಇದೀಗ ಇಬ್ಬರು ಸದಸ್ಯರ ರಾಜೀನಾಮೆ ನಂತರ ಸರಕಾರ ವರದಿ ಮಾಧ್ಯಮಗಳ ಕೈ ಸೇರಿದೆ. ದೇಶದಲ್ಲಿ ಡಿಮಾನಟೈಸೇಷನ್‌ ಜಾರಿಯಾದ ನಂತರ ನಡೆಸಿರುವ ಮೊದಲ ಉದ್ಯೋಗ ಸಂಬಂಧಿ ಸಮೀಕ್ಷೆ ಇದಾಗಿದೆ. 2017ರ ಜುಲೈ ಮತ್ತು 2018ರ ಜೂನ್‌ ನಡುವೆ ಈ ಸಮೀಕ್ಷೆ ನಡೆಸಲಾಗಿದೆ.

ಈ ಹಿಂದೆ 1972-73ರಲ್ಲಿ ನಿರುದ್ಯೋಗ ಸಮಸ್ಯೆ ಇದೇ ಹಂತಕ್ಕೆ ಬಿಗುಡಾಯಿಸಿತ್ತು. ಅದಾದ ನಂತರ ಇದೇ ಮೊದಲ ಬಾರಿಗೆ ನಿರುದ್ಯೋಗ ಸಮಸ್ಯೆ ತೀವ್ರ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎಂದು ‘ಬಿಸಿನೆಸ್ ಸ್ಟ್ಯಾಂಡರ್ಡ್‌’ ಹೇಳಿದೆ. ಉದಾಹರಣೆಗೆ ಈ ಹಿಂದೆ 2011-12ರಲ್ಲಿ ನಿರುದ್ಯೋಗ ದರ ಶೇಕಡಾ 2.2ಕ್ಕೆ ಕುಸಿದಿತ್ತು. ಅದೀಗ ಶೇಕಡಾ 6.1ಕ್ಕೆ ಏರಿಕೆಯಾಗಿದೆ.

ಗ್ರಾಮೀಣ ಭಾಗಗಳಿಗೆ ಹೋಲಿಸಿದರೆ ನಗರ ಪ್ರದೇಶದಲ್ಲಿ ನಿರುದ್ಯೋಗ ಪ್ರಮಾಣ ಹೆಚ್ಚಾಗಿದೆ. ಗ್ರಾಮೀಣ ಪ್ರದೇಶದಲ್ಲಿ ನಿರುದ್ಯೋಗ ದರ ಶೇಕಡಾ 5.3ರಷ್ಟಿದ್ದರೆ, ನಗರ ಪ್ರದೇಶದಲ್ಲಿ ಶೇ. 7.8ರಷ್ಟಿದೆ. ಈ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ 2017-18ರಲ್ಲಿ ಯುವ ಜನತೆಯ ನಿರುದ್ಯೋಗ ಪ್ರಮಾಣ ಹೆಚ್ಚಾಗಿದೆ ಎಂದು ಸರಕಾರದ ಈ ವರದಿ ಹೇಳಿದೆ.

2011-12ರಲ್ಲಿ ಶೇಕಡಾ 5ರಷ್ಟಿದ್ದ ಗ್ರಾಮೀಣ ಭಾಗದಲ್ಲಿ ಪುರುಷ ಯುವಕ (15-29)ರ ನಿರುದ್ಯೋಗ ಪ್ರಮಾಣ ಶೇಕಡಾ 17.4ಕ್ಕೆ ವಿಸ್ತರಣೆಯಾಗಿದೆ. ಇದೇ ವಯೋಮಾನದ ಯುವತಿಯರ ನಿರುದ್ಯೋಗ ಪ್ರಮಾಣ ಶೇಕಡಾ 4.8 ರಿಂದ 2017-18ರಲ್ಲಿ ಶೇಕಡಾ 13.6ಕ್ಕೆ ಏರಿಕೆಯಾಗಿದೆ. ಯುವ ಜನತೆಯ ವಿಚಾರದಲ್ಲೂ ಗ್ರಾಮೀಣ ಭಾಗಕ್ಕಿಂತ ನಗರ ಪ್ರದೇಶದಲ್ಲಿ ನಿರುದ್ಯೋಗ ಪ್ರಮಾಣ ಹೆಚ್ಚಾಗಿದೆ. ನಗರದ ಶೇಕಡಾ 18.7 ಯುವಕರು ಮತ್ತು ಶೇಕಡಾ 27.2 ಯುವತಿಯರು ನಿರುದ್ಯೋಗಿಗಳಾಗಿದ್ದಾರೆ.

ವಿಶೇಷವೆಂದರೆ ಶಿಕ್ಷಣ ಹೊಂದಿದವರ ನಿರುದ್ಯೋಗ ಪ್ರಮಾಣವೂ ಏರುತ್ತಲೇ ಇದೆ. ಗ್ರಾಮೀಣ ಭಾಗದ ಶಿಕ್ಷಣ ಪಡೆದ ಮಹಿಳೆಯರ ನಿರುದ್ಯೋಗ ಪ್ರಮಾಣ 2004-05ರಲ್ಲಿ ಶೇಕಡಾ 9.7 ಇದ್ದರೆ 2011-12ರಲ್ಲಿ ಇದು 15.2ಕ್ಕೆ ಏರಿಕೆಯಾಗಿತ್ತು. ಅದೀಗ 2017-18ರಲ್ಲಿ ಬರೋಬ್ಬರಿ ಶೇಕಡಾ 17.3ಕ್ಕೆ ಹೆಚ್ಚಳವಾಗಿದೆ. ಪುರುಷರ ವಿಚಾರಕ್ಕೆ ಬಂದಾಗ 2011-12ರಲ್ಲಿ ಶೇಕಡಾ 4.4 ಇದ್ದ ನಿರುದ್ಯೋಗ ಪ್ರಮಾಣ ಇದೀಗ 2017-18ರಲ್ಲಿ ಶೇಕಡಾ 10.5ಕ್ಕೆ ಏರಿಕೆಯಾಗಿದೆ.

ದುಡಿಯುವ ವಯೋಮಾನದ ಕಾರ್ಮಿಕರು ಕೆಲಸ ಪಡೆಯುವ ಪ್ರಮಾಣವೂ ತಗ್ಗಿದೆ. 2011-12ರಲ್ಲಿ ದುಡಿಯುವ ವಯೋಮಾನದ ಶೇಕಡಾ 39.5ರಷ್ಟು ಜನರು ಉದ್ಯೋಗ ಪಡೆಯುತ್ತಿದ್ದರು. ಈ ಪ್ರಮಾಣವೀಗ 36.9ಕ್ಕೆ ಇಳಿಕೆಯಾಗಿದೆ.

ಈ ಹಿಂದೆ ಸಮೀಕ್ಷೆ ನಡೆಸಿದ್ದ ‘ಸೆಂಟರ್ ಫಾರ್‌ ಮಾನಿಟರಿಂಗ್‌ ಇಂಡಿಯನ್‌ ಎಕಾನಮಿ’ ಡಿಮಾನಟೈಸೇಷನ್‌ ತರುವಾಯ ದೇಶದಲ್ಲಿ 15 ಲಕ್ಷ ಉದ್ಯೋಗಗಳು ನಷ್ಟವಾಗಿತ್ತು ಎಂದು ಹೇಳಿತ್ತು. ಇದೀಗ ‘ಎನ್‌ಎಸ್‌ಎಸ್‌ಒ’ ವರದಿ 2017-18ರಲ್ಲಿ ಕಳೆದ 45 ವರ್ಷಗಳಲ್ಲೇ ಅತ್ಯಂತ ಹೆಚ್ಚಿನ ನಿರುದ್ಯೋಗವಿದೆ ಎಂದು ಹೇಳಿದೆ. ಇವಿಷ್ಟು ಪಕೋಡ ಮಾರಲು ಹೇಳಿದವರು ಮತ್ತು ವಿದ್ಯಾರ್ಥಿಗಳಿಗೆ ಪರೀಕ್ಷೆ ಬರೆಯಲು ಸಲಹೆ ನೀಡುವವರ ಗಮನಕ್ಕೆ!