ಎಡಪಂಥೀಯರಿಗಿಂತ ಬಲಪಂಥೀಯರು ‘ಸುಳ್ಳು ಸುದ್ದಿ’ ಹರಡಲು ಸಂಘಟಿತರಾಗಿದ್ದಾರೆ: ಅಧ್ಯಯನ
COVER STORY

ಎಡಪಂಥೀಯರಿಗಿಂತ ಬಲಪಂಥೀಯರು ‘ಸುಳ್ಳು ಸುದ್ದಿ’ ಹರಡಲು ಸಂಘಟಿತರಾಗಿದ್ದಾರೆ: ಅಧ್ಯಯನ

ಸುಳ್ಳು ಸುದ್ದಿಗಳನ್ನು ಹೆಚ್ಚಿನ ಸಂದರ್ಭದಲ್ಲಿ ಟ್ವಿಟ್ಟರ್ ಮತ್ತು ಪ್ರಧಾನಿ ನರೇಂದ್ರ ಮೋದಿ ಬೆಂಬಲಿತ ಜಾಲಗಳನ್ನು ಉಲ್ಲೇಖಿಸಿ ಹರಡಲಾಗುತ್ತದೆ ಎಂಬುದಾಗಿ ಅಧ್ಯಯನ ತಿಳಿಸಿದೆ.

ಭಾರತದಲ್ಲಿ ವ್ಯಾಪಕವಾಗಿರುವ ‘ಫೇಕ್‌ ನ್ಯೂಸ್‌’ ಅರ್ಥಾತ್ ಸುಳ್ಳು ಸುದ್ದಿಗಳ ಮೂಲಕ್ಕೆ ಅಧ್ಯಯನವೊಂದು ಕನ್ನಡಿ ಹಿಡಿದಿದೆ. ಸುಳ್ಳು ಸುದ್ದಿ ಹರಡುವಿಕೆ ಹಿಂದೆ ‘ರಾಷ್ಟ್ರೀಯತೆ’ ಹೆಚ್ಚಾಗಿ ಕೆಲಸ ಮಾಡುತ್ತಿದೆ ಎಂಬುದಾಗಿ ಜಗತ್ತಿನ ಪ್ರಖ್ಯಾತ ಮಾಧ್ಯಮ ಸಂಸ್ಥೆ ಬಿಬಿಸಿ ಅಧ್ಯಯನ ನಿರೂಪಿಸಿದೆ.

ಸುಳ್ಳು ಸುದ್ದಿಗಳನ್ನು ಹರಡುವಾಗ, ವಿಷಯ- ವಿಚಾರಗಳಿಗಿಂತ; ಭಾವನಾತ್ಮಕ ನೆಲೆಯೇ ಹೆಚ್ಚು ಕೆಲಸ ಮಾಡುತ್ತದೆ ಎಂದು ಅಧ್ಯಯನ ಹೇಳಿದೆ. ಇದರಲ್ಲಿ ರಾಷ್ಟ್ರೀಯತೆಯ ಕೊಡುಗೆಯೇ ಹೆಚ್ಚು ಎಂದು ಹೇಳಿದೆ. ಭಾರತದಲ್ಲಿ ಸಾಮಾಜಿಕ ಮಾಧ್ಯಮಗಳನ್ನು ಬಿಬಿಸಿ ತಜ್ಞರು ಪರಿಶೀಲನೆಗೆ ಒಳಪಡಿಸಿದ್ದು, ಸುಳ್ಳು ಸುದ್ದಿಗಳನ್ನು ಹರಡುವುದರಲ್ಲಿ ಬಲಪಂಥೀಯರು, ಎಡಪಂಥೀಯರಿಗಿಂತ ಹೆಚ್ಚು ಸಂಘಟಿತರಾಗಿದ್ದಾರೆ ಎಂದು ಹೇಳಿದೆ.

ಸುಳ್ಳು ಸುದ್ದಿಗಳನ್ನು ಹೆಚ್ಚಿನ ಸಂದರ್ಭದಲ್ಲಿ, ಟ್ವಿಟ್ಟರ್ ಮತ್ತು ಪ್ರಧಾನಿ ನರೇಂದ್ರ ಮೋದಿ ಬೆಂಬಲಿತ ಜಾಲಗಳನ್ನು ಉಲ್ಲೇಖಿಸಿ ಹರಡಲಾಗುತ್ತದೆ ಎಂಬುದಾಗಿ ಅಧ್ಯಯನ ತಿಳಿಸಿದೆ. ಭಾರತ, ಕೀನ್ಯ ಮತ್ತು ನೈಜೀರಿಯಾ ದೇಶಗಳಲ್ಲಿ ‘ಸುಳ್ಳು ಸುದ್ದಿಗಳನ್ನು ಹರಡುವಲ್ಲಿ ಜನರ ತೊಡಗಿಸಿಕೊಳ್ಳುವಿಕೆ’ ಕುರಿತಾಗಿ ಬಿಬಿಸಿ ಈ ಅಧ್ಯಯನದ ಮುಖ್ಯಾಂಶ ಇದು.

ಅಧ್ಯಯನದಲ್ಲಿ ಭಾಗವಹಿಸಿದವರ ಫೋನ್‌ಗಳನ್ನು ನಿರಂತರ ಏಳು ದಿನಗಳ ಕಾಲ ಬಿಬಿಸಿ ಪರಿಶೀಲನೆಗೆ ಒಳಪಡಿಸಿ ಈ ಸಂಶೋಧನೆಯನ್ನು ನಡೆಸಿದೆ. ಯಾವ ರೀತಿಯ ವಿಷಯ-ವಸ್ತುಗಳನ್ನು ಶೇರ್‌ ಮಾಡುತ್ತಾರೆ, ಯಾರೊಂದಿಗೆ ಶೇರ್‌ ಮಾಡುತ್ತಾರೆ, ಯಾವ ಪ್ರಮಾಣದಲ್ಲಿ ಶೇರ್‌ ಮಾಡುತ್ತಾರೆ ಎಂಬುದನ್ನು ಅಧ್ಯಯನದ ಸಮಯದಲ್ಲಿ ಪರಿಗಣನೆಗೆ ತೆಗೆದುಕೊಳ್ಳಲಾಗಿತ್ತು.

ಮುಖ್ಯವಾಹಿನಿ ಮಾಧ್ಯಮಗಳ ಮೇಲಿನ ಅಪನಂಬಿಕೆ

ಇಂಥಹದ್ದೊಂದು ಸುಳ್ಳು ಸುದ್ದಿ ಹರಡುವಿಕೆಗೆ ಮುಖ್ಯವಾಹಿನಿ ಮಾಧ್ಯಮಗಳ ಮೇಲಿನ ಅಪನಂಬಿಕೆಯೇ ಮೂಲಕ ಕಾರಣ ಎಂದೂ ಸಂಸ್ಥೆ ತಿಳಿಸಿದೆ. ಜನರು ಪರ್ಯಾಯ ಮಾಹಿತಿಯ ಮೂಲಗಳನ್ನು ಕಂಡುಕೊಂಡಿದ್ದು, ಇದನ್ನು ಪರಿಶೀಲನೆಗೆ ಒಳಪಡಿಸದೆ ನಂಬುತ್ತಿದ್ದಾರೆ. ಜತೆಗೆ ನಾವು ನಿಜವಾದ ಸ್ಟೋರಿಯನ್ನು ಹಂಚಿ ಸಹಾಯ ಮಾಡುತ್ತಿದ್ದೇವೆ ಎಂದುಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಈ ಸುಳ್ಳು ಸುದ್ದಿಗಳನ್ನು ಹರಡುವವರು, ‘ನಾವು ಸುಳ್ಳನ್ನು ಪತ್ತೆ ಹಚ್ಚುತ್ತೇವೆ’ ಎಂಬ ಬಗ್ಗೆ ಅತಿಯಾದ ವಿಶ್ವಾಸವನ್ನೂ ಹೊಂದಿರುತ್ತಾರೆ ಎಂದು ಸಂಸ್ಥೆ ಹೇಳಿದೆ.

2018ರ ಹೊತ್ತಿಗೆ ಪ್ರವಾಹದ ರೀತಿಯಲ್ಲಿ ಡಿಜಿಟಲ್‌ ಮಾಹಿತಿಯನ್ನು ಹಂಚಿಕೊಳ್ಳಲಾಗುತ್ತಿದ್ದು, ಪರಿಸ್ಥಿತಿ ಬಿಗುಡಾಯಿಸುತ್ತಿದೆ. ಅಧ್ಯಯನದಲ್ಲಿ ಪಾಲ್ಗೊಂಡವರು ಮಾಹಿತಿಯ ಮೂಲದ ಬಗ್ಗೆಯೂ ಹೆಚ್ಚಾಗಿ ಗಮನ ಹರಿಸುವುದು ಕಂಡು ಬಂದಿಲ್ಲ ಎಂದು ವರದಿ ಆತಂಕವನ್ನೂ ವ್ಯಕ್ತಪಡಿಸಿದೆ. ಫೇಸ್‌ಬುಕ್‌ ಪೋಸ್ಟ್‌ಗೆ ಬಂದ ಕಾಮೆಂಟ್‌ಗಳು, ಅದರಲ್ಲಿರುವ ಚಿತ್ರಗಳು, ಕಳುಹಿಸುವವರ ಚಿತ್ರಗಳು, ವಾಟ್ಸಾಪ್‌ಗೆ ಬಂದಾಗ ಕುಟುಂಬಸ್ಥರು, ಗೆಳೆಯರು ಕಳುಹಿಸಿದ್ದನ್ನೆಲ್ಲಾ ಜನರು ಕುರುಡಾಗಿ ನಂಬುತ್ತಿದ್ದಾರೆ ಎಂದು ಅಧ್ಯಯನದಿಂದ ತಿಳಿದು ಬಂದಿದೆ.

ಈ ರೀತಿ ಸುಳ್ಳು ಸುದ್ದಿಗಳನ್ನು ಹಂಚುವುದು ಹಿಂಸೆಗೂ ನಾಂದಿಯಾಗಿದೆ. ಮಕ್ಕಳ ಕಳ್ಳರ ಬಗ್ಗೆ ಹಬ್ಬಿದ ವಂದಂತಿ ಜೀವಗಳನ್ನೇ ಬಲಿ ಪಡೆದುಕೊಂಡಿದೆ. ಬಿಬಿಸಿಯ ಅಧ್ಯಯನದ ಪ್ರಕಾರನ ಇಲ್ಲಿಯವರೆಗೆ ಈ ರೀತಿ 32 ಜನರು ಸುಳ್ಳು ವದಂತಿಗಳಿಗೆ ಸಾವನ್ನಪ್ಪಿದ್ದಾರೆ.

ಕೀನ್ಯಾ ಮತ್ತು ನೈಜೀರಿಯಾದಲ್ಲೂ ಪರಿಸ್ಥಿತಿ ಭಿನ್ನವಾಗಿಲ್ಲ. ಆದರೆ ಕೀನ್ಯಾದಲ್ಲಿ ಹಗರಣ ಮತ್ತು ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಸುಳ್ಳು ಸುದ್ದಿಗಳು ಹೆಚ್ಚು ಹರಡಿದರೆ ನೈಜೀರಿಯಾದಲ್ಲಿ ಭಯೋತ್ಪಾದನೆ ಮತ್ತು ಸೇನೆಗೆ ಸಂಬಂಧಿಸಿದ ಸುದ್ದಿಗಳು ಹೆಚ್ಚಾಗಿ ಓಡಾಡುತ್ತವೆ. ಎರಡೂ ದೇಶಗಳಲ್ಲಿ ಆರೋಗ್ಯದ ಭಯದ ಬಗ್ಗೆಯೂ ಸುಳ್ಳು ಸುದ್ದಿಗಳು ಹೆಚ್ಚಾಗಿ ಹಂಚಲ್ಪಡುತ್ತವೆ. ಆದರೆ ಭಾರತಕ್ಕೆ ಬಂದಾಗ ಈ ಕೆಲಸ ಸಂಘಟಿತವಾಗಿ ನಡೆಯುತ್ತಿದೆ. ಮತ್ತು ಇದರ ಹಿಂದೆ ರಾಷ್ಟ್ರೀಯತೆ ಎಂಬ ಹುಸಿ ಭಾವನಾತ್ಮಕತೆ ಕೆಲಸ ಮಾಡುತ್ತಿದೆ ಎಂದು ಅಧ್ಯಯನ ಹೇಳಿದೆ. ಅದರ ಸಂಪೂರ್ಣ ವರದಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ.

Join Samachara Official. CLICK HERE