samachara
www.samachara.com
‘ಹಿಂಗ್ಯಾಕೆ’: ವಿಚಾರಣಾಧೀನ ಖೈದಿಗಳಲ್ಲಿ ಮೂವರಲ್ಲಿ ಒಬ್ಬರು ಎಸ್‌ಸಿ ಅಥವಾ ಎಸ್‌ಟಿ; ವರದಿ
COVER STORY

‘ಹಿಂಗ್ಯಾಕೆ’: ವಿಚಾರಣಾಧೀನ ಖೈದಿಗಳಲ್ಲಿ ಮೂವರಲ್ಲಿ ಒಬ್ಬರು ಎಸ್‌ಸಿ ಅಥವಾ ಎಸ್‌ಟಿ; ವರದಿ

ದಲಿತರು ಮತ್ತು ಆದಿವಾಸಿಗಳನ್ನು ಗುರಿಯಾಗಿಸುವ ಒಂದು ನಿರ್ಧಿಷ್ಟ ಮಾದರಿಯನ್ನು ಸೂಚಿಸುತ್ತಿವೆ. ಈ ತಳ ಸಮುದಾಯಗಳು ನಿರಂತರವಾಗಿ ಪೊಲೀಸರಿಂದ ತೊಂದರೆ ಅನುಭವಿಸುತ್ತಿರುವುದು ಸ್ಪಷ್ಟವಾಗಿದೆ.

Team Samachara

‘ತಮ್ಮ ಜನಸಂಖ್ಯೆಯ ಅನುಪಾತಕ್ಕಿಂತ ಹೆಚ್ಚಿನ ಸಂಖ್ಯೆಯ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ಆರೋಪಿಗಳು ಜೈಲುಗಳಲ್ಲಿ ವಿಚಾರಣಾಧೀನ ಖೈದಿಗಳಾಗಿ ಕೊಳೆಯುತ್ತಿದ್ದಾರೆ.’

ಹೀಗಂಥ ಹೊಸ ಸಂಶೋಧನೆಯೊಂದು ಹೇಳಿದೆ. ಭಾರತದ ಜನಸಂಖ್ಯೆಯಲ್ಲಿ ಎಸ್‌ಸಿ ಮತ್ತು ಎಸ್‌ಟಿಗಳ ಪಾಲು ಶೇಕಡಾ 24. ಆದರೆ ವಿಚಾರಣಾಧೀನ ಖೈದಿಗಳಾಗಿ ಇವರ ಪಾಲು ಶೇಕಡಾ 34ರಷ್ಟಿದೆ ಎಂಬುದಾಗಿ ‘ಕ್ರಿಮಿನಲ್‌ ಜಸ್ಟೀಸ್‌ ಇನ್‌ ದ ಶ್ಯಾಡೋ ಆಫ್‌ ಕಾಸ್ಟ್‌’ ವರದಿ ತಿಳಿಸಿದೆ.

ನ್ಯಾಯಕ್ಕಾಗಿ ರಾಷ್ಟ್ರೀಯ ದಲಿತ ಆಂದೋಲನ ಮತ್ತು ದಲಿತ ಮಾನವ ಹಕ್ಕುಗಳ ರಾಷ್ಟ್ರೀಯ ಕೇಂದ್ರ ಈ ವರದಿ ತಯಾರಿಸಿವೆ. ರಾಷ್ಟ್ರೀಯ ಅಪರಾಧ ದಾಖಲೆ ವಿಭಾಗ(ಎನ್‌ಸಿಆರ್‌ಬಿ)ದಿಂದ ಪಡೆದುಕೊಂಡ ಮಾಹಿತಿಗಳನ್ನು ಆಧರಿಸಿ ಇದನ್ನು ತಯಾರಿಸಲಾಗಿದೆ.

ವರದಿಯು, ಕೆಲವು ರಾಜ್ಯಗಳಲ್ಲಿ ಈ ವ್ಯತ್ಯಾಸ ಇನ್ನೂ ಹೆಚ್ಚಾಗಿದೆ ಎಂದು ಹೇಳಿದೆ. ಉದಾಹರಣೆಗೆ ಅಸ್ಸಾಂ, ತಮಿಳುನಾಡು, ಮಹಾರಾಷ್ಟ್ರ ಮತ್ತು ರಾಜಸ್ಥಾನಗಳಲ್ಲಿ ಹೆಚ್ಚಿನ ಪ್ರಮಾಣದ ಎಸ್‌ಸಿ ಮತ್ತು ಎಸ್‌ಟಿ ಸಮುದಾಯದ ಜನರು ಕೇಸು ಜಡಿಸಿಕೊಂಡು ಜೈಲು ಪಾಲಾಗಿದ್ದಾರೆ. ತಮಿಳುನಾಡಿನಲ್ಲಿ ದಲಿತರು ಶೇಕಡಾ 21ರಷ್ಟಿದ್ದರೆ, ಜೈಲಿನಲ್ಲಿರುವ ದಲಿತರ ಸಂಖ್ಯೆ ಶೇಕಡಾ 38. ಅಂದರೆ ಜನಸಂಖ್ಯೆಯ ಅನುಪಾತಕ್ಕಿಂತ ಶೇಕಡಾ 17ರಷ್ಟು ಹೆಚ್ಚಿನ ದಲಿತರು ಜೈಲುಗಳಲ್ಲಿದ್ದಾರೆ.

“ಒಟ್ಟಾರೆ ಈ ಸಂಗತಿಗಳು ದಲಿತರು ಮತ್ತು ಆದಿವಾಸಿಗಳನ್ನು ಗುರಿಯಾಗಿಸುವ ಒಂದು ನಿರ್ಧಿಷ್ಟ ಮಾದರಿಯನ್ನು ಸೂಚಿಸುತ್ತಿವೆ. ಈ ತಳ ಸಮುದಾಯಗಳು ನಿರಂತರವಾಗಿ ಪೊಲೀಸರಿಂದ ತೊಂದರೆ ಅನುಭವಿಸುತ್ತಿರುವುದು ಮತ್ತು ವಿಚಾರಣಾಧೀನ ಖೈದಿಗಳಾಗಿ ಮತ್ತಷ್ಟು ಹಿಂಸೆಗೆ ಗುರಿಯಾಗುತ್ತಿರುವುದು ಸ್ಪಷ್ಟವಾಗಿದೆ. ನಾವು ಈ ಬಗ್ಗೆ ತನಿಖೆಗೆ ಒತ್ತಾಯಿಸುತ್ತೇವೆ,” ಎಂದು ವರದಿ ಹೇಳಿದೆ.

ಒಂದೊಮ್ಮೆ ದಲಿತರು ಮತ್ತು ಆದಿವಾಸಿಗಳು ತಮ್ಮ ಮೇಲೆ ದೌರ್ಜನ್ಯ ನಡೆದಿದೆ ಎಂಬ ದೂರು ದಾಖಲಿಸಿದರೆ, ಆರೋಪಿಗಳು ಪ್ರತಿ ದೂರು ದಾಖಲಿಸುತ್ತಾರೆ. “ಎಸ್‌ಸಿ ಸಂತ್ರಸ್ತರು ದೂರು ದಾಖಲಿಸಿದಕ್ಕೆ ಪ್ರತಿಯಾಗಿ ಅವರನ್ನು ಹತ್ತಿಕ್ಕಲೆಂದೇ ಪ್ರತಿದೂರುಗಳನ್ನು ದಾಖಲಿಸಲಾಗುತ್ತದೆ. ಈ ಸಂದರ್ಭದಲ್ಲಿ ಎಸ್‌ಸಿ ಸಂತ್ರಸ್ತರನ್ನು ಬಂಧಿಸಲಾಗುತ್ತದೆ ಮತ್ತು ಕ್ರಿಮಿನಲ್ ಮೊಕದ್ದಮೆಗೆ ಗುರಿಪಡಿಸಲಾಗುತ್ತದೆ,” ಎಂದು ವರದಿ ವಿವರಿಸಿದೆ.

ಇದನ್ನೇ ಆಧಾರವಾಗಿಟ್ಟುಕೊಂಡು ಸುಪ್ರೀಂ ಕೋರ್ಟ್‌ ಎಸ್‌ಸಿ/ಎಸ್‌ಟಿ (ದೌರ್ಜನ್ಯ ತಡೆ) ಕಾಯ್ದೆಯ ದುರ್ಬಳಕೆಯಾಗುತ್ತಿದೆ ಎಂದು ಹೇಳಿತ್ತು. ಇದರ ಆಧಾರದ ಮೇಲೆ ಕಳೆದ ಮಾರ್ಚ್‌ನಲ್ಲಿ ಕಾಯ್ದೆಯನ್ನು ಸ್ವಲ್ಪಮಟ್ಟಿಗೆ ದುರ್ಬಲಗೊಳಿಸಲು ನ್ಯಾಯಾಲಯ ನಿರ್ಧರಿಸಿತ್ತು.

2015ರ ಎನ್‌ಸಿಆರ್‌ಬಿ ಮಾಹಿತಿಗಳ ಪ್ರಕಾರ ದೇಶದ ಶೇಕಡಾ 55ರಷ್ಟು ವಿಚಾರಣಾಧೀನ ಖೈದಿಗಳು ದಲಿತರು, ಆದಿವಾಸಿಗಳು ಮತ್ತು ಮುಸ್ಲಿಂ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ. ಈ ಮೂರು ಜನರ ಸಂಖ್ಯೆಗೆ ಹೋಲಿಸಿದರೆ ಈ ಪ್ರಮಾಣ ತೀರಾ ಹೆಚ್ಚಾಗಿದೆ. 2011ರ ಜನಗಣತಿ ಪ್ರಕಾರ ಈ ದೇಶದಲ್ಲಿ ಶೇಕಡಾ 39ರಷ್ಟು ದಲಿತರು, ಆದಿವಾಸಿಗಳು ಮತ್ತು ಮುಸ್ಲಿಮರು ಸೇರಿದ್ದಾರೆ.

ಇದೆ ವೇಳೆ ಗಲ್ಲು ಶಿಕ್ಷೆಗೆ ಗುರಿಯಾಗುವ ಹೆಚ್ಚಿನವರು ಕೂಡ ದಲಿತರಾಗಿದ್ದಾರೆ. 2016ರಲ್ಲಿ ನ್ಯಾಷನಲ್‌ ಲಾ ಯುನಿವರ್ಸಿಟಿ ಪ್ರಕಟ ಮಾಡಿರುವ ‘ಭಾರತದಲ್ಲಿ ಮರಣ ದಂಡನೆ’ ವರದಿಯಲ್ಲಿ, ಗಲ್ಲು ಶಿಕ್ಷೆಗೆ ಗುರಿಯಾದ 279 ಜನರಲ್ಲಿ 127 ಜನರು ಅಥವಾ ಶೇಕಡಾ 34 ಖೈದಿಗಳು ಹಿಂದುಳಿದ ವರ್ಗಗಳಿಗೆ ಸೇರಿದವರಾಗಿದ್ದಾರೆ. ಹಿಂದುಳಿದವರಿಗೆ ಹೋಲಿಸಿದರೆ ಮರಣ ದಂಡನೆ ವಿಧಿಸಿಕೊಂಡ ಸಾಮಾನ್ಯ ವರ್ಗಗಳಿಗೆ ಸೇರಿದವರ ಸಂಖ್ಯೆ ಶೇಕಡಾ 24 ಮಾತ್ರ.

ಇನ್ನು ಗಲ್ಲು ಶಿಕ್ಷೆಗೆ ಗುರಿಯಾಗುವ ಶೇಕಡಾ 20ರಷ್ಟು ಜನರು ಧಾರ್ಮಿಕ ಅಲ್ಪಸಂಖ್ಯಾತರಾಗಿದ್ದಾರೆ. ಗುಜರಾತ್‌ ರಾಜ್ಯದಲ್ಲಂತೂ ಗಲ್ಲು ಶಿಕ್ಷೆಗೆ ಗುರಿಯಾದ 19 ಜನರಲ್ಲಿ 15 ಜನರು ಮುಸ್ಲಿಂ ಸಮುದಾಯದವರಾಗಿದ್ದಾರೆ.

ವರದಿಯ ಪ್ರಕಾರ, ಸಮಾಜದಲ್ಲಿ ಆಳವಾಗಿ ಬೇರೂರಿದ ಪೂರ್ವಗ್ರಹಗಳು ದುರ್ಬಲ ಸಮುದಾಯಗಳ ಮೇಲಿನ ಕಿರುಕುಳ ಮತ್ತು ಜೈಲು ವಾಸದಲ್ಲಿ ನಿರ್ಣಾಯಕ ಪಾತ್ರವಹಿಸುತ್ತವೆ. ಸಾಮಾನ್ಯವಾಗಿ ಪೊಲೀಸ್ ಹಿಂಸೆಯ ಬಲಿಪಶುಗಳು ದಲಿತರು ಮತ್ತು ಆದಿವಾಸಿಗಳಾಗಿರುತ್ತಾರೆ. ಅವರುಗಳನ್ನು ಸಾಮಾನ್ಯವಾಗಿ ಸಂಯೋಜಿಸಲ್ಪಟ್ಟ ಆರೋಪಗಳಲ್ಲಿ ಬಂಧಿಸಲಾಗುತ್ತದೆ ಎಂದು ವರದಿ ವಿವರಿಸಿದೆ.

ದಲಿತರು ಹೆಚ್ಚಿನ ಸಂಖ್ಯೆಯಲ್ಲಿ ಜೈಲಿನಲ್ಲಿ ಕೊಳೆಯುವಂತಾಗಲು ಪೋಲೀಸರ ನಿಧಾನಗತಿಯ ತನಿಖೆಯೂ ಕಾರಣವಾಗಿದೆ. “ಅನೇಕ ಖೈದಿಗಳು ಕಾರಾಗೃಹದಲ್ಲಿ ಸಿಲುಕುತ್ತಾರೆ. ಕಾರಣ ಅವರ ಮೇಲಿನ ಪ್ರಕರಣಗಳ ತನಿಖೆಯನ್ನು ಪೊಲೀಸರು ಪೂರ್ಣಗೊಳಿಸುವುದಿಲ್ಲ ಮತ್ತು ಸಮಯಕ್ಕೆ ಸರಿಯಾಗಿ ಆರೋಪಪಟ್ಟಿ ಸಲ್ಲಿಸುವುದಿಲ್ಲ. ಇದು ಬಹಳ ಗಂಭೀರ ವಿಷಯವಾಗಿದೆ. ಏಕೆಂದರೆ ಇಂಥಹ ಜನರು ತಮ್ಮ ಮೇಲಿನ ಆರೋಪಗಳ ಬಗ್ಗೆಯೂ ಅರಿವಿಲ್ಲದೆ ಜೈಲಿನ ದಿನಗಳನ್ನು ಕಳೆಯುತ್ತಿದ್ದಾರೆ,” ಎಂದು ವರದಿ ಎಚ್ಚರಿಸಿದೆ.

ದೇಶದಲ್ಲಿ ಮೀಸಲಾತಿಯ ಚರ್ಚೆ ನಡೆಯುತ್ತಿರುವ ಹೊತ್ತಲ್ಲಿ ಈ ಅಸಮಾನತೆಯ ಅನುಪಾತವನ್ನು ಗಮನಿಸಬೇಕಿದೆ.

ಕೃಪೆ: ದಿ ವೈರ್