samachara
www.samachara.com
ಹೆಗಡೆಗೆ ಪಕ್ಷದೊಳಗಿನ ‘ವಿಘ್ನ ಸಂತೋಷಿ’ಗಳ ಕಾಟ; ವೇದಿಕೆ ಹತ್ತಿಸಿ, ಇಳಿಸಿದವರು ಯಾರು?
COVER STORY

ಹೆಗಡೆಗೆ ಪಕ್ಷದೊಳಗಿನ ‘ವಿಘ್ನ ಸಂತೋಷಿ’ಗಳ ಕಾಟ; ವೇದಿಕೆ ಹತ್ತಿಸಿ, ಇಳಿಸಿದವರು ಯಾರು?

ದೆಹಲಿಯಲ್ಲಿ ಭಾನುವಾರ ನಡೆದ ಬಿಜೆಪಿ ರಾಜ್ಯ ಮುಖಂಡರ ಕ್ಲೋಸ್‌ ಡೋರ್‌ ಮೀಟಿಂಗ್‌ನಲ್ಲಿ ಅನಂತ ಕುಮಾರ್‌ ಹೆಗಡೆ ಅವರನ್ನು ವೇದಿಕೆಯಿಂದ ಕೆಳಗಿಳಿಸಿದ್ದು, ಯಡಿಯೂರಪ್ಪ ಅವರೋ ಅಥವಾ ಅವರ ಬೆಂಬಲಿಗರೋ?

Team Samachara

ದೆಹಲಿಯಲ್ಲಿ ಎರಡು ದಿನಗಳ ಕಾಲ ನಡೆದ ಬಿಜೆಪಿ ರಾಷ್ಟ್ರೀಯ ಕಾರ್ಯಕಾರಿಣಿ ಸಭೆಯ ನಂತರ ನಡೆದ ಕರ್ನಾಟಕ ಬಿಜೆಪಿ ಮುಖಂಡರ ‘ಖಾಸಗಿ ಸಭೆ’ಯಲ್ಲಿ ಕೇಂದ್ರ ಸಚಿವ ಅನಂತ ಕುಮಾರ್‌ ಹೆಗಡೆ ಅವರನ್ನು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ ವೇದಿಕೆಯಿಂದ ಕೆಳಗಿಳಿಸಿದ್ದಾರೆ ಎಂಬುದು ಸುದ್ದಿಯಾಗಿತ್ತು. ಈ ಘಟನೆ ಅನಂತ ಕುಮಾರ್‌ ಹೆಗಡೆ ಅವರನ್ನು ಮುಜುಗರಕ್ಕೆ ಈಡು ಮಾಡಿತ್ತು ಎಂಬ ಸುದ್ದಿಗಳ ಬೆನ್ನಲ್ಲೇ ಗುರುವಾರ ಈ ಬಗ್ಗೆ ದೀರ್ಘ ಸ್ಪಷ್ಟನೆ ಬರೆದುಕೊಂಡಿದ್ದಾರೆ ಹೆಗಡೆ. ಅಂದು ನಡೆದ ವಾಸ್ತವವನ್ನು ತಿರುಚಿ ಸುಳ್ಳು ಸುದ್ದಿ ಹಬ್ಬಿಸಲಾಗಿದೆ ಎಂದು ‘ಕೆಂಪರಿವೆ’ಯ ‘ಎಡಚ’ರ ವಿರುದ್ಧ ಸಿಟ್ಟು ಕಾರಿಕೊಂಡಿದ್ದಾರೆ. ಜತೆಗೆ ಆ ಖಾಸಗಿ ಸಭೆಯ ಮಾಹಿತಿಯನ್ನು ತಿರುಚಿ ಮಾಧ್ಯಮಗಳಿಗೆ ಹರಿಬಿಟ್ಟ ಪಕ್ಷದೊಳಗಿನ ‘ವಿಘ್ನ-ಸಂತೋಷಿ’ಗಳ ಬಗ್ಗೆಯೂ ಸುಳಿವು ನೀಡಿದ್ದಾರೆ!

ತಮಗಾಗದ ಪತ್ರಕರ್ತರು ತಾನು ಕುಂತರೂ, ನಿಂತರೂ, ಮಾತನಾಡಿದರೂ, ಮಾತನಾಡದಿದ್ದರೂ ಅದಕ್ಕೆ ಅನೇಕ ಅರ್ಥ-ಅಪಾರ್ಥ ಕಟ್ಟಿ ಸುದ್ದಿ ಮಾಡುತ್ತಾರೆ ಎಂದು ಜರಿದಿರುವ ಅನಂತ ಕುಮಾರ್‌ ಹೆಗಡೆ, ಬಿಜೆಪಿಯೊಳಗೂ ಎಲ್ಲವೂ ಸರಿಯಿಲ್ಲ ಎಂಬುದನ್ನು ತಮ್ಮ ಮಾತುಗಳಲ್ಲೇ ಒಪ್ಪಿಕೊಂಡಿದ್ದಾರೆ. ಹೆಗಡೆ ‘ವಿಘ್ನ- ಸಂತೋಷಿ’ಗಳು ಎಂದು ಕರೆದಿರುವುದು ಬಿಜೆಪಿಯೊಳಗಿನವರ ಬಗ್ಗೆಯೇ. ತಮಗಾಗದವರು ಪಕ್ಷದ ಹೊರಗಷ್ಟೇ ಅಲ್ಲ, ಒಳಗೂ ಇದ್ದಾರೆ ಎಂಬುದನ್ನು ಹೆಗಡೆ ಮಾತುಗಳೇ ಸ್ಪಷ್ಟಪಡಿಸುತ್ತವೆ.

‘ಕೆಂಪಂಗಿ’ಯವರ ಬಗ್ಗೆ ಇನ್ನಿಲ್ಲದಂತೆ ಸಿಡಿಮಿಡಿಗೊಂಡಿರುವ ಹೆಗಡೆ ತಮ್ಮ ಪಕ್ಷದೊಳಗಿನ ‘ವಿಘ್ನ- ಸಂತೋಷಿ’ಗಳ ಬಗ್ಗೆ ಎಚ್ಚರಿಕೆಯನ್ನಷ್ಟೇ ನೀಡಿದ್ದಾರೆ. ಈ ವಿಘ್ನ ಸಂತೋಷಿಗಳು ಯಾರು, ಯಾಕೆ ಇವರಿಗೆ ಅನಂತ ಕುಮಾರ್‌ ಹೆಗಡೆ ಹಾಗೂ ಯಡಿಯೂರಪ್ಪ ಅವರನ್ನು ಕಂಡರೆ ಆಗುವುದಿಲ್ಲ ಎಂಬ ಬಗ್ಗೆ ಹೆಗಡೆ ಏನನ್ನೂ ಹೇಳಿಲ್ಲ. ಆದರೆ, ಇದು ಯಡಿಯೂರಪ್ಪ ಪರವಾಗಿರುವವರು ನಡೆಸಿರುವ ಕೃತ್ಯ ಎಂಬ ಅನುಮಾನಗಳು ಕಮಲ ಪಾಳಯದೊಳಗಿವೆ. ಆದರೆ, ಯಾರು ನಡೆಸಿದ್ದು, ಯಾಕೆ ನಡೆಸಿದ್ದು ಎಂಬುದಕ್ಕೆ ಉತ್ತರಗಳು ಸ್ಪಷ್ಟವಿಲ್ಲ.

ದೆಹಲಿಯಲ್ಲಿ ನಡೆದ ಸಭೆಯಲ್ಲಿ ಅನಂತ ಕುಮಾರ್‌ ಹೆಗಡೆ ವೇದಿಕೆ ಮೇಲಿಂದ ತಾವೇ ಇಳಿದು ಬಂದರು ಎಂಬುದನ್ನು ಅಂದಿನ ಸಭೆಯಲ್ಲಿದ್ದ ಬಿಜೆಪಿ ಶಾಸಕ ಸಿ.ಎಸ್‌. ನಿರಂಜನ್‌ ಕುಮಾರ್‌ ಒಪ್ಪಿಕೊಳ್ಳುತ್ತಾರೆ. “ಗೋವಿಂದ ಕಾರಜೋಳ ಅವರು ವೇದಿಕೆಯ ಕಡೆಗೆ ಬರುತ್ತಿದ್ದಂತೆ ವೇದಿಕೆಯಲ್ಲಿ ಆಸನಗಳು ಖಾಲಿ ಇಲ್ಲದ್ದನ್ನು ಗಮನಿಸಿದ ಅನಂತ ಕುಮಾರ್‌ ಹೆಗಡೆ ತಾವೇ ಎದ್ದು ಕಾರಜೋಳ ಅವರಿಗೆ ಆಸನ ಬಿಟ್ಟುಕೊಟ್ಟು ಕೆಳಗೆ ಬಂದು ಕುಳಿತರು. ಅವರಿಗೆ ಆಸನ ಬಿಟ್ಟುಕೊಡುವಂತೆ ಯಾರೂ ಸೂಚನೆ ನೀಡಲಿಲ್ಲ. ಯಾರು ಅವರ ವಿರುದ್ಧ ಅಪಪ್ರಚಾರ ನಡೆಸುತ್ತಿದ್ದಾರೋ, ಯಾಕೆ ನಡೆಸುತ್ತಿದ್ದಾರೋ ನನಗೆ ಗೊತ್ತಿಲ್ಲ” ಎನ್ನುತ್ತಾರೆ ನಿರಂಜನ್‌ ಕುಮಾರ್‌.

ಕರ್ನಾಟಕದಲ್ಲಿ ಸಮ್ಮಿಶ್ರ ಸರಕಾರ ಕೆಡವಿ ಬಿಜೆಪಿ ಅಧಿಕಾರಕ್ಕೆ ಬರಲು ಪ್ರಯತ್ನಿಸುತ್ತಿದೆ ಎಂಬ ಹೊತ್ತಿನಲ್ಲೇ ದೆಹಲಿಯಲ್ಲಿ ಬಿಜೆಪಿ ‘ಚಾಣಕ್ಯ’ನ ನೇತೃತ್ವದಲ್ಲಿ ಆಯೋಜಿಸಿದ್ದ ಪಕ್ಷದ ಆಂತರಿಕ ಕ್ಲೋಸ್ ಡೋರ್‌ ಸಭೆಯಲ್ಲಿ ಹೆಗಡೆಗೆ ಮುಖಭಂಗವಾಗುವಂತೆ ಯಡಿಯೂರಪ್ಪ ನಡೆದುಕೊಂಡಿದ್ದಾರೆ ಎಂಬ ಸುದ್ದಿಯಂತೂ ಹಬ್ಬಿ, ಅದಕ್ಕೆ ಒಂದು ಕಡೆಯಿಂದ ತಡವಾಗಿಯಾದರೂ ಸ್ಪಷ್ಟನೆ ಹೊರಬಂದಿದೆ. ಆದರೆ, ಅದರ ಜತೆಗೆ ಪಕ್ಷದ ಆಂತರಿಕ ಕಿಡಿಗೇಡಿಗಳ ಬಗ್ಗೆ ಹೆಗಡೆ ನೀಡಿರುವ ಎಚ್ಚರಿಕೆಯನ್ನೂ ಪಕ್ಷ ಲಘುವಾಗಿ ತೆಗೆದುಹಾಕುವಂತಿಲ್ಲ.

ಕೇಂದ್ರದಲ್ಲಿ ಮೋದಿ ನೇತೃತ್ವದಲ್ಲಿ ಸರಕಾರ ಅಸ್ಥಿತ್ವಕ್ಕೆ ಬಂದ ಮೇಲೆ ಅನಂತ ಕುಮಾರ್‌ ಹೆಗಡೆ, ಮೋದಿ ಓಲೈಕೆಗಾಗಿ ‘ಹರಿತ’ವಾದ ಮಾತುಗಳನ್ನೇ ಆಡುತ್ತಾ ಬಂದವರು. ಕರ್ನಾಟಕ ಬಿಜೆಪಿಯ ‘ಫೈರ್‌ ಬ್ರಾಂಡ್‌’ ಎಂದು ಕರೆಸಿಕೊಂಡ ಹೆಗಡೆ ಒಂದು ಹಂತದಲ್ಲಿ ಬಿಜೆಪಿ ಪಕ್ಷಕ್ಕೇ ಮುಜುಗರವಾಗುವಂಥ ಹೇಳಿಕೆಗಳನ್ನು ಕೊಟ್ಟು, ಅದಕ್ಕಾಗಿ ಸಾರ್ವಜನಿಕವಾಗಿ ಕ್ಷಮೆ ಕೇಳಿ ಆ ನಂತರ ತಮ್ಮ ‘ಹರಿತ’ವಾದ ಹೇಳಿಕೆಗಳಿಂದ ಕೊಂಚ ದೂರವೇ ಇದ್ದವರು. ಬಿಜೆಪಿಯಲ್ಲಿ ನೇರವಾಗಿ ಮೋದಿ ಕೃಪಾಹಸ್ತ ತಮ್ಮ ಮೇಲಿದೆ ಎಂಬಂತೆ ನಡೆದುಕೊಂಡ ರಾಜ್ಯ ನಾಯಕರ ಪೈಕಿ ಅನಂತ ಕುಮಾರ್ ಹೆಗಡೆ, ನವೀನ್‌ ಕುಮಾರ್‌ ಕಟೀಲು ಪ್ರಮುಖರು. ಒಂದು ಕಾಲದಲ್ಲಿ ಬಾಯಿಗೆ ಬಂದಂತೆ ಮಾತನಾಡುತ್ತಿದ್ದ ಈ ನಾಯಕರು ಬಿಜೆಪಿಗೆ ರಾಜ್ಯ ಘಟಕವೊಂದಿದೆ, ಅದಕ್ಕೆ ಬಿ.ಎಸ್‌. ಯಡಿಯೂರಪ್ಪ ಎಂಬ ಅಧ್ಯಕ್ಷರೊಬ್ಬರಿದ್ದಾರೆ ಎಂಬುದನ್ನೇ ಮರೆತವರಂತೆ ನಡೆದುಕೊಂಡವರು.

ಸಮಾರಂಭವೊಂದರಲ್ಲಿ ಯಡಿಯೂರಪ್ಪ ಜತೆಗೆ ಅನಂತ ಕುಮಾರ್‌ ಹೆಗಡೆ. 
ಸಮಾರಂಭವೊಂದರಲ್ಲಿ ಯಡಿಯೂರಪ್ಪ ಜತೆಗೆ ಅನಂತ ಕುಮಾರ್‌ ಹೆಗಡೆ. 
- ಸಾಂದರ್ಭಿಕ ಚಿತ್ರ

ದೆಹಲಿಯಲ್ಲಿ ನಡೆದ ಸಭೆಯಲ್ಲಿ ಯಡಿಯೂರಪ್ಪ, ಅನಂತ ಕುಮಾರ್ ಹೆಗಡೆ ಅವರನ್ನು ವೇದಿಕೆಯಿಂದ ಕೆಳಗಿಳಿಸಿದರು ಎಂಬ ಸುದ್ದಿ ಸಹಜವಾಗಿಯೇ ಯಡಿಯೂರಪ್ಪ ಮತ್ತೆ ಖಡಕ್‌ ಆಗುತ್ತಿದ್ದಾರೆ ಎಂಬಂಥ ಸಂದೇಶವನ್ನಂತೂ ಕೊಟ್ಟಿತ್ತು. ಇದು ಸುಳ್ಳು ಸುದ್ದಿಯೇ ಆಗಿದ್ದರೂ ಒಂದುಮಟ್ಟಕ್ಕೆ ಯಡಿಯೂರಪ್ಪ ವರ್ಚಸ್ಸಿನ ವಿಷಯಕ್ಕೆ ಬಂದರೆ ಇದು ಪ್ಲಸ್‌ ಪಾಯಿಂಟ್‌. ಹೀಗಾಗಿಯೇ ಈ ಸುದ್ದಿ ಹರಿದಾಡಿ ಹೆಚ್ಚೂ ಕಡಿಮೆ ಒಂದು ವಾರ ಸಮೀಪಿಸುತ್ತಿರುವ ಹೊತ್ತಿನಲ್ಲಿ ಅನಂತ ಕುಮಾರ್‌ ಹೆಗಡೆ ಅವರೇ, “ನನ್ನನ್ನು ವೇದಿಕೆಯಿಂದ ಕೆಳಗೆ ಇಳಿಸಲಿಲ್ಲ, ನಾನೇ ಇಳಿದೆ” ಎಂಬ ಸ್ಪಷ್ಟನೆಯ ದೀರ್ಘ ಬರಹ ಬರೆದುಕೊಂಡಿದ್ದಾರೆಯೇ ಹೊರತು, “ನಾನು ಹೆಗಡೆ ಅವರನ್ನು ವೇದಿಕೆಯಿಂದ ಕೆಳಗಿಳಿಸಲಿಲ್ಲ” ಎಂಬ ಸ್ಪಷ್ಟನೆಯನ್ನು ಯಡಿಯೂರಪ್ಪ ಅವರೇನೂ ಕೊಟ್ಟಿಲ್ಲ!

ರಾಜ್ಯ ಬಿಜೆಪಿಯಲ್ಲಿ ಎಲ್ಲವೂ ಸರಿಯಿಲ್ಲ ಎಂಬುದಕ್ಕೆ ಹೆಗಡೆ ವೇದಿಕೆಯಿಂದಿಳಿದ ಘಟನೆ ಹೊರಗೆ ಪ್ರಸ್ತುತವಾದ ರೀತಿಯೇ ಒಂದು ತಾಜಾ ಉದಾಹರಣೆ. ಒಂದು ಕಡೆಗೆ ಆಪರೇಷನ್‌ ಕಮಲದ ರಿಹರ್ಸಲ್‌ ನಡೆಸಿ, ಅದು ಪ್ರದರ್ಶನಗೊಳ್ಳುವ ದಿನಾಂಕದ ಯಾವ ಮುನ್ಸೂಚನೆಯೂ ಇಲ್ಲದಂತಿರುವ ಬಿಜೆಪಿಯಲ್ಲಿ ಹೆಗಡೆ ಸ್ಪಷ್ಟನೆಯ ಬರಹ ಒಂದಷ್ಟು ಸದ್ದು ಮಾಡುತ್ತಿದೆ. ಪಕ್ಷದೊಳಗಿನ ‘ಮಾತನಾಡುವ ಶೂರ’ರ ವಿಚಾರದಲ್ಲಿ ಯಡಿಯೂರಪ್ಪ ಖಡಕ್‌ ಆಗಿ ನಡೆದುಕೊಳ್ಳುತ್ತಿದ್ದಾರೆ ಎಂಬ ಸಂದೇಶವನ್ನಂತೂ ಈ ಘಟನೆ ರವಾನಿಸಿದೆ. ಆದರೆ, ಬಿಜೆಪಿಯೊಳಗಿನ ಈ ವಿಘ್ನ ಸಂತೋಷಿಗಳ ಬಗ್ಗೆ ಅನಂತ ಕುಮಾರ್‌ ಹೆಗಡೆ ಸಿಟ್ಟಾಗಿರುವ ಪರಿಯನ್ನು ನೋಡಿದರೆ ಹೆಗಡೆಯಂತೂ ಇದನ್ನು ಇಲ್ಲಿಗೇ ಬಿಡುವಂತೆ ಕಾಣುವುದಿಲ್ಲ.

ರಾಜ್ಯದಲ್ಲಿ ಸಮ್ಮಿಶ್ರ ಸರಕಾರ ಕೆಡವಿ ಬಿಜೆಪಿಯನ್ನು ಅಧಿಕಾರಕ್ಕೆ ತರಬೇಕೆಂಬ ‘ಮಹತ್ವಾಕಾಂಕ್ಷಿ’ ಪ್ರಯತ್ನಗಳು ಗಂಭೀರವಾಗಿ ನಡೆಯುತ್ತಿವೆ. ಲೋಕಸಭಾ ಚುನಾವಣೆಯೂ ಸಮೀಪಿಸುತ್ತಿರುವುದರಿಂದ ಬಿಜೆಪಿ ಕರ್ನಾಟಕದಲ್ಲಿ ಕನಿಷ್ಠ 20 ಸ್ಥಾನಗಳನ್ನು ಗೆಲ್ಲಲೇಬೇಕೆಂಬ ಉತ್ಸಾಹದಲ್ಲಿದೆ. ಇದಕ್ಕೆ ಪೂರಕವಾಗಿ ಕಳೆದ ಭಾನುವಾರ ನಡೆದ ಕ್ಲೋಸ್‌ ಡೋರ್‌ ಮೀಟಿಂಗ್‌ನಲ್ಲಿ ಅಮಿತ್‌ ಶಾ ಜತೆಗೆ ರಾಜ್ಯ ಬಿಜೆಪಿ ಮುಖಂಡರ ಮಾತುಕತೆ ನಡೆಯಬೇಕಿತ್ತು. ಆದರೆ, ಅನಾರೋಗ್ಯದ ಕಾರಣಕ್ಕೆ ಅಮಿತ್‌ ಶಾ ಪೂರ್ವನಿಗದಿತ ಸಭೆಗಳಿಗೆ ಬರಲಾಗಲಿಲ್ಲ ಎನ್ನಲಾಗಿದೆ. ಆಪರೇಷನ್‌ ಕಮಲದ ಮುಂದೂಡಿಕೆಗೂ ಅಮಿತ್‌ ಶಾ ಗೈರಾಗಿದ್ದೇ ಕಾರಣ ಎಂಬ ಮಾತುಗಳೂ ದಟ್ಟವಾಗಿವೆ.

ಪಕ್ಷದೊಳಗಿನ ಈ ಬೆಳವಣಿಗೆಗಳ ಬಗ್ಗೆ ‘ಸಮಾಚಾರ’ದೊಂದಿಗೆ ಮಾತನಾಡಿದ ಬಿಜೆಪಿ ಮುಖಂಡ ಎಂ.ಬಿ. ಭಾನುಪ್ರಕಾಶ್‌, “ನಮ್ಮದೂ ಮನುಷ್ಯರ ಪಕ್ಷ. ನಮ್ಮದು ದೇವರ ಪಕ್ಷವಲ್ಲ. ಮನುಷ್ಯರಿದ್ದ ಕಡೆ ಕಿಡಿಗೇಡಿತನಗಳು ಸಹಜ. ಅಂತಹ ಯಾರೋ ಕಿಡಿಗೇಡಿಗಳು ಈ ಸುಳ್ಳು ಸುದ್ದಿ ಹಬ್ಬಿಸಿರಬಹುದು. ಅದನ್ನು ಪಕ್ಷದೊಳಗೆ ಯಾರೂ ಗಂಭೀರವಾಗಿ ತೆಗೆದುಕೊಳ್ಳುವುದಿಲ್ಲ. ಅದನ್ನು ಗಂಭೀರವಾಗಿ ತೆಗೆದುಕೊಳ್ಳಬೇಕಾದ ಅಗತ್ಯವೂ ಇಲ್ಲ” ಎನ್ನುತ್ತಾರೆ.

ಆದರೆ, ಯಡಿಯೂರಪ್ಪ ಪರವಾಗಿರುವವರು ಹೆಗಡೆ, ಕಟೀಲು ಅವರಿಗೆ ಮುಖಭಂಗ ಮಾಡಲು ಈ ಸುದ್ದಿಗಳನ್ನು ಹಬ್ಬಿಸಿರಬಹುದು ಎಂಬ ಬಗ್ಗೆ ಪಕ್ಷದೊಳಗೇ ಅನುಮಾನಗಳಿರುವುದೂ ವಾಸ್ತವ. ಇದನ್ನೇ ಹೆಗಡೆ ಹೇಳಿರುವ ವಿಘ್ನ ಸಂತೋಷಿಗಳು ಎಂಬ ಉಲ್ಲೇಖ ಸ್ಪಷ್ಟವಾಗಿ ಹೇಳುತ್ತಿದೆ. ಸದ್ಯ ನಾಲಿಗೆಯ ಹರಿತ ಕಳೆದುಕೊಂಡು ಮೊಂಡಾಗಿರುವ ಬಿಜೆಪಿ ನಾಯಕರನ್ನು ಸೈಡ್‌ಲೈನ್‌ ಮಾಡಲು ಈ ವಿಘ್ನ ಸಂತೋಷಿಗಳಿಗೆ ಹೆಗಡೆ ವೇದಿಕೆಯಿಂದ ಕೆಳಗಿಳಿದ ಘಟನೆಗಿಂತ ಉತ್ತಮ ಸಂದರ್ಭ ಸಿಕ್ಕಿರಲಾರದು.

ದೆಹಲಿಯಲ್ಲಿ ಕರ್ನಾಟಕದ ಬಿಜೆಪಿ ನಾಯಕರ ಕ್ಲೋಸ್‌ ಡೋರ್‌ ಮೀಟಿಂಗ್‌ನ ಅಘೋಷಿತ ಅಜೆಂಡಾಗಳ ಪೈಕಿ ರಾಜ್ಯ ನಾಯಕತ್ವ ಬಲಪಡಿಸುವುದೂ ಒಂದಾಗಿತ್ತು. ಲೋಕಸಭಾ ಚುನಾವಣೆಯ ಹೊತ್ತಿಗೆ ಯಡಿಯೂರಪ್ಪ ವರ್ಚಸ್ಸು ಹೆಚ್ಚಿಸಲು ಪಕ್ಷದ ರಾಷ್ಟ್ರೀಯ ನಾಯಕರೂ ತಲೆಕೆಡಿಸಿಕೊಂಡಿದ್ದರು. ಇದೇ ಹೊತ್ತಿನಲ್ಲಿ ಯಡಿಯೂರಪ್ಪ ಹೆಗಡೆ ಅವರನ್ನು ವೇದಿಕೆಯಿಂದ ಕೆಳಗಿಳಿಸಿದರು ಎಂಬ ಸುದ್ದಿ ಒಂದು ವೇಳೆ ಸುಳ್ಳು ಸುದ್ದಿಯೇ ಆಗಿದ್ದರೂ ಬಿಜೆಪಿ ರಾಜ್ಯ ನಾಯಕತ್ವ ‘ಬಲಪಡಿಸುವ’ ನಿಟ್ಟಿನಲ್ಲಿ ಇದೂ ಸಕಾರಾತ್ಮಕ ಬೆಳವಣಿಗೆಯೇ. ಇಷ್ಟೆಲ್ಲಾ ನಡೆದ ಮೇಲೆ ವೇದಿಕೆಯಿಂದ ಕೆಳಗಿಳಿದು ನಾನೇ ತಪ್ಪು ಮಾಡಿದೆನೇನೋ ಎಂದು ಹೆಗಡೆ ಅವರಿಗೆ ಅನಿಸುತ್ತಿರಲೂಬಹುದು!

(ಈ ಬೆಳವಣಿಗೆಗಳ ಪ್ರತಿಕ್ರಿಯೆಗಾಗಿ ಅನಂತ ಕುಮಾರ್‌ ಹೆಗಡೆ ಅವರನ್ನು ದೂರವಾಣಿ ಮೂಲಕ ಸಂಪರ್ಕಿಸಲು ಪ್ರಯತ್ನಿಸಲಾಯಿತು. ಆದರೆ, ಸಂಪರ್ಕ ಸಾಧ್ಯವಾಗಲಿಲ್ಲ. ಇಮೇಲ್‌ ಮೂಲಕವೂ ಅವರ ಪ್ರತಿಕ್ರಿಯೆ ಕೇಳಲಾಗಿದ್ದು, ಉತ್ತರ ಬಂದರೆ ಅಪ್‌ಡೇಟ್ ಮಾಡಲಾಗುವುದು.)