samachara
www.samachara.com
‘ಎಲ್ಲೂ ನೈತಿಕತೆ ಇಲ್ಲ’; ಆಹಾ, ರಾಜಕೀಯದಲ್ಲಿ ಲಜ್ಜೆಗೆಟ್ಟವರ ಸೊಬಗ ನೋಡಾ!
COVER STORY

‘ಎಲ್ಲೂ ನೈತಿಕತೆ ಇಲ್ಲ’; ಆಹಾ, ರಾಜಕೀಯದಲ್ಲಿ ಲಜ್ಜೆಗೆಟ್ಟವರ ಸೊಬಗ ನೋಡಾ!

ರಾಜ್ಯ ರಾಜಕೀಯದಲ್ಲಿ ಸದ್ಯಕ್ಕೆ ನೈತಿಕತೆ ಎಂಬುದಕ್ಕೆ ಯಾವುದೇ ಅರ್ಥ ಉಳಿದಿಲ್ಲ. ಈ ವಿಚಾರದಲ್ಲಿ ರಾಜಕಾರಣಿಗಳು ಪಕ್ಷಭೇದ ಮರೆತು ಒಗ್ಗಟ್ಟು ಪ್ರದರ್ಶಿಸಿದ್ದಾರೆ.

ದಯಾನಂದ

ದಯಾನಂದ

ಈಗಿರುವ ರಾಜಕೀಯ ವ್ಯವಸ್ಥೆ ಸುಧಾರಿಸದಿದ್ದರೆ ವಿಧಾನಸೌಧ ಪ್ರಯೋಜನಕ್ಕೆ ಬರುವುದು ಮೇಲಿನ ಚಿತ್ರದಲ್ಲಿರುವಂತೆ ಸೆಲ್ಫಿ ತೆಗೆದುಕೊಳ್ಳಲು ಮಾತ್ರ!

ರಾಜಕಾರಣಕ್ಕೆ ಸಮಾಜವಾದಿ ಹಿನ್ನೆಲೆ ಇರುವ ಕರ್ನಾಟಕದಲ್ಲಿ ಇಲ್ಲಿಯವರೆಗೂ ರಾಜಕೀಯ ಎಂದರೆ ಅಲ್ಪಸ್ವಲ್ಪವಾದರೂ ಮರ್ಯಾದೆ ಇತ್ತು. ಆದರೆ, ಇದೀಗ ಪೂರ್ತಿ ಬಟ್ಟೆ ಬಿಚ್ಚಿಕೊಂಡು ನಿಂತಿರುವ ರಾಜಕಾರಣಿಗಳು ‘ಅವರು ಇರುವುದೂ ಹೀಗೆ, ನೀವು ಇರುವುದೂ ಹೀಗೆ, ನಾವು ಇರುವುದೂ ಹೀಗೇ’ - ಎಂಬ ಸಮಜಾಯಿಷಿಗಳ ಮೂಲಕ ಲಜ್ಜೆಗೆಟ್ಟಿರುವುದನ್ನೇ ವಿಜೃಂಭಿಸಿಕೊಳ್ಳಲು ಹೊರಟಿದ್ದಾರೆ.

ಶನಿವಾರ ಈಗಲ್ಟನ್‌ ರೆಸಾರ್ಟ್‌ನಲ್ಲಿ ಸುದ್ದಿಗೋಷ್ಠಿ ನಡೆಸಿದ ಕಾಂಗ್ರೆಸ್‌ ಸಂಸದ ಡಿ. ಕೆ. ಸುರೇಶ್‌, “ಚರ್ಚೆ ನಡೆಸಲು ಕಾಂಗ್ರೆಸ್‌ ಶಾಸಕರೆಲ್ಲಾ ಇಲ್ಲಿಗೆ ಬಂದಿದ್ದೇವೆ” ಎಂದು ಮಾತು ಆರಂಭಿಸಿ, “ಅಲ್ಲಿ ನೈತಿಕತೆ, ಇಲ್ಲಿ ನೈತಿಕತೆ, ಎಲ್ಲೂ ನೈತಿಕತೆ ಇಲ್ಲ” ಎಂದು ಮಾತು ಮುಗಿಸಿದ್ದಾರೆ. ಹೀಗೆ ರಾಜಕೀಯಕ್ಕೆ ನೈತಿಕತೆ ಎಂಬುದು ಎಲ್ಲೂ ಇಲ್ಲ ಎಂಬುದನ್ನು ಸುರೇಶ್‌ ನೇರವಾಗಿಯೇ ಒಪ್ಪಿಕೊಂಡಿದ್ದಾರೆ. ಆ ಮೂಲಕ ನಾವೂ ಮಾಡಲು ಹೊರಟಿರುವುದೂ ಲಜ್ಜೆಗೆಟ್ಟ ರಾಜಕಾರಣವನ್ನೇ ಅದಕ್ಕೆ ಬಿಜೆಪಿ, ಕಾಂಗ್ರೆಸ್ ಎಂಬ ಪಕ್ಷಬೇಧವಿಲ್ಲ ಎಂಬುದನ್ನು ಹೇಳಿದ್ದಾರೆ.

“ಅವರು ರೆಸಾರ್ಟ್‌ಗೆ ಹೋಗಿದ್ದಾರೆ. ಅದಕ್ಕೇ ನಾವೂ ರೆಸಾರ್ಟ್‌ಗೆ ಹೋಗ್ತೀವಿ” ಎಂದು ಶುಕ್ರವಾರದ ಸುದ್ದಿಗೋಷ್ಠಿಯಲ್ಲಿ ಸಿದ್ದರಾಮಯ್ಯ ಹೇಳಿದ್ದಂತಹ ಮಾತುಗಳ ಧ್ವನಿಯೇ ಡಿ. ಕೆ. ಸುರೇಶ್‌ ಶನಿವಾರ ಪುನರುಚ್ಛರಿಸಿದ ಮಾತುಗಳಲ್ಲೂ ಕಾಣುತ್ತಿದೆ. ಲಜ್ಜೆಗೆಟ್ಟ ರಾಜಕಾರಣ ಎಂದರೆ ಇದು, ನೈತಿಕತೆ ಎಂಬುದಕ್ಕೆ ಈ ರಾಜಕಾರಣದಲ್ಲಿ ಅರ್ಥವೇ ಇಲ್ಲ ಎಂಬುದನ್ನು ಒಪ್ಪಿಕೊಳ್ಳುವ ಮೂಲಕ ರಾಜ್ಯ ರಾಜಕಾರಣಿಗಳು ತಮ್ಮ ಮಾತುಗಳ ಮೂಲಕವೇ ಬೆತ್ತಲಾಗುತ್ತಿದ್ದಾರೆ.

ರಾಜ್ಯದಲ್ಲಿ ಸಮ್ಮಿಶ್ರ ಸರಕಾರ ರಚನೆಯಾದಾಗಿನಿಂದ ಇಂಥ ಲಜ್ಜೆಗೆಟ್ಟ ರಾಜಕಾರಣದ ಹಲವು ಮಜಲುಗಳನ್ನು ರಾಜ್ಯದ ಜನತೆ ನೋಡುತ್ತಲೇ ಬಂದಿದ್ದಾರೆ. ಬಹುಮತ ಇಲ್ಲದಿದ್ದರೂ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ ಬಿ. ಎಸ್‌. ಯಡಿಯೂರಪ್ಪ, ಜನರ ಅನುಕಂಪಕ್ಕಾಗಿ ವಿಷಕಂಠನಾಗಿ ಸಾರ್ವಜನಿಕವಾಗಿ ಕಣ್ಣೀರು ಸುರಿಸಿದ ಎಚ್‌.ಡಿ. ಕುಮಾರಸ್ವಾಮಿ, ರೆಸಾರ್ಟ್‌ ರಾಜಕಾರಣ ಈಗ ನಮಗೂ ಅನಿವಾರ್ಯ ಎನ್ನುತ್ತಿರುವ ಸಿದ್ದರಾಮಯ್ಯ ಎಲ್ಲರೂ ಈಗ ಸಾರ್ವಜನಿಕವಾಗಿ ಬೆತ್ತಲಾಗಿರುವವರೇ. ನಾಡಿನ ಜನರ ಮುಂದೆ ಖುದ್ದು ತಾವೇ ಬೆತ್ತಲಾಗಿರುವುದರಿಂದ ಈ ನಾಯಕರ ಬಳಿ ಇನ್ನು ಕಳೆದುಕೊಳ್ಳಲು ಬೇರೆ ಯಾವುದೂ ಉಳಿದಿಲ್ಲ.

ಈ ನಾಯಕರು ತಾವು ಮಾತ್ರ ಬೆತ್ತಲಾಗುತ್ತಿಲ್ಲ. ತಮ್ಮೊಂದಿಗಿರುವ ಎಲ್ಲರ ಲಾಡಿದಾರಗಳನ್ನೂ ಕಳಚಿ ರಾಜಕೀಯದಲ್ಲಿ ‘ಬೆತ್ತಲಾಗದೆ ಬಯಲು ದಕ್ಕದು’ ಎಂಬ ಹೊಸ ನೀತಿಪಾಠಗಳನ್ನು ಹೇಳಿಕೊಡುತ್ತಿದ್ದಾರೆ. ಪ್ರಾಮಾಣಿಕತೆ, ನೈತಿಕತೆ, ಪಾರದರ್ಶಕತೆ - ಇವುಗಳಿಗೆಲ್ಲಾ ರಾಜಕೀಯದಲ್ಲಿ ಯಾವುದೇ ಬೆಲೆ ಇಲ್ಲ ಎಂಬುದನ್ನು ಅಧಿಕೃತವಾಗಿ ಹೇಳಲು ಹೊರಟಿರುವ ರಾಜಕೀಯ ಮುಖಂಡರು ಈ ವಿಷಯಗಳಲ್ಲಿ ಪಕ್ಷಬೇಧ ಮರೆತಿದ್ದಾರೆ.

ತನ್ನ ಶಾಸಕರನ್ನು ‘ಉಳಿಸಿ’ಕೊಳ್ಳಲು ಕಾಂಗ್ರೆಸ್‌ ಕೂಡಾ ರೆಸಾರ್ಟ್‌ಗೆ ಬಸ್‌ ಹತ್ತಿದ್ದರಿಂದ ಸರಕಾರ ಉರುಳಿಸುವ ಪ್ರಯತ್ನಕ್ಕೆ ಬಿಜೆಪಿ ಅಲ್ಪ ವಿರಾಮ ಹಾಕಿದೆ. ಗುರುಗ್ರಾಮದ ಪಂಚತಾರಾ ಹೋಟೆಲ್‌ನಿಂದ ರಾಜ್ಯಕ್ಕೆ ಶಾಸಕರನ್ನು ಕರೆಸಿಕೊಂಡು ಬರ ಅಧ್ಯಯನಕ್ಕೆ ಕಳಿಸುವ ಮಾತನ್ನಾಡಿದ್ದಾರೆ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ. ತಾನು ರೆಸಾರ್ಟ್‌ಗೆ ಹೋಗುವಾಗ ಬಾರದ ಬರ ಹಾಗೂ ರಾಜ್ಯದ ಸಮಸ್ಯೆಗಳು, ಬಿಜೆಪಿಗೆ ಉಳಿದವರು ರೆಸಾರ್ಟ್‌ಗೆ ಹೋದಾಗ ನೆನಪಿಗೆ ಬರುತ್ತವೆ.

ತನ್ನ ಪಕ್ಷದ ಗುರುತಿನ ಮೇಲೆ ಜನರಿಂದ ಆರಿಸಿ ಬಂದಿರುವ ಶಾಸಕರನ್ನು ತನ್ನ ಹಿಡಿತದಲ್ಲಿಟ್ಟುಕೊಳ್ಳಲು ಸಾಧ್ಯವಿಲ್ಲದ ಸ್ಥಿತಿಗೆ ಎಲ್ಲಾ ರಾಜಕೀಯ ಪಕ್ಷಗಳೂ ಬಂದು ನಿಂತಿವೆ. ಹೀಗಾಗಿ ಪಕ್ಷ ರಾಜಕಾರಣ ಎಂಬುದಕ್ಕೆ ಸದ್ಯದ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಯಾವುದೇ ಬೆಲೆ ಇಲ್ಲ. ಅದು ಬಿಜೆಪಿ ಇರಲಿ, ಕಾಂಗ್ರೆಸ್ ಇರಲಿ, ಜೆಡಿಎಸ್‌ ಇರಲಿ - ಅಧಿಕಾರ ಬೇಕೆಂದರೆ ಎಲ್ಲವೂ ಒಂದೇ ಎಂಬುದನ್ನು ರಾಜಕಾರಣಿಗಳು ಈಗಾಗಲೇ ಸಾಬೀತು ಮಾಡಿದ್ದಾರೆ.

ನಾಲ್ಕು ಮಂದಿ ಅತೃಪ್ತ ಶಾಸಕರನ್ನು ಬಿಟ್ಟು ಉಳಿದ ಎಲ್ಲಾ ಕಾಂಗ್ರೆಸ್‌ ಶಾಸಕರು ಶುಕ್ರವಾರವೇ ಕಾಂಗ್ರೆಸ್ ತೆಕ್ಕೆಗೆ ಸೇರಿರುವುದರಿಂದ, ಇವರನ್ನು ನೆಚ್ಚಿಕೊಂಡು ಈಗಿರುವ ಸಮ್ಮಿಶ್ರ ಸರಕಾರವನ್ನು ಕೆಡವಿ ಹೊಸ ಸರಕಾರ ರಚಿಸುವುದು ಸಾಧ್ಯವಿಲ್ಲದ ಮಾತು ಎಂಬುದು ಬಿಜೆಪಿಗೂ ಅರಿವಾಗಿರುವಂತಿದೆ. ಹೀಗಾಗಿ ಬಿಜೆಪಿ ಸದ್ಯಕ್ಕೆ ತನ್ನ ರೆಸಾರ್ಟ್‌ ರಾಜಕಾರಣವನ್ನು ಕೈಬಿಟ್ಟಿದೆ. ಬರ ಅಧ್ಯಯನದ ನೆಪದಲ್ಲಿ ತನ್ನ ಶಾಸಕರನ್ನು ರಾಜ್ಯಕ್ಕೆ ಕರೆಸಿಕೊಳ್ಳುತ್ತಿರುವ ಬಿಜೆಪಿ ಲೋಕಸಭಾ ಚುನಾವಣೆಯ ಕಾರಣಕ್ಕೆ ಸರಕಾರ ಕೆಡವುವ ಪ್ರಯತ್ನವನ್ನು ತಾತ್ಕಾಲಿಕವಾಗಿ ಮುಂದೂಡಿದೆ.

ಇತ್ತ ಆಪರೇಷನ್‌ ಕಮಲದ ಭೀತಿಯಲ್ಲಿರುವ ಕಾಂಗ್ರೆಸ್‌ ತನ್ನ ಎಲ್ಲಾ 77 ಶಾಸಕರನ್ನು ಐಷಾರಾಮಿ ಬಸ್‌ಗೆ ತುಂಬಿಕೊಂಡು ಸಿಎಲ್‌ಪಿ ಸಭೆ ಮುಗಿಯುತ್ತಿದ್ದಂತೆ ಶುಕ್ರವಾರ ರಾತ್ರಿಯೇ ರೆಸಾರ್ಟ್‌ಗಳ ಕಡೆಗೆ ಪ್ರಯಾಣ ಬೆಳೆಸಿತ್ತು. ಸದ್ಯ ಬಿಡದಿಯ ಈಗಲ್ಟನ್‌ ರೆಸಾರ್ಟ್ ಹಾಗೂ ವಂಡರ್‌ಲಾ ರೆಸಾರ್ಟ್‌ಗಳಲ್ಲಿ ಕಾಂಗ್ರೆಸ್‌ ಶಾಸಕರು ಬೀಡು ಬಿಟ್ಟಿದ್ದಾರೆ. ಶನಿವಾರ ಸಂಜೆ 3 ಗಂಟೆಗೆ ಈಗಲ್ಟನ್‌ ರೆಸಾರ್ಟ್‌ನಲ್ಲಿ ಮತ್ತೆ ಸಭೆ ನಡೆಸಲು ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ ಮುಂದಾಗಿದ್ದಾರೆ. ಬಿಜೆಪಿಗೆ ಆಡಿದ ಮಾತಿನಂತೆ ನಡೆದುಕೊಳ್ಳಿ ಎಂದಿರುವ ಸಿದ್ದರಾಮಯ್ಯ ಯಡಿಯೂರಪ್ಪ ನಿರ್ಧಾರವನ್ನು ಸ್ವಾಗತಿಸುವುದಾಗಿ ಟ್ವೀಟ್ ಮಾಡಿದ್ದಾರೆ.

ಸಚಿವ ಸಂಪುಟ ವಿಸ್ತರಣೆಯಿಂದ ಆರಂಭವಾದ ಕಾಂಗ್ರೆಸ್‌ ಶಾಸಕರ ಭಿನ್ನಮತ ಇಲ್ಲಿಯವರೆಗೂ ಬಂದು ಸದ್ಯ ಈ ಅಧ್ಯಾಯಕ್ಕೆ ಅಲ್ಪ ವಿರಾಮ ಬೀಳುವ ಲಕ್ಷಣಗಳು ಕಾಣುತ್ತಿವೆ. ತಮಗೆ ನೀಡಿದ್ದ ಸಚಿವ ಸ್ಥಾನವನ್ನು ವಾಪಸ್‌ ಪಡೆದ ಕಾರಣಕ್ಕೆ ಕಾಂಗ್ರೆಸ್‌ ವಿರುದ್ಧ ಅಸಮಾಧಾನಗೊಂಡಿದ್ದ ರಮೇಶ್‌ ಜಾರಕಿಹೊಳಿ ತಮ್ಮ ಆಪ್ತ ಶಾಸಕರನ್ನು ಕಟ್ಟಿಕೊಂಡು ಸಮ್ಮಿಶ್ರ ಸರಕಾರ ಉರುಳಿಸುವ ಪ್ರಯತ್ನವನ್ನು ಮಾಡುತ್ತಲೇ ಬಂದಿದ್ದಾರೆ. ಆ ಮೂಲಕ ಈಗಿನ ಲಜ್ಜೆಗೆಟ್ಟ ಅಧ್ಯಾಯಕ್ಕೆ ನಾಂದಿ ಹಾಡಿದ್ದು ರಮೇಶ್‌ ಜಾರಕಿಹೊಳಿ. ಆದರೆ, ಈ ಸರಕಾರ ಬೀಳಿಸುವ ಹೊಸ ಪ್ರಹಸನಕ್ಕೆ ಬಿಜೆಪಿಯ ರಂಗು ಸೇರಿಕೊಂಡಿದ್ದು ಕಳೆದ ಭಾನುವಾರದಿಂದೀಚೆಗೆ.

ದೆಹಲಿಯಲ್ಲಿ ನಡೆದ ಎರಡು ದಿನಗಳ ಬಿಜೆಪಿ ರಾಷ್ಟ್ರೀಯ ಕಾರ್ಯಕಾರಿಣಿ ಸಭೆಯ ನಂತರದ ದಿನವಾದ ಭಾನುವಾರ ಕರ್ನಾಟಕ ಬಿಜೆಪಿ ಮುಖಂಡರೊಂದಿಗೆ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಕ್ಲೋಸ್‌ ಡೋರ್‌ ಮೀಟಿಂಗ್‌ ನಿಗದಿಯಾಗಿತ್ತು. ಆ ಸಭೆಯಲ್ಲಿ ಅಂದುಕೊಂಡಂತೆ ಆಗಿದ್ದರೆ ಸಮ್ಮಿಶ್ರ ಸರಕಾರ ಉರುಳಿಸಿ ಪಕ್ಷೇತರ ಹಾಗೂ ಅತೃಪ್ತ ಶಾಸಕರ ಬೆಂಬಲದಿಂದ ಸರಕಾರ ರಚಿಸುವ ಕನಸನ್ನು ಬಿಜೆಪಿ ಕಂಡಿತ್ತು.

ಆದರೆ, ಅಮಿತ್‌ ಶಾ ಗೈರು ಹಾಜರಿಯಿಂದ ಕರ್ನಾಟಕ ಬಿಜೆಪಿ ಮುಖಂಡರ ಲೆಕ್ಕಾಚಾರಗಳೆಲ್ಲವೂ ಉಲ್ಟಾ ಹೊಡೆದವು. ನಾಲ್ಕೈದು ಶಾಸಕರನ್ನು ನೆಚ್ಚಿಕೊಂಡು ಸರಕಾರ ರಚಿಸಲು ಸಾಧ್ಯವಿಲ್ಲ ಎಂಬ ಸ್ಪಷ್ಟ ಸಂದೇಶ ಕೊಟ್ಟ ಬಿಜೆಪಿ ದೆಹಲಿ ನಾಯಕರು ಲೋಕಸಭಾ ಚುನಾವಣೆ ಕಡೆಗೆ ಗಮನ ಕೊಡುವಂತೆ ಹೇಳಿಕಳಿಸಿದ್ದಾರೆ ಎನ್ನಲಾಗಿದೆ. ಹೀಗಾಗಿಯೇ ಸಮ್ಮಿಶ್ರ ಸರಕಾರದ ಗೋಡೆಯ ಇಟ್ಟಿಗೆ ಕೀಳಲು ಮುಂದಾಗಿದ್ದ ಬಿಜೆಪಿ ಸದ್ಯಕ್ಕೆ ಈ ಪ್ರಯತ್ನದಿಂದ ಹಿಂದೆ ಸರಿದಿದೆ.

ಸಮ್ಮಿಶ್ರ ಸರಕಾರ ಬೀಳುತ್ತದೋ ಇಲ್ಲವೋ; ಆದರೆ, ಬಿಜೆಪಿ ಇರಲಿ, ಕಾಂಗ್ರೆಸ್ ಇರಲಿ, ಜೆಡಿಎಸ್‌ ಇರಲಿ - ಅಧಿಕಾರಕ್ಕೆ ಬಂದು ಕುಳಿತ ಮೇಲೆ ಎಲ್ಲರೂ ಒಂದೇ ಎಂಬುದನ್ನು ಸದ್ಯದ ರಾಜಕೀಯ ವಿಷಮಸ್ಥಿತಿ ಪರದೆ ಎತ್ತಿ ತೋರಿಸಿದಂತಿದೆ. ನೈತಿಕತೆಯ ಯಾವ ಲೇಪವೂ ಇಲ್ಲದಂತೆ ವರ್ತಿಸುತ್ತಿರುವ ರಾಜಕಾರಣಿಗಳು ತಾವು ಜನರ ಸೇವೆಗಾಗಿ ಆರಿಸಿ ಬಂದವರು ಎಂಬುದನ್ನು ಸಂಪೂರ್ಣವಾಗಿ ಮರೆತಿದ್ದಾರೆ. ಇಂಥವರನ್ನು ಆರಿಸಿ ಕಳಿಸಿದ್ದೇಕೆ ಎಂಬುದನ್ನು ಪ್ರಜಾಪ್ರಭುತ್ವ ವ್ಯವಸ್ಥೆಯ ಶ್ರೀಸಾಮಾನ್ಯ ಪ್ರಭುಗಳೂ ಮರೆತು, ‘ರಾಮ ರಾಜ್ಯ ಆಳಿದರೂ ರಾಗಿ ಬೀಸೋದು ತಪ್ಪಲ್ಲ’ ಎಂದು ತಮ್ಮ ಪಾಡಿಗೆ ತಾವಿದ್ದಾರೆ.