ಮುಖ್ಯಮಂತ್ರಿ ಕನಸನ್ನು ಹಿಂದೆಯೇ ಬಿಟ್ಟು ಹೋದ ಅನಂತ್‌ ಕುಮಾರ್‌; ರಾಜಕೀಯ ಹೆಜ್ಜೆ ಗುರುತುಗಳು
COVER STORY

ಮುಖ್ಯಮಂತ್ರಿ ಕನಸನ್ನು ಹಿಂದೆಯೇ ಬಿಟ್ಟು ಹೋದ ಅನಂತ್‌ ಕುಮಾರ್‌; ರಾಜಕೀಯ ಹೆಜ್ಜೆ ಗುರುತುಗಳು

“ಅನಂತ್‌ ಕುಮಾರ್‌ಗೆ ಮುಖ್ಯಮಂತ್ರಿಯಾಗುವ ಆಸೆ ಇತ್ತು. ಅದೇ ಕಾರಣಕ್ಕೆ ನಾನು ಪಕ್ಷ ಬಿಡಬೇಕಾಯಿತು,” ಎಂದು ಬಿಜೆಪಿ ಬಿಟ್ಟು ಕೆಜೆಪಿ ಕಟ್ಟಿದ್ದ ಯಡಿಯೂರಪ್ಪ ಹಲವು ಬಾರಿ ಆರೋಪಿಸಿದ್ದರು.

ಕರ್ನಾಟಕ ಬಿಜೆಪಿಯ ಪ್ರಮುಖ ನೇತಾರ, ಕೇಂದ್ರ ರಾಸಾಯನಿಕ ಮತ್ತು ರಸಗೊಬ್ಬರ ಖಾತೆ ಸಚಿವ ಅನಂತ್‌ ಕುಮಾರ್‌ ಬೆಂಗಳೂರಿನಲ್ಲಿ ಇಂದು ಬೆಳಿಗ್ಗೆ ನಿಧನರಾಗಿದ್ದಾರೆ. ಬೆಂಗಳೂರು ದಕ್ಷಿಣ ಲೋಕಸಭಾ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದ ಅವರು ಕಳೆದ ಹಲವು ಸಮಯದಿಂದ ಪ್ಯಾಂಕ್ರಿಯಾಟಿಕ್‌ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದರು. ಲಂಡನ್‌, ನ್ಯೂಯಾರ್ಕ್‌ನಲ್ಲಿ ಖಾಯಿಲೆಗೆ ಚಿಕಿತ್ಸೆ ಪಡೆದ ನಂತರ ಅವರು ಬೆಂಗಳೂರಿಗೆ ವಾಪಸಾಗಿ ಬಸವನಗುಡಿಯಲ್ಲಿರುವ ‘ಶ್ರೀ ಶಂಕರ ಕ್ಯಾನ್ಸರ್‌ ಮತ್ತು ಸಂಶೋಧನಾ ಕೇಂದ್ರ’ದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಅವರು ತಮ್ಮ 59ನೇ ವಯಸ್ಸಿನಲ್ಲಿ ಸಾವನ್ನಪ್ಪಿದ್ದಾರೆ.

ಬೆಂಗಳೂರು ಅನಂತ್‌ ಕುಮಾರ್‌ ಅವರ ಹುಟ್ಟೂರು ಹೌದು. ಜುಲೈ 22, 1959ರಲ್ಲಿ ಎಚ್‌.ಎನ್. ನಾರಾಯಣ ಶಾಸ್ತ್ರಿ ಮತ್ತು ಗಿರಿಜಾ ಎನ್‌ ಶಾಸ್ತ್ರಿ ಪುತ್ರರಾಗು ಜನಿಸಿದ ಅವರು ಪ್ರಾಥಮಿಕ ಶಿಕ್ಷಣವನ್ನು ಬೆಂಗಳೂರಿನಲ್ಲಿ ಮುಗಿಸಿರು. ಮುಂದೆ ಉನ್ನತ ವ್ಯಾಸಾಂಗಕ್ಕಾಗಿ ಹುಬ್ಬಳ್ಳಿಯ ಬಸ್ಸು ಹತ್ತಿದರು. ಕೆ.ಎಸ್‌. ಆರ್ಟ್ಸ್‌ ಕಾಲೇಜಿನಿಂದ ಬಿಎ ಪದವಿ ಪಡೆದ ಅವರು ಮುಂದೆ ಕಾನೂನು ಕ್ಷೇತ್ರವನ್ನು ಆಯ್ದುಕೊಂಡು ಜೆಎಸ್ಎಸ್‌ ಕಾಲೇಜಿನಿಂದ ಎಲ್‌ಎಲ್‌ಬಿ ಪದವಿ ಪಡೆದರು.

ಕಾಲೇಜು ದಿನಗಳಲ್ಲೆ ಅನಂತ್‌ ಕುಮಾರ್‌ ಅವರಿಗೆ ರಾಜಕೀಯದೆಡೆಗಿನ ತುಡಿತ ಆರಂಭವಾಗಿತ್ತು. ಪರಿಣಾಮ ವಿದ್ಯಾರ್ಥಿ ಸಂಘಟನೆ ಸೇರಿಕೊಂಡರು. ಬಿಜೆಪಿಯ ವಿದ್ಯಾರ್ಥಿ ಸಂಘಟನೆ ‘ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್‌’ ಅವರ ಕಾರ್ಯಕ್ಷೇತ್ರವಾಯಿತು. 1982ರಿಂದ 85ರವರೆಗೆ ಎಬಿವಿಪಿಯ ಕಾರ್ಯದರ್ಶಿಯಾಗಿ, 85 ರಿಂದ 87ರವರೆಗೆ ಎಬಿವಿಪಿಯ ರಾಷ್ಟ್ರೀಯ ಕಾರ್ಯದರ್ಶಿ ಹುದ್ದೆಗಳನ್ನು ನಿಭಾಯಿಸಿದರು. ಬಳಿಕ ಸಕ್ರಿಯ ರಾಜಕಾರಣಕ್ಕೆ ಧುಮುಕಿದ ಅವರು ಬಿಜೆಪಿ ಸೇರಿಕೊಂಡರು. ಕರ್ನಾಟಕ ಬಿಜೆಪಿಯ ಕಾರ್ಯದರ್ಶಿ, ಪ್ರಧಾನ ಕಾರ್ಯದರ್ಶಿ ಹುದ್ದೆಗಳಿಗೆ ಬಲು ಬೇಗ ಏರಿದರು. ಹೀಗಿರುವಾಗಲೇ ರಾಷ್ಟ್ರ ರಾಜಕಾರಣ ಅವರನ್ನು ಕೈ ಬೀಸಿ ಕರೆಯಿತು.

ದೆಹಲಿ ವಿಮಾನ ಹತ್ತಿದವರೇ 1995ರಲ್ಲಿ ಬಿಜೆಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾದರು. ಮರು ವರ್ಷವೇ 1996ರಲ್ಲಿ ನಡೆದ ಲೋಕಸಭೆ ಚುನಾವಣೆಯಲ್ಲಿ ಮೊದಲ ಬಾರಿಗೆ ಬೆಂಗಳೂರು ದಕ್ಷಿಣ ಲೋಕಸಭಾ ಕ್ಷೇತ್ರದಿಂದ ಸ್ಪರ್ಧಿಸಿದರು. ಮೊದಲ ಯತ್ನದಲ್ಲೇ ಗೆಲುವು ಅವರದಾಗಿತ್ತು. ಅಲ್ಲಿಂದ ಇಲ್ಲಿಯವರೆಗೆ ಸತತ ಆರು ಬಾರಿ ಈ ಕ್ಷೇತ್ರದಿಂದ ಕಣಕ್ಕಿಳಿದು ಗೆದ್ದ ಇತಿಹಾಸ ಅವರದ್ದು.

1998ರಲ್ಲಿ ಎರಡನೇ ಬಾರಿಗೆ ಅವರು ಲೋಕಸಭಾ ಚುನಾವಣೆ ಗೆದ್ದಾಗ ಅವರಿಗೆ ಮಂತ್ರಿಯಾಗುವ ಭಾಗ್ಯ ಒದಗಿ ಬಂತು. 1998ರಲ್ಲಿ ಅಟಲ್‌ ಬಿಹಾರಿ ವಾಜಪೇಯಿ ಸಂಪುಟದಲ್ಲಿ ನೇರ ಕ್ಯಾಬಿನೆಟ್‌ ಸಚಿವರಾಗಿ ಪ್ರಮಾನವಚನ ಸ್ವೀಕರಿಸಿದರು. ವಾಜಪೇಯಿ ಸರಕಾರದಲ್ಲಿದ್ದ ಅತೀ ಕಿರಿಯ ವಯಸ್ಸಿನ ಸಚಿವರು ಅನಂತ್‌ ಕುಮಾರ್‌ ಅವರಾಗಿದ್ದರು. 1999ರಲ್ಲಿ ಮತ್ತೆ ಗೆದ್ದು ಐದು ವರ್ಷಗಳ ಕಾಲ ಸಚಿವರಾಗಿದ್ದರು. 2014ರಲ್ಲಿ ನರೇಂದ್ರ ಮೋದಿ ಸರಕಾರ ಅಧಿಕಾರಕ್ಕೆ ಬರುತ್ತಲೂ ಅವರು ಮೂರನೇ ಬಾರಿ ಸಚಿವರಾದರು. ಹೀಗೆ ಬಿಜೆಪಿ ಕೇಂದ್ರದಲ್ಲಿ ಅಧಿಕಾರಕ್ಕೇರಿದ ಮೂರು ಬಾರಿ ಗೂಟದ ಕಾರು ಹತ್ತಿದ ಹೆಗ್ಗಳಿಕೆ ಅವರದ್ದು.

ವಾಜಪೇಯಿ ಸಂಪುಟದ ಕಿರಿಯ ಸಚಿವರಾಗಿದ್ದಾಗ ಅನಂತ್‌ ಕುಮಾರ್‌.
ವಾಜಪೇಯಿ ಸಂಪುಟದ ಕಿರಿಯ ಸಚಿವರಾಗಿದ್ದಾಗ ಅನಂತ್‌ ಕುಮಾರ್‌.
/ಡೆಕ್ಕನ್‌ ಹೆರಾಲ್ಡ್‌

ಕರ್ನಾಟಕದ ಬಿಜೆಪಿಯ ಮಟ್ಟಿಗೆ ಯಡಿಯೂರಪ್ಪ ರಾಜ್ಯಕ್ಕೆ, ಕೇಂದ್ರಕ್ಕೆ ಅನಂತ್‌ ಕುಮಾರ್ ಎಂಬುದು ಜನಜನಿತವಾಗಿತ್ತು. ಬೆಂಗಳೂರು ಮತ್ತು ದೆಹಲಿ ನಡುವೆ ಬಿಜೆಪಿಯ ಸಂಪರ್ಕ ಸೇತುವಾಗಿದ್ದರು ಅವರು. ಅವರು ಅಧ್ಯಕ್ಷರಾಗಿದ್ದ ಅವಧಿಯಲ್ಲಿ 2004ರಲ್ಲಿ ರಾಜ್ಯದಲ್ಲಿ ಮೊದಲ ಬಾರಿಗೆ ಬಿಜೆಪಿ ಪಕ್ಷ ಅತೀ ಹೆಚ್ಚಿನ ಸ್ಥಾನಗಳನ್ನು ಗಳಿಸಿತ್ತು. 2008ರಲ್ಲಿ ಬಿಜೆಪಿ ಕರ್ನಾಟಕದಲ್ಲಿ ಅಧಿಕಾರಕ್ಕೆ ಬರುತ್ತಲೂ ಅನಂತ್‌ ಕುಮಾರ್ ಶಕ್ತಿ ಕೇಂದ್ರವಾಗಿ ಬದಲಾಗಿದ್ದರು. ಪರಿಣಾಮ ಮುಂದಿನ ಹಲವು ವರ್ಷ ಕರ್ನಾಟಕ ಬಿಜೆಪಿಯ ‘ಜೋಡಿ ಎತ್ತು’ಗಳಂತಿದ್ದ ಯಡಿಯೂರಪ್ಪ ಮತ್ತು ಅನಂತ್‌ ಕುಮಾರ್‌ ನಡುವೆ ಶೀತಲ ಸಮರ ಹತ್ತಿಕೊಂಡಿತು.

“ಅನಂತ್‌ ಕುಮಾರ್‌ಗೆ ಮುಖ್ಯಮಂತ್ರಿಯಾಗುವ ಆಸೆ ಇತ್ತು. ಅದೇ ಕಾರಣಕ್ಕೆ ನಾನು ಪಕ್ಷ ಬಿಡಬೇಕಾಯಿತು,” ಎಂದು ಅಂದು ಬಿಜೆಪಿ ಬಿಟ್ಟು ಕೆಜೆಪಿ ಕಟ್ಟಿದ್ದ ಯಡಿಯೂರಪ್ಪ ಹೇಳಿದ್ದರು. ಅವತ್ತು ಅನಂತ್‌ ಕುಮಾರ್‌ ಬಿಜೆಪಿಯ ಮೇರು ನಾಯಕ ಎಲ್‌.ಕೆ. ಅಡ್ವಾಣಿ ಪಾಳಯದಲ್ಲಿ ಗುರುತಿಸಿಕೊಂಡಿದ್ದರು. ಅಡ್ವಾಣಿ ಮಾನಸ ಪುತ್ರ ಎನ್ನುವಷ್ಟರ ಮಟ್ಟಿಗೆ ಹೈಕಮಾಂಡ್‌ಗೆ ಆಪ್ತರಾಗಿದ್ದರು. ಈ ಕಾರಣಕ್ಕೆ ನರೇಂದ್ರ ಮೋದಿ ಅಧಿಕಾರಕ್ಕೆ ಬಂದಾಗ ಅನಂತ್‌ ಕುಮಾರ್‌ ಅವರಿಗೆ ಪ್ರಮುಖ ಖಾತೆ ದಕ್ಕಿರಲಿಲ್ಲ. ಹಲವು ಬಾರಿ ಗೊಬ್ಬರ ಖಾತೆ ಸಚಿವ ಎಂದು ಅವರು ಲೇವಡಿಗೂ ಗುರಿಯಾಗಬೇಕಾಯಿತು.

ಬಿಜೆಪಿಯ ಹಿರಿಯ ನಾಯಕ ಎಲ್‌. ಕೆ. ಅಡ್ವಾಣಿಯ ಮಾನಸ ಪುತ್ರ ಎಂಬ ಹೆಸರು ಅನಂತ್‌ ಕುಮಾರ್‌ ಅವರಿಗಿತ್ತು. 
ಬಿಜೆಪಿಯ ಹಿರಿಯ ನಾಯಕ ಎಲ್‌. ಕೆ. ಅಡ್ವಾಣಿಯ ಮಾನಸ ಪುತ್ರ ಎಂಬ ಹೆಸರು ಅನಂತ್‌ ಕುಮಾರ್‌ ಅವರಿಗಿತ್ತು. 
/ಮನೋರಮಾ ಆನ್‌ಲೈನ್‌

ಆದರೆ ಇದು ಅನಂತ್‌ ಕುಮಾರ್‌ ಅವರಿಗೆ ಹೊಸದೇನೂ ಆಗಿರಲಿಲ್ಲ. ಅವರನ್ನು ಬಿಜೆಪಿಯಲ್ಲೇ ವಿರೋಧಿಸುವ, ಟೀಕಿಸುವ ಒಂದು ವರ್ಗ ಅವತ್ತಿಗೂ ಇತ್ತು. ಇವತ್ತಿಗೂ ಇದೆ. ಕಮಲ ಗುರುತು ಬಿಟ್ಟು ನಿಂತರೆ ಅವರು ಸ್ಥಳೀಯ ಸಂಸ್ಥೆ ಚುನಾವಣೆಯನ್ನು ಗೆಲ್ಲುವುದಿಲ್ಲ ಎಂದು ಹಲವರು ಅವರನ್ನು ಬಹಿರಂಗವಾಗಿಯೇ ಟೀಕಿಸಿದ್ದರು.

ಇದೇ ಅನಂತ್‌ ಕುಮಾರ್ ಹೆಸರು ಹುಡ್ಕೋ ಹಗರಣದಲ್ಲಿ ಕೇಳಿ ಬಂದಿತ್ತು. 14 ಸಾವಿರ ಕೋಟಿ ರೂ. ಹುಡ್ಕೋ ಹಗರಣದಲ್ಲಿ ಅವರು ಶಾಮೀಲಾಗಿದ್ದಾರೆ ಎಂಬ ಗಂಭೀರ ಆರೋಪಗಳಿಗೆ ಅವರು ಗುರಿಯಾಗಿದ್ದರು. ಈ ಕುರಿತು ಶ್ರೀರಾಮ ಸೇನೆ ಮುಖ್ಯಸ್ಥ ಪ್ರಮೋದ್‌ ಮುತಾಲಿಕ್‌ 'ಅನಂತನ ಅವಾಂತರ' ಎಂಬ ಪುಸ್ತಕವನ್ನೂ ಬಿಡುಗಡೆಗೊಳಿಸಿದ್ದರು. ಇದರಲ್ಲಿ ನೀರಾ ರಾಡಿಯಾ ಟೇಪ್ ಹಗರಣ ಸೇರಿ 18 ಆರೋಪಗಳನ್ನು ‘ಸಜ್ಜನ ರಾಜಕಾರಣಿ’ ಅನಂತ್‌ ಕುಮಾರ್‌ ವಿರುದ್ಧ ಹೊರಿಸಲಾಗಿತ್ತು. ಬೆಂಗಳೂರಿನ ಪಂಚತಾರಾ ಹೋಟೆಲ್ ಅಶೋಕ ಡೀಲ್ ನಲ್ಲಿ 'ಒಳ್ಳೆ ಡೀಲ್' ಮಾಡಿದ್ದಾರೆ ಎಂದು ಮಾಜಿ ಬಿಜೆಪಿ ನಾಯಕ ವಿ. ಧನಂಜಯ್‌ ಕುಮಾರ್‌ ಆರೋಪಗಳನ್ನು ಮಾಡಿದ್ದರು.

ಹೀಗಿದ್ದೂ, ಅನಂತ್‌ ಕುಮಾರ್‌ ಕೆಟ್ಟ ಕಾರಣಗಳಿಗೆ ಸುದ್ದಿಗೆ ಗ್ರಾಸವಾದ ಉದಾಹರಣೆಗಳು ಕಡಿಮೆ. ಅದಕ್ಕೆ ಅವರು ಮೀಡಿಯಾಗಳನ್ನು ಚೆನ್ನಾಗಿ ಮ್ಯಾನೇಜ್‌ ಮಾಡುತ್ತಾರೆ ಎಂಬ ಮಾತುಗಳು ಮಾಧ್ಯಮ ವಲಯದಲ್ಲಿ ಚಾಲ್ತಿಯಲ್ಲಿದ್ದವು.

ವೇದಿಕೆ ಮೇಲೆ ಸಿಹಿ ಹಂಚಿಕೊಂಡು, ಹಿಂದೆ ಪರಸ್ಪರ ಕತ್ತಿ ಮಸೆಯುತ್ತಲೇ ಇದ್ದ ಕರ್ನಾಟಕ ಬಿಜೆಪಿಯ ಎರಡು ಧ್ರುವಗಳು; ಅನಂತ್‌ ಕುಮಾರ್‌ - ಬಿ.ಎಸ್. ಯಡಿಯೂರಪ್ಪ. 
ವೇದಿಕೆ ಮೇಲೆ ಸಿಹಿ ಹಂಚಿಕೊಂಡು, ಹಿಂದೆ ಪರಸ್ಪರ ಕತ್ತಿ ಮಸೆಯುತ್ತಲೇ ಇದ್ದ ಕರ್ನಾಟಕ ಬಿಜೆಪಿಯ ಎರಡು ಧ್ರುವಗಳು; ಅನಂತ್‌ ಕುಮಾರ್‌ - ಬಿ.ಎಸ್. ಯಡಿಯೂರಪ್ಪ. 
/ದಿ ನ್ಯೂಸ್‌ ಮಿನಿಟ್‌

ಇದರಾಚೆಗೆ ಯಡಿಯೂರಪ್ಪ ಬಿಜೆಪಿಗೆ ವಾಪಸ್‌ ಬಂದ ಬಳಿಕ ಇತ್ತೀಚೆಗೆ ಅವರು ತಮ್ಮ ಹಳೆಯ ಚಾರ್ಮ್ ಕಳೆದುಕೊಂಡು ಒಂದರ್ಥದಲ್ಲಿ ತೆರೆಮರೆಗೆ ಸರಿದಿದ್ದರು. ತಮ್ಮ ‘ಅದಮ್ಯ ಚೇತನ’ವೇ ಅವರಿಗೆ ಬದುಕಾಗಿತ್ತು. ಈ ಸರಕಾರೇತರ ಸಂಸ್ಥೆ ಕರ್ನಾಟಕ ಮತ್ತು ರಾಜಸ್ಥಾನದ ಜೋಧಪುರದಲ್ಲಿ ಶಾಲಾ ಮಕ್ಕಳಿಗೆ ಮಧ್ಯಾಹ್ನದ ಬಿಸಿಯೂಟಗಳನ್ನು ನೀಡುತ್ತಾ ಬಂದಿದೆ. ಸಂಸ್ಥೆಯ ವತಿಯಿಂದ ಪ್ರತಿ ಭಾನುವಾರ ಹಮ್ಮಿಕೊಳ್ಳಲಾಗುತ್ತಿದ್ದ ‘ಹಸಿರು ಭಾನುವಾರ’ ಕಾರ್ಯಕ್ರಮಕ್ಕೆ ಅನಂತ್‌ ಕುಮಾರ್‌ ತಪ್ಪದೇ ಹಾಜರಾಗುತ್ತಿದ್ದರು. ಗಿಡದ ಬುಡಕ್ಕೆ ಮಣ್ಣು ಒಟ್ಟು ಮಾಡಿ ನೀರು ಹಾಕುವಷ್ಟು ಕ್ಯಾಬಿನೆಟ್‌ ಸಚಿವರು ಬಿಡುವಾಗಿದ್ದರು.

ಇಂಥಹ ಅನಂತ್‌ ಕುಮಾರ್‌ ಇನ್ನು ನೆನಪು ಮಾತ್ರ.

Join Samachara Official. CLICK HERE