samachara
www.samachara.com
ಭೈರವ ಲಾಡ್ಜ್‌ಗೆ ನುಗ್ಗಿದ ನೆಲಮಂಗಲದ ‘ಪೋಲಿ’ಸರು; ಆರಕ್ಷಕರೇ ಭಕ್ಷಕರಾದ ಕತೆ ಇದು
COVER STORY

ಭೈರವ ಲಾಡ್ಜ್‌ಗೆ ನುಗ್ಗಿದ ನೆಲಮಂಗಲದ ‘ಪೋಲಿ’ಸರು; ಆರಕ್ಷಕರೇ ಭಕ್ಷಕರಾದ ಕತೆ ಇದು

ನೆಲಮಂಗಲದ ಭೈರವ ಲಾಡ್ಜ್‌ನಲ್ಲಿ ಪೊಲೀಸರೇ ಯುವತಿಯರಿಬ್ಬರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪ ಕೇಳಿಬಂದಿದೆ.

Team Samachara

ರಕ್ಷಣೆ ನೀಡಬೇಕಾದ ಪೊಲೀಸರೇ ಯುವತಿಯರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ ಎಂಬ ಆರೋಪವೊಂದು ಬೆಂಗಳೂರು ಗ್ರಾಮೀಣ ಜಿಲ್ಲೆಯ ನೆಲಮಂಗಲದಲ್ಲಿ ತಡವಾಗಿ ಸದ್ದು ಮಾಡುತ್ತಿದೆ.

ಜ. 4ರಂದು ನಡೆದಿರುವ ಘಟನೆ ಹಿನ್ನೆಲೆಯಲ್ಲಿ ನೆಲಮಂಗಲ ಟೌನ್‌ ಪೊಲೀಸ್ ಠಾಣೆಯ ಕ್ರೈಂ ಪೇದೆ ಚೆನ್ನೇಗೌಡ ಹಾಗೂ ಚಾಲಕ ಜರೀಫ್‌ ಎಂಬುವವರನ್ನು ಅಮಾನತ್ತು ಮಾಡಲಾಗಿದೆ. “ಘಟನೆ ಗಮನಕ್ಕೆ ಬಂದಿದ್ದು, ಇಬ್ಬರ ಮೇಲೆ ಶಿಸ್ತು ಕ್ರಮ ಕೈಗೊಳ್ಳಲಾಗಿದೆ. ಈ ಕುರಿತು ತನಿಖೆಗೆ ಆದೇಶ ನೀಡಿದ್ದೇನೆ,’’ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಟಿ. ಪಿ. ಶಿವಕುಮಾರ್ ‘ಸಮಾಚಾರ’ಕ್ಕೆ ತಿಳಿಸಿದರು.

ನಡೆದಿದ್ದೇನು?:

ನೆಲಮಂಗಲದ ಕುಣಿಗಲ್ ವೃತ್ತದ ಬಳಿ ಇರುವ ಭೈರವ ಲಾಡ್ಜ್‌ನಲ್ಲಿ ಜ. 4ರಂದು ಇಬ್ಬರು ಯುವಕರು ಹಾಗೂ ಇಬ್ಬರು ಯುವತಿಯರು ಕೊಠಡಿಯನ್ನು ಬಾಡಿಗೆಗೆ ಪಡೆದುಕೊಂಡಿದ್ದರು. “ಇದನ್ನು ಗಮನಿಸಿದ ಚೆನ್ನೇಗೌಡ ಹಾಗೂ ಜರೀಫ್‌ ಕೊಠಡಿಗೆ ನುಗ್ಗಿ ಇಬ್ಬರು ಯುವಕರನ್ನು ಥಳಿಸಿದರು. ನಂತರ ಯುವಕರನ್ನು ಠಾಣೆಗೆ ಕರೆದೊಯ್ದರು. ಮರಳಿ ಬಂದವರು ಯುವತಿಯರ ಜತೆ ಅನುಚಿತವಾಗಿ ವರ್ತಿಸಿದರು,’’ ಎಂದು ಹೊರಬಿದ್ದಿರುವ ಮಾಹಿತಿ.

ಸಿಸಿ ಟಿವಿಯಲ್ಲಿ ದಾಖಲಾಗಿರುವ ಯುವತಿಯರ ಚಿತ್ರ (ಲೈಂಗಿಕ ದೌರ್ಜನ್ಯ ಪ್ರಕರಣಗಳ ವರದಿಯಲ್ಲಿ ಸಂತ್ರಸ್ತರ ಗುರುತು ಬಹಿರಂಗ ಪಡಿಸಬಾರದೆಂಬ ಕಾರಣಕ್ಕೆ ಫೋಟೊ ಬ್ಲರ್‌ ಮಾಡಲಾಗಿದೆ)
ಸಿಸಿ ಟಿವಿಯಲ್ಲಿ ದಾಖಲಾಗಿರುವ ಯುವತಿಯರ ಚಿತ್ರ (ಲೈಂಗಿಕ ದೌರ್ಜನ್ಯ ಪ್ರಕರಣಗಳ ವರದಿಯಲ್ಲಿ ಸಂತ್ರಸ್ತರ ಗುರುತು ಬಹಿರಂಗ ಪಡಿಸಬಾರದೆಂಬ ಕಾರಣಕ್ಕೆ ಫೋಟೊ ಬ್ಲರ್‌ ಮಾಡಲಾಗಿದೆ)
ಸ್ಕ್ರೀನ್‌ ಗ್ರಾಬ್‌ / ಚಿತ್ರಕೃಪೆ: ಸುವರ್ಣ ನ್ಯೂಸ್‌

“ಘಟನೆ ನಡೆದಿದ್ದು ನಿಜ. ಆದರೆ ಇವರಿಬ್ಬರು ಯುವತಿಯರಿದ್ದ ಕೋಣೆಗೆ ಹೋಗಿರಲಿಲ್ಲ. ಲಾಡ್ಜ್‌ ಕೆಳಗೆ ನಿಂತು ಇಬ್ಬರನ್ನು ಕರೆಸಿಕೊಂಡರು. ಕೊನೆಗೆ ಕ್ಯಾಬ್‌ನಲ್ಲಿ ಯುವತಿಯನ್ನು ಕಳುಹಿಸಿ ಕೊಟ್ಟರು. ಈ ಘಟನೆ ಯಾಕೆ ಈಗ ಸುದ್ದಿಯಾಯಿತೋ ಗೊತ್ತಿಲ್ಲ,’’ ಎನ್ನುತ್ತಾರೆ ನೆಲಮಂಗಲ ಠಾಣೆಯ ಎಸ್ಐ.

‘ಸಮಾಚಾರ’ದ ಜತೆ ಮಾತನಾಡಿದ ಅವರು ಪ್ರಾಥಮಿಕ ಹಂತದ ತನಿಖೆಯಲ್ಲಿ ಲಭ್ಯ ಮಾಹಿತಿ ಪ್ರಕಾರ ತಮ್ಮ ಸಿಬ್ಬಂದಿಗಳು ತಪ್ಪೆಸಗಿಲ್ಲ ಎಂದರು. ಆದರೆ, “ಜ. 5ರಂದು ಇಬ್ಬರನ್ನೂ ಕರೆದ ಸರ್ಕಲ್‌ ಇನ್ಸ್‌ಪೆಕ್ಟರ್‌ ಕ್ರೈಂ ವಿಭಾಗದಿಂದ ಬದಲಾವಣೆ ಮಾಡಿದ್ದರು. ಅಷ್ಟೆ ಅಲ್ಲ ಇಬ್ಬರ ಅನುಚಿತ ವರ್ತನೆಯ ಬಗ್ಗೆ ಎಚ್ಚರಿಕೆಯನ್ನೂ ನೀಡಿದ್ದರು,’’ ಎನ್ನುತ್ತಾರೆ ಅವರು.

ಏನಿದು ‘ಅನುಚಿತ ವರ್ತನೆ’? ಯಾಕೆ ಅವತ್ತೇ ಪೇದೆಗಳ ವ್ಯಾಪ್ತಿ ಮೀರಿದ ನಡವಳಿಕೆಗೆ ದೂರು ದಾಖಲಿಸಿಕೊಳ್ಳಲಿಲ್ಲ? ಎಂಬ ಪ್ರಶ್ನೆಗಳಿಗೆ ಉತ್ತರ ನೀಡಲು ಹಿರಿಯ ಅಧಿಕಾರಿಗಳು ನಿರಾಕರಿಸುತ್ತಾರೆ.

“ಘಟನೆ ಗಮನಕ್ಕೆ ಬಂದಿದ್ದು ಇವತ್ತು (ಶುಕ್ರವಾರ). ತನಿಖೆಗೆ ಆದೇಶ ನೀಡಿದ್ದೇನೆ. ದೂರು ಇನ್ನಷ್ಟೆ ದಾಖಲಿಸಿಕೊಳ್ಳುತ್ತೇವೆ,’’ ಎನ್ನುತ್ತಾರೆ ಬೆಂಗಳೂರು ಗ್ರಾಮಾಂತರ ಎಸ್‌ಪಿ ಶಿವಕುಮಾರ್.

ನೆಲಮಂಗಲದ ಕುಣಿಗಲ್‌ ವೃತ್ತದ ಬಳಿ ಇರುವ ಭೈರವ ಡಿಲಕ್ಸ್‌ ಲಾಡ್ಜ್‌
ನೆಲಮಂಗಲದ ಕುಣಿಗಲ್‌ ವೃತ್ತದ ಬಳಿ ಇರುವ ಭೈರವ ಡಿಲಕ್ಸ್‌ ಲಾಡ್ಜ್‌
ಸ್ಕ್ರೀನ್‌ ಗ್ರಾಬ್‌ / ಚಿತ್ರಕೃಪೆ: ಸುವರ್ಣ ನ್ಯೂಸ್‌

ಸರ್ಕಲ್‌ ಇನ್ಸ್‌ಪೆಕ್ಟರ್‌ ಕೈಲಿ ರಿಜಿಸ್ಟ್ರಿ:

“ಅವತ್ತು ರಾತ್ರಿ 10 ಗಂಟೆ ಸುಮಾರಿಗೆ ಯಡಿಯೂರಿಗೆ ಹೋಗಿದ್ದ ನಾಲ್ವರು ಎರಡು ಬುಲೆಟ್‌ನಲ್ಲಿ ಬಂದು ರೂಮ್ ಪಡೆದುಕೊಂಡರು. ಊಟಕ್ಕೆ ಕೂತಿದ್ದ ಸಮಯದಲ್ಲಿ ಲಾಡ್ಜ್‌ಗೆ ಬಂದ ಜರೀಫ್‌ ರೂಮ್‌ ಬಾಯ್‌ಗೆ ಥಳಿಸಿ ಎಲ್ಲಾ ಕೊಠಡಿಗಳ ಬಾಗಿಲು ತೆಗೆಯಲು ಹೇಳಿದರು. ಕೊನೆಗೆ, ಎರಡು ರೂಮ್‌ಗಳಲ್ಲಿದ್ದ ಯುವಕರನ್ನು ಊಟ ಬಿಡಿಸಿ ಹೊರಗೆ ಕರೆತಂದರು. ಚೆನ್ನೇಗೌಡರಿಗೆ ಕರೆ ಮಾಡಿ ಕರೆಸಿಕೊಂಡರು. ಯುವಕರನ್ನು ಠಾಣೆಗೆ ಕರೆದೊಯ್ದರು,’’ ಎಂದು ಮಾಹಿತಿ ನೀಡುತ್ತಾರೆ ಲಾಡ್ಜ್‌ನ ಸಿಬ್ಬಂದಿಯೊಬ್ಬರು.

ಠಾಣೆಯಿಂದ ಮರಳಿದ ಚೆನ್ನೇಗೌಡ ಮತ್ತು ಜರೀಫ್ ಇಬ್ಬರು ಯುವತಿಯರಿದ್ದ ರೂಮ್‌ಗೆ ಮತ್ತೆ ನುಗ್ಗಿದ್ದಾರೆ. “ಈ ಸಮಯದಲ್ಲಿ ನಮ್ಮ ರೂಮ್‌ ಬಾಯ್ ಬೇಡ ಎಂದರೂ ಕೇಳಲಿಲ್ಲ. ಒಳಗೆ ಏನು ನಡೆದಿದೆ ಗೊತ್ತಿಲ್ಲ. ಆದರೆ ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ಇಬ್ಬರು ಪೊಲೀಸರು ರೂಮ್‌ ಒಳಗಡೆ ಇದ್ದರು,’’ ಎಂದು ಲಾಡ್ಜ್‌ ಸಿಬ್ಬಂದಿ ಮಾಹಿತಿ ನೀಡುತ್ತಾರೆ.

ಈ ಕುರಿತು ಸಿಸಿಟಿವಿ ದೃಶ್ಯಾವಳಿಗಳನ್ನು ಇವರು ಪೊಲೀಸರಿಗೆ ನೀಡಿದ್ದಾರೆ. ಜತೆಗೆ ಲಾಡ್ಜ್‌ನ ನೋಂದಣಿ ಪುಸ್ತಕವನ್ನು ಸರ್ಕಲ್‌ ಇನ್ಸ್‌ಪೆಕ್ಟರ್‌ ತೆಗೆದುಕೊಂಡು ಹೋಗಿದ್ದಾರೆ. ಇದರ ಜತೆಗೆ, ಯುವಕರಿಂದ ಠಾಣೆಯಲ್ಲಿ ಹಣವನ್ನೂ ಪೊಲೀಸರು ವಸೂಲಿ ಮಾಡಿಕೊಂಡಿದ್ದಾರೆ ಎಂಬ ಆರೋಪವಿದೆ.

“ಈ ಸಮಯದಲ್ಲಿ ಯುವಕರಿಂದ ಹಣ ಇಸಿದುಕೊಳ್ಳಲು ದುಂಬಾಲು ಬಿದ್ದರು. ಕೊನೆಗೆ ಜರೀಫ್‌ ಏಟಿಎಂಗೆ ಕರೆದೊಯ್ದು ಹಣ ಡ್ರಾ ಮಾಡಿಸಿಕೊಂಡರು. ಇನ್ನೊಬ್ಬ ಯುವಕ ಗೆಳೆಯನಿಂದ ಪೇಟಿಎಂ ಮಾಡಿಸಿಕೊಂಡ. ರೂಮ್‌ ಬಾಯ್‌ನ್ನು ಇವರ ಜತೆಗೆ ಇರಿಸಿಕೊಂಡಿದ್ದರು. ಇಷ್ಟೆಲ್ಲಾ ನಡೆದು ಅವರನ್ನು ಬಿಟ್ಟು ಕಳುಹಿಸುವ ಹೊತ್ತಿಗೆ ಇಬ್ಬರು ಯುವತಿಯರು ಕ್ಯಾಬ್‌ನಲ್ಲಿ ಹೊರಟು ಹೋಗಿದ್ದರು,’’ ಎಂದು ನಡೆದ ಘಟನೆಯನ್ನು ಲಾಡ್ಜ್‌ ಸಿಬ್ಬಂದಿ ವಿವರಿಸುತ್ತಾರೆ.

ಸಿಸಿ ಟಿವಿ ದೃಶ್ಯಗಳಲ್ಲಿ ಯುವಕರು 
ಸಿಸಿ ಟಿವಿ ದೃಶ್ಯಗಳಲ್ಲಿ ಯುವಕರು 
ಸ್ಕ್ರೀನ್‌ ಗ್ರಾಬ್‌ / ಚಿತ್ರಕೃಪೆ: ಸುವರ್ಣ ನ್ಯೂಸ್‌

ರೂಮ್‌ ಪಡೆಯುವುದು ತಪ್ಪಾ?:

ಘಟನೆಗೆ ಸಾಕ್ಷಿಯಾದವರು ಹೇಳುವ ಪ್ರಕಾರ, ಯುವಕ ಯುವತಿಯರು ರೂಮ್‌ ಬಾಡಿಗೆ ಪಡೆದುಕೊಂಡಿದ್ದೇ ಅಪರಾಧ ಎಂದು ಪೊಲೀಸರು ಬಿಂಬಿಸಲು ಹೊರಟಿದ್ದಾರೆ. ಬೆದರಿಕೆ ಹಾಕಿ ಹಣವನ್ನೂ ವಸೂಲಿ ಮಾಡಿದ್ದಾರೆ. ಘಟನೆ ಠಾಣೆಯ ಹಿರಿಯ ಅಧಿಕಾರಿಗಳ ಗಮನಕ್ಕೆ ಅವತ್ತೇ ಬಂದಿದ್ದರೂ ಕ್ರಮ ಕೈಗೊಳ್ಳದೆ ಮೀನಾಮೇಶ ಎಣಿಸಿರುವುದು ಎದ್ದು ಕಾಣಿಸುತ್ತಿದೆ.

ಇದರ ಜತೆಗೆ, ಯುವಕರ ಮಾಹಿತಿಯನ್ನು ಎಲ್ಲಿಯೂ ಸೋರಿಕೆಯಾದಂತೆ ಕಾಯ್ದುಕೊಂಡು ಬಂದಿದ್ದಾರೆ. ಘಟನೆಯ ಕುರಿತು ಅಸಮಾಧಾನಗೊಂಡಿದ್ದ ಪೊಲೀಸ್‌ ಸಿಬ್ಬಂದಿ ಕಡೆಯಿಂದಲೇ ಸುಮಾರು 20 ದಿನಗಳ ನಂತರ ಸುದ್ದಿ ಸೋರಿಕೆಯಾಗಿದೆ. ಇದು ಮಾಧ್ಯಮಗಳಲ್ಲಿ ಸುದ್ದಿಯಾಗುತ್ತಿದ್ದಂತೆ ಎಚ್ಚೆತ್ತ ಪೊಲೀಸ್ ವರಿಷ್ಠಾಧಿಕಾರಿ ಕ್ರಮಕ್ಕೆ ಸೂಚಿಸಿದ್ದಾರೆ. ರಕ್ಷಣೆ ನೀಡಬೇಕಾದವರೇ ಭಕ್ಷಕರಾಗುವುದು ಎಂದರೆ ಇದೆ ಅಲ್ವಾ?