‘Ease of doing business’ ಎಂಬ ಅಣಕ: 14 ವರ್ಷಗಳಲ್ಲೇ ಪಾತಾಳ ಕಂಡ ಉದ್ಯಮ ಹೂಡಿಕೆ
COVER STORY

‘Ease of doing business’ ಎಂಬ ಅಣಕ: 14 ವರ್ಷಗಳಲ್ಲೇ ಪಾತಾಳ ಕಂಡ ಉದ್ಯಮ ಹೂಡಿಕೆ

2014ರಲ್ಲಿ ಅಧಿಕಾರಕ್ಕೆ ಬಂದ ಪ್ರಧಾನಿ ನರೇಂದ್ರ ಮೋದಿ ಸರಕಾರಿ ನೀತಿಗಳಲ್ಲಿದ್ದ ಅಡೆತಡೆಗಳ ಯುಗವನ್ನು ಅಂತ್ಯಗೊಳಿಸುವುದಾಗಿ ಹೇಳಿದ್ದರು; ಹೂಡಿಕೆ ಚಕ್ರವನ್ನು ಪುನಶ್ಚೇತನಗೊಳಿಸುವುದಾಗಿ ಭರವಸೆ ನೀಡಿದ್ದರು. ಆದರೆ...

‘ಭಾರತದಲ್ಲಿ ಉದ್ಯಮ ಸ್ಥಾಪನೆ ಸುಲಭವಾಗಿದೆ. ಇದಕ್ಕೆ ‘ಈಸ್‌ ಆಫ್‌ ಡೂಯಿಂಗ್ ಬಿಸಿನೆಸ್‌’ ಶ್ರೇಯಾಂಕವೇ ಕನ್ನಡಿ. ಉದ್ಯಮದಲ್ಲಿ ಹೂಡಿಕೆ ಹೆಚ್ಚಾಗಿದೆ. ಮೇಕ್‌ ಇನ್‌ ಇಂಡಿಯಾ ಯಶಸ್ವಿಯಾಗಿದೆ’ ಎಂದು ಬಿಂಬಿಸಿಕೊಳ್ಳುತ್ತಾ ಬಂದವರು ಪ್ರಧಾನಿ ನರೇಂದ್ರ ಮೋದಿ.

ಆದರೆ ಇದೆಲ್ಲಾ ಅಪ್ಪಟ ಸುಳ್ಳು ಎನ್ನುತ್ತಿದೆ ಅವರದೇ ಸರಕಾರದ ಇಲಾಖೆಯ ವರದಿ. ಭಾರತದ ಉದ್ಯಮ ಕ್ಷೇತ್ರದಲ್ಲಿನ ಹೂಡಿಕೆಯತ್ತ ಬೆಳಕು ಬೀರಿರುವ ‘ಭಾರತೀಯ ಆರ್ಥಿಕತೆ ಮೇಲ್ವಿಚಾರಣಾ ಕೇಂದ್ರ (ಸಿಎಂಐಇ)’ ಡಿಸೆಂಬರ್‌ಗೆ ಅಂತ್ಯವಾದ ತ್ರೈಮಾಸಿಕದಲ್ಲಿ 14 ವರ್ಷಗಳಲ್ಲೇ ಅತ್ಯಂತ ಕನಿಷ್ಠ ಹೂಡಿಕೆಯಾಗಿದೆ ಎಂದು ಹೇಳಿದೆ. ಈ ಅವಧಿಯಲ್ಲಿ ಕೇವಲ 1 ಲಕ್ಷ ಕೋಟಿ ರೂಪಾಯಿ ಹಣ ಹೂಡಿಕೆಯಾಗಿದೆ. ಇದು ಸೆಪ್ಟೆಂಬರ್‌ಗೆ ಅಂತ್ಯವಾದ ತ್ರೈಮಾಸಿಕಗಿಂತ ಶೇಕಡಾ 53ರಷ್ಟು ಮತ್ತು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 55ರಷ್ಟು ಕಡಿಮೆ ಎಂದು ಅದು ಹೇಳಿದೆ.

ಪಾತಾಳ ತಲುಪಿರುವ ಹೂಡಿಕೆ.
ಪಾತಾಳ ತಲುಪಿರುವ ಹೂಡಿಕೆ.
/ಲೈವ್‌ಮಿಂಟ್‌

ಖಾಸಗಿ ರಂಗದ ಕಂಪನಿಗಳು ಹೊಸ ಯೋಜನೆಗಳ ಘೋಷಣೆಯನ್ನು ಕಡಿತಗೊಳಿಸಿದ್ದು ಸೆಪ್ಟೆಂಬರ್‌ಗೆ ಹೋಲಿಸಿದರೆ ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಖಾಸಗಿ ಕಂಪನಿಗಳ ಹೊಸ ಯೋಜನೆ ಘೋಷಣೆ ಶೇಕಡಾ 62ರಷ್ಟು ಕಡಿಮೆಯಾಗಿವೆ ಎಂದು ‘ಸಿಎಂಐಇ’ ಹೇಳಿದೆ. ಈ ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಈ ಪ್ರಮಾಣ ಶೇಕಡಾ 64ರಷ್ಟು ಕುಸಿತವಾಗಿದೆ.

ವಿಶೇಷವೆಂದರೆ ಖಾಸಗಿ ಕಂಪನಿಗಳ ಯೋಜನೆಗಳ ಜತೆ ಸರಕಾರದ ಯೋಜನೆಗಳೂ ಹೊರ ಬರುತ್ತಿಲ್ಲ. ಸೆಪ್ಟೆಂಬರ್‌ಗೆ ಹೋಲಿಸಿದರೆ ಶೇಕಡಾ 34ರಷ್ಟು ಕಡಿಮೆ ಯೋಜನೆಗಳನ್ನು ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಸರಕಾರ ಘೋಷಣೆ ಮಾಡಿದೆ. ಕೇವಲ 50,604 ಕೋಟಿ ರೂಪಾಯಿಗಳ ಯೋಜನೆಯನ್ನು ಸರಕಾರ ಘೋಷಿಸುವ ಮೂಲಕ 2004ರ ಡಿಸೆಂಬರ್‌ ನಂತರ ಮೊದಲ ಬಾರಿಕೆ ಕನಿಷ್ಠ ಹೂಡಿಕೆಯನ್ನು ಮಾಡಿದೆ.

ಹೆಚ್ಚು ಕಡಿಮೆ ಎಲ್ಲಾ ಕ್ಷೇತ್ರಗಳ ಹೂಡಿಕೆಯಲ್ಲೂ ಇಳಿಕೆಯಾಗಿರುವುದು ದಾಖಲೆಗಳಲ್ಲಿ ಬಹಿರಂಗಗೊಂಡಿದೆ. ಇದ್ದಿದ್ದರಲ್ಲಿ ನಿರ್ಮಾಣ ವಲಯ ಮಾತ್ರ ಸ್ವಲ್ಪ ಮಟ್ಟಿಗೆ ಹೂಡಿಕೆಯನ್ನು ಕಾಣುತ್ತಿದೆ. ಆದರೆ ಅದಕ್ಕೂ ಕಾರಣವಿದೆ. ನಿರ್ಮಾಣ ವಲಯ ಪೂರ್ತಿ ನೆಲಕ್ಕಚ್ಚಿತ್ತು. ಇದೀಗ ಅದು ನಿಧಾನಕ್ಕೆ ಚೇತರಿಸಿಕೊಳ್ಳುತ್ತಿದೆ.

ದೇಶದ ಉದ್ಯಮ ವಲಯ ಯಾಕೆ ಹೀಗೊಂದು ಸಂಕಷ್ಟದ ಪರಿಸ್ಥಿತಿಗೆ ಬಂತು ಎಂದು ನೋಡಿದರೆ ಅಲ್ಲಿ ಸಮಸ್ಯೆಗಳ ಸರಮಾಲೆಯೇ ತೆರೆದುಕೊಳ್ಳುತ್ತಿದೆ. ಸರಕಾರದ ಮಟ್ಟದಲ್ಲೇ ಸಮಸ್ಯೆಗಳಿರುವುದೂ ಕಂಡು ಬಂದಿದೆ. ವಸೂಲಾಗದ ಸಾಲಗಳು, ಸರಕಾರದ ಅನಿಶ್ಚಿತ ಯೋಜನೆಗಳು, ಸ್ಥಗಿತಗೊಂಡ ಯೋಜನೆಗಳ ಪುನರಾರಂಭಕ್ಕೆ ಕಾನೂನು ಕಟ್ಟಳೆಗಳ ಅಡ್ಡಿಯಿಂದಾಗಿ ಭಾರತದ ಉದ್ಯಮ ವಲಯವೇ ಕಳೆಗುಂದಿದೆ.

ಖಾಸಗಿ ಕ್ಷೇತ್ರದಲ್ಲಿ ಯಾವ ಮಟ್ಟಕ್ಕೆ ಯೋಜನೆಗಳು ಅರ್ಧಕ್ಕೆ ನಿಂತಿವೆ ಎಂದರೆ ಈ ಹಿಂದಿನ ಗರಿಷ್ಠ ಶೇಕಡಾ 24ರ ದಾಖಲೆಗೆ ಸಮೀಪದಲ್ಲಿದೆ. ಖಾಸಗಿ ಸಂಸ್ಥೆಗಳಿಗೆ ಹೋಲಿಸಿದರೆ ಸರಕಾರದ ಶೇಕಡಾ 11ರಷ್ಟು ಯೋಜನೆಗಳಷ್ಟೇ ಅರ್ಧಕ್ಕೆ ಮೊಟಕುಗೊಂಡಿವೆ. ಹೀಗೆ ಅರ್ಧಕ್ಕೆ ನಿಂತ ಯೋಜನೆಗಳಲ್ಲಿ ವಿದ್ಯುತ್‌ ಉತ್ಪಾದನೆ ಮತ್ತು ಉತ್ಪಾದನಾ ಕ್ಷೇತ್ರಗಳ ಉದ್ಯಮಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ. ವಿದ್ಯುತ್‌ ವಲಯದಲ್ಲಿ ಶೇಕಡಾ 35.4 ರಷ್ಟು ಯೋಜನೆಗಳು ಅರ್ಧಕ್ಕೆ ನಿಂತಿದ್ದರೆ, ಉತ್ಪಾದನಾ ಕ್ಷೇತ್ರದಲ್ಲಿ ಈ ಪ್ರಮಾಣ ಶೇಕಡಾ 29.2ಕ್ಕೆ ಏರಿಕೆಯಾಗಿದೆ. ಹಣದ ಕೊರತೆ, ಇಂಧನ ಮತ್ತು ಕಚ್ಛಾ ವಸ್ತುಗಳ ಕೊರತೆ ಹಾಗೂ ಉದ್ಯಮಕ್ಕೆ ಪೂರಕವಲ್ಲದ ವಾತಾವರಣ ಇದಕ್ಕೆ ಕಾರಣವಾಗಿದೆ. ಅದರಲ್ಲೂ ಹಣದ ಕೊರತೆ ಉದ್ಯಮವನ್ನು ಇನ್ನಿಲ್ಲದಂತೆ ಬಾಧಿಸುತ್ತಿದೆ. ಹಣಕಾಸು ಸಂಸ್ಥೆಗಳು ಮತ್ತು ನಿಗಮಗಳಿಂದ ಯೋಜನೆಗಳಿಗೆ ಬೇಕಾದ ಹಣ ಹೊಂದಿಸಲು ಸಾಧ್ಯವಾಗುತ್ತಿಲ್ಲ.

2014ರಲ್ಲಿ ಅಧಿಕಾರಕ್ಕೆ ಬಂದ ಪ್ರಧಾನಿ ನರೇಂದ್ರ ಮೋದಿ ಸರಕಾರಿ ನೀತಿಗಳಲ್ಲಿದ್ದ ಅಡೆತಡೆಗಳ ಯುಗವನ್ನು ಅಂತ್ಯಗೊಳಿಸುವುದಾಗಿ ಹೇಳಿದ್ದರು; ಹೂಡಿಕೆ ಚಕ್ರವನ್ನು ಪುನಶ್ಚೇತನಗೊಳಿಸುವುದಾಗಿ ಭರವಸೆ ನೀಡಿದ್ದರು. ಆದರೆ ನಾಲ್ಕುವರೆ ವರ್ಷಗಳ ನಂತರವೂ ಪರಿಸ್ಥಿತಿ ಸುಧಾರಣೆಯಾಗಿಲ್ಲ. ಜತೆಗೆ ಬಹುಸಂಖ್ಯಾತ ಮನಸ್ಥಿತಿಯ ಬೆಳವಣಿಗೆ ಉದ್ಯಮಕ್ಕೆ ಪೂರಕವಾಗಿಲ್ಲ ಎಂದು ತಜ್ಞರು ಅಂದಾಜಿಸಿದ್ದಾರೆ. ಇದಲ್ಲದೆ ಚುನಾವಣಾ ವರ್ಷವಾಗಿರುವುದರಿಂದ ಹೂಡಿಕೆದಾರರು ಕಾದು ನೋಡುವ ತಂತ್ರಕ್ಕೂ ಮೊರೆ ಹೋಗಿದ್ದಾರೆ. ಈ ಎಲ್ಲಾ ಕಾರಣಗಳಿಂದ ಹೊಸ ವರ್ಷದ ಆರಂಭದಲ್ಲೇ ಒಂದಾದ ಮೇಲೊಂದರಂತೆ ಯೋಜನೆಗಳು ಅರ್ಧಕ್ಕೆ ನಿಲ್ಲುತ್ತಿವೆ. ಪರಿಸ್ಥಿತಿ ಹೀಗಿರುವಾಗ ವರ್ಷಕ್ಕೆ 2 ಕೋಟಿ ಉದ್ಯೋಗ ಸೃಷ್ಟಿ ಸಾಧ್ಯವಾಗುವುದಾದರೂ ಹೇಗೆ?

ಕೃಪೆ: ಲೈವ್‌ ಮಿಂಟ್‌